Движење на промена – Kurir.mk

Грчката партија Движење на промена в недела одбира ново име

Ивона Петрова — Fri, 06 May 2022 12:45:15 +0000

Движење на промена или ПАСОК- Движење на промена се двете опции што ги имаат членовите на грчката партија Движење на промена за в недела да одберат ново име на партијата во пресрет на Конгресот на крајот од месецов, јави дописничката на МИА од Атина. Станува збор за партијата која од 2017 година го промени името од ПАСОК во Движење на промена, а новиот лидер Никос Андрулакис избран пред неколку месеци најави враќање на старото име. В недела ќе се одржат внатрепартиски избори за делегати на Конгресот, а паралелно членовите ќе гласаат и за ново име на партија. Првата опција е актуелното име Движење на промена со актуелниот симбол, додека пак втората опција е комбинација од старото и новото име, односно ПАСОК – Движење на промена, пропратено со симболот на ПАСОК, зелено сонце. Движење на промена е централно левичарска партија и трета политичка сила во Грција.

Почина Фофи Генимата, претседателката на грчката партија Движење на промена

Ивана Ефремовски — Mon, 25 Oct 2021 09:53:10 +0000

Претседателката на централно левичарската грчка партија Движење на промена (КИНАЛ) Фофи Генимата, денеска ја загуби долгогодишната битка со ракот и почина на 57- годишна возраст, јави дописничката на МИА од Атина. Генимата пред две седмици беше хоспитализирана во атинска болница, каде што се лекуваше, а доцна синоќа драстично и се влошила здравствената состојба и и покрај напорите на лекарите, како што соопштија од болницата, во 12.04 часот, починала. Во 2008 година на Генимата ѝ беше дијагностициран рак на дојка и успешно се избори со болеста, а здравствени проблеми поради кои беше хоспитализирана, се должеа на повторување на нејзината основна болест. Претседателката на КИНАЛ, поранешно ПАСОК, преку „Фејсбук“, пред две седмици соопшти дека, поради хоспитализацијата, се повлекува од изборниот процес во партијата закажан за 5 декември за избор на нов лидер. (МИА)