државна награда Свети Климент Охридски – Kurir.mk

Објавен Конкурсот за доделување на државната награда „Св. Климент Охридски“ во 2022

Дарко Андоновски — Tue, 31 May 2022 07:12:41 +0000

Одборот за доделување на државната награда „Св. Климент Охридски“ распиша Конкурс за доделување на државната награда „Св. Климент Охридски“ во 2022 година. Како што информира Министерството за култура, конкурсот ќе трае од 1 до 30 јуни 2022 година. Достапен е на веб-страницата на Министерството за култура. Согласно со член 5 од Законот за државните награди и Законот за изменување и дополнување на Законот за државните награди („Службен весник на РМ“ бр. 52/06 и 54/07), со наградата „Св. Климент Охридски“ се оддава највисоко признание за долгогодишни остварувања во областа на воспитанието, образованието, културата, уметноста, здравството, спортот и заштитата и унапредувањето на човековата околина и во социјалната дејност. Во една година можат да се доделат најмногу до пет награди. Државната награда ја доделува Одборот за доделување на државната награда „Св.Климент Охридски“, составен од претседател и 12 члена, кој распишува конкурс и донесува одлука за доделување на наградата. Државната награда се врачува во Собранието на 8 декември – Ден на св. Климент Охридски. Државната награда „Св. Климент Охридски“ првпат е доделена во 1969 година.

Поранешна пратеничка и шеф на партиска комисија на СДСМ доби државна награда „Свети Климент Охридски”.

Ивана Ефремовски — Wed, 08 Dec 2021 16:32:52 +0000

Екс пратеничката и екс претседателка на Комисијата за едно општество на СДСМ Ѓулумсер Касапи е меѓу годинешните добитници на највисоката државна награда „Свети Климент Охридски”. -Доделување на државната награда „Св. Климент Охридски“ за 2021 година. Честитки за носителите на признанието: универзитетската професорка Ѓулумсер Касапи, во областа на воспитанието и образованието, како и писателот Јован Павловски, музичката уметничка Снежана Анастасова-Чадиковска и академската сликарка-костимограф Елена Дончева во областа на културата и уметноста, напиша претседателот Пендаровски во врска со церемонијата која се одржа во Собранието. Наградата на Касапи и ја доделува македонскиот парламенент каде до пред една година лауреатката била пратеничка и координарка на клубот на пратенички. Кои се заслугите на Касапи за воспитанието и образованието и што таа објавила или направила во овие области, а е од државен интерес во 2021 година, не и е познато на јавноста. Касапи која беше пратеничка на СДСМ и шеф на партиска комисија која ја формираше Заев во јавноста е позната и како мајка на членот на кабинетот на вицепремиерот Артан Груби кој според МВР беше фатен со наркотици по што беше избркан од својата советничка позиција во владата каде го советувал Артан Груби за култура и општество. Целата анализа прочитајте ја на ЕКСПРЕС

Соопштени добитниците на државната награда „Св. Климент Охридски“ за 2021 година

Ивона Петрова — Wed, 01 Dec 2021 09:44:10 +0000

Државната награда „Св. Климент Охридски“ за 2021 година во областа на воспитанието и образованието му се доделува на универзитетскиот професор Ѓулумсер Касапи, а добитници во областа на културата и уметноста се писателот Јован Павловски, музичкиот уметник Снежана Анастасова-Чадиковска и Елена Дончева, академски сликар – костимограф, соопшти Министерството за култура. Одлуката ја донесе Одбор за државната награда „Св. Климент Охридски“ под претседателство на академик Газанфер Бајрам. Наградата на годинашните добитници ќе им биде врачена в среда, 8 декември 2021, во 12 часот во Собранието на Македонија. Државната награда „Св. Климент Охридски“ е највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на Република Северна Македонија.

Доделена државната награда „Свети Климент Охридски“

Катерина Бојаџиева — Sun, 08 Dec 2019 13:33:26 +0000

Во Парламентот денеска беше врачена државната награда „Свети Климент Охридски“ за 2019 година што се доделува за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на државата. За остварување во областа на воспитанието и образованието наградата му припадна на проф. д-р Агим Паљоска, албанолог. Наградата за остварување во областа на културата и уметноста им беше доделена на писателот Димитар Башевски и Весна Ѓиновска-Илкова, оперски пејач и Виолета Томовска, естраден уметник, а наградата за остварување во областа на здравството му се доделува проф. д-р Дејан Докиќ, пулмолог-алерголог. Од името на добитниците се заблагодари писателот Димитар Башевски, кој рече дека наградата симболизира многу години работа и дела кои ги претставуваат нив. – Убаво е што сред гласноста, бучавоста од партиски, политички, правни, сообраќајни и други гласови, ваквите прилики се еден момент каде вниманието се свртува кон нешто што е подолгорочно, кон нешто што трае подолго и што е поврзано со сфери како што се: културата, науката, образованието и други, рече Башевски.