дрезден – Kurir.mk

Почина осомничениот за заложничката криза во Дрезден, заложниците се ослободени

Ивана Ефремовски — Sat, 10 Dec 2022 16:06:02 +0000

Четириесетгодишниот маж, осомничен дека ја убил мајка си пред да земе заложници во источниот германски град Дрезден, починал од повредите здобиени во полициската операција, соопштија властите. Полицијата соопшти дека 40-годишен маж ја убил својата 62-годишна мајка денеска рано наутро во станбена зграда во областа Прохлис во Дрезден.

Во соопштението се наведува дека тој подоцна зел вработен и дете како заложници во трговскиот центар „Алтмарк“ во центарот на Дрезден. Властите го евакуираа трговскиот центар и околните области. Заложниците се ослободени и не се повредени.

Пред заложничката криза, 40-годишникот пукал во канцелариите на Радио Дрезден и се обидел да ја пробие вратата.

Осомничениот се обидел да упадне во канцелариите утрово околу 8:30 часот, но не можел да помине низ вратата, изјави извршниот директор Тино Утаси за ДПА. Откако не успеал да влезе во просториите на радио станицата, осомничениот пукал кон вратата. Таму биле екипите на утринските емисии на РТЛ и Радио Дрезден. „За среќа, персоналот беше присебен, истрча преку другиот излез и избега“, рече Утаси. (МИА)

Грабеж на векот: Објавени детали и снимка од грабежот во Дрезден

Ивана Ефремовски — Tue, 26 Nov 2019 08:02:58 +0000

Германската полиција објави видеоснимка од вчерашниот грабеж во музејот „Зелен трезор“ во Дрезден. Акцијата траела неколку минути, а украдениот накит е од непроценлива вредност. Ограбувачите имале батериски лампи и секири. На снимките од безбедносните камери, кои работеле и по прекинот на струјата, се гледа како еден од крадците со секира го крши стаклото на витрините и зема накит. Според официјални податоци, станува збор за најголемиот грабеж на уметнички предмети по Втората светска војна. Натрапниците вчера влегле во историскиот дел на музејот, што се состои од два дела, и каде што се чуваат околу 4.000 скапоцени предмети од слонова коска, злато, сребро и скапоцени камења. Во првиот оддел се чуваат скапоцености од периодот на полскиот крал Август Втори Силниот, кој владеел 1687 – 1733 година, а во другиот, нов оддел, има колекции на поединци. Директорката на музејот Марион Акерман изјави дека украдените дела се од непроценлива вредност и оти е невозможно да се продадат на пазарот. Полиција сè уште трага по двајца осомничени. (МИА)

ФОТО: Ограбен музеј во Дрезден, украден накит од над милијарда евра

Ивона Петрова — Mon, 25 Nov 2019 12:38:27 +0000

Еден од најголемите европски историски музеи „Зелен трезор” во Дрезден, Германија, бил ограбен рано утрово, а крадците однеле колекција вредна над милијарда евра, соопшти полицијата. Имено, украдена е историска колекција на средновековен накит. Според полициските извештаи, натрапниците влегле во историскиот дел на музејот што се состои од два дела. Во првиот оддел се чуваат скапоцености од периодот на полскиот крал Август Втори Силниот, кој владеел 1687 – 1733 година, а во новиот оддел се колекциите на поединци. Засега не се соопштува што точно е украдено од вредните предмети. Според германски „Билд”, во музејот дошло и до прекин на електричната енергија и, најверојатно се работи за намерна саботажа, како дел од грабежот.