драган даравелски – Kurir.mk

Судот го ослободи Драган Даравелски, пресудата му се укинува

Ристе Здравков — Tue, 14 Mar 2023 12:19:22 +0000

Судечкиот совет кој постапува по предметот против обвинетиот Д.Д. постпаувајќи по обвинителниот акт на ОЈО од 18.4.2005 година за кривичните дела злоупотреба на службена положба и овлатување донесе НЕПРАВОСИЛНО РЕШЕНИЕ со кое кривичната постапка против Д.Д. се запира поради настапување на апсолутна застареност, а пресудата со К.бр. 809/05 се укинува. – По барање за повторување на постапката против обвинетиот Д.Д., доставено од неговиот бранител на 10.01.2023 година, за кое барање Кривичниот совет со решение КПОВ бр. 40/23 дозволи повторување на постапката, а истото решение беше потврдено од Апелациониот суд, беше формиран предмет со К.бр. 414/23 кој согласно АКМИС системот беше распредлен на понатамошно постапување. Претседателот на судечкиот совет, надовр од главен претрес, констатира дека е настапена апсолутна застареност за кривичното гонење, на дело сторено во период од 2001 до 2002 година со оглед да: Согласно член 353 ст.1 од КЗ објавен во Службен весник на 29.07.1996 год. а кој бил во важност за време на сторување на делотот, „службеното лице кое со искористување на својата службена положба или овластување ќе прибави значителна имотна корист или нанесе значителна штета ( став 3) ќе се казни со затвор од 1 до 10 години“. Соглансно член 107 ст.1 од истиот Закон „кривичното гонење не може да се преземе кога ќе поминат 10 години од извршувањето на делото“, а согласно член 108 ст.6 од истиот Закон „застареноста на кривичното гонење настапува во секој случај кога ќе помине двапат онолку време колку што се бара за застареност на кривично гонење“ – велат од Кривичен. Судот утврди дека во конкретниот случај апсолутната застареност настапила на 1.12.2022 година. Против ова неправосилно решени странките имаат право на жалба пред Апелационот суд Скопје.

За Даравелски во Кривичен е оформен предмет и се чека да се закаже рочиште

Катерина Бојаџиева — Tue, 21 Feb 2023 14:35:55 +0000

Повторување на постапка за поранешниот директор на Царина Драган Даравелски е дозволено. Оформен е предмет и ќе видиме, ќе се цени дали има пречки за водење на постапката, а тоа е застареност на делото. Ќе видиме, но сега за сега се чека да се закаже рочиште, па ќе видиме, велат од Основниот кривичен суд. Од Основниот кривичен суд, денеска на брифинг со медиуми, во однос на случајот со Даравелски, посочуваат дека одлуката е согласно вториот протокол на Европската конвенција за екстрадиција, согласно што нашата држава дала гаранција на правото за повторно судење во 2015 година, кога бил приведен во Белград и било побарано негова екстрадиција. - Ставот два од истиот член упатува вели дека „кога замолената страна ќе го извести лицето за кое што е побарана екстрадиција, за тоа дека е донесена пресуда во негово отсуство, ова известување страната молител нема да го смета за формална нотификација“. Тоа значи дека не тече рокот од една година, иако сите знаеме дека бил во притвор, знаел и бил известен за пресудата, појаснуваат од Кривичен суд. Двата услови, посочуваат од Кривичен суд, се исполнети во член 456 – Повторување на постапка на лице судено во отсуство од Законот за кривична постапка од 2013 година, кој што го применуваме. Ставот 1 од член 456 гласи „Кривичната постапка во која некое лице е осудено во отсуство, а настапила можност повторно да му се суди во негово присуство, ќе се повтори и надвор од условите предвидени во членот 364 од овој закон, ако осудениот или неговиот бранител поднесе барање за повторување на постапката во рок од една година од денот кога осудениот дознал за пресудата со која е осуден во отсуство“, додека став 2 од истиот член гласи „надвор од случаите предвидени во ставот (1) на овој член судот во секој случај ќе дозволи повторување на постапката, доколку против лицето осудено во отсуство во тек е постапка за екстрадиција и доколку државата во која се наоѓа лицето бара гаранции дека на лицето ќе му се дозволи право на повторно судење во негово присуство“. Ова истото, посочуваат од Кривичен, е во однос и на аболицијата. Кривичниот совет на Основниот кривичен суд Скопје, дозволи повторување на кривичната постапка против Драган Даравелски кој беше осуден на седум години затворска казна за кривично дело „Злоупотреба на службената положба и овластување. Според пресудата, тој го оштетил државниот буџет за 2,5 милиони евра во периодот од 1999 до 2002 година. Министерството за правда повеќе пати побара негова екстрадиција, откако тој пребегна во Србија. Даравелски беше уапсен во Белград во 2016 година по потерница од македонските власти, но тогаш српските власти не го екстрадираа, бидејќи имал српско државјанство. Тој минатиот месец беше уапсен на граничниот премин Табановце при обид за влез во државава откако по промената на власт во 2002 година пребегна во Србија. аа/нд/

Даравелски по 20 години снимен во јавност (ВИДЕО)

Ристе Здравков — Wed, 15 Feb 2023 13:03:15 +0000

По 20 години од неговото бегство, телевизија Телма успеа да го сними денешниот изглед на Драган Даравелски, поранешниот директор на Царинската управа. Тој излезе од затвор по 35 дена минати во Идризово и воопшто не застана пред новинарот да даде било каква изјава. Надвор пред затворот го чекаа два автомобила со затемнети стакла, а тој се качи во еден од нив и се упатија кон Куманово. Осуденикот на седум години затворска казна очекува ново судење на кое ќе биде ослободен поради застареност на делото. фото+видео: telma

На Даравелски повторно ќе му се суди

Ивона Петрова — Tue, 14 Feb 2023 14:01:12 +0000

Кривичниот совет на Основниот кривичен суд Скопје, дозволи повторување на кривичната постапка против Драган Даравелски кој беше осуден на седум години затворска казна за кривично дело „Злоупотреба на службената положба и овластување. Тој минатиот месец беше уапсен на граничниот премин Табановце при обид за влез во државава одкако по промената на власт во 2002 година пребегна во Србија. Основното јавно обвинителство поднело жалба против решението на Советот, а денеска е добиена одлука на Вторстепениот суд со која решението на Кривичниот совет се потврдува во целост. Решението во текот на денешниот ден ќе биде доставено до странките и КПУ Идризово, соопшти денеска Основниот Кривичниот суд Скопје. -По добиено барање од адвокатот на Даравлески за повторување на кривичната постапка, оформи предмет и изврши увид во списите на кривично правниот предмет К.бр. 809/05, предметот за извршување на досудената санкција на Основниот суд Куманово со КУИКП бр. 162/10, предметот на кривичниот совет со КС – КР бр. 1085/15, известувањето од КПУ Идризово и прибави мислење од надлежното ОЈО Скопје. Постапувајќи по барањето и по детална анaлиза на прибавените списи и докумeнтација, Кривичниот совет на 3 февруари 2023 година донесе решение со кое утврди дека барањето е основано и се дозволува повторување на кривичната постапка против обвинетиот, се наведува во соопштението на Судот. Советот, како што се наведува, го ценел чл.3 ст.2 од Втор додатен протокол на Европската конвенција за екстрадиција како и одредбата од чл.424 ст.1 од ЗКП, според која кривичната постапка во која некое лице е осудено во отсуство, а настапила можност повторно да му се суди во негово присуство ќе се повтори ако осудениот или неговиот бранител поднесе барање за повторување на постапката во рок од една година од денот кога осудениот дознал за пресудата со која е осуден во отсуство. Од Судот појаснуваат дека кривичната постапка против обвинетиот Драган Даравелски не е запрена, односно со конкретното решение се дозволува повторување на постапката и ќе биде оформен нов предмет кој ќе биде распределен на понатамошно постапување. Според пресудата, тој го оштетил државниот буџет за 2,5 милиони евра во периодот од 1999 до 2002 година. Министерството за правда повеќе пати побара негова екстрадиција, откако тој пребегна во Србија. Даравелски беше уапсен во Белград во 2016 година по потерница од македонските власти, но тогаш српските власти не го екстрадираа, бидејќи имал српско државјанство.

Пресудата за Даравелски испишана на 100 страници, по 15 години тој бара повторување на постапката

Ивона Петрова — Tue, 17 Jan 2023 11:53:49 +0000

Без постоење одлука на Царинската управа, без одлука на Владата и без обезбедени средства од Министерството за финансии, поранешниот директор на Царинската управа Драган Даравелски набавувал патнички возила од „Евро кар“ Битола и од Са&Са Компани од Скопје. Даравелски заедно со раководителот на сектор за организациони кадровски имотно правни и финансиско материјални работи во Царина, Киро Доцевски покрај бесправно набавените возила, од депозитната сметка исплаќале физички лица за наводно извршени повремени работи за Царинската управа и доделувале спонзорства со што во 2001 и 2002 година, на штета на Буџетот на државата прибавиле имотна корист од над 1 милион и 650 илјади евра. Ова е наведено во пресудата за Даравелски и Доцевски, во која тогашната претседателката на судечкиот совет Татјана Дуковска, поранешниот директор на Царинската Управа го осуди на седум години затворска казна, додека пак раководителот на сектор за финансиско работење на четири години и десет месеци. И двајцата се осудени за кривично дело „Злоупотреба на службената положба и овластување, а Доцевски дополнително и за „Фалсификување службена исправа. Даравелски пресудата во 2007 година ја дочека во бегство. Тој по промената на власт во 2002 година пребегна во Србија, а за него се отвори обвинителен акт и започна судска постапка. Министерството за правда повеќе пати побара негова екстрадиција, Даравелски беше уапсен во Белград по потерница од македонските власти, но тогаш српските власти не го екстрадираа, бидејќи имал српско државјанство. После две децении поранешниот директор на Царинската управа на 10 јануари годинава се врати во земјава, а на преминит „Табановце“ веднаш беше уапсен и пренесен во затворот во Идризово. Наредните денови актуелно беше толкувањето дали делото на Даравелски е застарено на што веднаш одговори судот од Куманово дека извршувањето на изречената казна затвор не застарува со оглед што Основниот суд Куманово по приемот на правосилната пресуда преземал повеќе дејствија, со кои текот на застарувањето на извршувањето на казната е прекинувано. Истиот ден адвокатскиот тим на Даравелски побара повторување на постапката, поради, како што е наведено, донесена пресуда во отсуство, односно додека Даравелски беше во бегство. Во пресудата од околу 100 страни, во која МИА направи увид, покрај набавката на возилата и спонзорствата, Даравелски во времето додека беше директор на Царинската управа, а во државава имаше воен конфликт, во појаснувањето е наведено дека тој и Доцевски преку АД „Бисерка“ од Куманово исплаќале фактури за наводна набавка на храна и вода за одбранбените сили, за војската и полицијата, за што сведоците од Министерствата за одбрана и за внатрешни работи потврдиле дека таква помош бранителите не добиле. Во тој воен конфликт од 2001 година за жал животот го загубија над 80 бранители, а стотици беа исселени од своите домови. Како се одвивала злоупотребата на државните пари според пресудата Даравелски како директор и Доцевски како раководител на сектор во Царина, по претходен договор искористувајќи ја својата положба и овластување и пречекорувајќи ги границите на своето службено овластување, извршиле набавка на патнички возила „Шкода фелиција“ во износ од 47.309.145 денари од „Евро кар“ Битола, за што Даравелски со профактура авансно од жиро сметка на Царина со ЗПП образец од 25 декември 2000 година, потпишан од негова страна префрлил 35.482.635 денари, а обвинетиот Коцевски со четири налога од 23 мај, 5 јуни, 28 јуни и 28 декември 2001 година од депозитната сметка на Царинската управа префрлил 11.826.510 денари на „Евро Кар“ и на Са&Са Компани за две патнички возила „Ауди А6“ во вкупна вредност од 3.351.502. Сето ова, според судот го направиле без постоење на одлука на Царинската управа за потребата за набавка на возила како и без претходно да се обезбедат средства од Министерството за финансии. Во август 2017 година Владата предводена од Зоран Заев откри дека нивните претходници исплаќале службеници кои никојпат не се појавиле на работа, но почетоците на таквата пракса на плаќање работници со државни пари без да се појават на работа најверојатно се од 2001 година. Во пресудата за Даравелски судечкиот совет појаснува дека без одлука на Владата, без претходно склучен договор, Даравелски и Доцевски префрлиле вкупно 2.432.698 денари на Младинска задруга „Леон“ од Куманово од депозитната сметка на Царина која е наменета за времено собирање средства поврзани со царинска постапка, како и од 2002 година од сметката при Стопанска банка каде мигририрала депозитната сметка и сметката во Комерцијално инвестиционата банка Куманово, на име повеќе физички лица кои немале склучено Договор за дело, а за наводно извршени повремени или привремени работи за потребите на Царинската управа. Со 15 вирмани потпишани од Доцевски, се наведува во пресудата, извршено е вкупно 1.662.302 денари префрлање од депозитната сметка на Царинската управа на Младинската задруга „Леон“ од Куманово на име на исплата на повеќе физички лица за работно ангажирање и извршување повремено и привремено работи во Царинската управа иако знаеле дека 25 од нив не биле работно ангажирани, не извршувале повремено и привремено работи и не евидентирале во списоците доставени во царинските испостави како ангажирани лица и за кои од префрлените средства е извршена нето исплата од вкупно 820.926 денари. Судијката Дуковска во пресудата наведува дека Даравелски и Доцевски со вкупно доделување на 86.081.067 денари на име спонзорство од депозитната сметка на Царина и од сметката на Стопанска банка и Комерцијално инвестиционата банка Куманово, на штета на Буџетот на РМ во 2001 и 2002 година прибавиле значителна имотна корист во вкупен износ од 103.576.167 денари, од кои во 2001 година износ од 65.381.198 денари и 38.196.969 денари во 2002 година, за повеќе физички и правни лица во РМ. При тоа Доцевски во повеќе службени исправи-договори за цесија, внесувал невистинити податоци лажно прикажувајќи долгување на Царинската управа према повеќе правни лица. Тоа го правел на начин што од набавените 75 патнички возила Шкода фелиција по цена од по 728.045 од Евро кар Битола и двете патнички возила Ауди А6 од Са&Са Компани, по цена од 1.649.326, односно 1.702.176.00, 25 патнички возила Шкода фелиција без постоење на правен основ отстапиле: едно на ЈП за Стопанисување со спортски објекти, по едно на општините Самоков, Јегуновце, Другово, Маврови анови, Подареж, Конче, Карбинци, Орашец, Вранешница, Илинден, Вратница, Конопиште, Добрешево, Пласница, Кривогаштани, Витолиште, Новеци, Тополчани, Долнени, Центар Жупа, Сопотница, Петровец и две на Гази Баба. За сето ова да го пркријат, според пресудата, Доцевски по налог на Даравелски во 25 службени исправи – Договори за цесии внел невистинити податоци, лажно прикажувајќи дека Царинската управа има финансиски долг према сите 25 правни лица, на кои им биле отстапени возилата, потпишувајќи ги во име и заверувајќи ги со службен печат на Царинската управа, а двете возила „Ауди А6“ без правен основ и без одлука на Владата за преотстапување на основни средства ги отуѓиле на Општина Чаир и на Брегалничката Епархија од Штип. -Откако со инструктивни телеграми бр.02-371/1 од 31.01.2001 г. и бр. 05-4958/1 од 28.12.2001 г. Драган Даравелски незаконски ги обврзал Царинските испостави во Република Македонија средствата наплатени по разни основи, наместо во Буџетот на РМ да ги уплатуваат на депозитната сметка на Царинската управа со што обезбедил прилив на парични средства и од кои донел одлука бр.02-859/2 од 14.03.01 со која се овластил сам себе да доделува спонзорство и финансиска помош, пречекорувајќи ги границите на своите службени овластувања и двајцата обвинети и тоа Даравелски со 48 потпишани налози, а Доцевски со 109 налога на штета Буџетот на РМ на име спонзорство и плаќање по доставени фиктивни фактури, префрлиле од депозитната сметка на Царинската управа вкупно 49.495.870 денари на повеќе физички и правни лица прибавувајќи им имотна корист. На ФК Куманово каде Даравелски бил претседател и потписник на жиро-сметката во 2001 година префрлиле износ од 18.268.280 денари од кои преку жиро сметка ОФС –Куманово износ од 14.018.280 денари во период кога жиро сметката на ОФК Куманово била блокирана, а на 16 јули 2001 година по профактура бр.0195/01 извршил уплата на 1.775.790 денари на Прима ауто од Битола за набавка на автобус марка „Застава ивеко“ за потоа Доцевски во службената исправа – Договор за цесија склучен помеѓу ФК Куманово, Прима Ауто и Царинската управа лажно прикаже дека Царинската управа има финансиски долг кон ФК Куманово заверувајќи ја со свој потпис и печат од Царинската управа, се наведува во пресудата. На АД „Бисерка“ од Куманово префрлиле пари прибавувајќи имотна корист од вкупно 7.953.240 денари и тоа на име ноќевање на кошаркарите и користење хотелски услуги во хотел КУБА од Куманово 868.800 денари, иако немало склучен договор за користење на услуги, ниту пак истите се дадени, со налог од 16 август 2001 потпишан од Доцевски по фактура од АД „Бисерка“ одобриле префрлање од 1.000.000 на име „појачана исхрана“ на времено раселените лица од Кумановскиот регион, а за кои плаќање се вршело од МТСП врз основа на договор 10-2845/701 од 2 јули 2001 година склучен меѓу Министерството за труд и социјална политика и АД „Бисерка“ на 5.770.000 денари Исплатите кон АД „Бисерка“ продолжиле и за наводно испорачани прехранбени артикли за потребите на одбранбените сили – полиција и војска врз основа на доставени фактури, кои не биле поткрепени со пропратна документација и за наводно испорачани сендвичи износ од 314.440 денари, потоа за ракометниот клуб жени од Куманово во износ од 1.100.000 денари, за ракокметниот клуб мажи во износ од 1.000.000 за Кошаркарскиот сојуз на Македонија во износ од 108.000 денари, за АЛБ – АСС Тетово во износ од 30.000 денари…… Злоупотреба на своето овластување, според пресудата, Даравелски направил кога од обезбеден прилив на парични средства на депозитна сметка на Царинската управа со претходно доставените инструктивни телеграми во 2001 година до Царинските испостави во РМ и спротивно на овластувањата во донесената одлука бр.02-10/1 од 8 јануари 2002 година, со која поранешниот директор на Царинската управа се овластил самиот себеси да доделува спонзорства и финансиска помош од депозитната сметка на Управата. Префрлени се вкупно 36.585.197 денари на повеќе физички и правни лица. Во пресудата, судијката Дуковска им изрекува забрана за вршење на професија, дејност или должност во траење од 5 години од денот на правосилноста на пресудата на Даравелски и Доцевски и наведува дека им се запленува имотната корист во вкупен паричен износ од 105.575.167 денари. Откако завршија сите жалбени процедури и отстранети сите правни пречки, во 2010 година државата започна да го запленува имотот што успеваше да го детектира. Од Даравелски одземени се стан во центарот на Скопје од 119 метри квадратни, деловен простор во Куманово, а од Доцевски стан во Куманово од 74 метри квадратни. Државата во 2010 година конфискуваше акции од компаниите поврзани со Даравелски, како што се „Југоопрема“, кумановската фабрика за тули „КИК“, „Козјак“, „Трготекстил“ од Скопје и ЗИК „Скачковце“ од Куманово, но и од ИК Банка и СТАТЕР банка од Куманово. МИА

Адвокатот на Даравелски побара повторување на постапката

Ивона Петрова — Wed, 11 Jan 2023 13:05:00 +0000

Поради донесена пресуда во отсуство, адвокатот на Драган Даравелски побарал повторување на постапката, информираше денеска Основниот кривичен суд Скопје. – Согласно барањето оформен е предмет кој е распределен пред надлежен Кривичен совет за понатамошно постапување. Советот, во однос на барањето, согласно законските надлежности првично ќе се обрати за податоци до установата каде истиот е на издржување на казната затвор, а потоа предметот ќе го прати на мислење до Основното јавно обвинителство. По комплетирање на списите, Советот закажува седница и по донесената одлука странките и јавноста ќе бидат благовремено известени, појаснуваат од Судот. Од Кривичен известуваат дека евентуалното застарување на извршувањето на санкцијата односно застарувањето на кривичниот прогон, го утврдува Судот според местото на последно живеалиште на осуденикот, односно Основниот суд во Куманово, а во однос на застарување на кривичното гонење одлучува Основниот кривичен суд Скопје при евентуална повторена постапка. Поранешниот директор на Царина, Драган Даравелски беше осуден во отсуство во 2007 година за „Злоупотреба на службената положба и овластувања“ и тој се бараше со меѓународна потерница. Според пресудата, тој го оштетил државниот буџет за 2,5 милиони евра во периодот од 1999 до 2002 година. Министерството за права повеќе пати побара негова екстрадиција, откако тој пребегна во Србија. Даравелски беше уапсен во Белград во 2016 година по потерница од македонските власти, но тогаш српските власти не го екстрадираа, бидејќи имал српско државјанство. Тој вчера беше уапсен на граничниот премин „Табановце“.

ДАРАВЕЛСКИ ОСТАНУВА ВО ЗАТВОР – од судот велат дека казната за криминалот кој го сторил не застарела

Дарко Андоновски — Wed, 11 Jan 2023 11:01:13 +0000

Поранешниот директор на Царинската управа, Драган Даравелски останува во затворот во Идризово. Од Министерството за правда за „Фокус“ информираат дека судот во Куманово сепак пресметал дека на Даравелски, не му е застарено извршувањето на казната, што значи дека засега тој останува во затвор. „Во однос на застареноста, неа ја констатира надлежен суд. Од известувањети кое го добивме од судот во Куманово апсолутна застареност на извршувањето на казната по пресуда на Основниот суд Скопје 1,К.бр.809/05 настапува на 26 .03 2028 година“, одговориле од Правда. Од таму додаваат дека последен пат е барана екстрадиција во јуни 2020 година, а претходно во 2004 и 2013 година. Всушност последното барање од пред две години го помести рокот на застарување, затоа и апсолутната застареност е во 2028 година. Дараврлски вчера беше уапсен на граничниот премин „Табановце“, по 20 години поминати во бегство.

Даравелски ќе биде слободен човек, му застареле делата и ќе биде ослободен од затвор!

Тале Кристо — Tue, 10 Jan 2023 14:49:03 +0000

На поранешниот функционер и бегалец од правдата Драган Даравелски, кој денеска беше уапсен на граничниот премин Табановце при влез во Македонија, му застареле делата и најверојатно брзо ќе биде ослободен од затвор, велат за Плусинфо доброупатени извори. Изворите велат дека Даравелски решил да влезе во Македонија откако преку неговите адвокати се уверил дека неговите дела се застарени и не може да биде задржан на издржување на затоврската казна која му е досудена во 2007 година. По неговото денешно апсење ќе бидат потребни само неколку денови за тоа официјално да биде констатирано, по што тој ќе биде слободен граѓанин, велат изворите на Плусинфо. Поранешниот функционер и бизнисмен Драган Даравелски, кој со години беше азилант во Белград, откако беше осуден во отсуство, денеска беше уапсен на граничниот премин Табановце и однесен во затворот Идризово на отслужување на затворската казна. Даравелски беше директор на Царинската управа, а во 2007 година беше осуден во отсуство на 7 години затвор, по што беше баран со потерница на Интерпол. Во 2016 година беше уапсен во Белград, но не беше екстрадиран, а и до ден денешен не се изврши неговата екстрадиција. Тој е осуден за злоупотреба на службената должност и овластување и оштетување на државниот буџет за 2,5 милиони евра. И неговиот заменик, второобвинетиот Киро Доцевски, беше осуден за истото дело, а судот одлучи на двајцата да им се заплени имотот.

Приведен Драган Даравелски на „Табановце“

Дарко Андоновски — Tue, 10 Jan 2023 13:25:39 +0000

Полицијата денеска го приведе поранешниот директор на македонската Царинска управа, Драган Даравелски, информираат од МВР за „360 степени“. „Денеска (10.01.2023) на ГП ‘Табановце’ е приведен Д.Д., кој се бараше со меѓународна потерница, и ќе биде пренесен во надлежната казнено-поправна установа“, соопштија од МВР. Драган Даравелски е поранешен директор на Царинската управа кој е осуден за злоупотреба на службената положба во Царината во периодот од 1999 до 2002 година во вредност од над 2 милиони евра. По изречената пресуда во 2007 година, за Даравелски следуваа и низа кривични пријави за злоупотреба на службената должност и овластувања по разни основи, а меѓу нив најтешката е за неуплатување на приходите од царините во Буџетот на државата. Неговиот заменик, второобвинетиот Киро Доцевски, беше обвинет за истото дело, но и за фалсификување службена исправа. Според обвинението, државата била оштетена за 2,5 милиони евра. Судот тогаш одлучи на двајцата да им се заплени имот во висина од 103 575 167 денари. Даравелски беше баран со потерница на Интерпол. Тој во 2016 година беше уапсен во Белград, но не се случи неговата екстрадиција бидејќи српските власти ја прекинаа постапката неколку минути пред примопредавањето откако со задоцнување дознаа дека Даравелски има српско државјанство. Како што посочуваат од Министерството за правда, последната екстрадиција од Србија била барана во јуни 2020 и досега нема одговор на барањето. Претходно, екстрадиции биле барани во 2004, 2013 и 2016 година.