Џастин Трудо – Kurir.mk

Трудо: Не се обидуваме да ја испровоцираме Индија, но сакаме одговори за убиството

Дарко Андоновски — Wed, 20 Sep 2023 07:08:20 +0000

Канада не се обидува да ја испровоцира Индија со тоа што сугерира дека е поврзана со убиството на сепаратистичкиот водач на Сиките во Канада, туку сака Њу Делхи соодветно да го реши проблемот, изјави премиерот Џастин Трудо. Тој објави дека канадските разузнавачки служби активно ги истражуваат наводите кои ги поврзуваат индиските агенти со убиството на Хардиб Синг Ниџар (45) во јуни во Британска Колумбија. Индија брзо го отфрли тврдењето како апсурдно, велејќи дека ќе го протера канадскиот дипломат. Трудо им рече на новинарите дека случајот има далекусежни последици за меѓународното право. „Владата на Индија треба да го сфати ова прашање со најголема сериозност. Ние го правиме тоа, не сакаме да провоцираме или да ескалираме“, рече тој. Њу Делхи, кој ја повикува Отава да дејствува против антииндиските елементи, долго време не е задоволен од сепаратистичките активности на Сиките во Канада. Канада има најголема популација на Сиките надвор од Пенџаб. Околу 770.000 луѓе го навеле сикизмот како своја религија на пописот во 2021 година.

По пожарите во Канада, Трудо го обвини Фејсбук дека го става профитот над безбедноста на луѓето

Катерина Бојаџиева — Tue, 22 Aug 2023 12:08:15 +0000

Канадскиот премиер Џастин Трудо го обвини Фејсбук дека го става профитот над безбедноста на луѓето за време на вонредната состојба предизвикана од невидената сезона на шумски пожари во Канада. Мета, матичната компанија на Фејсбук и Инстаграм, претходно ова лето објави дека ќе го исполни ветувањето дека ќе ја блокира информативната содржина од Канада на своите платформи поради новиот закон кој бара од технолошкиот гигант да им плаќа на издавачите чии линкови ги користи или на друг начин ги пренаменува нивните содржини на интернет. Шумските пожари кои беснеат низ Канада принудија десетици илјади луѓе да ги напуштат своите домови и се доближија близу градовите како Јелоунајф, главниот град на северозападните територии, додека околу 30.000 луѓе во провинцијата Британска Колумбија добија наредба да се евакуираат. „Во моментов, во вонредна ситуација каде што ажурираните локални информации се поважни од кога било, Фејсбук ги става корпоративните профити пред безбедноста на луѓето“, рече Трудо на прес-конференција во Корнвол, островот Принц Едвард.

Трудо го посети Киев за да ја изрази својата поддршка за Украина

Тале Кристо — Sat, 10 Jun 2023 13:07:35 +0000

Канадскиот премиер Џастин Трудо денеска го посети Киев во знак на поддршка додека украинските сили се подготвуваат за голема контраофанзива против Русија и се борат со секојдневни воздушни напади, пренесоа британските медиуми. Трудо се поклони пред споменикот на загинатите украински борци во центарот на Киев. Канада, како членка на НАТО, е средина на една од најголемите украински заедници во светот, и земјата обезбедува воена и финансиска помош за Украина уште од почетокот на инвазијата што ја започна Русија во февруари 2022 година. Посетата на Трудо на Киев доаѓа по ноќните руски ракетни напади и напади со беспилотни летала врз Одеса, Полтавската област и Харков.

Трудо: Кина игра агресивни игри со институциите во Канада

Тале Кристо — Tue, 08 Nov 2022 08:40:24 +0000

Кина игра „агресивни игри“ со демократиите и со институциите во Канада, смета канадскиот премиер Џастин Трудо. Изјавата на Трудо следува откако канадскиот телевизиски канал Глобал њуз извести за финансирање „тајна мрежа“ на кандидати на неодамнешните избори. Исто така, властите во Отава кон крајот на октомври најавија истрага за наводни незаконски кинески полициски бироа во областа на Торонто. – Презедовме значајни чекори за зајакнување на интегритетот на нашите изборни процеси и системи, нагласи Трудо пред новинарите. Тој додаде дека Канада ќе продолжи да „инвестира во борбата против мешањето во изборите, против странското мешање во демократиите и институциите“.

Средба Блинкен – Трудо

Ивона Петрова — Fri, 28 Oct 2022 12:48:28 +0000

Американскиот државен секретар Ентони Блинкен престојува во дводневна посета на Канада, каде синоќа во Отава имаше средба со канадскиот премиер Џастин Трудо. На средбата се дискутираше за блиската соработка меѓу САД и Канада за разни прашања и заедничкиот прогрес кон целите претставени во Патна карта за обновено американско-канадско партнерство. Како што соопштија од Стејт департментот, „секретарот Блинкен е задоволен од можноста да разговара со премиерот Трудо за продолжителната поддршка за Украина и Хаити, и соработката во индиско-тихоокенаксиот регион“. -Државниот секретар исто така нотираше дека САД се задоволни од нашата тесна соработка за јакнење на конкуренцијата во Северна Америка, промоција на инклузивна економска обнова, продлабочување на економската интеграција и унапредување на различноста и вклученоста, изјави портпаролот Нед Прајс. Блинкен ја истакнал и важноста од инвестиции во континенталната одбрана и безбедност вклучувајќи го и Арктикот, и напорот за ангажаман околу борбата со климатските промени.

Трудо: Канада ќе воведе нови санкции кон Москва за „лажните“ референдуми

Катерина Бојаџиева — Wed, 28 Sep 2022 07:32:57 +0000

Канада ќе воведе нови санкции кон Москва поради „лажните“ руски референдуми во четири окупирани украински региони, изјави премиерот Џастин Трудо. -Канада никогаш нема да ги признае резултатите од референдумите или обидот на Русија за илегална анексија на украински територии, рече канадскиот премиер. „Имаме намера да воведеме нови санкции против поединци и ентитети кои се вклучени во овој последен обид за поткопување на принципите на државниот суверенитет и кои ја споделуваат одговорноста за бесмисленото крвопролевање низ Украина што се случува во моментов“, рече Трудо во изјавата. Проруските власти во окупираните украински региони известија дека мнозинството од населението гласало за приклучување кон Русија на референдумите кои Киев и Западот ги осудија како лажни. Референдуми беа спроведена во четири региони – Доњецк, Луганск, Запорожје и Херсон, кои сочинуваат околу 15 отсто од украинската територија. Трудо додаде дека Канада заедно со меѓународните партнери и сојузници работи на заедничкото отфрлање на „нелегитимните гласови“.

Канадскиот премиер вторпат позитивен на Ковид-19

Ивона Петрова — Tue, 14 Jun 2022 06:11:25 +0000

Канадскиот премиер Џастин Трудо по вторпат е позитивен на Ковид-19, неколку дена по средбата со американскиот претседател Џозеф Бајден, објави бриселскиот портал „Политико“. „Ќе ги следам упатствата на здравствените експерти и ќе се изолирам. Се чувствувам добро, но тоа е затоа што ги добив вакцините“, напиша Трудо преку Твитер. Канадскиот премиер е вакциниран трипати. Во јануари годинава ја прими бустер-дозата, за истиот месец да биде позитивен на тестот за Ковид-19. Информацијата дека Трудо е позитивен на Ковид-19 е објавена веднаш по неговото враќање од Лос Анџелес каде што минатата седмица имаше средби со лидерите на Самитот на двете Америки, како и средба со Бајден во четвртокот.

Трудо најави забрана за продажба на оружје

Ивона Петрова — Tue, 31 May 2022 06:12:51 +0000

Премиерот на Канада, Џастин Трудо најави нов закон за поседување оружје и забрана за купување на оружје. – Денот кога овој закон ќе стапи во сила, повеќе нема да може да се купува, продава, пренесува или увезува оружје во Канада, истакна Трудо. Доколку биде усвоена, забраната се очекува да стапи во сила наесен. Забраната за поседување и купување на оружје уследи по минатонеделното убиство на 19 деца и двајца учители во основно училиште во Тексас во САД. Канада веќе има значително поригорозни ограничувања за поседување оружје од САД.

Трудо: Повеќе оружје и воена опрема ќе биде испратена во Украина

Катерина Бојаџиева — Mon, 09 May 2022 06:33:27 +0000

Канадскиот премиер Џастин Трудо денеска, по ненајавената посета на Киев, истакна дека во Украина ќе биде испратено ново оружје и воена опрема. По разговорите со украинскиот претседател Володимир Зеленски, Трудо им рече на новинарите дека Канада, исто така, ќе воведе нови санкции за руски поединци и компании поради рускиот напад врз Украина. Тој додаде дека Канада повторно ќе ја отвори амбасадата во Киев.

Бајден и Трудо: Русија е целосно одговорна за војната

Тале Кристо — Sat, 07 May 2022 10:42:13 +0000

Американскиот претседател Џозеф Бајден и канадскиот премиер Џастин Трудо се согласија дека Русија е целосно одговорна за нејзината инвазија врз Украина и за натамошните напори за обезбедување безбедносна помош за Киев, соопшти Белата куќа. Двајцата лидери во вчерашниот телефонски разговор се осврнале и на претстојното учество на Самитот на Америка, што е планирано за јуни во Лос Анџелес, се наведува во соопштението. Бајден вчера разговараше и со германскиот канцелар Олаф Шолц, изразувајќи согласност дека нема да признаат никакви руски „територијални придобивки“ во Украина, изјави портпарол на германската Влада.