Драганчо Саботковски – Kurir.mk

Саботковски: И покрај големите наследени долгови во општината, реализиравме голем број на проекти за жителите на Општина Могила

Тале Кристо — Mon, 28 Nov 2022 13:46:04 +0000

И покрај наследените големи долгови на Општина Могила, како и блокираните сметки на неколку основни училишта, со добро менаџирање и напорна работа изминатава година реализирани се голем број на капитални проекти за подобрување на животот на жителите на оваа општина. Како што информираше на средбата на градоначалници од Пелагонискиот регион градоначалникот на Могила Драганчо Саботковски, и покрај отежнатите околности предизвикани од големите долгови и светската економска и енергетска криза, во текот на 2022 година долгот на општината е преполовен, а реализирани се повеќе од 50 проценти од ветените проекти во изборната програма. - Изминатава година реализиравме низа проекти, од кои би ги одвоил почетокот на инфраструктурното уредување на индустриската зона „Петилеп“ која за првпат по десетина години од отворањето доби водовод, во завршна фаза е реконструкцијата на улицата „Широка“ која се простира од центарот до излезот на село Могила. Годинава тампонирани и асфалтирани се околу 6.5 километри пристапни патишта во сите населени места, а во однос на социјалната заштита за првпат за првачињата доделивме парични средства во висина од 3000 денари и комплетен училишен прибор – кажа градоначалникот Саботковски. Како главни проекти кои ќе се реализираат во Општина Могила во наредната 2023 година, градоначалникот Саботковски наведе повеќе инфраструктурни проекти. - За наредната година со Пелагонискиот плански регион потпишавме договор за асфалтирање на 3 улици во Српци, Беранци и Могила, а ќе започне и изградбата на првата градинка во Општина Могила, со капацитет за 40 деца. Дополнително, наредната година ќе започне и изградбата на главниот водоводен цевковод кон селата Српци, Беранци, Трновци, Лознани, Врањевци, што претставува капитална инвестиција во вредност од околу 28 милиони денари – додаде Саботковски. Регионалната средба на општините од Пелагонискиот регион се одржа во Битола и истата беше организирана од страна на Комисијата за локална, Комисијата за инфраструктура, урбанизам и транспорт, Комисијата за енергетика и Комисијата за финансии при ВМРО-ДПМНЕ.

Саботковски: За секое прваче од Могила обезбедивме финансиска помош по 3000 денари

Тале Кристо — Thu, 25 Aug 2022 11:46:42 +0000

На мој предлог како градоначалник и со одлука на Советот на општина Могила обезбедивме финансиска помош од 3000 денари и пакет училишен прибор за секое прваче во општина Могила, објави на социјалната мрежа на Фејсбук градоначалникот на општина Могила Драганчо Саботковски. Овој проект, има за цел да им овозможи финансискa помош на сите семејства кои годинава имаат прваче, воедно ќе обезбедиме помош и прибор за сите деца чии родители се приматели на социјална помош и за сите деца со попреченост кои учат во основните училишта во нашата општина. Обезбедување поквалитетно образование за сите деца е еден од нашите приоритети, пишува Саботковски во својата објава.

Саботковски: Се чисти и уредува тревната површина во Могила

Тале Кристо — Thu, 09 Jun 2022 18:48:20 +0000

Изминатите денови комуналните служби интензивно чистеа и поткаструваа покрај улиците низ општина Могила. Уредени и чисти тревни површини за поубава и почиста општина Могила, пишува на Фејсбук Драганчо Саботковски, градоначалник на општина Могила.

Саботковски: Започна инфраструктурното уредување на индустриската зона Петилеп во Могила

Магдалена Андонова — Fri, 20 May 2022 09:40:16 +0000

Индустриската зона Петилеп во општина Могила започнува инфраструктурно да се уредува. Денес заедно со директорот на Центарот за развој на Пелагонискиот плански регион Јосиф Балтов и претставници од БВ Инженеринг направивме вовед во работа за изградба на водовод во индустриската зона Петилеп со должина од 1190 метри, вкупната вредност на договорот изнесува 4.067.713,00 денари, стои во Фејсбук статусот на Драганчо Саботковски - градоначалник на општина Могила. Тој напиша дека индустриската зона Петилеп се наоѓа на регионалниот пат А3 и опфаќа површина од 17,9 хектари, на која се предвидени 14 парцели со намена лесна незагадувачка индустрија и 1 парцела со намена за градби за производство на електрична енергија од обновливи извори. - Во наредниот период уште 5 парцели ќе бидат предмет на отуѓување по пат на електронско јавно наддавање, на кое сите заинтересирани физички и правни лица ќе можат да се стекнат со сопственост на градежно земјиште. Зоната е значајна за економскиот развој на општина Могила, за отворање на нови работни места преку привлекување на домашни и странски инвестиции, додаде Саботковски во својата објава.

Саботковски: Потпишан е договорот за изградба на градинка во општина Могила

Дарко Андоновски — Thu, 31 Mar 2022 12:49:46 +0000

Градоначалникот на општина Могила, Драганчо Саботковски преку статус на Фејсбук пишува дека во општината е потпишан договор за изградба на градинка. -Денес на мое огромно задоволство ве информирам дека потпишав договор за изградба на првата градинка во општина Могила, значаен проект за жителите на општина Могила. Договорот за соработка и договорот за групна набавка на градежни работи го потпишавме со министерката за труд и социјална политика Јованка Тренчевска за изградба и опрема на детска градинка со капацитет од 40 деца, во вкупен износ од 12.819.667,59 денари. Детската градинка ќе се гради во училишниот двор на ОУ „ Гоце Делчев “ – Могила. Апликацијата е заведена од 28.02.2022 за финансирање на проект доставен од страна на Општина Могила до Министерството за труд и социјална политика со прилог документација и Основен проект за Изградба на детска градинка. Постапката за јавна набавка ќе ја спроведе Министерството за труд и социјална политика. Предвидениот рок за изведба на градежни работи од предмер пресметката изнесува 14 месеци сметајќи од денот определен за вовед во работа на Изведувачот, а предвидениот рок за набавка, испорака и монтажа на опрема изнесува не повеќе од 1 месец, по завршувањето на градежниот дел. Општината се обврзува да ги обезбеди сите потребни услови за пуштање и непречено функционирење на објектот, како и да обезбеди траен приклучок за електрична енергија, водовод, канализација и греење пред технички прием на објектот, стои во неговиот пост на Фејсбук.

Саботковски: Во Могила се започна постапка за поставување на фотоволатици на спортска сала и училиштата во Добрушево и Ивањевци

Ивона Петрова — Sat, 19 Feb 2022 12:55:33 +0000

Поминаа 100 дена откако ја извршувам функцијата градоначалник на општина Могила. Сто дена заедно со мојот тим, Советот, општинската администрација и комуналнотo претпријатие работиме дисциплинирано, домаќински и вредно ги исполнуваме барањата на жителите за подобра и просперитетна општина Могила. Транспарентноста во работата е еден од најважните сегменти за успешна работа на градоначалникот и затоа моите сограѓани секогаш ќе бидат вклучени во креирањето на општинскиот Буџет“, истакна градоначалникот на општина Могила, Драганчо Саботковски на регионалниот отчет насловен „Промени што носат иднина – 100 дена локалната власт, отчет на ВМРО-ДПМНЕ. Саботковски додаде дека Општина Могила е задолжена околу 30 милиони денари што е сериозна сума. Извршните наплати од милионски суми се показател на недомаќинското и лошо работење. Блокирани сметки на училишта и куп проблеми кои се таложеле. Високи суми за репрезентација, вработени кои не доаѓале на работа и тендери со надминати суми, се дел од причините зошто се побара од Државниот завод за ревизија да изврши контрола на досегашното работење. -Со општинската механизација реализиравме низа акции за чистење на општина Могила. Со уредување и чистење на парковите во поголемите населени места и одржување на јавна чистота успеавме да исчистиме повеќе локации. Се расчисти покрај патот на на влезот во село Долно Српци, со општинскиот скип се донесе вода во црквата „Света Богородица“ во Мусинци. Во село Добрушево се чистеа канали од дрвја и грмушки на критичните места. Во декември внатрешно се опреми мултифункционалниот објект во село Могила. Канцеларијата за матичната служба е опремена како и делот во кој ќе се склучуваат бракови. Опремен е просторот за нова библиотека во Могила, просторот за изложби и салата за работни средби. Дел од градежните активности за мултифунционалниот објект во село Добрушево се веќе завршени. Исто така, во тек е проектот за подобрување на енергетската ефикасност во јавниот сектор, кој опфаќа поставување на фотоволтаици за производство на електрична енергија на покривите на спортската сала во Могила и училиштата во Добрушево и Ивањевци. Овој проект е од особена важност во период на енергетска криза, нагласи Саботковски. Саботковски посочи дека заедно со градоначалниците од регионот се потпиша и Меморандум за поддршка и унапредување на демократските процеси во рамки на проектот „Зајакнување на луѓето од Пелагонија“. Целта на оваа соработка е активно учество на младите од руралните средини. Предлог проектот од младите ќе се реализира до септември. -Над 30 барања за социјална парична помош се исплатени во месец јануари. Над 20 предмети за легализација се потпишани и доставени. Почната е репроценка на имотите со цел ажурирање на податоците за имотот и даночни обврзници преку проект „Зајакнување на капацитетите за искористување на ресурсите" кој се реализира во соработка со USAID. Во тек е опремување на основните училишта во општината со потребните наставни средства и помагала за поефикасна реализација на наставата. Во тек е и повик за финансиска поддршка за сите спортски клубови, организации и здруженија од општина Могила преку јавен повик за доставување на барања, додаде Саботковски. Саботковски укажа дека Могила е земјоделска општина, на најголем дел од жителите земјоделството им е основно или дополнително занимање. Како градоначалник застана до тутунарите кои изразија револт поради ниската откупна цена на тутунот и јавно ја поддржа иницијативата за измени на Законот за откуп на тутун. -Иако направивме многу, сè уште сме на почетокот од нашиот мандат. Во текот на оваа година ќе биде завршена реконструкција на главната улица „Широка“ во должина од 1200 метри. Проектот опфаќа комплетна изработка на коловозната конструкција, изградба на тротоари од двете страни на улицата, кружен тек и атмосферска канализација. Го корегиравме и надополнивме проектот за изградба на првата градинка во село Могила со капацитет од 30 деца, што ќе започни со изградба оваа пролет, со што ќе се реши проблемот на многу родители. Конечно индустриската зона Петилеп започнува инфраструктурно да се уредува. Оваа година ќе се гради водовод во зоната. Ќе започне и изградба на главен доводен цевковод за водоснабдување на селата Беранци, Д.Српци, Ивањевци, Св. Тодори, Трновци, Вашарејца и Лознани финансиран од средствата од ТАВ Македонија, рече Саботковски. Саботковски посочи дека со домаќинско работење се исполнуваат ветувањата, се создава нова иднина, промените се видливи, ќе биде подобро бидејќи друга опција нема. Со работа, чесно кон промените што носат иднина.

Саботковски: Утре ќе се одржи вонредна седница на Советот на општина Могила и ќе се предложи формирање на комисија за проценка на штетите од земјотресот

Тале Кристо — Mon, 10 Jan 2022 21:37:44 +0000

Во однос на штетите од синоќешниот земјотрес на територијата на општина Могила ве известувам дека во текот на утрешниот ден ќе се одржи Вонредна седница на Совет на општина Могила, ќе се формира Комисија за проценка на штетите и ќе побараме одржување на итна седница на Владата на Република Македонија, на која ќе се разгледа состојбата во општина Могила. Дополнително утре ќе бидете известени за заклучоците и преземањето на конкретните мерки, пишува во својата објава на Фејсбук Драганчо Саботковски, градоначалник на општина Могила

Пратениците на ВМРО-ДПМНЕ ќе иницираат законски промени: Да се забрани увоз на тутун додека не се откупи домашниот

Магдалена Андонова — Sun, 26 Dec 2021 12:53:52 +0000

Градоначалниците од регионите во кои се одгледува тутун и е една од поглавните егзистенцијални гранки во општините, денес се собраа на координативна средба на која се разгледуваше ниската цена на тутунот и една од главните теми беше изнаоѓање решенија за повисоки откупни цени. Градоначалникот на општина Могила, Драганчо Саботковски, рече дека причина за оваа регионална средба е токму ниската откупна цена и еден од заклучоците кои ги донеле на тој координативен состанок бил да се достават барања до Државниот земјоделски инспекторат да излезе на терен се со цел реална проценка на тутунот. Градоначалникот на Прилеп, Борче Јовчески ја поздрави оваа средба и најави дека ќе има почести вакви комуникации и контакти со здруженијата на тутунопроизводителите, каде што секојдневно ќе можат да им реферираат за класата и цената со која се настапува а се со интерес правилно да бидат проценети класите. Еден од заклучоците беше и преку нашите пратеници од регионот секој да се погрижи на наредната собраниска седница да се издејствува, да се иницира измени во Законот за откуп на тутун со тоа што би се забранил увозот на тутун, се до оној момент додека не се откупи и последното ливче од нашиот домашен тутун. Со тоа би го заштедиле и домашниот тутун, но воедно и секој нареден од тутунопроизводител би вложил и во иднина, со идна реколта да се погрижи да допринесе за своето семејство и би се намалило иселувањето на младите од нашата земја, рече Јовчески.

Саботковски: Опремување на Мултифункциониот објект во село Могила

Тале Кристо — Thu, 16 Dec 2021 13:46:12 +0000

Опремување на Мултифункциониот објект во село Могила, проект кој опфаќа доизградба со внатрешно уредување и опремување на повеќе функционален простор со цел обезбедување на услуги за жителите. Ќе се основа нова библиотека во Могила која ќе се користи и за работилници на најразлични теми , вклучувајќи ги младите и возрасните, објави на социјалната мрежа на Фејсбук Драганчо Саботковски градоначалник на општина Могила. Планиран е изложбен простор, опрема за делот во кој се предвидуваат венчавки и канцеларија за соработка со невладиниот сектор, со што ќе се отвори можноста за волонтирање и размена на искуства со невладиниот сектор од регионот и пошироко. Со активностите кои ќе ги понуди Повеќенаменскиот Центар ќе бидат подобрени услугите кон жителите, образование, пристапност, еднакви можности и вклучување на најранливите категории граѓани во општествените текови и нивна социјализација и активација, пишува во својата објава Саботковски.

Целосна реконструкција на улицата „Широка А“ во Могила

Тале Кристо — Tue, 09 Nov 2021 15:52:36 +0000

Во текот на работниот ден направив увид во градежните активности на улица Широка А во населено место Могила во вкупна вредност од 16.143.480 денари, целосно финансиран со средства од Буџетот на општина Могила, објави на својата Фејсбук страница градоначалникот на општина Могила Драганчо Саботковски. Улица Широка А е главната артерија на сообраќајната мрежа во Могила. Реконструкцијата опфаќа комплетна изработка на коловозната конструкција, изградба на тротоари од двете страни на улицата за безбедно движење на пешаците и атмосферска канализација. Во самата изведба предвиден е кружен тек на сообраќај заради забавување на брзината на движење на возилата и безбедно регулирање на останатиот сообраќај. Во моментот се работи на изведба на градежни работи над атмосферска канализација која ќе ги собира атмосферските води и со препумпна станица ќе ги одведува до реципиент. Изведувач на работите е ЖИКОЛ ДООЕЛ Струмица, подизведувач ДОО Изофас Прилеп, пишува во својата објава Саботковски.