донирање органи – Kurir.mk

Папата Бенедикт потпишал картичка за донирање на органите по смртта, но тоа нема да се случи – еве ја причината

Ивона Петрова — Thu, 05 Jan 2023 12:17:47 +0000

Папата Бенедикт беше поборник за донирање органи и со години носел донаторска картичка, но неговите органи не можат да се донираат по неговата смрт. Џозеф Рацингер со години беше на списокот за донирање органи, но Ватикан официјално потврди во 2011 година дека на списокот го нема. Имено, правилата се такви што неговата лична одлука за донирање органи престанала да важи откако станал папа во 2005 година. - Точно е дека папата има донаторска картичка, но спротивно на јавното мислење, картичката што му била издадена во 70-тите станала неважечка со изборот на кардиналот Рацингер за папа,напиша тогаш долгогодишниот секретар на папата Георг Гансвајн во писмо што го испратил до германскиот лекар Гер Винкелман. Самиот Рацингер често се залагаше за донирање органи. – Да се дарува органи спонтано, со целосна свест и знаење, значи оживување на вистински и длабок чин на љубов кон ближниот, рече тој во говорот во 1999 година. Од Ватикан велат дека со смртта на папата, неговото тело и припаѓа на Црквата и мора да биде погребано недопрено. Доколку органите на папата би биле донирани, тие би станале мошти во туѓо тело, во случај папата на крајот да биде прогласен за светец.

Донирани органите на американската актерка Ен Хеч

Магдалена Андонова — Mon, 15 Aug 2022 20:30:00 +0000

Американската актерка Ен Хеч е „мирно исклучена од апаратите за одржување“ откако била пронајден соодветен примател на органи, потврди портпаролот. Претставник на покојната ѕвезда вчера ја потврди нејзината смрт за новинската агенција PA. Во петокот, 53-годишната жена беше законски прогласена за мртва откако претрпе „тешка аноксична повреда на мозокот“ додека удрила со нејзиниот автомобил во куќа во Лос Анџелес. Таа била задржана на апарати за одржување во живот во случај нејзините органи да бидат донирани. Не е познато колку или кои органи биле донирани, но, според NBC News, хирурзите биле подготвени да ја направат процедурата. Во изјавата, портпаролката на Хеч, Холи Берд, рече дека актерката „мирно била исклучена од апарати за одржување“ откако било пронајдено компатибилно лице кое ги добило нејзините донирани органи. Претходно вчера, полицискиот оддел на Лос Анџелес (ЛАПД) соопшти дека ја завршиле истрагата за несреќата на Хеч, по која што остана во кома. „Од денеска нема да има дополнителни истражни напори за овој случај“, се вели во соопштението. „Сите информации или записи што биле побарани пред овој пресврт на настаните сепак ќе се собираат како што ќе пристигнат како формалности и ќе бидат вклучени во целокупниот случај. „Кога лицето осомничено за кривично дело ќе почине, ние не вршиме истрага.“ Одделот претходно потврди дека несреќата се истражува како кривично дело сообраќаен судир со возење под влијание, откако прелиминарните тестови на крвта покажале присуство на дрога во системот на Хеч. Било потребно дополнително тестирање за да се исклучат супстанциите што се администрираат во болницата. Противпожарната служба на Лос Анџелес минатата недела соопшти дека нејзиното возило „експлодирало со силен пожар“, во кој што на 59 пожарникари им требало повеќе од еден час целосно да го изгаснат. Покрај изгорениците, актерката останала со „тешка аноксична повреда на мозокот“ - кога мозокот е лишен од кислород - соопшти нејзиното семејство. Лин Мишел, жената во чија куќа фатално удрила актерката, на социјалните мрежи ја сподели својата тага по веста за смртта на Хеч. „Веста за смртта на Ен Хеч е поразителна“, објави Мишел на интернет. „Нејзиното семејство и нејзините пријатели и нејзините деца, особено, навистина претрпеа голема загуба и моето срце е со нив.Целата оваа ситуација е само трагична и навистина немам зборови“, додаде таа. „Испраќам љубов на сите вклучени“. Фондот формиран за да ѝ помогне на Мишел досега има собрано повеќе од 174.000 долари. Хеч беше позната по филмовите како „Вулкан“, „Дони Браско“ и римејкот на „Психо“ од 1998 година. Мајката на две деца се појави и во Танц со ѕвездите, американски еквивалент на Strictly Come Dancing, во 2020 година. Нејзиното семејство во соопштението во петокот рече: „Денес изгубивме силна светлина, љубезна и најрадосна душа“. Ѕвездите меѓу кои и актерот Антонио Бандерас и поранешната партнерка на Хеч, Елен Деџенерис, беа меѓу оние кои ѝ оддадоа почит.

Здружението „Храбро срце“ втора година по ред го одбележува 13 Август – светскиот ден на органодарителството

Super Admin — Fri, 13 Aug 2021 14:16:29 +0000

Ирена Р. Најдевска, поддржувач на Здружението „Храбро срце“ е организаторот на овој настан на кој беа поделени едукативни флаери со цел граѓаните да се информираат за донирање органи по завршувањето на нечиј живот. Целта на настанот е подигнување на јавната свест за потребата и важноста од донирање органи, како и да им се даде поддршка на сите пациенти кои се на листата за трансплантација. Претседателот на „Храбро срце“ – Васко Јолески изрази голема благодарност до Акад. Жан Митрев и до проф. д-р Сашко Јовев, кои се всушност водилка во овој процес што во моментов се развива во нашата земја кои ни испратија видеопорака за кампањата за подигнување на свеста кај народот за донирање органи. На настанот беа присутни доктори кои им даваат поддршка на овие пациенти и тоа: Кардиолошки завод Св. Стефан Охрид (д-р Елена Башуроска, д-р Слаѓана Тупаре, д-р Виолета Мојсова, д-р Ѓорѓи Нестороски), потоа претставници од Општа болница Охрид и директорот на болницата во Струга, д-р Арменд Арслани. Од здружението „Храбро срце“ упатуваат благодарност до спонзорите на овој настан: Пункт мебел и Бебе Хоум од Скопје, кафетерија Тераса Аквариус Охрид, Кожувчанка ДОО и Фризерско студио SKILL - Охрид како и до несебичната поддршка од активистите на Црвен крст – Охрид кои и годинава како и лани учествуваат во одбележувањето на овој настан, како и на активистот Гордана Лолеска од Охрид од Здружението на ретките болести.

Здружението „Храбро Срце“ продолжува со своите активности за подигнување на свеста за донирање органи

Super Admin — Thu, 21 Jan 2021 09:57:09 +0000

Вие како здружение што имате реализирано досега? До каде сте со активностите? Реализирани се бројни гостувања на наши членови на телевизиите од национален, како и од локален карактер. Целта на овие гостувања беше промовирање на кампањата во нашата држава, информирање на пошироката јавност за тоа до каде сме со реализацијата на барањата кои се доставени до ФЗО за бесплатни контролни прегледи на пациентите, до каде е процесот за едукација на трансплантацискиот тим за експлантирање на вградените дивајси и сл. Во градовите низ нашата земја беа дистрибуирани пишани материјали (флаери,брошури) со цел секој граѓанин да се запознае со нашата рабата, а со тоа и да почне да размислува за можноста за дарување органи. Успешноста на нашата кампања се гледа и од таму што имавме бројни мејлови со многу прашања на кои нашите членови даваа одговори. Најмногу прашања беа поставувни за тоа на кој начин можат да се донираат органи за време на животот. Кои се вашите следни активности? Како главна активност која е предвидена во Програмата за 2021 година е тоа што имаме ставено посебен акцент на едукација на трансплантацискиот тим за експлантирање (отстранување) на веќепоставениот дивајс (пумпа) бидејќи тој оперативен зафат во просек трае од 5 до 6 часа, а потоа следува трансплантација на срце. Важно е да споменеме дека што подолго се носи пумпата, таа повеќе сраснува со ткивата и е потешко да се отстрани. Тоа е специфична процедура која досега во нашата држава ниту еднаш не е извршена. Оттука сметаме дека е многу важен одговорот од надлежните за ова прашање бидејќи тоа неколкупати беше спомнато од страна на надлежните дека е предвидено да се изврши обука на докторите. Откога ќе се намали или смири пандемијата со Корона 19 вирусот, а во зависност и од моменталната здравствена состојба во нашата држава, ќе започне втората фаза од кампањата. Истата ќе почне на 22.02.2021 год. а ќе заврши на 22.05.2021 год. Потоа, интензивна комуникација со ФЗО за барањата кои се доставени, дел од нив се прифатени од страна на Фондот за што сме бескрајно благодарни, но сè уште не е почнато да се спроведува. Понатаму, очекуваме повик од нашите болнички координатори за термин кој треба да го даде Министерството за здравство за испитување на антитела на сите пациенти кои се на листата за трансплантација. Да нагласиме дека прв пат се направија тие HLA испитувања на 28.5.2020 година, но тие испитувања се прават на секои четири месеци, а не еднаш во годината. Тие се важни за компатибилноста на потенцијалниот орган со потенцијалниот примател, но покрај тие испитувања важни се и многу други параметри на компатибилност (крвна група, приближна возраст, приближна тежина и висина и сл.) со цел што е можно донорското срце повеќе да одговара на потенцијалниот примател. Покрај погореспоменатотот ги изделуваме и следните предвидени активности:

Ќе се продолжи со емитување на видео спотови во кои со свои изјави за поддршка на нашата кампања учествуваат голем број истакнати и афирмирани здравствени работници, уметници, глумци, пејачи, спортисти, музичари, како и разни поддржувачи на нашето Здружение од земјата и од странство.
Ќе се организираат средби со граѓани и со здравствените работници по градовите од нашата земја на кои би се дискутирала потребата од органодарителството и би се делеле пишани материјали (флаери,брошури).
Ќе иницираме до Министерот за здравство формирање на Центар за психолошка поддршка на пациентите потенцијални приматели на орган, потенцијалните живи дарители на орган, семејствата на потенцијалните кадаверични дарители на орган, како и за трансплантираните пациенти, кој Центар би функционирал во рамките на Министерството за здравство.
Почитувајќи го интересот на нашите сограѓани за можноста да ги донираат своите органи за време на животот, а знаејќи дека во овој момент Законот за трансплантација на органи и ткива не ја овозможува реализацијата на оваа желба, во соработка со Националните институции ќе го иницираме почетокот за измени и дополненија на Законот за трансплантација на органи, како би можеле овие желби да се претворат во реалност.
Согласно почетокот на иницијативата за измени и дополненија на Законот за трансплантација на органи, ќе бараме и воведување на донорски картички во нашата држава, по пример на околните држави.
Ќе ги интензивираме нашите комуникации со Министерството за Здравство, ФЗОМ, МТСП, ПИОМ, јавните и приватните болници, за да се овозможи подобар и подостоинствен живот на сите пациенти со механичка потпора на работата на срцето како и на сите пациенти кои се наогаат на Националната листа за трансплантација на срце. – велат од Здружението.

Неговата мајка по втор пат му даде живот: 81-годишна Македонка му донираше бубрег на својот син (ВИДЕО)

Ивана Ефремовски — Wed, 26 Sep 2018 13:44:30 +0000

81-годишна жена му даде втор живот на својот син. Пред два дена таа го донираше својот бубрег на синот. -Мојата мајка, 81-годишната Павлина по втор пат ми дава живот, таа ме спаси и ми го донираше својот бубрег без размислување, раскажува Тоде Ѓорѓиев, пренесе Канал 5. 57-годишниот пациент на Клиниката за урологија раскажува за животот, со години бил на дијализа, последната шанса била само трансплантација. Трансплантацијата ја направи доктор Сашо Дохчев заедно со тимот од Урологија. Целата сторија погледнете ја на Канал 5

Шпанија глобален лидер за донирање органи

Ивона Петрова — Tue, 06 Feb 2018 08:51:19 +0000

Шпанија и понатаму е глобален лидер кога е во прашање донирањето органи и таа позиција ја задржува со години. Според податоците на шпанското Министерство за здравство, бројот на донатори во 2017 година се зголемил за повеќе од осум отсто. Вкупниот број донирани органи бил 2.183, соопшти министерството. Во Шпанија минатата година се пресадени рекордни 5.259 органи, најмногу бубрези и црн дроб. Шпанија има 46,9 донатори на милион жители што е уште еден рекорд, и таа стапка расте од година во година. Хрватска е на второ место зад Шпанија по број на донатори – во 2016 година имало 34,8 донатори на милион жители, но лани таа цифра е намалена на 32. МИА