Џасинда Ардерн – Kurir.mk

Поранешната премиерка на Нов Зеланд одликувана за водење на земјата во време на криза

Ивана Ефремовски — Mon, 05 Jun 2023 14:53:22 +0000

Поранешната премиерка на Нов Зеланд, Џасинда Ардерн денеска беше одликувана со титулата Дама за нејзините напори да ја води земјата низ пандемијата на Ковид-19, терористичките напади на две џамии во Крајстчерч и ерупцијата на вулканот на Белиот остров. Ардерн беше прогласен за Дама, втора највисока чест во Нов Зеланд. Премиерот обично избира на кого ќе му биде доделена честа, која потоа ја одобрува британскиот монарх, шефот на државата. Премиерот Крис Хипкинс рече дека Ардерн добила признание за својата служба за некои од најголемите предизвици на Нов Зеланд во модерното време. „Водечкиот одговор на Нов Зеланд на терористичките напади од 2019 година и пандемијата на Ковид-19 беше период на интензивен предизвик за нашиот 40-ти премиер, и од прва рака видов дека нејзината посветеност на Нов Зеланд остана апсолутна“, рече Хипкинс. Ардерн стана премиерка во 2017 година и поднесе оставка во јануари оваа година во изненадувачка објава дека „повеќе нема сила“ да го води Нов Зеланд.

Западните медиуми за неочекуваната оставка на премиерката на Нов Зеланд

Ивона Петрова — Fri, 20 Jan 2023 10:28:11 +0000

Неочекуваната објава за оставка го означи крајот на петгодишниот мандат на новозеландската премиерка Џасинда Ардерн, која доби меѓународна пофалба за нејзиното емпатично лидерство за време на неколку кризи. Во услови на притисоците поради зголемените трошоци за живот и зголеменото незадоволство во јавноста, нејзината популарност неодамна почна да опаѓа во корист на главната конзервативна опозиција пред општите избори следната есен, пренесува Радио Слободна Европа (РСЕ). Ардерн (42), која како премиерка на Нов Зеланд стана глобална либерална икона, но се соочи со зголемени политички предизвици пред претстојните избори, на 19 јануари ненадејно објави дека ќе се повлече од функцијата лидер на земјата, пишува Њујорк Тајмс. Во емотивниот говор во новозеландскиот град Напиер, Арден рече дека таа лично не се чувствува подготвена да заврши уште еден мандат и дека ќе се повлече до 7 февруари. – Се надевам дека ќе ги оставам Новозеланѓаните со верувањето дека можете да бидете љубезни а воедно и силни, емпатични, но решителни, оптимисти, но фокусирани…дека можете да бидете лидер на вој начин, лидер кој знае кога е време да замине, истакна Ардерн во емотивната објава. Ардерн стана премиерка во 2017 година и извојува историска повторна победа во 2020 година, во голема мера благодарение на одговорот на Нов Зеланд на пандемијата на Ковид, кој им овозможи на жителите да живеат главно нормални животи за голем дел од здравствената криза.. Сепак, нејзината Лабуристичка партија оттогаш драстично падна во анкетите поради економските проблеми и забележаниот пораст на насилниот криминал што придонесе за чувството на незадоволство, наведува Њујорк Тајмс. Во декември поддршката за лабуристите изнесуваше 33 отсто, во споредба со 38 отсто за централнодесничарската Национална партија, предводена од Кристофер Луксон. Сепак, Ардерн остана лично популарна кај гласачите, вели весникот, додавајќи дека таа редовно е на врвот пред Луксон во анкетите како „омилена премиерка“ на повеќето Новозеланѓани. Набргу по нејзиното неочекувано доаѓање на власт како најмлад премиер на Нов Зеланд во последните 150 години, Ардерн, пишува Њујорк Тајмс, стана нешто како глобална славна личност, особено затоа што претставуваше добредојдена алтернатива на политиките што ги застапуваше тогашниот американски претседател Доналд Трамп. . Кој и да го заземе местото на Ардерн ќе се соочи со големи предизвици во наредните месеци, оценуваат аналитичарите. Ардерн се соочи со серија кризи во текот на пет и пол години како премиерка, од кои најпознат е терористичкиот напад во март 2019 година на две џамии во Крајстчрч, кога напаѓач уби 51 лице, потсетува лондонскиот весник Тајмс, додавајќи дека нејзиното сочувство со жртвите и безбедно справување со последиците ја направија лидерка која стекна популарност во целиот свет. Подоцна истата година, во декември, таа повторно ја покажа својата длабочина на чувствата во лицето на трагедијата кога 22 лица загинаа во вулканска ерупција на Вајт остров. Сепак, додава Тајмс, иако Ардерн имаше силна поддршка за време на пандемијата на Ковид-19, нејзината популарност опадна со текот на времето бидејќи се бореше со опаѓањето на довербата во владата, влошената економска ситуација и повторното заживување на конзервативната опозиција. Некои аналитичари сметаат дека кој и да ја преземе премиерската функција ќе работи во многу тешки услови до општите избори на 14 октомври. Политичкиот аналитичар од Универзитетот Викторија во Велингтон, Брајс Едвардс, смета дека оставката ја поштедила Ардерн од „понижувачки изборен резултат во октомври“. Брајс, исто така, оцени дека заминувањето на Ардерн е „нешто како самоубиствена мисија“ за лабуристите, испраќајќи силна порака дека дури и премиерката не верува дека нејзината влада може да победи во октомври. Веста за оставката на новозеландската премиерка беше толку изненадувачка што Ардерн мораше да ги отфрли сугестиите дека се обидува да спречи каков било скандал или дека се повлекува бидејќи нејзината партија заостанува во последните анкети. Ардерн им рече на новинарите дека ќе биде пратеник до април и дека со нетрпение очекува да поминува повеќе време со своето семејство, наведува весникот, додавајќи дека таа, исто така, ги отфрлила шпекулациите дека би можела да преземе висока функција во Обединетите нации, велејќи дека е фокусирана на служење на својата земја и партија, а не на својата кариера. Ардерн, пишува Вашингтон пост, доби пофалби за нејзиното мирно управување со пацифичката нација низ низа големи настани и кризи. Додека списанието Атлантик во 2020 година ја опиша како веројатно „најефективниот лидер на планетата“, во последно време, сепак, локалните чувства кон нејзината администрација се влошија. Полициските извештаи покажуваат дека заканите упатени кон премиерката Ардерн се речиси тројно зголемени во последниве години, посочува весникот, додавајќи дека таа, исто така, од време на време бил мета на мизогинско злоставување. Претстојните избори најверојатно ќе се фокусираат на економијата и трошоците за живот, ги пренесува весникот оценките на аналитичарите, од кои некои не ја исклучуваат можноста Лабуристите да имаат подобри резултати откако Ардерн ќе ја напушти власта. Според весникот, Ардерн се обидел да оди по жица во надворешната политика, балансирајќи меѓу најважниот безбедносен партнер – САД и Кина, која е најголемиот трговски партнер на Нов Зеланд. Сепак, минатата година таа призна дека „разликите“ меѓу нејзината земја и Кина стануваат „сè потешко помирливи“. Тој однос, заклучува Вашингтон пост, ќе биде тест за следниот премиер.

Канцеларијата на новозеландската премиерка Ардерн била нападната од жена со меч

Катерина Бојаџиева — Thu, 27 Oct 2022 06:19:38 +0000

Новозеландската полиција приведе жена во врска со вчерашниот напад со меч врз канцеларијата на премиерката на Нов Зеланд, Џасинда Ардерн, во Окланд, јави ДПА. Полицијата соопшти дека е уапсена 57-годишна жена. „Уапсената соработува во истрагата, во овој момент не бараме друго лице“, изјави полицискиот портпарол. При нападот бил скршен прозорец од канцеларијата на Ардерн, а во зградата бил издуван чад, јавуваат локалните медиуми. Нема информации за повредени, бидејќи во моментот на инцидентот во канцеларијата немало луѓе. Ардерн моментално е на Антарктикот на одбележување на 65-годишнината од создавањето на научната станица База Скот во Нов Зеланд (именувана по британскиот поларен истражувач Роберт Скот), како и за првата целосна сезона на антарктичко истражување и акција за зачувување на животната средина по двегодишен прекин поради Ковид.

Нов Зеланд ќе стане република, но не наскоро

Катерина Бојаџиева — Mon, 12 Sep 2022 09:56:30 +0000

Новозеландската премиерка Џасинда Ардерн изјави дека по смртта на кралицата Елизабета Втора нејзината влада нема да бара промена на статусот на Нов Зеланд од кралство во република. Ардерн, пренесуваат американските медиуми, изјави дека верува дека Нов Зеланд во иднина ќе стане република и дека тоа ќе се случи за време на нејзиниот живот, но дека сега нејзината влада има поважни прашања. Од смртта на Елизабета втора, на 8 септември, Ардерн нема зборувано за оваа идеја – Нов Зеланд да стане република, но за неа претходно неколку пати позитивно се има изјаснето. Според сегашниот систем, лидер на Нов Зеланд е британскиот монарх, а во Нов Зеланд го застапува гувернерот, чија улога последните години е протоколарна. Меѓутоа, многу луѓе не се сигурни дека Нов Зеланд ќе може да излезе од сенката на своето колонијално минато и да стане целосно независна нација додека не стане република. -Имаше дебати, многу години наназад. Јас го кажав мојот став неколку пати. Верувам дека Нов Зеланд ќе стане република со текот на времето, дури и во текот на мојот живот, но не очекувам дека тоа ќе се случи наскоро, ниту пак е на агендата сега, кажа новозеландската премиерка. Премиерот на Антигва и Барбуда, Гастон Браун, вчера изјави дека граѓаните на оваа островска земја во Малите Антили на референдум ќе гласаат дали да стане република по смртта на британската кралица Елизабета Втора. Според него, референдумот ќе се одржи во следните три години и притоа касно нагласи потегот нема да се преземе од непријателство, пренесува Би-би-си. Австралискиот премиер, Ентони Албанесе, пак, откако ја презеде функцијата во мај, веќе прави напори земјата да ја направи република, вчера изјави дека сега не е време за промени, туку за оддавање почит на животот на британската кралица. Албанесе претходно изјави дека одржувањето референдум за Австралија да стане република не било приоритет во неговиот прв тригодишен мандат.

Џонсон и премиерката на Нов Зеланд денеска ќе се сретнат во Лондон

Магдалена Андонова — Fri, 01 Jul 2022 09:31:01 +0000

Британскиот премиер Борис Џонсон денеска во Лондон ќе се сретне со премиерката на Нов Зеланд, Џасинда Ардерн, со која ќе разговараат за прашања поврзани со безбедноста и билатералните односи. Ардерн е во посета на Лондон по овонеделниот состанок на лидерите на НАТО во Мадрид, на кој присуствуваа и таа и Џонсон. Кабинетот на Џонсон соопшти дека тој и Џасинда Ардерн ќе разговараат за безбедносните предизвици во индо-тихоокеанскиот регион и ситуацијата во Украина. Двајцата лидери се очекува да разменат идеи за борба против дезинформациите на Интернет и зајакнување на билатералните врски во областите на трговијата и на науката. „Партнерството меѓу Британија и Нов Зеланд ги прави нашите земји побезбедни и попросперитетни. Работиме заедно за да се справиме со новите закани што се предизвик за стабилноста и суверенитетот во Европа и во индо-пацифичкиот регион“, се вели во соопштението од Кабинетот на Џонсон. (МИА)

Новозеландската премиерка Ардерн позитивна на Ковид-19

Ивана Ефремовски — Sat, 14 May 2022 07:27:06 +0000

Премиерката на Нов Зеланд, Џасинда Ардерн е позитивна на Ковид-19, со умерени симптоми и ќе биде во изолација дома седум дена, соопштија од нејзиниот кабинет. Ардерн веќе беше во изолација од минатата недела, кога нејзиниот партнер Кларк Гејфорд беше позитивен и требаше да продолжи со работа од понеделникот. Нов Зеланд воведе еден од најрестриктивните пристапи во светот за управување со епидемијата на Ковид-19 од нејзиниот почеток во 2020 година, а бројот на смртни случаи од болеста, 892, останува меѓу најниските во развиените земји. Сепак, бидејќи ограничувањата се олеснија во март и со „растот“ на Омикрон, позитивниот случај на Ардерн е меѓу повеќе од 50.000 регистрирани во текот на изминатата недела. (МИА)

Премиерката Ардерн вели дека протестите во Нов Зеланд се „увезени“ од странство

Ристе Здравков — Mon, 14 Feb 2022 16:41:27 +0000

Премиерката на Нов Зеланд, Џасинда Ардерн, вели дека анти-ковид протестите, кои сега влегуваат во својата втора недела, се „увезен“ феномен и ништо слично на она што досега го видела во земјата, пренесува Ројтерс. Стотици демонстранти продолжуваат да ги окупираат тревниците пред парламентот веќе седми ден, игнорирајќи ги повторените повици на полицијата да си замине. Дури ни лошите временски услови не успеаја да ги избркаат демонстрантите. Собирајќи инспирација од демонстрациите на камионџиите во Канада, демонстрантите во Нов Зеланд исто така блокираа неколку улици околу парламентот со своите камиони, комбиња и мотоцикли. „Ова се ми изгледа како увезен протест“, изјави Ардерн за државната телевизија ТВНЗ. „Видов знамињата на кои го пишуваше името на Трамп, а видов и канадски знамиња“, вели таа. Ардерн на прес-конференција подоцна истиот ден рече дека демонстрантите побарале од владата да ги отстрани сите ковид мерки. „Тоа значи дека во моментот кога гледаме зголемување на случаите и зголемување на ризикот за јавното здравје и благосостојбата на Нов Зеланд, тие сакаат да се укинат токму мерките што не одржаа безбедни, здрави и живи. Извинете, но тоа нема да се случи“, рече Ардерн. Земјата со пет милиони жители, Нов Зеланд е меѓу државите со најниските бројки на ковид случаи, главно поради строгите ограничувања. Границите на земјата, сепак, сè уште се затворени со десетици илјади иселеници од Нов Зеланд разделени од семејствата.

Нов Зеланд ќе ги ублажи мерките кога ќе биде вакцинирано 90 отсто од населението

Ивона Петрова — Fri, 22 Oct 2021 05:59:40 +0000

Премиерката на Нов Зеланд Џасинда Ардерн денеска нагласи дека земјата ќе стави крај на заклучувањето и строгите мерки наметнати поради пандемијата на коронавирусот само кога 90 отсто од населението ќе биде целосно вакцинирано. -На крајот, најдовме рамнотежа помеѓу желбата да се отвориме повторно брзо, но луѓето се уште да бидат безбедни, рече Ардерн на прес-конференција. Досега, 68 проценти од жителите на Нов Зеланд биле вакцинирани со две дози, додека 86 проценти добиле единечна доза. Откако ќе се исполни целта за 90 проценти целосна вакцинација на населението, земјата ќе се пресели во нова рамка за заштита од Ковид -19 што ќе обезбеди излез од заклучувањето и ќе овозможи повторно отворање на бизниси и настани, рече Ардерн. -Целосно вакцинираните луѓе ќе можат повторно да се соберат со семејството и пријателите, да одат во барови и ресторани и да прават што сакаат со поголема безбедност, додаде таа. Нов Зеланд, кој беше пример во борбата против Ковид-19, има потешкотии да го потисне ширењето на многу заразна Делта варијанта на вирусот, и покрај тоа што неговиот најголем град Оукленд е под строг „локдаун“ повеќе од два месеца. Инаку, за време на прес-конференцијата, Нов Зеланд беше погоден од земјотрес со јачина од 5,9 степени по Рихтеровата скала, што ја принуди премиерката да подзастане, да се фати поцврсто за говорницата, а потоа му се обрати на новинарот со прашањето: Ах, извинете, мало одвлекување на вниманието – дали би ви пречело да го повторите тоа прашање?

Нов Зеланд: Убедлива изборна победа на премиерката Ардерн

Ивана Ефремовски — Sun, 18 Oct 2020 07:47:45 +0000

Лидерката на владејачката Лабуристичка партија на Нов Зеланд, Џасинда Ардерн, утрово изјави дека по убедливата изборна победа ќе формира нова влада во следните три недели. Ардерн не ја спомна можноста за склучување коалициски договор со Партијата на зелените, која освои 7,6 проценти од гласовите на изборите и треба да има 10 места во парламентот. Ново-старата премиерка на Нов Зеланд изјави дека на земјата не и требаат нови ограничувачки мерки откако беше регистриран еден нов случај на коронавирусот. (МИА)

Нов Зеланд: Ардерн прогласи победа на изборите

Ивана Ефремовски — Sat, 17 Oct 2020 12:14:10 +0000

Кандидатката за премиер на Нов Зеланд, Џасинда Ардерн изјави денеска дека го освоила мандатот, а нејзината Лабуристичка партија е победник на изборите. За Ардерн ова ќе биде втор мандат по ред. -Нов Зеланд покажа дека Лабуристичката партија е најпопуларна во претходните 50 години, истакна Ардерн пред своите симпатизери. Таа во своето прво обраќање по изборите нагласи дека гласовите кои и се дадени на неа и партијата нема да бидат залудни. -Немојте да мислите дека вашата поддршка ќе биде залудна. Можам да ви ветам дека ќе бидеме партија која ќе работи во интерес на секој жител на Нов Зеланд, додаде старо-новата премиерка. Ардерн како своја примарна цел го наведе спречувањето на ширењето на коронавирусот. (МИА)