домови – Kurir.mk

Македонците преферираат да живеат во сопствени домови, Германците и Швајцарците во изнајмени

Тале Кристо — Sun, 23 Apr 2023 07:33:47 +0000

Луѓето на Балканот и во Источна Европа преферираат да имаат и да живеат во сопствени домови за ралика од населението во Западна Европа кое почесто се решава за изнајмени живелишта. Според податоците на „Евростат“ што ги анализира порталот „Лангеист“, 85,9 отсто од жителите на Северна Македонија живеат во сопствени домови. Рекордери се Косово и Албанија каде што околу 97 проценти од луѓето имаат свои, а не изнајмени живеалишта. Во Романија тој процент е 95,7, во Србија, Црна Гора и Хрватска околу 90, во Бугарија 85 и во Грција 73,3 отсто. Германија (49,1%) и Швајцарија (42,2%) имаат далеку најниска стапка на сопственост на домови во Европа. Тие се единствените земји каде што сопствениците на куќи се помалубројни од оние кои живеат во изнајмени домови. Стапките на сопственост на домови во Европа значително се разликуваат помеѓу земјите и се под влијание на различни фактори, вклучувајќи ја достапноста на станови со пристапни цени, распространетоста на социјалните станови и демографската структура на населението. Еден од можните фактори кои влијаат на стапките на сопственост на домови во Европа, е достапноста на прифатливи станови. Во некои земји, како што се Германија и Швајцарија, трошоците за сместување се релативно високи, што им отежнува на многу луѓе да купат дом. Спротивно на тоа, во други земји, како што се Бугарија и Романија, домувањето е многу поевтино, па затоа поседувањето дом е подостапно за поголем број луѓе. Друг фактор што може да влијае на стапките на сопственост на домови е распространетоста на социјалните станови. Во земјите каде што социјалното домување е вообичаено, како што се Холандија и Австрија, закупувачите се со поголема веројатност да бидат сместени во имоти во јавна сопственост, и затоа стапките на сопственост на домови се пониски. И покрај овие варијации, поседувањето дом останува важна аспирација за многу Европејци, обезбедувајќи чувство на припадност, стабилност и безбедност што потешко може да се добие преку изнајмување, заклучува „Лангеист“.

Велика Британија: Домовите на руските олигарси може да се користат за сместување украински бегалци

Ивона Петрова — Sun, 13 Mar 2022 11:51:16 +0000

Домовите на руските олигарси во Велика Британија против кои се воведени санкции би можеле да се користат за сместување бегалци од војната во Украина, изјави британски министер. Во изјава за Би-Би-Си, државниот секретар за домување и заедници, Мајкл Гоув рече дека сака да истражи опција која ќе им дозволи на британските власти да ги користат домовите и имотите на санкционирани поединци, сè додека тие се санкционирани, за хуманитарни и други цели. – Постои прилично висока законска пречка што треба да се помине и не зборуваме за трајна конфискација. Но, ние велиме: „Ти си санкциониран, го поддржуваш Путин, овој дом е тука, немаш право да го користиш или да профитираш од него … Ако можеме да го користиме за да им помогнеме на другите, ајде да го направиме тоа“, рече Гоув. Тој додаде дека британската Влада сака да ги зајакне сегашните мерки кои ги спречуваат олигарсите само да ги продаваат своите домови во Велика Британија, а не и да живеат во нив. – Ако вашето богатство и вашето влијание се користат со цел да се поддржи или да се обезбеди утеха на Путин, со оглед на тоа што тој го прави, тогаш се плашам дека треба да ги сносите последиците, повлече Гоув.

Задолжителна вакцинација на вработените во домовите за стари лица и здравствените работници во Грција

Тале Кристо — Mon, 12 Jul 2021 17:23:20 +0000

Задолжителна вакцинација за вработените во домовите за нега на стари лица и за здравствените работници, можност, припадниците на армијата да се вакцинираат во нивните единици и влез само за вакцинирани во местата за забава на затворено, се четирите одлуки на грчката Влада што преку видео порака до граѓаните ги соопшти премиерот на Грција Кирјакос Мицотакис, јави дописничката на МИА од Атина. Мицотакис рече дека овие мерки ќе го ограничат ширењето на вирусот „пред повторно здравствениот систем да биде под опасада“. За вработените во домовите за нега на стари лица, вакцинацијата веднаш станува задолжителна, а оние кои нема да се вакцинираат по 16 август ќе бидат на принуден одмор. За втората категорија, здравствените работници, како во државниот така и во приватниот сектор, задолжителната вакцинација ќе важи од 1 септември, а Мицотакис истакна дека „е незамисливо, на пример, невакцинирана медицинска сестра да се грижи за пациент со карцином“. Паралелно изрази увереност дека со оваа одлука се согласува голем дел од општеството, но и ги повика партиите да дадат поддршка. Третата одлука се однесува на вооружените сили, односно на редовните војници кои ќе имаат можност да се вакцинираат во нивните единици. Иако се споменуваше дека внатрешните делови на угостителските објекти ќе бидат „мешани“ или „чисти“ по избор на сопствениците, сепак Мицотакис соопшти дека кафулињата, рестораните, баровите, кината, театрите и слично од петок до крајот на август, на затворено, ќе работат, исклучиво за вакцинирани лица и со зголемен, но одреден број на гости. Тој додаде дека ова значи дека во текот на летото забавувањето, без разлика дали е на отворено или во затворен простор, ќе се однесува само на гости кои седат на маса, а стоењето ќе биде забрането, за да се спречи ширење на вирусот. Грчкиот премиер истакна дека станува збор за четири опции кои се во корист на здравјето на вработените, а истовремено се и одлуки што им даваат слободи на оние кои имаат право на тоа. – Земјата нема повторно да се затвори поради ставот на некои. Ќе им даде слобода на многу и заштита на сите. Бидејќи во опасност не е Грција, туку невакцинираните Грци, порача Мицотакис. Во десетминутната видео-порака до граѓаните, грчкиот премиер посочи дека „операцијата Слобода“ односно процесот на имунизација се шири низ целата држава и „се доближува до целта, во текот на летото да е вакцинирано 70 отсто од полнолетното население“, но сепак, истакна дека појава на Делта сојот и процентот граѓани кои сè уште се двоумат за вакцинирањето го спречуваат брзото и дефинитивно справување со пандемијата.

Околу 30 домови уништени во шумски пожар во Австралија

Ивона Петрова — Tue, 02 Feb 2021 10:32:31 +0000

Шумскиот пожар кој зафати делови североисточно од Перт, во Западна Австралија, уништи околу 30 домови и се заканува да продолжи, додека локалното население во регионот тврди дека е предоцна за евакуирање. Пожарот кој избувна вчера зафати земјиште со површина од над 7.000 хектари, во радиус од 75 километри, во близина на градот Вуролу, а погодени се неколку околни места. Градоначалникот на Свон, Кевин Бејли изрази уверување дека во пожарот се уништени 30 домови, а еден пожарникар е хоспитализиран поради вдишување чад. Властите во Западна Австралија тврдат дека површината која е зафатена од пожарот, двојно се зголемила во текот на ноќта, а пожарникарите трагаат по евентуални жртви.

Шведска не успеа да ги заштити корисниците на домови за стари лица

Тале Кристо — Tue, 24 Nov 2020 13:44:44 +0000

Шведскиот инспекторат за здравство и социјална заштита (ИВО) денеска соопшти дека открил сериозни недостатоци во грижата за штитениците на домовите за стари лица во кои илјадници луѓе починале од Ковид-19. Коронавирусот ги „опустоши“ домовите на стари лица во првиот бран на пандемијата, поради што премиерот Стефан Лофвен во мај призна дека земјата не успеала да ги заштити своите постари граѓани. – Во својата истрага, ИВО утврди сериозни недостатоци на регионално ниво кога станува збор за згрижувањето што се обезбедува на луѓето што живеат во домови за стари лица, изјави Софија Валстром, генералната директорка на ИВО. ИВО информира дека ниту еден од 21 шведски регион не бил доволно одговорен околу лекувањето на заразени жители на домови, при што една петтина од пациентите немале индивидуална лекарска процена. После затишјето во текот на летото, инциденцата на коронавирус повторно се зголеми за време на вториот бран на пандемијата. Корисниците на домовите за стари лица сочинуваат речиси половина од над 6.400 смртни случаи од Ковид-19 во Шведска.

Десетици илјадници лица ги напуштија домовите поради интензивните борби во Авганистан

Магдалена Андонова — Wed, 14 Oct 2020 11:49:10 +0000

Десетици илјадници луѓе во јужен Авганистан беа принудени да ги напуштат своите домови по неколкудневни интензивни борби меѓу талибанците и авганистанската армија и полиција, соопштија официјални лица. Насилството продолжува и покрај мировните разговори. Талибанците во неделата вечерта извршија напад врз градот Лашкар Гах во провинцијата Хелманд, принудувајќи ги САД да започнат воздушни напади за поддршка на авганистанските сили. Поради интензивните борби, локалното население бега со мотоцикли, такси и автобуси. – Повеќе од 5.100 семејства или 30.000 луѓе … побегнаа од борбите досега, рече Мохамед Рамин, директор на одделот за бегалци во Хелманд. Борбите денеска продолжија во најмалку четири области. Војската одби неколку напади на талибанците. Девет лица загинаа во судир меѓу два хеликоптери утрово. Министерството за одбрана го истражува инцидентот. Талибанците започнаа разговори со авганистанската влада во Доха минатиот месец, но засега двете страни не можат да се договорат за основната рамка за разговори. Договор со талибанците беше постигнат во Катар на 29 февруари. САД ветија дека ќе се повлечат до средината на 2021 година во замена за ветувањето од талибанското движење дека нема да дозволат државата да биде користена од екстремистите. (MИА)

Спасовски и Заев против Уставот, ќе проверуваат гости по домовите

Дарко Андоновски — Sun, 11 Oct 2020 10:02:00 +0000

Премиерот Зоран Заев и министерот за внатрешни работи, Оливер Спасовски по умот на министерот за здарвство, Венко Филипче противуставно ќе контролираат во домовите на граѓаните дали ќе се групираат повеќе од четворица луѓе. Откако пред два дена Филипче ја предложи една од новите рестриктивни мерки според која групирањето по домовите ќе било ограничено на 4 лица, во јавноста имаше безброј реакции кои сеуште не стивнуваат за ваквата потенцијална мерка. Освен реакциите од страна на граѓаните министерот за внатрешни работи Оливер Спасовски изјави дека дополнително ќе се разговара за ваквата мерка. Ако се потсетиме на периодот за времетраење на техничката влада, револтот од страна на Филипче и Заев тогаш не изостануваше кон тогашниот технички министер за внатрешни работи Наќе Чулев, па тие тогаш инсистираа на казнување за семејните собири, иако Чулев велеше дека без одлука на обвинителството и судот такво нешто не е можно, тој тогаш беше на мета на обвинувања. Но сега во ситуација на енормен зголем број на заболовувања од коронавирусот, Заев, Спасовски и Филипче се спремаат изгледа на граѓаните да им вршат и контроли во домовите. Како ќе се контролира спроведувањето на мерката за забрана за групирање во домовите, кога неповредливоста на домот е уставно загарантирано и без судска одлука истото полицијата не може да го спроведува, освен во случаи кога има постапување по кривична пријава. Во членот 26 од Уставот на Република Македонија се вели дека се гарантира неповредливоста на домот. Како уставна категорија ова право може да биде ограничено единствено со судска одлука кога е во прашање откривање или спречување на кривични дела или заштита на здравјето на граѓаните. По ова без налог од страна на судот полицијата нема надлежност да врши претрес или да упаѓа во домовите на граѓаните затоа што Уставот гарантира неповредливост на домот. Па Спасовски и Заев треба сериозно да размислат дали повторно ќе го прекршуваат Уставот во безизлезност во справување со коронакризата, кога очигледно состојбата не е под контрола одамна, а се почести се посочувањата кон министерот за здравство од кој се бара да си даде оставка од функцијата.

Лос Анџелес ќе ја исклучува струјата и водата во домовите каде се прават големи забави

Магдалена Андонова — Thu, 06 Aug 2020 11:51:51 +0000

Властите на Лос Анџелес ќе започнат со исклучување на снабдувањето со струја и вода во домовите каде за време на пандемија се оддржуваат забави во кои учествуваат голем број луѓе, ова денеска го изјави градоначалникот на градот Ерик Гарсети. Гарсети истакна дека наредба од ваков тип е веќе одобрена во одделот за водни ресурси и енергеткика на градот и додаде дека мерката ќе важи од 7 август, со оглед на зголемениот број случаи на инфекции од коронавирус. -Гледаме извештаи за масовни забави и собирања кои ги нарушуват издадените укази за време на пандемијата. Овие активности станаа своевидни ноќни клубови, кажа градоначалникот за да ги објасни акциите на градот. Во изминатите 24 часа во Лос Анџелес се регистрирани повеќе од 2.300 нови потврдени случаи на Ковид-19, со што вкупната бројка на ниво на градот сега е над 197.000 заразени. (MИА)

Драматична состојба во домовите за стари лица во Англија поради коронавирусот

Тале Кристо — Tue, 05 May 2020 15:11:48 +0000

Повеќе од 6.000 лица починаа од новиот коронавирус во домовите за стари и изнемоштени лица во Англија за три недели, а таквата „драматична ситуација“ и понатаму се влошува иако епидемијата во Обединетото Кралство почнува полека да се намалува, соопшти Заводот за национална статистика. Вкупно 6.391 смртен случај, поврзан со новиот коронавирус, е потврден во домовите за стари и изнемоштени лица од 10 април до 1 мај, од кои 2.044 се регистрирани во послената недела од минатиот месец, покажуваат податоците кои се однесуваат само за Англија. – Бројот на починати во земјата на дневна основа полека се намалува, што охрабрува, истакна Ник Стрип, аналитичар од Заводот за статистика, додавајќи дека болниците бележат околу 75 отсто повеќе починати од вообичаеното за овој период од годината.

Прогласена вонредна состојба во Русија: Поларни мечки во потрага по храна влегуваат во домовите (ВИДЕО)

Ивана Ефремовски — Sun, 10 Feb 2019 13:48:22 +0000

На архипелагот Нова Земја прогласена е вонредна состојба поради инвазијата на поларни мечки, соопштуваат од регионалната влада на Архангелск. Одлуката да се прогласи вонредна состојба е донесена на 9. февруари. Властите на островот Нова Земја прогласиле вонредна состојба затоа што поларни мечки им одм на луѓето по домовите и не се плашат од ништо. Поларните мечки се погодени од глобалното затоплување и сè повеќе се присилени да доаѓаат на копното во потрага за храна. Овие животни Русија ги прогласи за загрозен вид. Ловот на мечки е забранет, а државната агенција за заштита на околината одби да даде дозвола за да се убијат животните. Мечките не се плашат од ништо. Ниту од полициските патроли и сирените кои ги бркаат, што значи потребно е да се преземат порадикални мерки. Ако останатите мерки не родат плод, единствениот одговор би можел да биде контролиран отстрел, предупредуваат официјалните лица.