донација – Kurir.mk

ФФМ донираше медицинска опрема за второлигашките клубови

Тале Кристо — Thu, 02 Nov 2023 18:54:02 +0000

Дефибрилатори за сите шеснаесет екипи од Втората лига донираше денеска Фудбалската федерација на Македонија (ФФМ) со цел подобрување на условите во делот на медицинските тимови на клубовите и зголемена грижа за здравјето на фудбалерите. Срцевиот удар е меѓу главните причини за смрт кај фудбалерите на теренот, а редовните прегледи на срцето и соодветните мерки за прва помош, како што е итна реанимација и употреба на дефибрилатор, можат да помогнат да се спречи смрт од срцеви проблеми. -ФФМ навистина прави големи напори за снабдување на сите национални тимови со медицинска опрема и апаратура, но, исто така, посветува внимание и дава помош во опрема и медицински апарати и за екипите од МФЛ, вклучувајќи го и женскиот фудбал и футсалот, изјави д-р Невзат Јусуфи, претседавач на Комисија за медицина и антидопинг во ФФМ. Минатата сезона ФФМ на клубовите од Првата македонска фудбалска лига им донираше автоматизирани дефибрилатори, а нивните лекарски тимови ги следеа едукативните програми за реанимација и употреба на дефибрилатори меѓу лекарите, тренерите и играчите. -За нас, исто така, е многу важно што освен донацијата со медицинска опрема, како тело во Федерацијата кое се грижи за здравјето и медицината, континуирано одржуваме едукација на физиотерапевтите и лекарите ангажирани во клубовите и во репрезентативните тимови. Оваа година го одржавме и важниот семинар за лиценцирање на лекарите и физиотерапевтите во МФЛ под покровителство на УЕФА, додаде Јусуфи.

НАТО контингентот преку Амбасадата на САД донираше техничка опрема за радовишките пожарникари

Тале Кристо — Wed, 01 Nov 2023 16:18:38 +0000

НАТО контингентот преку Амбасадата на САД донираше техничка опрема за радовишките пожарникари, соопштија од Општина Радовиш. Опремата се состои од противпожарни шлемови, гумени чизми, сет алати (секира, јаже,клешти, пила), противпожарни огноотпорни одела, балаклави и носачи за белодробен апарат со маска. Од Општината додаваат дека ТППЕ Радовиш е дел од неколкуте противпожарни единици во државата, кои се опфатени со донација на техничка опрема од НАТО контингентот за да им се помогне на единиците во опремувањето за ефикасно извршување на интервенциите.

ФФМ донираше 13.800 фудбалски топки на клубовите од сите натпреварувања

Тале Кристо — Thu, 26 Oct 2023 12:10:36 +0000

Фудбалската федерација на Македонија им донира вкупно 13.800 фудбалски топки (FIFA QUALITY PRO “IMS - International Match Standard”) на клубовите од сите категории од натпреварувањата во рамки на Првата лига, Втората лига, Третите лиги, младински конкуренции, Женска фудбалска лига, футсалците и Национални тимови. - Со новата акција наменета за клубовите од МФЛ и нашите национални тимови, Управниот одбор на Фудбалската федерација на Македонија ја потврдува важноста за поддршка на сите клубови во сите конкуренции од натпреварувањата организирани од ФФМ. Ќе се обидеме и во иднина да им ја дадеме целосната поддршка и помош на клубовите кои придонесуваат за развој на фудбалот во Македонија, истакна Муамед Сејдини - претседател на Фудбалската федерација на Македонија. За 12 клубови од Првата македонска фудбалски лига се распределуваат 600 фудбалски топки (Triton - FIFA), a 16 клубови од Втората лига ќе добијат вкупно 640 фудбалски топки. Осумнаесет клубови од Женската лига (Прва и Втора) ќе добијат 560 фудбалски топки (Reposta). Точно 7.040 фудбалски топки (Mission IMS) се наменети за клубовите од Трета лига, лигите организирани од Општинските фудбалски Сојузи и младинските конкуренции. Eкипите од ФФМ Детска лига ќе добијат вкупно 3.000 фудбалски топки. 200 топки се наменети за тимовите од Прва и Втора футсал лига. Останатите ќе бидат на располагање за сите наши Национални тимови. Фудбалските топки произведени по највисоките стандарди на ФИФА се со дизајн на ФФМ.

Аутомакедонија со донација на енергетски ефикасна фасада за ООУ „Стив Наумов“ во населбата Автокоманда

Super Admin — Wed, 30 Aug 2023 11:39:59 +0000

Аутомакедонија, една од водечките компании за услуги поврзани со мобилетот и еден од најголемите дистрибутери на автомобили во Македонија, направи уште една донација со која ја зацврстува титулата на општествено одговорна компанија. По своја иницијатива и темелно планирање на овој проект од страна на Аутомакедонија, основното училиште Стив Наумов во Автокоманда доби нова енергетски ефикасна фасада. На веќе постоечки ѕид е додадена изолација која ја зголемува топлотната изолација со што се добива енергетска заштеда.

„Истражувајќи ги потребите на училиштата во нашата општина, дојдовме до идејата за обнова на фасадата во ООУ „Стив Наумов“. Во договор со општината во која се наоѓа нашиот објект – Автокоманда, заеднички го избравме основното училиште „Стив Наумов“. Примопредавањето на фасадата го усогласивме со почетокот на училишната година, а ќе го продолжиме со уште еден мурал кој ќе биде избран преку ликовен конкурс со цртежи од учениците.“ – изјави Гордица Штерјева, заменик директор на Аутомакедонија.

„Како градоначалник на општина Гази Баба изразувам благодарност до компанијата Аутомакедонија за покажаната општествена одговорност преку донацијата на изградбата на енергетски - ефикасната фасада на општинското основно училиште Стив Наумов во Автокоманда. Како локална самоуправа негуваме партнерски однос со компаниите кои функционираат на нашата територија. Наша обврска како локална самоуправа е да изнаоѓаме различни начини на финансирање со цел реализација на што повеќе проекти. “ – изјави градоначалникот на Гази Баба - Бобан Стефковски.

Со сите чекори за обнова на фасадата објектот добива минимално 20% зголемена енергетска ефикасност, што воедно ќе придонесе и за намалување на вкупните трошоци за енергија на училиштето. Реновирањето на оваа фасада е само еден дел од активностите кои Аутомакедонија како општествено одговорна компанија ги спроведува во рамки на својата стратешка определба за поддршка на енергетската ефикасност и обновливите извори на енергија.

Општина Ѓорче Петров први со финансиска донација за санирање на последиците од невремето во Делчево

Ристе Здравков — Fri, 09 Jun 2023 10:23:00 +0000

300.000 денари финансиска помош од Општина Ѓорче Петров за Општина Делчево за санирање на последиците од синоќешното силно невреме, се вели во Фејсбук статусот на градоначалникот на општина Ѓорче Петров, Александар Стојкоски. -Солидарност со нашиот народ! Советниците на денешната седница донесоа итна одлука за помош на делчевскиот регион кој беше зафатен од силни врнежни што донесе поплавени подрачја. Општина Ѓорче Петров е првата скопска општина која експресно донесе одлука за помош на погоденото подрачје. Солидарноста е синоним за Ѓорче Петров, а покажувањето хуманост во вакви тешки моменти е големина на големите. Ние сме секогаш на страна на најголемата човечка особина и доблеста на еден поединец или колектив. Без разлика на партиска, верска или било каква друга разлика, во моменти на вакви непогоди, наша морална должност е на било каков начин да им помогнеме на нашите колеги. Благодарност до сите градоначалници и тимови од други општини кои на било каков начин учествуваат во помош на погоденото подрачје, истакна Стојкоски. Нашата парола е „модерно, урбано и хумано“ и тоа никогаш не смееме да го заборавиме! Додава Стојкоски.

Со донација на повеќе од 300 илјади денари dm drogerie markt го одбележа Меѓународниот ден на децата!

Super Admin — Thu, 01 Jun 2023 13:57:29 +0000

Компанијата dm drogerie markt која гордо го носи епитетот на една од општествено најодговорните компании, оваа година го одбележува Меѓународниот ден на децата со донација на 15 бебешки креветчиња во вредност од повеќе од 300.000 денари во ЈЗУ Општа болница ,,Д-р Ферид Мурад’’ во Гостивар. На денот на отворањето на реновираното детско одделение, со оваа донација компанијата учествуваше во обезбедување на сите потребни креветчиња, а целта е да овозможи посоодветни услови на најмалите членови на општеството во нивниот ран развој.

„Иако секој ден им го посветуваме на децата, Меѓународниот ден на децата е одличен повод да се присетиме на тоа дека секое дете го заслужува најдоброто. Особено сме среќни за оваа донација, која ни покажува дека сме на вистинскиот пат да создадеме што подобри услови за нашите најмалечки. Сакаме да веруваме дека на овој начин сме значаен дел од еден период во животот на децата и придонесуваме да израснат во среќни, задоволни луѓе подготвени да градат светла и убава иднина за сите нас. Нашата цел е да продолжиме да ги слушаме потребите на заедницата со желба да даваме придонес преку различни проекти и значајни донации“ , изјавија од компанијата.

dm drogerie markt е етаблиран како пријател на македонските здравствени институции, а за тоа говорат постојаните вложувања во здравствениот сектор изминатите години. Во изминатата деловна година, компанијата донираше повеќе од 5,3 милиони денари во општествено-одговорни цели. Со истата посветеност продолжуваат и понатаму да вложуваат во заедницата во која делуваат.

ДОНИРАЈ ЗА НИКОЛА – да бидеме хумани, 143 488 (А1) и 143 117 (Т-МОБИЛЕ)

Дарко Андоновски — Wed, 05 Apr 2023 07:51:40 +0000

19 годишниот Никола Ѓорѓиев од Црешево, општина Гази Баба боледува од карцином на коските. Животот досега неколку пати го има ставено Никола пред сериозни предизвици. Истиот е без родители и живее со своите баба и дедо. Во борбата со болеста на Никола му е потребна нашата помош со цел обезбедување на финансиски средства за лекување во Турција.

Донација од над милион денари за Клиниката за радиотерапија и онкологија во Скопје

Катерина Бојаџиева — Tue, 21 Mar 2023 13:08:00 +0000

Со цел давање придонес во подобрување на условите при третманот и грижата за женското здравје, во март - месец посветен на жената, „Дм дрогерие маркт“ донира повеќе од еден милион денари во медицинска опрема и апарати за подобрување на условите за работа во гинеколошкиот оддел при ЈЗУ Универзитетска клиника за радиотерапија и онкологија во Скопје, информираат од оваа компанија. Со набавка на два гинеколошки прегледни стола, две столчиња за преглед и стерилизатор за медицинска опрема, како што се нагласува во соопштението, компанијата уште еднаш ја докажа својата посветеност кон создавање на подобри услови за грижа и одржување на женското здравје. - Изминатата година „Дм“ донираше повеќе од 1,6 милиони денари во пет гинеколошко-акушерски клиники низ земјата. Преку овие донации, компанијата обезбеди поддршка за родилките, а оваа помош значеше и подобрени услови и за новороденчињата, како и за мајките по породувањето, потенцираат од компанијата.

ПОКАЖА КОЛКАВО СРЦЕ ИМА – Роналдо донираше полн авион по земјотресот во Турција и Сирија, еве колку пари се проценува неговата хуманост (ФОТО)

Дарко Андоновски — Mon, 06 Mar 2023 16:08:17 +0000

Кристијано Роналдо уште еднаш покажа дека е голем човек. Славниот португалски фудбалер испрати огромна хуманитарна помош за Сирија и Турција кои беа погодени од разорни земјотреси. Роналдо бил крајно потресен од она што се случи во овие земји, па им испратил полн авион за помош на настраданите од оваа природна катастрофа. Фудбалерот на Ал Наср испратил шатори, пакети со храна, перници и ќебиња, бебешка храна и млеко како и медицински материјали во Турција и Сирија.

🚨 Cristiano Ronaldo sent a plane loaded with supplies such as tents, food parcels, pillows, blankets, baby food, milk, medical supplies to help victims of the earthquake in Syria and Turkey. 🇹🇷🇸🇾
(Source: @MailSport) pic.twitter.com/KhRgtwFJXF — Transfer News Live (@DeadlineDayLive) March 5, 2023

Донацијата на Роналдо е проценета на 350.000 долари. Ова не е прв пат Кристијано да учествува во вакви великодушни хуманитарни акции, а се проценува дека досега дал неколку милиони евра хуманитарна помош. Хуманиот потег на Роналдо наиде на големи пофалби низ светот, а тој уште еднаш даде пример како познатите личности треба да се однесуваат во вакви ситуации.

„Металика“ донира 250.000 долари за Турција и Сирија

Тале Кристо — Thu, 16 Feb 2023 07:32:38 +0000

Хеви-метал составот „Металика“ ќе дари 250.000 долари (околу 230.000 евра) на хуманитарните организации „Дајрект релиф“ (Direct Relief) и „Ворлд централ кичен“ (World Central Kitchen), коишто обезбедуваат помош за подрачјата погодени од земјотресите во Турција и Сирија. „Немаме зборови за да го опишеме уништувањето во јужна Турција и северна Сирија. Земјотресот со јачина од 7,8 степени го претвори целиот подрачје во урнатини. Бројот на жртви продолжува да расте. Партнерските организации, „All Within Foundation My Hands“ (нивната фондација, б.п.), „Дајрект релиф“ и „Ворлд централ кичен“ работат на терен за да обезбедат медицинска помош и храна за жртвите од оваа катастрофа. „АФВМХ“ обезбедува грантови од 125.000 американски долари за секоја организација, заради поддршка на нивните напори“, соопшти „Металика“. „Дајрект релиф“ обезбедува медицинска опрема, додека „Ворлд централ кичен“ работи на подготовка на над 125.000 оброци дневно. Донацијата доаѓа од непрофитната организација на американскиот бенд основана 2017 година за борба против гладот и во поддршка на образованието и други добротворни цели ширум светот. Хеви-метал составот редовно донира пари во добротворни цели. Секој декември, на пр. тие одржуваат посебен годишен концерт наречен „Раце кои помагаат“ (Helping Hands) во Калифорнија, којшто меѓу другото, го полни буџетот на нивната хуманитарна фондација.