драги рашковски – Kurir.mk

Рашковски доби куќен притвор и забрана да комуницира со овие три лица

Ивана Ефремовски — Thu, 06 Jul 2023 15:36:25 +0000

Судот денеска му изрече мерка куќен притвор на Драги Рашковски, осуден на осум години затвор за случајот „Софтвери“. Рашковски доби и забрана да комуницира со првите тројца обвинети Ивица Димитровски, Игор Христов и Даниел Станчев. На Димитровски, Христов и Станчев им се изречени мерки на претпазливост. Овие мерки ќе останат во сила до правосилноста на пресудата. Во Основниот кривичен суд денеска Драги Рашкоски беше прогласен за виновен за кривичните дела „злоупотреба на службена положба и овластување“ и „перење пари и други приноси од казниво дело“ во предметот „Софтвери“ и судот му определи осум години затвор, во кои ќе му се смета и времето поминато во куќен притвор. Драги Рашковски доби казна затвор од седум години за злоупотреба на службена положба и една година и шест месеци за делото перење пари, за што судот му одреди една единсвтена казна затвор од осум години. Судот ги прогласи за виновни и лицата Ивица Димитровски за кое одреди казна затвор од 5 години, за Игор Христов казна од 5 години и 6 месеци, за Даниел Станчев 4 години во кои ќe биде пресметано и времето поминато во куќен притвор, за Ирена Ивановска определена е казна затвор од 3 години и 6 месеци, а за Игор Ивановски и Маја Силјаноска судот определи три години. Лицата се обвинети за „злоупотреба на службена положба и овластување“. Според обвинителниот акт, првообвинетиот, Драги Рашковски, не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици. Случајот го водеше судијката Фанка Јанчулева Михаиловска, а застапник на обвинението беше обвинителката Ивана Трајчевска. (МИА)

Рашковски после пресудата: Судијката и обвинителката полагаа тестови кои што јас ги прегледував

Ивана Ефремовски — Thu, 06 Jul 2023 13:19:59 +0000

Мило ми е она што го кажав од самиот старт како теза, се покажа како точно во однос на притворот. Би сакал да се има во предвид дека во однос на се останато, имам поднесено жалби до Стразбур, рече поранешниот генерален секретар на Владата, Драги Рашковски од судницата на Основниот кривичен суд, каде денеска доби пресуда од осум години затвор за случајот „Софтвери“. Рашковски посочи дека Судијката и обвинителката полагале тестови кои што тој ги прегледувал. -Целокупниот материјал, како обвинителката со овој суд се договара, како да бидеме осудени и изнесувани доказите и како обвинителката и вие како судија, ја нарекувате правобранителката „проста жена“ и се останато, почнувајќи од 2005 година, ќе бидат дадени на јавноста. Вклучително и 2009 година, кога вие и обвинителката полагавте на тестови кои што јас ги прегледував, кажа Рашковски.

СУДОТ ОДЛУЧИ: Осум години затвор за Драги Рашковски!

Тале Кристо — Thu, 06 Jul 2023 12:19:08 +0000

Во Основниот кривичен суд денска на јавна седница ги прогласи за виновни обвинетите во случајот „Софтвери“ каде што првообвинет беше поранешниот генсек на Владата на Република Македонија Драги Рашковски. Судот, Драги Рашковски го осуди на единствена затворска казна од осум години, за делото злоупотреба на службената положба е осуден на седум години затвор, а за делото перење пари, една година и шест месеци затвор. На Рашковски му се засметува и времето поминато во притвор. Затворски казни добија и останатите обвинети. На Ивица Димитровски му се изрекува казна затвор во траење од 5 години, на Игор Христов од 5 години и 6 месеци, на Даниел Станчев затвор од 4 години, на Игор Ивановски и Маја Сиљаноска казна затвор во траење од 3 години и 3 и пол години затвор за Ирена Ивановска. Во Основниот кривичен суд ќе биде објавена пресудата за случајот „Софтвери“, во кој обвинети се Драги Рашковски и шест други лица. Според обвинителниот акт, првообвинетиот, Драги Рашковски, не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици. Случајот го води судијката Фанка Јанчулева Михаиловска, а застапник на обвинението е обвинителката Ивана Трајчева.

ВО ЖИВО: Пресуда за случајот „Софтвери“, каде обинет е Драги Рашковски!

Тале Кристо — Thu, 06 Jul 2023 10:51:26 +0000

Во Основниот кривичен суд ќе биде објавена пресудата за случајот „Софтвери“, во кој обвинети се Драги Рашковски и шест други лица. Според обвинителниот акт, првообвинетиот, Драги Рашковски, не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици. Лицата И.Д., И.Х., Д.С., И.И., И.И. и М.С. се обвинети за „злоупотреба на службена положба и овластување“ од Кривичниот законик Случајот го води судијката Фанка Јанчулева Михаиловска, а застапник на обвинението е обвинителката Ивана Трајчева.

Одбраната на Рашковски побара ослободителна пресуда за случајот „Софтвери“

Дарко Андоновски — Mon, 12 Jun 2023 13:14:21 +0000

Мотивот колку што беше докажување на невиноста, толку беше и докажување на еден нов начин на водење на судска пракса, изјави денеска обвинетиот Драги Рашковски во своите завршни зборови за случајот „Софтвери“. Во Основниот кривичен суд Скопје, Рашковски денеска детално ги образложи завршните зборови и ги изнесе аргументите со кои ги побива, како што рече, „седумте теории на Обвинителството“. Рашковски се осврна детално на изведените докази за кои имаше забелешки за нивната исправност. Тој ги издвои сведочењата на вештите лица кои, како што рече, утврдија дека сите постапки се водени согласно Законот за јавни набавки. - Вештите лица на одбраната и вештите лица на Обвинителството, заклучуваат дека постапките се водени согласно Законот за јавни набавки, рече тој. Во своите завршни зборови, обвинетиот Рашковски изнесе ставови за побивање на дигиталните докази, како и анализа на специфичните докази на Обвинителство. - Во целиот овој процес, одбраната беше таа која напаѓаше, а Обвинителството на таквите напади немаше никаков одговор. Девизата на одбраната е нападот е најдобра одбрана, стои во писмените завршни зборови на Рашковски кои тој ги проследи до Судечкиот совет и јавноста. Тој побара Судот да донесе, како што рече, „правична одлука“. Неговиот адвокат, Владимир Доневски, во завршните зборови посочи дека Обвинителството со ниту еден доказ не докажало дека Драги Рашковски не ги извршил своите обврски во извршувањето на четирите јавни набавки. Тој истакна дека од обвинението изостануваат сите законски обележја за свест и намера за кривичното дело „злоупотреба на службена положба и овластување“, што му се става на товар на обвинетиот Рашковски. - Судот оваа постапка може да ја заврши само на еден начин, а тоа е донесување на пресуда со која обвинетиот ќе се ослободи од обвинението, бидејќи Јавното обвинителство не покажа дека обвинетиот ги сторил кривичните дела надвор од разумното сомнение, рече адвокатот. На денешното рочиште завршни зборови даде и одбраната на обвинетиот Даниел Станчев, која, исто така, побара ослободителна пресуда. Според обвинението, првообвинетиот Драги Рашковски, не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици. Рашковски е обвинет за кривичните дела „злоупотреба на службена положба и овластување” и „перење пари и други приноси од казниво дело”, а лицата Ивица Димитровски, Игор Христов, Даниел Станчев, Ирена Ивановска, Игор Ивановски и Маја Силјаноска се обвинети за „злоупотреба на службената положба и овластување”. Случајот го води судијката Фанка Јанчулева Михаиловска, а застапник на обвинението е обвинителката Ивана Трајчева.

Завршни зборови за случајот „Софтвери“, судењето продолжува на 12 јуни

Ивана Ефремовски — Thu, 25 May 2023 15:11:02 +0000

Судското рочиште за случајот „Софтвери“ продолжи денеска во Основниот кривичен суд – Скопје, со завршни зборови на обвинетите Ивица Димитровски и Игор Христовски. Адвокатката Сузана Јошевска-Анастасовска, како бранител на професорот Димитровски, рече дека не се исполнети законските услови за предлогот на Обвинителството за изрекување казна и забрана за вршење на професијата. - Што се однесува до предлогот на Обвинителството за изрекување казна, забрана за вршење на професија дејност при должност кон Ивица Димитровски, сметам дека не се исполнети законските услови за изрекување на истото, бидејќи не постои ниту еден доказ дека Ивица Димитровски ја злоупотребил професијата универзитетски професор заради извршување на кривичното дело или пак може да се очекува во иднина дека ќе ја злоупотреби, ниту пак постои каква било поврзаност на дејствијата што му се ставаат на товар со неговата работа и животен повик за едуцирање студенти, истакна Јошева Анастасовска. Димитровски пак, во своите завршни зборови зборуваше за неговата кариера откако почнал да работи на ФИНКИ уште од 2005 година и за неговиот интегритет како професор, посочувајќи дека во овие проекти не се вклучил за да се збогати. туку за да даде придонес како експерт. - Сакам да потенцирам дека никогаш не сум влегол во овие проекти со помислата дека ќе се збогатам, Се ова што сум го работел исклучиво е затоа што е директно поврзано со област за којашто сум докажан експерт и на која работам повеќе од 15 години. Дополнително, проектите беа од огромно општествено и економско значење за целата држава и искрено верував дека со нивната реализација може многу работи да се сменат на подобро, нагласи Димитровски, изразувајќи уверување во правичноста на судот и дека судот ќе ги цени и согледа сите неправилности и неправди што му биле нанесени на него и на неговата фамилија. (МИА)

Рашковски: Софтверот е целосно реализирани во првите 80 дена

Ивана Ефремовски — Tue, 14 Mar 2023 15:42:27 +0000

Генералниот секретар на Владата и кое било друго раководно лице не доставува барање до Владата за да му одобрат нешто за набавка. Тие барања се даваат кога се одобрува Буџет. Јас моето барање сум го реферирал пред министер, пред Владата и Собранието, кога сум реферирал зошто се барани тие средства, изјави поранешниот генерален секретар на Владата, Драги Рашковски на денешното рочиште за случајот „Софтвери“, одговарајќи на прашање од обвинителството „дали доставил информација до Владата дека ќе набави софтвер“.

Одговарајќи на вкрстено прашање на јавниот обвинител дали како генерален секретар до Владата доставил намера за ваква набавка, Рашковски рече дека нема потреба од доставување на таква информација.

Прашан дали имал одобрување од Владата за набавка на софтверот, Рашковски рече дека нема, затоа што немал потреба да побарува и затоа не може да има.

Додека во однос на тоа дали има информација од него до Владата за фазите од имплементацијата, Рашковски рече дека според тендерска информација, потврдувањето на фазите е работа што ја прави договорниот орган.

- Софтверот е целосно реализирани во првите 80 дена. Не може да барате потврдување на фази на имплементација, кога пред вас имате готов производ, рече Рашковски.

Откако обвинителката укажа на исказ на едно од вештите лица дека не биле доставени податоците од МВР, Рашковски рече дека софтверот работи и без дата базите од МВР, односно дека тие се потребни за да може да изрекувате казни.

На вкрстено прашање од Обвинителството „дали текстот од тендерската документација во голем дел се поклопува со текстот од неговото патентно барање“, Рашковски рече дека приказот на техничкиот проблем, по Законот за авторски права, не е составен дел од патентните барања.

Во однос на тоа дека нема запис за присуство на работа во Владата за лицата ангажирани со авторски договор, Рашковски рече дека има запис за тоа што е сработено од нив.

- Не знам што повеќе треба од тоа. Јас имам 5.430 состаноци додека сум бил генерален секретар во Владата и од ниту еден нема записник, зошто тоа е бирократизирање на работата, рече Рашковски.

На денешното рочиште заврши изведувањето на материјалните докази од одбраната, а нејзин предлог Рашковски даде исказ пред Судот, по што беше вкрстено испрашан и од јавната обвинителка Маја Конеска.

Судскиот процес се наоѓа во доказна постапка и го води судијката Фанка Јанчулева Михаиловска.

Според обвинителниот акт, Рашковски е обвинет за кривичните дела „злоупотреба на службена положба и овластување“ и „перење пари и други приноси од казниво дело“.

Лицата И.Д., И.Х., Д.С., И.И., И.И. и М.С. се обвинети за „злоупотреба на службена положба и овластување“ од Кривичниот законик.

Следното рочиште за случајот „Софтвери“ е 30 март. (МИА)

Рашковски се спореди со Илон Маск: И тој ќе ја напишеше истата спецификација

Ристе Здравков — Tue, 14 Mar 2023 13:45:16 +0000

Поранешниот генерален секретар на Владата, Драги Рашковски, денеска во судница даваше одбрана во случајот „Софтвери“. Тој тврдеше дека не е точно оти ја фаворизирал „Инвока груп“ да го добие тендерот. Рашковски објасни дека со техничките спецификации што се барале во тендерот не се фаворизирал никој бидејќи таа била направена така што „немате некои посебни ограничувања и не треба да се има какви било познавања за да се направи“. „Да му кажеме на Илон Маск: напиши ни техничка спецификација за софтвер за определување просечна брзина, ќе ни ја напише истата, сето ова што јас сум го напишал. Не е направено да ограничува ниту со техника, ниту со технологија, ниту со програмски јазик или што било“, рече Рашковски. Тој додаде дека иновативноста на неговото барање за патент е полициско возило да може да се движи и да забележи предметно возило на една локација, а потоа на истото тоа возило ако биде регистрирано од друго полициско возило на друга локација, врз основа на тоа да му се одреди просечна брзина на движење. За функционалноста на софтверот, Рашковски рече дека првото тестирање е направено кон средината на 2020 година, а потоа е тестиран по примопредавањето. Како што истакна, предлогот до Владата бил софтверот да биде ставен на камерите на „Сејв сити“ и да заживее, но до тоа не дошло. Тој ги негира вештачењата на Обвинителството дека софтверот бил нефункционален бидејќи, како што рече, тој бил тестиран на „Партизанска“ во Скопје, каде што се случуваат најмногу сообраќајни несртеќи во државата.

Судењето за „Софтвери“ продолжува на 14 март

Тале Кристо — Thu, 02 Mar 2023 13:16:41 +0000

Судењето за случајот „Софтвери“ во кој првообвинет е поранешниот генерален секретар на Владата, Драги Рашковски, продолжува на 14 март откако во Основниот Кривичен суд Скопје денеска беа изведени докази од страна на одбраната. На денешното рочиште, бранителот на обвинетиот Даниел Станчев, го претстави вештиот наод изготвен во врска со финансиите на Станчев и друштвото ИНВОКА, на кое тој е сопственик. Претходно, сведочеше вештото лице од областа на информатичките технологии, Мирослав Котевски, кој беше директно и вкрстено испрашуван по однос на изготвениот вешт наод, а во врска со интегритетот на доказите на обвинителството. Котевски претстави повеќе меѓународни документи според кои се врши дигитална форензика и зборуваше за методата на дигитални докази. Анализираше повеќе документи и нивните домеини. Според него, доказите на обвинителството имаат неколку извори од каде што се земени податоците и креирани доказите. Според него, целата постапка не е извршена правилно, на форензички исправен начин, според постапките на дигитална форензика. Според обвинението, првообвинетиот, Драги Рашковски, не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици. Рашковски е обвинет за кривичните дела „злоупотреба на службена положба и овластување” и „перење пари и други приноси од казниво дело”, а лицата И.Д., И.Х., Д.С., И.И., И.И. и М.С. се обвинети за „злоупотреба на службената положба и овластување”. Случајот го води судијката Фанка Јанчулева Михаиловска, а застапник на обвинението е обвинителката Ивана Трајчева.

Продолжи судењето за „Софтвери“, Рашковски постави прашања во врска со конкретни докази

Ивана Ефремовски — Thu, 09 Feb 2023 11:56:57 +0000

Во Основниот кривичен суд Скопје, денеска продолжи судењето за случајот „Софтвери“, во кој првообвинет е поранешниот генерален секретар на Владата, Драги Рашковски. На предлог на одбраната, денеска ќе бидат сослушани вештите лица, технички советници, Милица Шутова и Ристо Котев. На изминатото рочиште беа сослушани сведоци, вработени во генералниот секретаријат на Владата. Испрашувани беа сведоците Зорица Стојановиќ, Агим Махмути и Мирче Јанев. Обвинетиот Драги Рашковски преку директно испрашување постави прашања во врска со конкретни докази, дописи и одговори од Владата, во насока на тоа дали сведоците се изготвувачи на истите. Доказите се однесуваа на тоа дека, како што тврди одбраната, документите кои се однесуваат на јавната набавка, се транспарентно евидентирани во основните средства во Владата. Според обвинението, првообвинетиот не ги извршил службените должности при спроведување на четири постапки за јавна набавка за систем за биометриска идентификација, јавна набавка на софтвер за определување на просечна брзина на возила во сообраќајот и изрекување на казни, набавка на АНПР камери за препознавање на регистарски таблички за возила и јавна набавка на метални кабини за потребите на системот на биометриска идентификација и систем за автоматско препознавање на регистарски таблици. Рашковски е обвинет за кривичните дела „злоупотреба на службена положба и овластување” и „перење пари и други приноси од казниво дело”, а лицата И.Д., И.Х., Д.С., И.И., И.И. и М.С. се обвинети за „злоупотреба на службената положба и овластување”. Случајот го води судијката Фанка Јанчулева Михаиловска, а застапник на обвинението е обвинителката Ивана Трајчева. (МИА)