дпи – Kurir.mk

Под клуч ставени уште пет маркети кои не ги продавале артиклите по „гарантирана цена“

Ристе Здравков — Thu, 28 Sep 2023 14:34:14 +0000

Државниот пазарен инспекторат (ДПИ) синоќа казнил и пломбирал уште пет маркети ширум земјава кои не ја испочитувале одлуката за ограничување на цените на дел од прехранбените производи за кои Владата одлучи дека ќе се продаваат по „гарантирана цена“ до 30 ноември. За ова на својот профил на Фејсбук информира првиот човек на Пазарен, Горан Трајковски. „Казнети се и затворени пет маркети во Кавадарци, Гостивар, Куманово и Тетово“.Во повеќе наврати напоменав дека секој мора да ги почитува законите и одуките на Владата. Исто така, нема да дозволам никој да ги манипулира и доведува во заблуда граѓаните – потрошувачите!“, напиша Трајковски на фејсбук.

Трајковски: Пазарниот инспекторат ќе продолжи да работи со засилени контроли на терен

Катерина Бојаџиева — Wed, 13 Sep 2023 13:28:20 +0000

Државниот пазарен инспекторат (ДПИ) ќе постапува кај сите субјекти, без селекција и без компромис, како и досега. Пазарниот инспекторат и понатаму останува да работи со засилени контроли на терен, се со цел да се заштити стандардот на граѓаните. Ги охрабрувам сите граѓани кои ќе забележат неправилности, веднаш да пријават во пазарниот инспекторат, изјави денеска директорот на ДПИ Горан Трајковски, по состанокот со министерот за економија Крешник Бектеши и раководителите на подрачните одделенија на инспекторатот. -Напоменувам дека од моето поставување на директор на оваа институција, во периодот од први јануари, заклучно со 31 јуни оваа година, направени се 16.400 надзори и издадени се над 3.700 налози во вредност од 140 милиони денари, рече Трајковски. Потенцира дека следејќи ги цените, порастот на инфлацијата и реакциите на граѓаните, за високите цени на производите, ДПИ како институција, нема надлежност, ниту пак може да влијае врз формирањето на цените на пазарот. -Од утврденото, може да се заклучи дека цените на прехранбените производи се енормно високи и ако Владата по предлог на Министерството за економија донесе одлуки во врска со намалување на цените, ДПИ ќе постапува кај сите субјекти, без селекција и без компромис, како и досега, рече Трајковски. Пазарниот инспекторат и понатаму останува да работи со засилени контроли на терен, како што кажа, се со цел да се заштити стандардот на граѓаните. -Ги охрабрувам сите граѓани кои ќе забележат неправилности, веднаш да пријават во пазарниот инспекторат, рече директорот. Трајковски информираше исто така дека ќе има зголемување на платите на вработените во Државниот пазарен инспекторат. На состанокот со Бектеши и со раководителите на подрачните одделенија се разговарало за моменталната ситуација на Државниот пазарен инспекторат, стратегијата за подобрување на работата на Инспекторатот, како и следните активности што ќе се преземат.

ДПИ за една недела извршил над 600 надзори и издал 110 прекршочни налози

Ивона Петрова — Thu, 25 May 2023 09:13:08 +0000

Државниот пазарен инспекторат во периодот од 15 до 21 мај извршил над 600 надзори низ целата држава, при што се констатирани неправилности, за што се издадени над 110 прекршочни платни налози во вредност од над 2.660.000 денари. Покрај овие надзори, Државниот пазарен инспекторат соопшти дека постапува и по одлуките донесени од Владата кои се однесуваат на замрзнување на цените, одредување на највисоки цени на одделни производи во трговијата на мало, како и обврска на увозниците и на трговците да доставуваат стоки по претходно утврден редослед. По овие одлуки, извршени се над 170 надзори, а издадени се 53 прекршочни платни налози во вредност од над 1,150,000 денари. Сите економски субјекти, имаат можност да си ги платат прекшочните платни налози, или да си го остварат своето право доколку имаат забелешка во судска постапка. Инспекторите кои што констатирале прекршок кај економските субјекти ќе се појавуваат на судските рочишта, и ќе ги застапуваат и бранат законите по кои што ги констатирале прекршоците, велат од ДПИ. Инспекторите и понатаму се на терен, и постапуваат во согласност со своите надлежности, вршат редовни и вонредни надзори и контроли. - Како институција постапуваме во согласност со законите, а кај оние економски оператори доколку е констатирано прекршување и непочитување на било кој закон за кој како пазарен инспекторат сме надлжени, се санкционира без селективност. Целта не е само да ги казнуваме вршителите на трговска дејност, туку на тој начин да се изврши едукација, преку која нема повторно да ја направат грешката. Дополнително, во секое време им стоиме на располагање на граѓаните. Доколку имаат некое прашање во врска со нашето работење, можат да ни се обратат, а ние соодветно ќе одговориме. Ги охрабруваме граѓаните, доколку забележат одредена неправилност или сомнеж за измама, а се однесува на нив како потрошувачи, веднаш да пријават кај нас во инспекторатот. Пријавите можат да се поднесуваат по електронски пат, на нашата веб страна https://www.dpi.gov.mk/index.php/mk/odnosi-so-javnost/prijava-od-gragjani/view/form или преку телефон на 02/3162 341, се наведува во соопштението од ДПИ.

ДПИ во април извршил 2670 надзори и издал 800 прекршочни платни налози

Катерина Бојаџиева — Fri, 05 May 2023 12:23:10 +0000

Државниот пазарен инспекторат (ДПИ) во април годинава извршил над 2670 надзори и за констатираните неправилности издал над 800 прекршочни платни налози во вредност од над 21,275,000 денари. Издадени за 295 платни налози по Закон за трговија, 105 по Закон за угостителска дејност, 72 по Закон за заштита од пушење и 290 по Закон за финансиска дисциплина, соопшти ДПИ. Покрај овие надзори, Државниот пазарен инспекторат постапува и по Одлуките донесени од страна на Владата кои се однесуваат на замрзнување на цените, одредување на највисоки цени на одделни производи во трговијата на мало, како и обврска на увозниците и на трговците да доставуваат стоки по претходно утврден редослед. По овие Одлуки од денот на нивното донесување, 07.10.2022 година, заклучно со 30 април 2023 година, извршени се над 4600 надзори, а издадени се прекршочни платни налози во вредност од над 16.260.000 денари. Сите економски субјекти, имаат можност да си ги платат прекшочните платни налози, или да си го остварат своето право доколку имаат забелешка во судска постапка. Инспекторите кои констатирале прекршок кај економските субјекти ќе се појавуваат на судските рочишта, и ќе ги застапуваат и бранат законите по кои што ги констатирале прекршоците. Практиката од непојавување на инспекторите на судските рочишта нема да ја има во иднина, посочуваат од ДПИ. Државниот пазарен инспекторат е и понатаму на терен, постапува во согласност со своите надлежности, врши редовни и вонредни надзори и контроли. - Во врска со поплаките од страна на граѓаните кои се однесуваат на високите цени на производите, сакаме да известиме и да потенцираме, дека ние како институција, немаме надлежност ниту пак можеме да влијаеме врз формирањето на цените на производите. Како институција постапуваме во согласност со законите, а кај оние економски оператори доколку е констатирано прекршување и непочитување на било кој закон за кој како пазарен инспекторат сме надлжени, се санкционира без селективност. Целта не е само да ги казнуваме вршителите на трговска дејност, туку на тој начин да се изврши едукација, преку која нема повторно да ја направат грешката. Дополнително, во секое време им стоиме на располагање на граѓаните. Доколку имаат некое прашање во врска со нашето работење, можат да ни се обратат, а ние соодветно ќе одговориме. Ги охрабруваме граѓаните, доколку забележат одредена неправилност или сомнеж за измама, а се однесува на нив како потрошувачи, веднаш да пријават кај нас во инспекторатот. Пријавите можат да се поднесуваат по електронски пат, на нашата веб страна https://www.dpi.gov.mk/index.php/mk/odnosi-so-javnost/prijava-od-gragjani/view/form или преку телефон на 02/3162 341, се наведува во соопштението од ДПИ.

ДПИ: Извршени над 650 надзори, наплатени преку 175 прекршоци вредни повеќе од 6 230 000 денари

Ивана Ефремовски — Thu, 23 Mar 2023 15:44:13 +0000

Државниот пазарен инспекторат (ДПИ) од 13.03 до 19.03.2023 година изврши над 650 инспекциски надзори на целата територија на државата при што наплати и издаде повеќе од 175 прекршочни платни налози со вредност над 6 230 000 денари. Според ДПИ, во горенаведениот период се извршени над 530 инспекциски надзори и контроли по одлуките за посебни услови за трговија на одделни стоки. Во некои економски субјекти се констатирани прекршоци за што се издадени прекршочни платни налози во висина од над 1 750 000 денари. -Државниот пазарен инспекторат врши континуирани инспекциски надзори кај трговците на големо и мало во делот на почитување на Одлуката за замрзнување на цената на лебот до 33 денари, Одлуката за определување обврска на трговците да прибавуваат и продаваат определени видови и количества на одделни стоки на потрошувачите според определен редослед и одлуките за определување највисоки цени за одделни производи во трговијата на мало. Државниот пазарен инспекторат и понатаму интензивно ќе спроведува контроли и надзори во согласност со своите надлежности. Нема да има отстапувања и ќе биде казнет секој оној кој пробал на било каков начин да изврши прекршување на законите по кои постапува пазарниот инспекторат, се наведува во соопштението. ДПИ нагласува дека како институција ќе ги ангажира сите расположливи ресурси за тековно постапување и спроведување на законските регулативи. -Пазарниот инспекторат постојано врши надзори и постапува во согласност со законите, годишниот и стратешкиот план за работа. Дополнително, покрај редовните контроли, постапува и по пријави доставени од граѓаните и им излегува во пресрет за секое прашање поврзано со нашите надлежности и делокруг на работа. Законите ќе важат исто за сите, без селективност, а секој што нема да ги почитува, ќе биде санкциониран. Надзори се вршат постојано, а пазарниот инспекторат функционира со својот полн капацитет, нагласува ДПИ.

Трајковски: Повеќе од 160 инспектори на терен, цените се намалени

Ивона Петрова — Thu, 16 Mar 2023 11:11:28 +0000

Повеќе од 160 инспектори се на терен низ државата, се постапува без никаква селекција, исклучиво според закон. Од утрово досега е евидентирано намалување на цените и нема нерегуларности, соопшти директорот на Државниот пазарен инспекторат (ДПИ) Горан Трајковски кој денеска заедно со премиерот Димитар Ковачевски и министерот за економија Крешник Бектеши посети скопски маркет по повод владините одлуки за новите, замрзнати цени на тестенините и млечните производи. Како што информира Трајковски, детални податоци од инспекциските надзори ќе бидат соопштени во текот на денот или утре. Според него, ДПИ ќе ги објави имињата на субјектите ако утврди нерегуларности. -ДПИ постапува со полн капацитет. По увидот на фактичката состојба, во текот на денот ќе можеме да дадеме подетални информации. Досега има намалување на цените и од утрово нема нерегуларности. Би сакал да причекам додека не го добијам деталниот извештај па до крајот на денот или максимум утре да излеземе со детални информации. ДПИ ќе ги објави имињата на субјектите ако утврди нерегуларности зашто одлуките се во интерес на граѓаните. Ова нека биде поттик трговците самосвесно да ги намалат цените, истакна Трајковски. Тој потсети дека казните за евентуалните непочитувања на одлуките се од 800 до 10 000 евра. -Апелирам, со оглед дека имаа шест дена период трговците да се прилагот за почитување на одлуката, тоа да го направат зашто санскиите се високи, од 800 до 10 000 евра, а надзорите ќе се вршат до крај и по закон, потенцира директорот на ДПИ.

Инспекторите од денес на терен: Казни до 10.000 евра ако не се почитува намалувањето на цените на тестенините и млечните производи

Ивона Петрова — Thu, 16 Mar 2023 07:09:44 +0000

Владините одлуки за намалување на цените на тестенините и млечните производи од денес официјално стапуваат во сила, а трговците до сега требаше да ги усогласат цените според Одлуките, соопштија од Државниот Пазарен Инспекторат. -Од утре инспекторите ќе бидат на терен и ќе вршат контроли за да се утврди дали трговците постапиле во согласност со Одлуките! Инспекторите ќе постапуваат во рамки на нивните надлежности кои произлегуват од Одлуките, а согласно тоа и според Законот за трговија. Станува збор за искусни професионалци, со долгогодишно работно искуство во сферата на пазарната инспекција, што значи дека сме апсолутно подговени да се соочиме и со овој предизвик, велат од ДПИ. Контролите ќе се вршат над производите кои ги опфаќаат Одлуките за определување на највисоки цени за одделни производи во трговијата на мало (Службен весник на РСМ бр. 52/2023), односно: тестенини неварени, неполнети ниту поинаку приготвени, што не содржат обично пченично брашно или гриз, без додаток на јајца (макарони и шпагети) чија највисока цена на овие производи од ставот се утврдува на нивото на цените кои се применувале на 1 март 2023 година, во трговијата на мало, и се намалуваат за 15%; трајно кравјо млеко со масленост од 2,8%, 3,2% и 3,5%; урда; кравјo бело сирење и мешано бело сирење; кравји кашкавал (со исклучок на кравји кашкавал без додатоци и пармезан); кисело млеко; павлака и jогурт, без додатоци, а највисоките цени на наведените млечни производи се утврдуваат на нивото на цените кои се применувале на 1 март 2023 година, во трговијата на мало, и се намалуваат за 10%. Начинот на кој ќе се постапува доколку некој од економските оператори дејствува спротивно од Одлуките е предвиден во Законот за трговија. Во случај да се утврди прекршување на Одлуките ќе следат казни кои произлегуваат од Законот за трговија! Казните се високи и изнесуваат од 800 до 10000 евра, во зависност од големината и видот на економскиот оператор. Од ДПИ напоменуваат дека пазарна ќе постапува исклучиво по однос на контрола на цените утврдени со Одлуките, но нема надлежност да постапува, ниту пак да влијае врз формирање на цени во трговијата на големо и трговијата на мало. -Апелираме да се почитуваат Одлуките, а исто така ги повикуваме граѓаните доколку забележат неправилности веднаш да пријават во пазарниот инспекторат. Работиме во интерес на граѓаните и токму затоа се донесени овие Одлуки, за да се помогне во време на економска криза која сеуште постои и да се спречи личното профитерство и злоупотреба, велат од ДПИ.

Пазарна најави контроли: Високи казни ако не се почитува поевтинувањето на тестенините и млечните производи

Ивона Петрова — Fri, 10 Mar 2023 14:39:56 +0000

Владата донесе Одлуки за определување на највисоки цени за одделни производи во трговијата на мало со кои се опфатени: тестенини неварени, неполнети ниту поинаку приготвени, што не содржат обично пченично брашно или гриз, без додаток на јајца (макарони и шпагети) чија највисока цена на овие производи се утврдува на нивото на цените кои се применувале на 1 март 2023 година, во трговијата на мало се намалуваат за 15%. Највисоките цени на млечните производи се утврдуваат на нивото на цените кои се применувале на 1 март 2023 година, во трговијата на мало, и се намалуваат за 10%. Тука влегуваат: трајно кравјо млеко со масленост од 2,8%, 3,2% и 3,5%; урда; кравјo бело сирење и мешано бело сирење; - кравји кашкавал (со исклучок на кравји кашкавал без додатоци и пармезан); кисело млеко; павлака и јогурт, без додатоци. Одлуките ќе стапат во сила на 16 март 2023 година, а од Пазарниот инспекторат истакнуваат дека ова е доволен временски период за трговците да ги прилагодат цените. -Апелираме да се почитуваат Одлуките, затоа што во спротивно, без селекција, ќе следат казни, кои според Законот за трговија се исклучително високи! Исто така, апелираме, доколку граѓаните забележат било какви неправилности кои се поврзани со цените на производите веднаш да пријават во Државниот пазарен инспекторат! Напоменуваме дека Државниот пазарен инспекторат ќе постапува исклучиво по однос на контрола на цените утврдени со Одлуките, но нема надлежност да постапува, ниту пак да влијае врз формирање на цени во трговијата на големо и трговијата на мало. Веднаш по стапувањето во сила на овие Одлуки, пазарниот инспкеторат, ќе излезе на терен и ќе постапува. Работиме во интерес на граѓаните, токму затоа и се донесени Одлуките, да се спречи било каква злоупотреба и лично профитирање во време кога кризата сеуште постои. Пазарниот инспекторат е постојано на терен со сите свои расположливи ресурси и ќе продолжи да врши надзори во согласност со законските надлежности, но и ќе постапува по Одлуките на Владата. Во случај да се утврди прекршување на Одлуките ќе следат казни кои произлегуваат од Законот за трговија! Казните се високи и изнесуваат од 800 до 10000 евра, во зависност од големината и видот на економскиот оператор. Затоа апелираме да се почитуваат Одлуките, а ние како институција постојано сме на терен, постапуваме во согласност со нашите надлежности, се вели во соопштението.

Државен пазарен инспекторат: За два дена проверени над 460 економски субјекти, цената на белиот леб е од 25 до 33 денари

Тале Кристо — Fri, 03 Mar 2023 15:19:03 +0000

Државниот пазарен инспекторат (ДПИ) информира дека е континуирано на терен и врши надзори со сите свои расположливи ресурси, како за одлуката за замрзнување на цената на лебот на 33 денари, така и за решението што ги обврзува трговците да доставуваат и продаваат леб. Во изминатите два дена, како што соопштија денеска од ДПИ, проверени се над 460 економски субјекти, а забележано е дека цената на белиот леб се движи од 25 до 33 денари. - Дури на некои места, леб со поголема грамажа од предвидената во Одлуката се продава по 33 денари. Генерално се почитува владината Одлука за замрзнување на цената на лебот до 33 денари, но имаше и такви трговци кои ја прекршиле оваа Одлука, за што беа изречени казни во висина од над 300.000 денари, се наведува во соопштението. Од ДПИ најавуваат дека е континуирано на терен со сите свои расположливи ресурси и ќе врши надзори каде ќе утврдува која е минималната количина на лебот што ја опфаќаат Одлуките на Владата, која на дневна основа мора да се набавува и продава од страна на трговците и ќе ја контролира крајната продажна цена до 33 денари. - Ако се утврди прекршување на Одлуките, ќе следат казни кои произлегуваат од Законот за трговија! Казните се високи и изнесуваат од 800 до 10.000 евра, во зависност од големината и видот на економскиот оператор. Затоа апелираме да се почитуваат Одлуките, а ние како институција постојано сме на терен, постапуваме по Одлуките и останатите наши надлежности, се додава во соопштението од ДПИ.

ДПИ: Двете изјави што се бараат за упис на УКИМ да се изземат од документацијата

Тале Кристо — Tue, 23 Aug 2022 12:30:57 +0000

Скопје, 23 август 2022 (МИА) – Државниот просветен инспекторат (ДПИ) му наложи на Универзитетот „Св. Кирил и Методиј“ и факултетите во негов состав да не им бараат на идните студенти Изјава за неконкурирање на друг универзитет и Изјава за неподигање документи при упис во академската 2022/2023, затоа што е тоа спротивно на Законот за високо образование. Директорот на ДПИ, Ардиан Муслиу за МИА изјави дека вчера бил извршен вонреден инспекциски надзор на УКИМ, а Решението за изземање на двете изјави од документацијата што студентите ја доставуваат за упис, било издадено усно поради итноста, односно поради тоа што е во тек електронското аплицирање на кандидатите за запишување на факултетите и поради рокот определен за запишување на кандидатите кој истекува за неколку дена. Надзорот на ДПИ ги потврдил поплаките на студентите, односно е констатирано дека во електронска апликација, iKnow-системот за упис на студентите во академска 2022/2023, покрај останатите документи кои треба електронски да ги пополнат, задолжително треба да пополнат и подоцна, при нивната достава во хартиена форма, да потпишат Изјава за неконкурирање на друг универзитет и Изјава за неподигање документи. Со изјавата за неконкурирање на друг универзитет, кандидатот се обврзува да конкурира само на една од единиците на Универзитет „Св. Кирил и Mетодиј“ – Скопје и на ниту еден друг универзитет, додека со Изјавата за неподигање на документите кандидатот се обврзува дека во рок од три месеци нема да ги подигне оригиналните документи кои ги доставил при уписот. Наведените изјави задолжително требало да ги пополнат и потпишат сите апликанти за запишување на прв циклус на студии во академската 2022/2023 година на сите единици на Универзитет „Св. Кирил и Методиј“-Скопје. – Наведеното е спротивно на член 27, став 2, алинеја 1 од Законот за високото образование, како и спротивно на член 158, став 5, од Законот за високото образование, рече Муслиу за МИА и соопшти дека претставникот на субјектот на надзор изјавил дека уште веднаш ќе се обрати до службениците задолжени за одржување на iKnow-системот да ги тргнат изјавите од електронската апликација. Директорот на ДПИ посочи дека поради итноста односно затоа што е во тек електронското аплицирање за упис на факултет, како и поради рокот определен за запишување на кандидатите кој истекува за неколку дена, согласно член 83, став 6, од Законот за инспекциски надзор, од страна на советниците државни просветни инспектори задолжени за постапување по предметот, дадено е усно Решение за изземање на двете изјави од документите кои студентите треба да ги пополнат, потпишат и достават при аплицирање за студирање на прв циклус на студии на единиците на Универзитетот „Св. Кирил и Методиј“. Решението на ДПИ, исто така, наложува и да биде доставена информација до сите единици на Универзитетот во иднина да не ги бараат наведените изјави. Согласно Законот за инспекциски надзор, ќе следува и Решение за отстранување на незаконитоста во работењето на Универзитет „Св. Кирил и Методиј“.