Дојран – Kurir.mk

Најстудено во Берово, најтопло во Дојран

Ивана Ефремовски — Mon, 30 Oct 2023 06:41:10 +0000

Во Берово утрово е најстудено - еден степен, а најтопло е во Дојран, 12 степени. Како што соопшти Управата за хидрометеоролошки работи (УХМР), до 7:30 часот два степени се измерени во Лазарополе, три во Битола, четири во Струмица, Тетово и во Маврови Анови, пет во Скопје - Петровец и во Демир Капија, шест во Прилеп, Велес, Куманово, Штип, Крива Паланка, Претор и Попова Шапка. Седум степени се измерени во Скопје - Зајчев Рид, Охрид, Кавадарци, Гевгелија, а девет во Крушево и во Виница. Во текот на ноќта и изутринава времето беше ведро со слаб променлив ветер. Утрово е сончево и свежо. Времето денеска ќе биде сончево со слаб ветер од јужен правец. Максималната температура ќе биде во интервал од 20 до 27 степени. Во Скопје сончево со слаб променлив ветер. Максималната температура ќе достигне 24 степени.

Летово во Дојран се остварени околу 100.000 ноќевања, наплатата на туристичката такса незадоволителна

Ивана Ефремовски — Sat, 23 Sep 2023 11:25:40 +0000

На крајот на оваа туристичка сезона се остварени околу 100 илјади ноќевања, но точниот број не може да се утрврди бидејќи наплатата на туристичката такса не е целосно реализирана зашто таа е показател за точниот број на туристите, смета градоначалникот на Дојран, Анго Ангов. Општината е задоволна од посетеноста на Дојран, но како општина се стремат за развој на туризмот преку целата година. -За таа цел презедовме низа мерки како што се санација на стари објекти со кои се збогатува туристичката понуда и привлекување на туристи надвор од летната сезона. Овие денови заедно со Центарот за развој на Југоисточниот плански регион реализиравме проект за набавка на 20 електрични велосипеди, смарт табли и други активности кои ќе значат промоција и посета на Фронтовската линија од Првата светска војна за да станеме поатрактивни. Формиравме и ново претпријатие кое ќе организира тури до Фронтовската линија и првпат ќе се посетуваат Турската бања и Саат-кулата кои се историски споменции и се обновени по 115 години од нивното разурнување, вели Ангов. За зголемувањето на наплатата на туристичката такса, Општината организирала повеќе настани на кои на туристичките работници и издавачите на соби им било укажано дека со собирањето на овие средства се збогатува туристичката понуда и тие средства повторно се враќаат. Ангов смета дека и покрај тоа не е подигната свеста за плаќање на туристичката такса. Најавува дека во наредниот период ќе се засилат контролите за да може да се собира туристичката такса. (МИА)

Пожарот меѓу Богданци и Дојран ставен под контрола

Тале Кристо — Thu, 31 Aug 2023 18:06:37 +0000

Пожарот меѓу Богданци и Дојран, кој избувна денеска на пладне на планината Карабалија, во атарот на селото Селемли, во близина на границата со Грција, е локализиран и е ставен под контрола, но се уште не е целосно изгаснат. Според директорот на Центарот за управување со кризи (ЦУК) Стојанче Ангелов, кој е на местото на пожарот, со дејствување на двата авиони „Ер трактор“ на Дирекцијата за заштита и спасување (ДСЗ), но и на пожарникарите од Гевгелија и Дојран, спречено е проширување на пожарот. - Се повлековме. Локализираниот пожар ќе го следиме зашто постои можност од негово активирање доколку ветрот го промени правецот, изјави Ангелов. Како што рече тој во последната видео изјава од местото на пожарот во прилог на гаснењето е и ветрот кој го насочуваше огнот кон изгорените делови. Ангелов информираше дека големиот пожар е на линијата на фронтот од Првата светска војна и досега се слушнале повеќе детонации од експлозивни направи и истрели од куршуми од голем калибар.

Пожарот меѓу Богданци и Дојран делумно ставен под контрола

Тале Кристо — Thu, 31 Aug 2023 16:38:51 +0000

Делумно е ставен под контрола пожарот меѓу Богданци и Дојран што избувна денеска на пладне на планината Карабалија, во атарот на селото Селемли, во близина на границата со Грција. Како што изјави директорот на Центарот за управување со кризи (ЦУК), Стојанче Ангелов, горат уште два краци. -Со дејствување на двата авиона „Ер трактор“ на Дирекцијата за заштита и спасување (ДСЗ), но и на локалните пожарникари од Гевгелија и Дојран, спречено е проширување на пожарот кон полето, рече Ангелов. Според него, големиот пожар е на линијата на фронтот од Првата светска војна и досега се слушнале дваесетина детонации од експлозивни направи и истрели од куршуми од голем калибар. -Тоа го усложнува гаснењето на пожарот, бидејќи ја загрозува безбедноста на пожарникарите, но и на леталата. Авионите пристапуваат внимателно и исфрлаат вода од повисоко, додаде Ангелов. Во прилог на гаснењето на пожарот оди и ветрот кој го насочува огнот кон изгорените делови и, според директорот на ЦУК, има можност во наредните неколку часа пожарот целосно да биде локализиран.

Пожарот меѓу Богданци и Дојран засега не се заканува на селото Селемли

Тале Кристо — Thu, 31 Aug 2023 13:40:51 +0000

Пожарот меѓу Богданци и Дојран, што избувна денеска на пладне на планината Карабалија, во атарот на селото Селемли, го гаснат два авиони „Ер трактор“, пожарникари од Гевгелија и од ЈП „Национални шуми“. Според градоначалникот на Богданци, Блаже Шапов, пожарот зафатил нискостеблеста, но и квалитетна шума и засега нема опасност да се прошири кон селото Селемли. -Местото на избувнувањето на пожарот е на многу непристапен и небезбеден терен и бргу се шири. Засега нема опасност да се доближи до селото Селемли. На терен се пожарникарите од Гевгелија и од ЈП „Национални шуми“ и во координирана акција со авионите прават напори пожарот да го стават под контрола, изјави за МИА градоначалникот Шапов. Инаку, како што претходно информираа од Центарот за управување со кризи (ЦУК) пожарот е изгаснат на еден крак кај плантажи со овошни насади, а на едно место пожарот се префрлил и на грчка територија. Директорот на Центарот за управување со кризи Стојанче Ангелов, претходно информира дека голем пожар избувна денеска околку на отворено на границата со Грција, помеѓу Богданци и Дојран, каде поминува линијата од фронтот од Првата светска војна и во кој досега експлодираа најмалку четири гранати од Прва светска војна. -Денеска околу пладне изби голем пожар помеѓу Богданци и Дојран. Пожарот се наожа во атарот на селото Селемли но поминува преку линијата од фронтот од Првата светска војна, линија на којашто има многу заостанати минско експлозивни неексплодирани средства. Во текот на овие два часа колку што е пожарот активен слушнати се најмалку четири силни експлозии. Ваквите експлозии го усложнуваат гаснењето на пожарот бидејќи не е безбедно пожарникарите да се приближат до него, рече Ангелов, кој веќе е на пат кон локацијата каде што се наоѓа пожарот. Пожарот, како што информира тој, е изгаснат само на еден крак каде што беше безбедно пожарникарите да пријдат, а останатиот опожарен дел се гаси со Ер тракторите на Дирекцијата за заштита и спасување којшто користат вода со посебна пена со поголем ефект. -Двата ер трактори на ДЗС веќе се активни. Исфрлија по неколку тури вода. Ќе продолжат да дејствуваат се додека пожарот целосно не го изгаснат. Пожарот меѓу другото се движи и кон грчка територија и според сегашните информации на едно место веќе е префрлен на грчка територија, информира Ангелов. Директорот на ЦУК соопшти дека од тие причини преку системот 112 уште пред да се префрли пожарот на грчка територија тамошните служби се известени за да се подготват.

ДОЦНА ВЕЧЕРВА НУРКАЧИТЕ ГО ПРОНАЈДОА УДАВЕНИОТ МАЖ ВО ДОЈРАН – еве ги најновите детали!

Дарко Андоновски — Sun, 13 Aug 2023 18:16:06 +0000

Нуркачите од САЕ Тигар на МВР пред малку го пронајдоа телото на удавениот штипјанец и го извлекуваат на брегот на Дојранското Езеро. Веста ја соопштија од МВР, откако по неколкучасовна потрага телото на удавениот штипјанец на 42 годишна возраст беше лоцирано во водите на Дојранско Езеро. Несреќата се случи денеска околу 11:30 часот, кога во СВР Струмица било пријавено дека во Дојран, во непосредна близина на Градската плажа, едно лице паднало од педалинка во езерото и се удавило, а за настанот бил известен јавен обвинител.

Дождот го изгасна пожарот кај Дојран

Ивона Петрова — Sat, 05 Aug 2023 20:44:40 +0000

Дождот го изгасна силниот пожар кој попладнево избувна кај Дојран, пред селото Николиќ. Веста за МИА ја потврди директорот на Центарот за управување со кризи (ЦУК), Стојанче Ангелов. Според информации од жителите на селото Николиќ, дождот кој почнал да врне околу 20 часот го изгаснал пожарот, кој заради силниот ветер се закануваше да се префрли и на првите објекти во селото. Во гаснењето на пожарот учествуваше големиот полициски хеликоптер кој во повеќе наврати прецизно ја исфрлаше водата од ведрото од три тони, како и пожарникари од Дојран, Валандово, Гевгелија и екипи на ЈП „Национални шуми“. Според првичните информации пожарот зафатил поголема површина на шума, а целосна информација колкава е штетата ќе се знае дополнително.

ВИДЕО: Хеликоптерот на МВР исфрли над 50 тони вода и го локализираше пожарот кај Дојран

Ивона Петрова — Sat, 05 Aug 2023 17:24:08 +0000

Одделот за воздухопловни единици при МВР денеска дејствуваше во реонот на Дојран, каде успешно беше локализиран пожарот кој настана околу 12 часот. -Притоа хеликоптерот на МВР (Мi171) во 20 налети прецизно фрли над 50 тони вода врз најкритичните точки и со поддршка на локалните пожарникари пожарот е локализиран, информира МВР.

Пожарот кај Дојран ставен под делумна контрола, Ер тракторот не полетал поради силниот ветер

Ивона Петрова — Sat, 05 Aug 2023 15:44:55 +0000

Воспоставена е делумна контрола врз пожарот кај Дојран, пред селото Николиќ. Ова го објави директорот на Центарот за управување со кризи, Стојанче Ангелов, кој посочи дека во Дојран храбрите и пожртвувани пилоти на големиот полициски хеликоптер досега извршиле повеќе од 9 налети прецизно фрлајќи ја водата врз најкритичните точки и со поддршка на локалните пожарникари воспоставиле делумна контрола врз пожарот и ги изгаснале најкритичните точки и краци. Додава дека заради силниот ветар и очекуваното невреме на авионот „Ер трактор“ на Дирекцијата за заштита и спасување (ДЗС) од Контролата на летање не му било дозволено да полета кон Дојран. Пожарот кај Дојран го гаснат пожарникари од Дојран, Валандово, Гевгелија и екипи на ЈП „Национални шуми“. Инаку, според последните информации од жители на селото Николиќ, ветрот се смирил и не го потпомага ширењето на пожарот.

Претрес во дојранско, пронајдена дрога, приведени две лица

Дарко Андоновски — Sat, 22 Jul 2023 08:50:43 +0000

На 21.07.2023 во 17.45 часот, полициски службеници од Одделението за внатрешни работи Гевгелија ги лишиле од слобода Д.М.(31) и Р.М.(24), двајцата од село Ѓопчели, дојранско. При претрес во нивниот дом, извршен со судска наредба, биле пронајдени и одземени марихуана, воздушна пушка, пиротехнички средства и дробилка со остатоци од марихуана. За настанот бил запознаен Јавен обвинител од Основното јавно обвинителство Гевгелија, а по целосно документирање на случајот против лицата ќе биде поднесена соодветна пријава.