драган николиќ – Kurir.mk

Николиќ: Ме направија сериски убиец, ова е пекол за мене!

Бошко Тасиќ — Wed, 03 May 2023 04:18:31 +0000

Македонскиот кошаркарски шампион МЗТ Скопје Аеродром со нов тренер ќе ја продолжи сезоната во Првата кошаркарска лига, откако српскиот стратег Драган Николиќ беше разрешен од позицијата прв тренер на оваа екипа.Ваквата одлука на челните лица на МЗТ Скопје дојде по драконската казна која што Кошаркарската федерација на Македонија која му ја изрече на Николиќ поради испадот на натпреварот со Кожув кога влета в терен и собори протинички кошаркар. Николиќ, во изјава за српските медиуми ја прифати одговорноста, но смета дека е престрого казнет, бидејќи толку долга суспензија му го ускратува правото на работа. „Ме направија сериски убиец. Намерата ми беше да ги размрдам играчите. Не ни сонував дека Американецот Мајрон Гордон ќе налета на мене. Гордон тргна кон мене, јас веднаш му ја подадов раката со извинување, а тој го прифати. Знаев дека ќе бидам казнет, но не со толку натпревари. Официјалната суспензија е десет натпревари. Ова е пекол за мене, титулата шампион на Македонија ми е одземена“, вели Николиќ, кој со МЗТ го освои Купот на Македонија. Местото на Драган Николиќ го презеде неговиот помошник Васко Атанасов.

Васко Атанасов нов тренер на МЗТ

Ивона Петрова — Tue, 02 May 2023 16:37:23 +0000

Драган Николиќ од денеска не е прв тренер на екипата на МЗТ Скопје Аеродром, откако по објавата за суспензијата од десет натпревари взаемно беше договорен прекин на меѓусебната соработка, објави попладнево тимот од Јане Сандански. - Управата на клубот жали што дојде до ваква ситуација пред самиот крај на домашната сезона, во ситуација кога се бориме за десеттата шампионска титула во клупската историја. Популарниот Гаги имаше долги разговори со челниците на сино-белите, во кои беше дискутирана ситуацијата околу одлуката на КФМ и во кои дојде до взаемна согласност дека ваквата разврска е најчесен чин за клубот, по што уште еднаш искажа огромна љубов и потврди дека го оставил своето срце на најдобар начин на кој сметал дека ќе донесе резултат, стои во соопштението на МЗТ Скопје. Македонскиот кошаркарски шампион од денес ќе биде предводен од досегашниот прв помошник, Васко Атанасов.

Драган Николиќ доби жестока казна од Федерацијата, ќе следи и отказ од МЗТ Скопје!

Бошко Тасиќ — Tue, 02 May 2023 13:44:58 +0000

Драган Николиќ неславно ќе ја заврши својата кариера како тренер на МЗТ Скопје, откако српскиот стратег најпрвин не успеа да обезбеди опстанок во АБА1, за потоа апсолутно да се посрамоти со своето однесување на првиот плејоф меч со Кожув. За подсетување Николиќ турна противнички кошаркар кој беше тргнат во акција кон кошот на аеродромци, по што само поради прибраната реакција на членовите на двата тима не дојде до уште посериозен инцидент. Поради оваа реакција Николиќ доби суспензија од огромни десет натпревари, што практично ќе значи дека Србинот нема да може да седи на клупата на МЗТ до крајот на овој плејоф. Дисциплинецот Милојевиќ не покажа милост, апсолутно заслужено доделувајќи му ригорозна казна на стратегот на актуелниот првак, кој е познат по својот темперамент, но овојпат се надмина себеси со неспортскиот однос. Неофицијално оваа казна ќе го означи и крајот на Николиќ како стратег на МЗТ Скопје. Негов наследник ќе биде Васко Атанасов, младиот стратег под чие водство МЗТ славеше сезонава на гостувањето против Сплит. Се очекува овој стратег најпрвин да го води тимот до крајот на плејофот, а ако успее да ја оправда фаворитската улога и да стигне до титулата по што ќе остане на чело на МЗТ Скопје и за наредната натпреварувачка сезона.

Николиќ: Победивме гигант, ама за жал нашата судбина сега е во туѓи раце

Бошко Тасиќ — Fri, 14 Apr 2023 18:45:30 +0000

Тренерот Драган Николиќ беше среќен по победата, им честита на сите свои соработници за помошта додека беше позитивен на коронавирусот, но констатира дека судбината на клубот сега е во нечии други раце. „Најважно е што победивме. Игравме против гигант, тим што го освои Купот на Хрватска. Се навикнав на оваа одлична атмосфера во салата на МЗТ, им благодарам на навивачите што дојдоа и на овој голем празник. Овој триумф го посветувам на мојот покоен татко, кому денеска му е роденден. Исто така, роденден му е и на мојот помошник Васко Атанасов, со кого блиску соработувам и на кого му ја посветувам победата. Сакам со име и презиме да им се заблагодарам и на моите соработници покрај Атанасов, а тоа се Дејан Србиновски, Миодраг Тодоровиќ и Тино Даневски. Тие се светлата иднина на клубот. Знаете дека зависиме од утрешниот меч, но ние сме МЗТ Скопје и се фокусираме само на себе. Не сакам да коментирам било што за мечот во Подгорица,нашиот дел од работата го завршивме, но, за жал, не сме господари на својата судбина“, изјави Николиќ.

Николиќ: За нас постои само една опција на дуелот против Цибона

Бошко Тасиќ — Fri, 14 Apr 2023 05:44:44 +0000

Победата во Хрватска против Сплит може да добие на вредност само ако кошаркарите на МЗТ Скопје стигнат до победа против Цибона пред своите гледачи. Тренерот Николиќ на располагање ги има сите кошаркари, а мотивите против поранешниот европски првак нема да изостанат. „Играме против Цибона, квалитетна екипа која и покрај многуте проблеми пред почетокот на сезоната успеа предвреме да избори опстанок. Тренерот Јосип Сесар одлично го води тимот, го освои и Kупот на Хрватска со што ги исполни целите и во тешка ситуација, со оглед на заминувањата со кои се соочи во текот на сезоната. За нас, пак, постои само една опција за овој натпревар, а тоа е победа со која единствено ќе останеме во игра за опстанок во АБА лигата. Ќе сториме сè да го оствариме тоа и покрај кадровските проблеми со кои се соочувавме неделава“, рече Николиќ.

Тренерот на МЗТ Скопје не отпатува на дуелот во Сплит поради коронавирус

Тале Кристо — Thu, 06 Apr 2023 17:18:39 +0000

Српскиот стратег Драган Николиќ нема да може да го предводи МЗТ Скопје Аеродром на утрешното гостување во Сплит поради коронавирус, а на клупата на македонскиот кошаркарски првак во дуелот во кој само со победа ќе ги задржи шансите за опстанок во АБА лигата ќе седи неговиот прв помошник Васко Атанасов. „Повтореното тестирање пред заминувањето за Хрватска покажа дека Николиќ сè уште е позитивен, поради што беше донесена одлука да не тргнува на пат со цел да не се ризикува пренесување на коронавирусот и на другите кошаркари и членови на стручниот штаб. Поради иста причина во Сплит не замина ниту Андреј Андоноски, кој исто така беше тестиран позитивен на коронавирусот и кој нема да биде во тимот на утрешната средба“, соопшти попладнево МЗТ Скопје Аеродром. Натпреварот во сплитската сака „Грипе“ се игра утре со почеток во 18 часот. На две кола до крајот на регуларниот дел од сезоната МЗТ Скопје е последнопласиран на табелата со пет победи, една помалку од Борац на 13. место кое обезбедува разигрување за опстанок во АБА лигата.

Николиќ: Овој меч е „да се биде или не“ за МЗТ

Бошко Тасиќ — Sat, 25 Mar 2023 05:39:54 +0000

Македонскиот кошаркарски шампион ќе се сретне со Борац Чачак во клучниот и одлучувачки меч за аеродромци за опстанок во АБА-лигата. Мечот е на програмата в сабота во 19 часот. Тренерот на „металците“, Драган Николиќ даде изјава за официјалниот сајт на АБА-лигата и вели дека овој меч е од огромна важност за двата тима. „Пред нас е меч кој е „да се биде или не“ за двете екипи, бидејќи кој и да загуби во овој дуел, ќе остане со само теоретски и минимални шани за опстанок во јадранското друштво. Ова значи дека кошаркарите на МЗТ и на Борац ќе влезат во мечот максимално мотивирани и ќе дадат повеќе од своите можности за да стигнат до победата. Ние знаеме што треба да направиме за да дојдеме до посакуваната цел. Мора да одиграме со голема енергија, поголема од онаа што ја имавме на дуелот со Игокеа, само така ќе можеме да се надеваме на успех и важна победа за нас“, изјави Николиќ.

Николиќ: Покажавме неспособност

Бошко Тасиќ — Sun, 19 Mar 2023 07:02:55 +0000

Тренерот на МЗТ Скопје Аеродром Драган Николиќ не го криеше разочарувањето од новиот пораз на неговиот тим кој многу веројатно го носи во АБА 2 иако до крајот остануваат уште четири кола. Македонскиот првак не смееше да го загуби овој меч, пред се затоа што играше на домашен терен, а идната недела гостува во Чачак кај директниот конкурент Борац. И сега постојат теоретски шанси за опстанок, но тие особено ќе бидат уште помали ако Борац ја победи Мега. „Што се однесува до Игокеа, ја посакуваа оваа победа и дојдоа до неа. Што се однесува до нас, ние го дозволивме тоа со неверојатни грешки. Покажавме неспособност да добиеме меч кој сакавме да го добиеме и не успеавме поради некои основни грешки и едноставно тоа е тоа. Знаеме во каква сме ситуација, повторувам од ден во ден дека ќе се бориме до крај, но тоа е што е моментално“, изјави Николиќ по натпреварот.

Николиќ: Ни треба поддршка, ќе се бориме до последен здив за опстанок!

Бошко Тасиќ — Sat, 18 Mar 2023 07:50:15 +0000

Тренерот на македонскиот кошаркарски шампион Драган Николиќ зборуваше пред медиумите во пресрет на многу важниот натпревар против Игокеа во рамките на АБА лигата. „Металците“ во својот „Јане Сандански“ ќе го дочекаат босанскиот тим со огромна желба за победа и зголемување на шансите за опстанок во јадранското друштво. „Се радувам што ќе играме против мојот поранешен тим, Игокеа. За него ме врзуваат многу убави спомени, а тие важат за еден добро организиран АБА-лигашки тим. Имаат за предводник млад и перспективен тренер кој е на добар пат да обезбеди учество на Игокеа во елитата и следната сезона.Пред нас се најважните 200 минути во сезоната. МЗТ мора да бележи победи и да си ги зголеми шансите за опстанок, тоа е нашата цел и ќе се бориме до крај. Очекувам полна сала и огромна поддршка од „Фемили Аеродром“, нашиот шести играч. Одиме на победа“, изјави српскиот предводник на аеродромци. Натпреварот ќе започне во 17:00 часот.

Николиќ: Ова е прв чекор за МЗТ во оваа сезона, имаме да оствариме уште две големи цели

Бошко Тасиќ — Sun, 19 Feb 2023 07:20:29 +0000

МЗТ Скопје го потврди статусот на фаворит и го совлада Феникс 2010 во финалето на Купот на Македонија. „Штрковите“ славеа со 89:73 во СРЦ „Кале“, поточно дојдоа до 11 трофеј со што сега се на првото место по бројот на освоени пехари во ова натпреварување. Ова за клубот од Аеродром треба да биде дополнителна инспираци за тоа што следи во продолжението од сезоната каде екипата ќе проба да оставри две големи цели, да го одбрани пехарот во шампионатот и да обезбеди опстанок во АБА лигата. -Немам зборови за ова финале, сакам да им се заблагодарам за сите на честа во Македонија. Феникс го направи финалето големо, одигра доста добар натпревар овој тим, беше убав и за публиката и за македонската кошарка. Горд сум на клубот, мојот стручен штаб, играчите на прво место, навивачите секако. И ова е само прв наш чекор во оваа сезона, имаме уште две големи цели да оствариме и би му посакал на секој, еден ден во животот да се чувствува како јас сега, -порача тренерот на МЗТ, Драган Николиќ за кого ова беше втор Куп трофеј во Македонија.