Државна комисија за спречување на корупција – Kurir.mk

ДКСК: Прекршочни налози за повеќе општински советници, директори и членови на управни одбори кои истовремено извршуваат и други функции

Дарко Андоновски — Fri, 03 Feb 2023 13:04:40 +0000

Државната комисија за спречување на корупцијата (ДКСК) на денешната 81 седница информираше за извршена редовна проверка на поднесените Изјави за интереси и утврдените прекршувања на забраните од Законот за спречување на корупцијата и судирот на интереси, при што се утврдени повеќе случаи каде членови на Совети на општини, истовремено извршуваат и други функции. Антикорупционерите утврдиле случаи, каде што, член на Совет на општина е истовремено и в.д. директор на Јавно претпријатие, друг член на Совет на општина истовремено е и директор на Јавна здравствена установа – Здравствен дом, потоа член на Совет на општина, кој е и адвокат, друг член на Совет на општина е и претседател на училишен одбор на ОУ, како и член на Совет на Град Скопје, кој е и адвокат. ДКСК, исто така, утврдила и случај каде што в.д. директор на Јавно претпријатие и сопственик и управител на приватна фирма, член на Совет за заштита на потрошувачите и претседател на Управен одбор на ЈЗУ, в.д. директор на Јавно комунално претпријатие и сопственик на кој што управува со приватна фирма, член на Управен одбор на Клиника за гастроентерохепатологија и член на Управен одбор на детска градинка, како и член на Управен одбор на ЈЗУ Клиника за уво, нос и грло и адвокат. Претседателката на ДКСК Билјана Ивановска, појасни дека согласно законот избрано и именувано лице не може да биде ниту член на Управен одбор, ниту во друг управен орган и други забрани кои што треба да се почитуваат. - До сите лица ќе се достави известување со барање да се откажат од едната функција и ќе се спроведе постапка за порамнување со издавање на прекршочен платен налог, изјави Ивановска. ДКСК, на денешната седница, меѓу другото, најави дека од понеделник ќе почне да функционира регистарот на избрано и именувани лица на Државната комисија за спречување на корупцијата, што значи дигитализација на поднесувањето на известување од лицата и институциите при избор, со што ќе се избегне чекање за доставување на хартиени документи и побрзо детектирање на прекршувања.

Ивановска: Владата и раководителите да бидат поажурни во полнење на регистарот за избрани и именувани лица

Дарко Андоновски — Thu, 27 Oct 2022 12:58:00 +0000

ДКСК има надлежност да врши регистар на избрани и именувани лица, кои се должни да поднесат анкетен лист. Овој регистар треба да се полни со податоци којшто го доставуваат раководните лица во институциите и органите кои вршат избор и тоа во рок од 15 дена од изборот, рече претседателката на Државната комисија за спречување на корупцијата Билјана Ивановска во одговор на пратеничко прашање на Бране Петрушевски од ВМРО-ДПМНЕ за аферата „Тајни имоти“. – Сакам да укажам до Собранието, но и да упатам апел до сите овие раководни лица, кои не се ажурни и не го полнат регистарот за избрани и именувани лица, а пред се Владата ќе ја повикам. Повеќепати е укажано и на премиерот и на генералниот секретар и на вицепремиерката, сите оние кои се именувани од страна на Владата треба да ја известат ДКСК и ние да го полниме регистарот. Тоа не се случува, интероперабилноста не работи, што значи дека „работиме пешки“, вели Ивановска. Таа кажа дека минатата година, кога имало повеќе разрешувања и именувања, ДКСК направиле акција и тогаш излегле 710 функционери кои не поднеле анкетен лист и оти за сите тие се покренати постапки, околу 400 се завршени, а за останатите постапката се уште трае. – Прибирањето на информациите и податоците е рачно, тоа оди бавно. Сите овие предуслови што влијаат на функционирањето на Комисијата, треба да ги имате предвид. Проверката на имотната состојба, се одвива по годишен план, согласно закон, по поднесени дојави и пријави и по сопствена иницијатива, рече Ивановска. За оваа година, додаде таа, имаме 54 избрани лица кои се дел од нашиот годишен план, меѓу кои се пратеници, директори и градоначалници. – За сите оние што сметате дека не поднеле анкетен лист, слободно поднесете пријава, ние ќе провериме. Факт е дека постојат уште луѓе кои не се внесени. Очекувам дека конечно мандатот ќе го завршиме со тој софтвер којшто значително треба да ја олесни работата на ДКСК, рече Ивановска.

Склучен Меморандум за соработка помеѓу Народната банка и Државната комисија за спречување на корупцијата

Дарко Андоновски — Mon, 18 Jul 2022 07:29:32 +0000

Народната банка на Република Северна Македонија и Државната комисија за спречување на корупцијата склучија Меморандум за соработка, со кој се овозможува заемна размена на искуства и знаења, добра практика, како и стручна консултација за прашања од интерес. Меморандумот за соработка е резултат на долгогодишната успешна и отворена соработка помеѓу Народната банка и Државната комисија, со цел да се спречат корупцијата и судирот на интереси што е определено и во Политиката за спречување појава на корупција, донесена од Народната банка во 2021 година. Спроведувањето на одредбите на Меморандумот ќе биде многу значајно за двете институции, коишто преку директна и постојана соработка ќе придонесат за спроведување политика на нетолеранција на корупцијата. За спроведување на Меморандумот претстојат заеднички обуки за јакнење на капацитетите заради унапредување на професионалните капацитети на вработените на НБРСМ и ДКСК. Зајакнувањето на соработката со Државната комисија е една од активностите на Народната банка за поддршка на борбата за спречување на корупцијата, преку одржување високи правни и етички стандарди и преку примена на висок степен на професионално и непристрасно постапување при спроведувањето на целите и задачите.

Ивановска: Ризикот од политичката корупција и влијание е највисок, треба да постои систем на вредности

Магдалена Андонова — Tue, 11 Jan 2022 12:09:42 +0000

Ризикот од политичка корупција и политичко влијание е највисок. Понатаму следува ризикот од неказнивост и незадоволството од судиите. Тие се основните ризици, кои треба да ги надминеме, порача претседателката на Државната комисија за спречување на корупција, Билјана Ивановска. Во своето гостување на ТВ Телма, Ивановска истакна дека носителите на јавните фунции треба да бидат свесни дека системот треба да функционира, без разлика дали се тие на чело или не. – Треба нормално да си функционира, да постои систем на вредности да го избираат најдобриот квалитет, а не да бидат тоа нивни блиски лица, без разлика дали се роднински или партиски. Треба да се обезбеди начин на избор на луѓе кои што ќе бидат најдобри за таа позиција. Прав човек на право место, оти луѓето го градат општеството, рече Ивановска. Претседателката на ДКСК побара од новата Влада со својот личен пример, пред сè, да придонесе за промена на перцепцијата. – Ако некој функционер се откаже од своите привилегии, се откаже од злоупотребата на државните средства или пак од вработувањето на неговите блиски лица, туку во својот кабинет стави луѓе кои што го заслужуваат тоа место и ќе придонесат со своето стручно и професионално знаење таа институција да тргне напред, мислам дека тогаш ќе има некаква надеж, смета Ивановска.

ДКСК донесе одлука за запирање на предметот против Иванов за унапредување и именување на лица во Армијата

Дарко Андоновски — Tue, 21 Dec 2021 12:45:02 +0000

Државната комисија за спречување на корупција (ДКСК) на продолжението на 57-та седница денеска донесе одлука за запирање на предметот против поранешниот претседател на држават Ѓорге Иванов за унапредување и именување на лица во Армијата. Директорката на ДКСК Билјана Ивановска, посочи дека постапката се затвора, дека со огледа на тоа што има надмината и промената фактичка состојба, Комисијата нема понатаму што повеќе да прави. – ДКСК во целост ја испочитува постапката во конкретниот случај и ги утврди сите релевантни факти и докази и утврди фактичка состојба во која констатира постоење индиција – сомневање за прекршување на одредба Изборниот закон. Надлежните судски органи и покрај бројните појаснувања и образложенија дадени од ДКСК не ги земаа во предвид при утврдување на фактичката состојба. Со оглед дека од денот на донесување на оваа одлука и утврдување на основаноста на наодите за сомневање помина подолг временски период, од кога се променија околностите со конкретно службено лице, ДКСК оцени дека нема елементи за понатамошно постапување и заклучи дека предметот треба да се заклучи и архивира, изјави Ивановска. Фактички, посочи директорката на ДКСК, унапредувањата ги направил наредниот претседател на државата, што, како што рече, со тек на време имаме целосно изменета фактичка состојба и од тие причини е безпредметно овој предмет да стои отворен. Ивановска, потсети дека ДКСК постапувајќи по добиени сознанија од медиуми и пријави од непознати подносители, отворила предмет по сопствена иницијатива во врска со потпишани укази за унапредување и именување на лица во Армијата од страна на Претседателот Ѓорге Иванов за време на изборниот период 2019 година. За утврдување на фактичката состојба, Ивановска, посочи дека ДКСК побарала и добила информации и докази од Кабинетот на претседателот Иванов и до Министерството за одбрана. – Двете инстуицуии доставија одговори и произнесувања по однос на сомневањата за конкретниот случај. Министерството за обрана достави информација „доверливо“ со напомена дека информацијата може да се користи само од ДКСК. ДКСК по разгледување на сознанијата и добиените одговори ги утврди сите релевантни факти и докази за постоење индиција за прекршување на одредби од Изборниот зкаоник и констатира фактичка состојба. На својата 11 седница ДКСК донесе одлука во која утврди дека сомневањата за унапредувањата претседателот Иванов сторил дејствија кои се забранети за време на изборниот процес, што значи дека сомневањата се основани и одлучи да иницира прекршочна постапка против служебното лице Иванов пред надлежен суд, изјави Ивановска. Постапувајќи согласно законот за донесената одлука, нагласи дека ДКСК оваа одлука ја објавила на својата веб страна. – Врз основана на донесената одлука, пред поднесување на барање ја прекршочната постапка, а со оглед дека беше констатирана повреда од страна на ДКСК составен е и потпишан записник за констатиран прекршок и беше издаден прекршочен платен налог. Платниот наглог и записникот се доставени со препорачана пошта во јули 2019 на Иванов. Од негова страна во утврдниот рок не е постапено по пркршочниот налог и не е платен налогот и не е доставен доказ, по што овластено лице од ДКСК донесе одлука за отворање прекршочна постапка до Судот, изјави Ивановска. Незадоволно од поднесното барање, нагласи Ивановска, тужителот Иванов изјави тужба до Управниот суд против одлуката на ДКСК, на која ДКСК достави одговор во која ги даде сите свои аргументи и образложила дека ДКСК по постапување по конкретниот предмет утврдила постоење на сомнеж, што понатаму требало да го утврди Судот. -Управниот суд донесе пресуда со која тужбата на Иванов ја уважи, а одлуката на ДКСК е поништена со образложение дека од страна на ДКСК не се строрени доволни напори за утврдување на фактичката состојба и оцени дека има потреба од повторно постапување и оценување, изјави Ивановска. Незадоволна од донесена пресуда, ДКСК поднела жалба до повисокиот суд, во која навела дека првостепениот суд погрешно утврдил дека тужениот орган не прибавил докази за повисока исплата на плати, посочувајќи дека го известиле Судот дека располагаат со документи кои се доверливи, за кои согласно законот потребна е согласност од Министерството за одбрана, кое ДКСК не била во можност да ги достави до првостепениот суд. Вишиот управен суд, исто така, донел решение со кое жалбата на ДКСК против пресудата на Управниот суд ја отфрли како недозволена.

Директор на основно училиште во општина Теарце ја вработил ќерката, ДКСК бара поведување на прекршочна постапка

Дарко Андоновски — Fri, 17 Dec 2021 15:14:19 +0000

Државната комисија за спречување корупција на денешната 57-ма седница информираше дека директор на основно училиште во Општина Теарце ја вработил неговата ќерка како библиотекар во истото училиште. Од ДКСК наведоа дека ќе поднесат иницијатива до градоначалникот на Општина Теарце за разрешување на директорот, а за него поведување на прекршочна постапка за неииземање при потпишување на договорот и за непријавување на вработување на блиско лице до Комисијата. Од ДКСК наведоа дека ја прибавиле целата потребна документација, при што утрдиле дека навистина станува збор за ќерката на директорот на основното училиште и оти постои основа за прекршочна постапка, како и за иницијатива за негово разрешување. – Ние се обративме до посоченото основно училиште во Општината, каде што ја побаравме документацијата и како е спроведена постапката во врска со вработувањето на библиотекарот. Ги доставија сите потребни документи. За тоа работно место било пријавено само едно лице и Училишниот одбор предложил тоа лице да биде вработено затоа што немало никаква конкуренција, односно согласно јавниот оглас и биле исполнети условите. Но, бидејќи во пријавата се наведува дека се работи за ќерка на директорот, се обративме до директорот и за конкретното лице побаравме изјава дали е во сродство или не. Тој ни достави нотарска изјава каде што изјавува дека лицето е блиско лице, односно негова ќерка. Претходно не ни беше доставен договорот за работа, па го побаравме и утврдивме дека тој го потпишал, наведоа од ДКСК. Од анализата, од ДКСК предложија да се достави иницијатива до градоначалникот на Општина Теарце да се разреши директорот од функција, да се бара одоговорност и да се поведе прекршочна постапка против директорот бидејќи не се изземал од постапката за вработување на неговата ќерка, односно при потпишување на договорот не се изземал и за непријавување за вработување на блиско лице до ДКСК.

При крај е истрагата за набавката на кинеските вакцини отворена во март, вели Ивановска

Магдалена Андонова — Thu, 16 Dec 2021 10:43:11 +0000

Билјана Ивановска, претседателката на Државната комисија за спречување на корупција, во претпладневната емисија на ТВ24 рече дека Антикорупциска е при крај со истрагата за набавка на вакцините од кинескиот производител Синофарм која ја отвори уште во март. Изминатата пролет ДКСК ја нарече оваа истрага „комплексна“. Антикорупциска во мај информираше дека добила од Народна банка документ за извршена исплата на седум милиони и 800 илјади долари за увоз на стока кое Министерството за здравство го има исплатено на 15 февруари, а НБ го има реализирано во корист на Стабри Интернешенел од Хонг Конг. - При крај е предметот за набавката на вакцините, ќе излеземе во јавност со јасни докази, информираше кусо Ивановска во студиото на ТВ24. Од МЗ известиле дека немаат исплатено аванс на правно лице за купување кинески вакцини, туку на почетокот на оваа година има извршено уплата на средства на име гаранција со цел да се изврши резервација на 200 илјади дози вакцини од производителот Синофарм од Кина, врз основа на заклучоци од затворена владина седница одржана на 5.февруари. Парите што биле префрлени на Стабри се вратени назад и нема извршено никаква исплата. Владата потоа склучила договор директно со производителот Синофарм.

ДКСК со прекршочни глоби за неподнесување Анкетни листови, повеќето за екс-директори

Дарко Андоновски — Thu, 18 Nov 2021 11:23:24 +0000

Државната комисија за спречување на корупција (ДКСК) на денешната седница запре неколку предмети за недоставување или задоцнето поднесување Анкетен лист од страна функционери и именувани лица, откако прекршочната комисија во Антикорупција им има изречено прекршочни пријави и соодветни глоби. Шемши Салаи, член на ДКСК, информираше дека еден од тие случаи е за поранешен пратеник во Собранието, кој ненавремено доставил анкетен лист до ДКСК и на кого од страна на прекршочната комисија му е изречена прекршочна санкција глоба од 300 евра. За повеќе такви предмети кои беа запрени на седницата денеска од ДКСК, информираше и Горан Трпеноски, член на ДКСК, меѓу кои повторно за пратеник, кој по престанок на функцијата не поднел анкетен лист до Антикорупција, по што му е изречена глоба во износ од 400 евра. Друг предмет се однесува на вршител на должност директор, кој по престанок на оваа функција не поднел анкетен лист до ДКСК и му е изречена глоба во износ од 300 евра. Утврдено е дека и други двајца директори, по престанок на функцијата не поднеле анкетен лист до ДКСК и им се изречени глоба во износ од 300 евра во денарска противвредност за едниот, додека за другиот платена е половина од глобата. – За сите предмети по прекршочен платен налог, а на кои не им е платено, а утврдена им е глоба од прекршочната Комисија, доколку не платат одат на присилна наплата преку УЈП, појаснија од ДКСК. Софка Пејовска Дојчиновска, член на ДКСК, побара Антикорупција да прави пресек на платените глоби, затоа што, како што рече, ефикасноста на постапувањето на прекршочната Комисија во ДКСК е за пофалба, а сумата што се наплатува за сторените прекршоци не е занемарлива. Предлогот беше прифатен од претседателката на ДКСК, Билјана Ивановска, која нагласи дека уште повеќе ќе се зголеми ефикасноста со тие 710 прекршочни, кои ќе влезат во годишниот извештај од Антикорупција. – Со тоа даваме наш придонес во Буџетот, рече претседателката на ДКСК.

ДКСК ги потсети сите новоизбрани градоначалници и советници за одредбите од Законот за спречување на корупција и судирот на интереси

Катерина Бојаџиева — Tue, 02 Nov 2021 11:29:42 +0000

Државната комисија за спречување на корупција ги потсетува сите новоизбрани советници, градоначалници и функционери за одредбите од Законот за спречување на корупција и судирот на интереси, како и дека при извршувањето на јавните овластувања и должности не смеат да се раководат од лични, семејни, партиски и етнички интереси. Непочитувањето на сите обврски и забрани од Законот за спречување на корупција и судир на интереси претставуваат прекршок и за истите се изрекува одредена прекршочна санкција, односно јавна опомена. Претседателката на ДКСК Билјана Ивановска, на денешната 54-та седница, укажа на начелото на интегритет и обврската при вршењето на функцијата да внимаваат на евентуален судир на интереси, а во случај на постоење на сомневање на судир на интереси се должни да побараат мислење од ДКСК. – Избраните градоначалници и членови на Совет на општина, односно на Град Скопје, имаат обврска за поднесување на изјава за имотна состојба и судир на интереси, најдоцна во рок од 30 дена од денот на изборот. Градоначалниците или членовите на совет на кои функцијата им престанала, исто така, имаат обврска да поднесат изјава за имотна состојба или судир на интереси најдоцна во рок од 30 дена, од денот на престанување на функцијата. Градоначалниците или членовите на совет се должни во рок од 30 дена да го пријават секое зголемување на нивниот имот, односно имотот на членовите на нивното семејство во вредност што надминува 20 просечни плати во претходниот тримесечен период, изјави Ивановска. Градоначалник или член на Совет на општина, нагласи Ивановска, не може да биде член на управен или надзорен орган во трговско друштво, јавни претпријатија, агенции, фондови и сите други правни лица со доминантен државен капитал, освен ако со закон не е поинаку утврдено. ДКСК, на продолжението на денешната 54-та седница, разгледа и одлучи по повеќе предмети, меѓу кои и за договорот за снимање со дрон на шумски површини во скопската котлина за рана детекција на растителни болести од страна на Град Скопје, а каде е ангажирана фирмата на партнерот на министерката за образовани и наука. Катица Николовска, член на ДКСК, појасни дека за предметот имало доста реакции во јавноста и дека се обратиле до Град Скопје за добивање на целокупната документација за изборот на фирмата. – Постапката е спроведена согласно Законот за јавни набавки. Објавена е и планирана со годишниот план за јавни набавки. Спроведени се сите постапки преку електронскиот систем. Се јавил само еден кандидат. Склучен е договорот и реализиран е во рамки на планираните средства. Наводите во јавноста дека фирмата е избрана со влијание на министерката не се потврдени. Постапувањето по предметот се запира, изјави Николовска. ДКСК, исто така, го разгледа и предметот за 280 вработувања во АД „Пошти“, за кој констатира дека не се потврдиле наводите дека се вршат партиски вработувања пред избори. – Вработувањата биле предвидени уште во претходната година да се реализираат, на крајот на 2019 година, меѓутоа со распишување на предвремените парламентарни избори сите постапки се ставаат во мирување. Со планот за вработување се предвидени 230 нови вработувања и обезбедени се средства во финансискиот план на акционерското друштво. Сето тоа е јавно и транспарентно објавено. Формирана е комисија и сето тоа е потврдено со одлуки на Управен одбор. Така што, наводите дека се вршат партиски вработувања пред избори не се потврдуваат и предлагам постапувањето на комисијата да запре, изјави Николовска. ДКСК на денешната седница, исто така, разгледа и отфрли повеќе пријави од граѓани, поради неоснованост или ненадлежност.

ДКСК ја усвои Националната стратегија за спречување на корупцијата и судирот на интереси со Акциски план 2021-2025 година

Дарко Андоновски — Fri, 11 Dec 2020 14:50:21 +0000

На денешната 43-седница Државната комисија за спречување на корупција (ДКСК) едногласно ја усвои Националната стратегија за спречување на корупцијата и судирот на интереси со Акциски план 2021-2025 година, што ќе биде предадена во Собранието, каде треба да биде усвоена. Од ДКСК информираа дека во Националната стратегија првпат се воведуваат и четири нови сектори кои ќе се следат – животна средина, просторно планирање и урабанозмот, земјоделието и спортот. – Генерално мерките и активностите коишто се презентирани во нашата Стратегија се однесуваат точно на зајакнување пред се на инситуционалниот интегритет, а со самото тоа и на личниот интегритет на вработените во институциите, но некако сумирајќи ги резултатите од сите овие мерки и активности се наметнува заклучокот дека сепак нашата Стратегија е насочена кон зајакнување на контролните механизми на институциите, пред се тука вклучувајќи ги сите инспекторати, сите контролни механизми коишто се претставени во законските решенија и нивното спроведување. Така што исполнувањето на оваа Национална стратегија и ќе доведе до целосно зајакнување на инстуционалниот интегритет и контролните механизми на државата, нагласи претседателката на ДКСК Билјана Ивановска. Од ДКСК изразија надеж дека наскоро ќе биде усвоена Националната стратегија. Имено, денеска ДКСК ја продолжи и 42-та седница, на која беа изнесени повеќе предмети, за кои ДКСК донесе одлука дека нема да постапува. Сепак, поради многубројните пријави кои досега ги има добиено ДКСК, во однос на несоодветното бирање кандидати за одредени работи места во државни институции, односно „местење“ на условите за одредени лица, членовите на Комисијата укажаа дека мора да се најде соодветен механизам со кој ќе се спречи таквата пракса во иднина.