државен инспекторат за животна средина – Kurir.mk

Државен инспекторат за животна средина: УСЈЕ ги примени сите препораки, контролните мерења покажуваат дека нема надминување на емисиите

Дарко Андоновски — Wed, 08 Feb 2023 12:28:10 +0000

Државниот инспекторат за животна средина преку статус на Фејсбук информира дека УСЈЕ ги примени сите препораки и дека контролните мерења покажуваат дека нема надминување на емисиите. „ИНФО ЗА РЕАЛИЗАЦИЈА НА ЗАДОЛЖЕНИЈА ВО ИНСПЕКЦИСКА ПОСТАПКА ОД СТРАНА НА ПРАВЕН СУБЈЕКТ "ЦЕМЕНТАРНИЦА УСЈЕ" АД СКОПЈЕ. 1️⃣На 7ми Февруари е започната постапката за спогодување пред Комисијата за спогодување при МЖСПП и истата е во тек. По завршување на спогодувањето јавноста ќе биде информирана за конечната одлука. 2️⃣Правниот субјект постапи по издаденото Решение во инспекциска постапка од страна на Државен инспектор за животна средина од Одделението за инспекциски надзор во животната средина-Скопски регион при што во двата котли за парно греење со моќност од 4,2 MW во котларата за загревање на фабриката отпочна со користење природен гас како гориво. Исто така беа извршени мерење на емисија на гасови од емитерот-оџакот на парниот котел со акредитирана лабораторија за животна средина. Од пристигнатиот извештај е утврдено дека нема евидентирано надминување на ГВЕ-граничните вредности на емисија. 3️⃣Правниот субјект реализираше и мерења на 8 емисиони точки согласно А-ИЕ Дозвола од сите производни делови кои се во работен режим со две акредитирани лаборатории за животна средина. Останати 4 мерни места поради редовен годишен ремонт на ротациона печка 4 и придружни работни единици ќе се мерат дополнително. 📗Од пристигнатите извештаи е утврдено дека нема евидентирано надминување на ГВЕ-граничните вредности на емисија. 4️⃣Една од двете печки (ротациона печка бр.4) е во ремонт и истата не е во работен режим. 5️⃣Цементарница УСЈЕ А-Дозволата за усогласување со оперативен план ја поседуваше од 2011 година, измена на А-ДУОП беше направена во 2013 година, а А-Интегрираната Еколошка Дозвола ја поседува од 2020 година. Дозволите ги издава МЖСПП. 6️⃣Врз основа на пристигнато барање од страна на Канцеларијата на Народниот Правобранител на РСМ (Заменик НП), во тек е подготовка на информација со барани податоци за работењето на правниот субјект Цементарница Усје која ќе биде доставена до барателот во законски утврдениот рок. 7️⃣ДИЖС редовно ќе врши инспекциски надзори во правниот субјект согласно утврдени планови за работа“, стои во нивниот пост на Фејсбук.

Државниот инспекторат за животна средина ги охрабрува граѓаните: Пишете ни на месинџер за да пријавите загадување

Дарко Андоновски — Wed, 23 Jun 2021 13:44:43 +0000

Државниот инспекторат за животна средина (ДИЖС) иницираше заеднички акции со Инспекторатот на Град Скопје и МВР со цел спречување на палење кабли и гуми покрај реката Вардар. Договорени се засилени патроли и интервентни акции по пријави на граѓани. – Ги охрабруваме граѓаните, штом се јави чад веднаш да пријават загадување преку Месинџер на Фејсбук страницата на Државниот инспекторат за животна средина. Само заеднички можеме да делуваме за зачувување на животната средина, наведува ДИЖС.

Варницата во Превалец кај Велес работи и покрај забраната од Државниот инспекторат за животна средина

Ивана Ефремовски — Wed, 05 Dec 2018 15:44:22 +0000

Фирмата Каменелом „Техно павер“ ДООЕЛ Скопје која стопанисува со Варницата во Превалец кај Велес и понатаму бесправно работи и покрај забраната од Државниот инспекторат за животна средина од 14 ноември годинава. Инспекторатот на раководниот менаџерски тим на фирмата му наложи во законски рок од 90 дена да ги отстрани причините на загадување ако сака да ја врати А Интегрираната еколошка дозвола што МЖСПП им ја одзеде на 4 јуни годинава.

По одржаната јавна расправа во ноември со загадувачот, МЖСПП, Државниот инспекторат ,со граѓаните, екологистите, а на барање на општинската власт, како што информира за МИА Билјана Шуркова Манаскова општински инспектор за животна средина ,Општина Велес во законскиот рок до 30 ноември веќе доставило до МЖСПП бројни забелешки за тоа како министерството ја води постапката за повторно враќање на А Интегрираната дозволата за работа на оваа фирма, а што од нив го бара фирмата „Техно павер“. Шуркова Манаскова потенцира дека Општина Велес оценува дека барањето од страна на загадувачот до МЖСПП е нејасно и не’ ги утврдува сите влијанија врз животната средина и дека е потребно да се одбие, а се’ додека „Техно Павер“ не спроведе еколошки мерки и не престане да загадува и да им го загрозува здравјето на жителите од велешките населби Превалец и Тунел. -Забелешките се бројни од Општина Велес до МЖСПП за враќање на А интегрирана дозвола за работа на Каменелом „Техно Павер“. Генерално нашиот заклучок е дека барањето на загадувачот до МЖСПП е нејасно, односно не ги утврдува сите влијанија врз животата средина и дека е потребно вака како што е сега да се одбие. Ние сметаме дека со ваквите мерки кои се предложени од загадувачот, а засега не се направени. Секаде пишува ќе треба да се спроведат, а бидејќи станува збор за А интегрирана еколошка дозвола за што фирмата треба да ги исполни стандардите да не загадува, согласно нашите законски нормативи усогласени со европските, а според нашите согледувања тие досега немаат спроведено ништо за да ја заштита животната средина и здравјето на граѓаните: Затоа сметаме дека се додека тие не ги исполнат барањата на инспекторатот, тие не смеат да им дадат повторно дозвола, потенцира Шуркова Манаскова. Инаку Државниот Инспектор за животна средина кој го вршел надзорот, согласно Законот за животна средина, со решение ја забрани работата на Каменолом „Техно Павер“ ДООЕЛ Скопје Подружница во Превалец Велес, во писменото известување наведува дека причина поради која е затворен каменоломот е тоа што не поседува А интегрирана еколошка дозвола. На раководниот тим на Варницата им даде рок во траење од 90 дена, а во кој треба да се отстранат причините за настанатата состојба. Од инспекторатот информираат дека доколку утврдат дека не се постапува согласно Решението, ќе поднесат барање за поведување соодветна постапка до надлежен орган, согласно членот во Законот за животна средина. (МИА)