Договорот од Преспа – Kurir.mk

Указот и „Договорот од Преспа ” на дневен ред на седница на Уставниот суд

Ивана Ефремовски — Thu, 21 Sep 2023 06:57:40 +0000

Предметот во кој е оспорен Указот и „Договорот од Преспа" ќе се дискутира денеска на седница на Уставен суд. Од Уставниот суд информираат дека предметот е формиран од иницијативите поднесени од Тодор Петров, претседател на Светски Македонски Конгрес, Ивица Ефремов и Стив Ангеловски од Битола, Солза Грчева и Томе Тодоровски. - Со одредени наводи во иницијативите се тврди дека Указот за прогласување на Законот за ратификација на Конечната спогодба не е потпишан од претседателот на Република Македонија, што го прави тој акт спротивен со членот 51 од Уставот. Се тврди дека оспорените акти го нарушуваат владеењето на правото, наведено е во дел од иницијативите дека претседателот на Собранието на Република Македонија немал надлежност да утврдува одговорност дека претседателот на Републиката го кршел Уставот со непотпишување и во дадената ситуација, претседателот на државата не бил спречен да ја врши функцијата, за да биде заменет од страна на претседателот на Собранието, односно да го потпише Указот, со што се наведува дека е повреден и членот 82 од Уставот. Бидејќи претседателот на Републиката не го потпишал Указот, се наведува дека оспорениот закон не важи и не може да произведува правно дејство, односно објавување на Законот без потпис на претседателот на Република Македонија е грубо кршење на Уставот, се вели во соопштението од Уставен суд. Во дел од иницијативите, посочуваат од Уставен, подносителите тврдат дека Спогодбата е ништовна бидејќи била во спротивност со меѓународното право на самоопределување на народите, правото на секој народ да избере свое име, идентитет, свои национални обележја, симболи и др. и во спротивност со Виенската конвенција за договорно право. Предмет е формиран од иницијативите У.бр.8/2019, У.бр.16/2019, У.бр.26/2019, У.бр.40/2019 и У.бр.47/2019, со кои, како што информираат од Уставен суд, оспорени се Указот за прогласувањe на Законот за ратификација на Конечната спогодба за решавање на разликите опишани во резолуциите 817(1993) и 845(1993) на Советот за безбедност на Обединетите нации, за престанување на важноста на Привремената спогодба од 1995 година и за воспоставување на стратешко партнерство меѓу страните, бр.08-3866/1 од 05.07.2018 година („Службен весник на Република Македонија” бр.7/2019) и Законот за ратификација на Конечната спогодба за решавање на разликите опишани во резолуциите 817(1993) и 848(1993) на Советот за безбедност на Обединети Нации, за престанување на важноста на Примената спогодба од 1995 година и за воспоставување на стратешко партнерство меѓу страните („Службен весник на Република Македонија” бр.7/2019). (МИА)

Поп завршил со лопата во глава!

Тале Кристо — Mon, 18 Jan 2021 15:16:51 +0000

Несекојдневен инцидент се случил во албанскиот град Лежа, каде градежен работник физички го нападнал локалниот православен свештеник Кочо Капедани (80). Освен на социјалните мрежи видео запис и фотографии од инцидентот пренесуваат и албанските медуми, кои додават дека по вербална расправија изнервиран работник со лопата го удира стариот свештеник по грбот и главата. -Бев дома. Багерот дојде и јас се спуштив долу од куќата. Му реков на работникот да не удираат силно бидејќи се оштетени sидовите од мојата куќа. Работникот лопатата ја имаше во раката, а јас го имав стапот со кој слегував по скалите. Ме фати за рака и ме удри. Паднав во несвест. Потоа дојде полицијата и потоа не придружуваше до полициската станица. Полицијата не зазеде правилен став. Револтиран сум. Ми рекоа: прости му, изјавил Капедани за медиумите. Додава дека има сериозни видливи повреди на десното око од ударот на работникот на компанија што гради пат во населбата „Гура“. Претставник на Православната црква во Лежа, најавил дека, попот Капедани покрај тоа што го тужи насилникот, ќе поднесе обвинение и против полицијата од овој албански град, бидејќи наместо да го санкционира насилникот, полицајците се обиделе да го натераат да му прости.

Варвициотис: За европската перспектива на соседната земја потребно е исполнување на обврските од Договорот од Преспа

Ивана Ефремовски — Tue, 17 Sep 2019 07:59:41 +0000

Исполнување на обврските од Договорот од Преспа, напуштање на секаков иредентистички елемент и почитување на владеењето на правото, се точките на кои, според грчкото МНР, се осврнал алтернативниот министер за надворешни работи на Грција, Милтиадис Варвициотис, говорејќи за европската перспектива на нашата земја за време на состанокот на Советот за општи прашања во Брисел, jави дописничката на МИА од Атина. Како што соопштуваат од Министерството за надворешни работи на Грција, на состанокот на кој главна тема била подготовката за Европскиот совет на 17 и 18 октомври, Варвициотис посебно се осврнал на спроведувањето на Договорот од Преспа, истакнувајќи дека за Грција да ја поддржи интегративната перспектива на северниот сосед, „услов од кој не се отстапува е веднаш да се исполнат обврските што произлегуваат од потпишувањето на договорот, а се однесуваат на усогласеност со уставните промени што беа усвоени, целосно напуштање на било кој елемент на иредентизам и почитување на владеењето на правото“. -Во подготовките за следниот Европски совет, на агендата беа ставени одредени теми што многу се однесуваат на Грција. Првото е проширувањето со земјите од Западен Балкан и во однос на тоа побаравме нашите соседи да го почитуваат владеењето на правото, правилата на добрососедство и секако, да им служат на договорите што ги имаат потпишано, како што е Договорот од Преспа, рече Варвициотис по завршувањето на состанокот. Алтернативниот шеф на грчката дипломатија, во однос на проширувањето на унијата, истакнал дека Грција ја поддржува европската перспектива на земјите од Западен Балкан, но под поставените предуслови. Во однос на Албанија, рекол дека услов е земјата да ги исполни во целост петте приоритети поставени од унијата и да даде особено значење на правата на грчкото национално малцинство. Во обраќањето на вчерашниот состанок, Варвициотис истакнал дека Грција го поддржува барањето на Кипар, на следниот Европски совет да се разгледа и прашањето со турските прекршувања и ескалацијата на нелегалните активности во Источниот Медитеран. -Го поставивме прашањето за турската провокација, како во однос на прекршувањата на суверенитетот на Кипар, така и за заканите со кои се соочува нашата земја во бегалското прашање. И, секако, ја поставивме и побарувачката рамка преку која Грција доаѓа да бара дел од растот на Европа, во следната повеќегодишна финансиска рамка. Грција престана да биде земја која бара помош. Она што го бара е правото и можноста да се развие за да го постигне ритамот на развој и животниот стандард што го имаше пред кризата, рече Варвициотис по вчерашниот состанок. (МИА)

Авлонитис: Може да извезувате вино во странство, ама не како „македонско“

Ивана Ефремовски — Thu, 28 Feb 2019 08:27:16 +0000

Комисијата за трговските ознаки меѓу Македонија и Грција што треба да се формира во текот на оваа година, согласно Договорот од Преспа, предвидува дијалог меѓу бизнис заедниците, а не билатерален меѓудржавен дијалог, рече генералниот секретар за трговија и заштита на потрошувачи од Министерството за економија и развој на Грција, Димитрис Авлонитис на информативната средба со новинарите за трговските ознаки во рамките на Договорот од Преспа, јави дописничката на МИА од Атина. Тој објасни дека претставници на бизнис заедниците од двете земји, прво ќе се сретнат, за да ја регистрираат актуелната ситуација, да видат дали постојат проблеми, а потоа да најдат заемно прифатливи решенија за употребата на географските термини во трговските ознаки . „Треба да потенцираме дека договорот е целосно компатибилен со европските и меѓународните правила за регистрација на трговска сопственост и имиња, односно не вметнува никаква отстапува ниту од меѓународното право и Договорот од Мадрид ниту од европското право кое е во надлежност на Европската канцеларија за интелектуална сопственост“, рече Авлонитис. На средбата со новинарите, генералниот секретар за трговија и заштита на потрошувачи истакна дека во Европската канцеларија за регистрација на трговски ознаки, регистрирани се вкупно 19 грчки трговски ознаки што го содржат терминот „Македонија” или „македонско/а/и”, додека пак од нашата земја нема ниту едно барање за регистрација. Меѓу 19 различни обезбедени ознаки, неодамна била регистрирана е и „Македонската новинска агенција“, односно делот од грчката новинска агенција со седиште во Солун. На прашањето на дописничката на МИА од Атина, дали регистрирањата биле по Договорот од Преспа, генералниот секретар објасни дека оваа бројка е вкупна, неповрзана со решението меѓу двете земји и не се забележува никаква посебна раздвиженост поради договорот. „Тоа што бројот на регистрирања е мал не е ниту добро, ниту лошо. Станува збор за избор на бизнисмените и нема да ги стави во неповолна положба грчките бизниси“, истакна Авлонитис. Одговарајќи на новинарски прашања, за два производи со исто име, на пример „македонска салца” што се продаваат во супер-маркет во Германија, а на едниот пишува произведено во Грција, на другиот, произведено во Северна Македонија, Авлонитис рече дека не постои никаков проблем во конкретниот случај. На прашањето на дописничката на МИА од Атина, доколку двајца различни производители од двете земји имаат иста трговска ознака на нивниот производ што сакаат да го извезат во странство, како на пример „македонско вино”, Авлонитис објасни дека во тој случај, извоз може да има, но компанијата од Северна Македонија, нема да може да го регистрира на европско ниво производот под таа трговска ознака, бидејќи станува збор за грчки производ со заштитено име на потекло. „Може да извезувате, но нема да можете да можете да го регистрирате“, рече генералниот секретар за трговија и заштита на потрошувачи и објасни дека едно е извозот, а друго е регистрацијата, додека пак за конкретниот пример за „македонското вино“, не може да се регистрира трговска ознака под ова име. Димитрис Авлонитис, на информативната средба со новинарите истакна дека Договорот од Преспа создава динамика за отворање канали на комуникација, дополнителни мерки за градење доверба и можност за соработка на бизнис заедниците од двете земји. Паралелно, тој повика на смиреност и им препорача на грчките бизнисмени да ја следат трговската стратегија што се користи до сега и ако сметаат дека треба да се регистрира нивниот производ, да го сторат тоа. Авлонитис ги отфрли шпекулациите и информациите дека договорот дава можност за тужби за трговските ознаки. „Би поставил и јас едно прашање, некој да ми одговори. Во кој суд би била тужбата и врз основа на која законска рамка“, рече генералниот секретар за трговија и заштита на потрошувачи од Министерството за економија и развој на Грција, Димитрис Авлонитис на информативната средба со новинарите за трговските ознаки во рамките на Договорот од Преспа. Комисијата за трговските ознаки, согласно Договорот од Преспа, треба да се формира во текот на 2019 и ќе ја заврши нејзината работа во рок од три години. (МИА)

Мицотакис по ратификацијата на Договорот од Преспа: Денес е тежок и тажен ден

Ивана Ефремовски — Fri, 25 Jan 2019 15:28:39 +0000

Претседателот на Нова Демократија, Киријакос Мицотакис, по ратификацијата на Преспанскиот договор во Парламентот во Грција изјави дека денешниот ден е тажен и тежок. -Денеска е тежок и тажен ден за Грција, изјави Мицотакис. Преспанскиот договор е усвоен во грчкиот Парламент со 153 гласа „за“, наспроти 146 гласа „против“. Тој од почеток беше жесток критичар на Договорот од Преспа.

Мицотакис: Каменос e соучесник на Ципрас по Преспа

Ивана Ефремовски — Wed, 09 Jan 2019 17:05:56 +0000

Панос Каменос требаше пред неколку месеци да си замине од Владата, доколку навистина сакаше да го спречи Договорот од Преспа. Со тоа што остана во Владата, му го даде пенкалото на Алексис Ципрас да потпише, а според тоа е целосно одговорен и самиот тој, рече претседателот на Нова демократија, говорејќи на политичкиот комитет на партијата, јави дописничката на МИА од Атина. Кирјакос Мицотакис упати остри критики до актуелната Влада и до Панос Каменос по најавите дека тој веројатно ќе се повлече од коалицијата поради Договорот од Преспа. – Треба да говориме за соучество, бидејќи господинот Каменос е соучесник на господинот Ципрас после Преспа. Штом не се согласуваше, требаше уште од тогаш да си замине. Но, наместо него, од владата си замина архитектот на Договорот од Преспа, поранешниот министер за надворешни работи, господинот Коѕијас, рече Мицотакис коментирајќи дека оставката дошла на „владина седница без преседан со меѓусебни обвинувања за поткуп и употреба тајни фондови“. Лидерот на Нова демократија истакна дека последните сценарија и шпекулации за малцинска Влада до изборите на есен „претставуваат невиден прекршок на демократскиот поредок“. – Во демократијата не постои скриено или тајно мнозинство. Премиерот треба или да побара гласање доверба, за да видиме кои и колкумина го поддржуваат или да ја одведе земјата на избори, како што наметнува демократскиот легитимитет, порача претседателот на Нова демократија. Мицотакис рече дека тоа што во изминатите денови се случува во земјата е без преседан, „коалициските партнери да најавуваат средби и интервјуа кои потоа ги откажуваат или презакажуваат, претворајќи ја земјата во реално шоу“. (МИА)

Каменос: Договорот од Преспа е мртов, ние не прифаќаме решение со терминот Македонија

Ивана Ефремовски — Wed, 12 Dec 2018 11:27:52 +0000

Не прифаќаме решение што го содржи терминот Македонија и ако дојде време да се разделат нашите патишта, ќе се разделат, рече претседтелот на Независни Грци, министер за одбрана и коалиционен партнер во грчката влада, Панос Каменос, на седницата за законот за поништување на одредбите за кратење на пензиите. Тој, говореше за Договорот од Преспа, за кој рече дека е мртов, ги спомена изјавите на македонскиот премиер, но и за соработката со СИРИЗА, јави дописничката на МИА од Атина. -Договорот од Преспа е мртов. Мртов е бидејќи самиот господин Заев и покрај сите напори од грчка страна да се најде решение, со неговите континуирани изјави, го негира самиот договор. Освен ако нема направен друг договор, под маса, со Коѕијас. Тоа треба да го каже јавно. Но, ние не знаеме таков договор, рече коалицискио партнер во грчката Влада, говорејќи од парламентот. Каменос ја повтори позицијата дека нема да гласаат за ратификација на Договорот од Преспа и ќе ја напуштат владата. -Ако владата на Скопје продолжи со политиката што ја следи денес, односно да говори за политика што вклучува македонска националност или македонски јазик или уште повеќе, ако говори за македонско малцинство во земјата, овој договор не може никогаш да дојде, од ниту една влада за гласање во грчкиот Парламент. Но, доколку, од било која причина дојде во грчкиот Парламент, јасно изјавуваме дека Независни Грци си заминуваме од владата и од владиното мнозинство, рече Каменос и му се обрати на лидерот на Нова демократија, Киријакос Мицотакис, прашувајќи го дали го прифаќа името Северна Македонија и дали доколку се ратификува договорот, ќе го поништи кога ќе дојде на власт. Лидерот на Независни Грци, не испушти да го спомене неговиот став дека за да се донесе било каква одлука, потребно е претседателот да свика лидерска средба, бидејќи “последната донесена одлука е од средбата на Константинос Караманлис со претседателите на партиите и оваа одлука има уставна важност”. (МИА)

Мицотакис: Нема да го поддржиме Договорот од Преспа

Ивана Ефремовски — Fri, 26 Oct 2018 13:33:28 +0000

Лидерот на грчката опозициска Нова демократија, Кирјакос Мицотакис, уште еднаш, овој пат од Солун, го повтори ставот дека нема да го поддржи Договорот од Преспа. Во Солун тој присуствуваше на свеченостите по повод годишнината од ослободувањето на градот. Како што јави дописничката на МИА од Атина, Мицотакис, уште еднаш истакна дека тие не можат да поддржат договор што отстапува македонски јазик и македонска националност. -Секако од овде, од нашата Македонија, имаме и еден долг повеќе да се посетиме на славните страници од нашата историја. Бидејќи почнува реализацијата на настани што се на товар на националните интереси, повторно да потсетиме дека ние како Нова демократија нема да поддржиме никаков договор што отстапува македонски јазик и македонска националност на нашите соседи, рече Мицотакис од Солун.