Џејк Саливан – Kurir.mk

Саливан се сретна со кинескиот министер за надворешни работи Ванг Ји

Тале Кристо — Sun, 17 Sep 2023 18:48:23 +0000

Советникот за национална безбедност на Белата куќа Џејк Саливан се сретна со кинескиот министер за надворешни работи Ванг Ји во Малта во обид да ги стабилизира билатералните односи. Кинеското Министерство за надворешни работи соопшти дека Саливан и Ванг имале „искрени, значајни и конструктивни разговори“. Ова е нова дискусија на високо ниво во серијата консултации меѓу американските и кинеските претставници, кои го подготвуваат теренот за средба меѓу американскиот претседател Џо Бајден и неговиот кинески колега Си Џинпинг подоцна оваа година. Саливан и Ванг последен пат разговараа во мај во Виена. Овој месец Бајден го изрази своето разочарување што Си го пропуштил форумот на Г20 во Индија, но додаде дека „ќе успее да се види со него“. Следна таква можност е самитот за Азиско-пацифичка економска соработка, кој е закажан за ноември.

Волстрит журнал: Саливан му предложи на Зеленски да размисли за „реалистични“ преговарачки позиции

Катерина Бојаџиева — Mon, 14 Nov 2022 07:51:18 +0000

Американскиот советник за национална безбедност, Џејк Саливан за време на неодамнешен состанок, му предложи на украинскиот претседател Володимир Зеленски, да размисли за „реалистични“ преговарачки позиции, пишува Волстрит џурнал, повикувајќи се на дипломати. Според изворите на весникот, Вашингтон го повикал Киев да покаже отвореност за идејата за преговори. „Двајца европски дипломати, запознаени со дискусиите, изјавија дека Саливан му препорачал на тимот на Зеленски да размисли за реални барања и приоритети во преговорите, вклучувајќи и повторно разгледување на нивната објавена цел… враќање на контролата врз Крим“, наведува весникот. Како што пишува весникот, сè поголем број американски функционери сметаат дека наредните недели и месеци претставуваат можност за Русија и Украина да размислат за можни преговори. Вашингтон смета дека почетокот на зимата може да биде пресвртница во конфликтот во Украина. „Поради тоа што се чини оти Украина нема да постигне позначителни успеси на бојното поле во наредните недели, американски претставници и некои од нивните европски колеги почнаа да се прашуваат кога општеството ќе почне… да бара мирно решение“, посочува весникот. Во текстот се забележува дека САД и сојузниците се загрижени оти поради поддршката на Украина, нивните резерви оружје се исцрпуваат пребрзо. – Им велиме на Украинците дека нивно е да одлучат кога ќе го сторат тоа (да започнат мировни преговори). Но, би било добро да ги започнат порано, се цитира еден од западноевропските дипломати, пренесоа дел од руските медиуми. Претходно, Зеленски потпиша указ за стапување во сила на одлуката на Советот за национална безбедност и одбрана на Украина за неможност за преговори со рускиот претседател Владимир Путин. Исто така, тој изјави дека Украина нема да преговара со Русија, додека нејзин претседател е Путин. Кон крајот на октомври, рускиот претседател Путин посочи дека Русија е подготвена за преговори за Украина и го повика Киев веднаш да ги прекине сите борбени дејствија.

Саливан: Комуникацијата со Кремљ е во интерес на САД

Тале Кристо — Tue, 08 Nov 2022 08:21:38 +0000

Американскиот советник за национална безбедност Џејк Саливан потврди дека каналите за комуникација меѓу Вашингтон и Москва се отворени и покрај војната во Украина. За време на своето обраќање во Њујорк, Саливан рече дека е во интерес на САД да одржуваат контакт со Кремљ, истакнувајќи дека американските власти „се свесни со кого имаат работа“, пренесува Би-Би-Си. Неговата изјава уследи по написот на Волстрит џурнал во кој се вели дека Саливан разговарал со руски официјални претставници за да ги намали ризиците војната во Украина да ескалира во нуклеарен конфликт. Се наведува дека Саливан бил во контакт со советникот за надворешна политика на рускиот претседател Владимир Путин, Јуриј Ушаков и секретарот на рускиот совет за безбедност Николај Патрушев, но дека темата на разговорот не биле начините за ставање крај на украинскиот конфликт. Белата куќа не соопшти јавно за некакви разговори меѓу Саливан и висок руски функционер од март, кога американскиот советник за национална безбедност разговараше со Патрушев. Портпаролката на Советот за национална безбедност на САД, Адриен Вотсон, одби да го потврди написот на Волстрит џурнал и рече дека „луѓето изнесуваат многу тврдења“, а портпаролот на Кремљ Дмитриј Песков не сакаше да ги коментира наводите на весникот дека Вашингтон водел доверливи разговори со највисоките руски претставници. – Немаме што да кажеме за тие наводи. Повторувам уште еднаш дека има некои вистинити извештаи, но главно се е чиста шпекулација, рече Песков на прес-конференцијата и ги советуваше новинарите да се обратат во Белата куќа или во Волстрит џурнал за коментар.

Саливан: Ги охрабруваме пријателите од Северна Македонија да ги отпочнат преговорите со ЕУ

Тале Кристо — Tue, 05 Jul 2022 20:08:41 +0000

Ги охрбаруваме нашите пријатели од Северна Македонија да ја искористат можноста и да го отпочнат пристапниот процес со Европската Унија, напиша денеска на Твитер Џејк Саливан, советник за национална безбедност на Белата куќа. -Откога се приклучи во НАТО, Северна Македонија е силен сојузник. Може да има и важен придонес во ЕУ. Ги охрабруваме нашите пријатели да ја искористат можноста да го почнат пристапниот процес со ЕУ, порача тој. По објавување на францускиот предлог, Стејт департментот за Гласот на Америка рече дека САД ги поздравуваат напорите на Франција да постигне успешно решение и остануваат подготвени да играат конструктивна улога во олеснување на компромисот. -Со оглед на значењето на овој процес за земјите од регионот и за Европа пошироко, се надеваме дека дипломатските напори ќе продолжат, и ќе продолжиме да ја нудиме нашата поддршка онаму каде што е од помош. Ја поздравуваме Франција за нејзините напори да постигне успешно решение за што побрзо започнување на официјалните преговори. Преговорите сѐ уште се во тек, а ние остануваме подготвени да играме конструктивна улога во олеснувањето на компромисoт, изјави портпарол на Стејт департментот. Во неговата изјава се вели дека Северна Македонија и Албанија ги поставиле темелите и оти сега е време да се придвижат напред кон следната фаза во процесот на пристапување. -САД се силен поддржувач на интеграцијата на Северна Македонија и Албанија во ЕУ. Ние веруваме дека иднината на Западен Балкан е целосно во ЕУ. Процесот на проширување промовира долгорочен мир, стабилност и просперитет во целиот регион“, стои во изјавата, во која се наведува и дека САД ги земаат предвид „многуте изјави на лидерите на ЕУ за важноста на пристапувањето на Северна Македонија и Албанија во ЕУ за зајакнување на безбедноста на Европа, како и за нашата колективна безбедност.

Саливан: Новиот руски командант би можел да користи тактика на „изгорена земја“

Ивана Ефремовски — Mon, 11 Apr 2022 18:39:41 +0000

Американскиот советник за национална безбедност Џејк Саливан изјави дека назначувањето на рускиот генерал наречен „Касапот на Сирија“ за да ја надгледува војната во Украина е „конзистентно“ со начинот на кој Русија води војна. Генералот Александар Дворников (60) претходно ги предводеше руските операции во Сирија, каде што руските сили беа обвинети за намерно гаѓање на цивилни области. Тој претходно служеше и во Чеченија. Говорејќи за Face the Nation на Си-Би-Ес, Саливан рече дека верува оти назначувањето на Дворников е знак дека Русија планира да продолжи со тактиката на „изгорена земја“. -Видовме бруталност и воени злосторства и масовни убиства и ужасни и шокантни слики од градови како Буча и ракетни напади врз Краматорск, изјави Саливан. – Мислам дека ова (назначувањето на генералот) е показател дека ќе видиме повеќе од тоа. Москва негираше каква било вмешаност во смртта на цивили во Буча и ги опиша извештаите за расфрлани тела низ тамошните улици како лажни вести. Но, оценката на Саливан ја повтори и генералот Дејвид Петреус, поранешен директор на ЦИА. -Русите беа познати во Сирија, во основа по…„депопулација“ на областите. Тоа му го направија на Алепо, изјави Петреус за Си-Ен-Ен. -Тоа е она што тие го направија со другите области. И мислам дека можеме да го очекуваме тоа. (МИА)

Саливен: Соединетите Држави се посветени на обезбедување на Украина со оружје за одбрана

Дарко Андоновски — Sun, 10 Apr 2022 16:49:19 +0000

Американскиот советник за национална безбедност Џејк Саливен денеска изјави дека САД се посветени на Украина да и го дадат оружјето што и е потребно за да се одбрани од Русија. Тој за Си-Ен-Ен изјави дека очекува новоименуваниот руски генерал кој ја надгледува Украина, Александар Дворников, да „оркестрира злосторства и бруталност врз украинските цивили“. Тој посочи дека Кремљ е одговорен за напади врз цивили. Саливан изјави за дека администрацијата на американскиот претседател Џозеф Бајден ќе испрати повеќе оружје во Украина со цел да ја спречи Русија да окупира повеќе територии и да нападне цивили, што Вашингтон го смета за воено злосторство. „Ќе го набавиме оружјето што и е потребно на Украина за да им возврати на Русите за да ги спречиме да окупираат повеќе градови и места каде што би извршиле злосторства“, посочи Саливен.

Саливан: САД „немаат намера да користат хемиско оружје под никакви околности“

Ивана Ефремовски — Fri, 25 Mar 2022 14:50:24 +0000

САД „немаат намера да користат хемиско оружје под никакви околности“, односно дури и ако Русија го употреби во Украина, изјави денеска советникот за национална безбедност Џејк Саливан, во авионот „Ер форс 1“, со кој американскиот претседател Џо Бајден патуваше во Полска. Во разговор со новинарите на авионот, Саливан, сепак предупреди дека Москва „ќе плати висока цена“ во случај да употреби хемиско оружје. Со тоа, ги појасни зборовите на американскиот претседател, кој вчера рече дека доколку Русија употреби хемиско оружје во инвазијата на Украина, САД ќе одговорат. „Ние би одговориле, би одговориле ако тој го користи. Природата на одговорот ќе зависи од природата на употребата“, рече Бајден на прес-конференција во Брисел, мислејќи на рускиот претседател Владимир Путин. САД и НАТО, рече тој, исто така утврдуваат планови за вонредни ситуации за секој можен руски напад на територијата на НАТО. (МИА)

Саливан: Кина ќе биде изолирана доколку и помогне на Русија

Катерина Бојаџиева — Mon, 14 Mar 2022 21:20:33 +0000

Американскиот советник за национална безбедност Џејк Саливан ја предупреди Кина дека ќе биде изолирана доколку ја поддржи Русија во нејзината агресија против Украина. Тој му рече на високиот кинески дипломат Јанг Џичи дека Пекинг може да се соочи со економски казни и глобална изолација доколку и помогне на Русија. На повеќечасовниот состанок во Рим, американските претставници ги информирале сојузниците на НАТО и на некои азиски земји дека Кина дала сигнал дека е подготвена да и помогне на Русија воено и економски во војната, тврдат американски дипломати.

Саливан: Убиството на американскиот новинар е шокантно и ужасно, Путин ќе плати висока цена

Ивона Петрова — Mon, 14 Mar 2022 06:51:00 +0000

Убиството на американскиот новинар Брент Рено е шокантени ужасен настан, изјави синоќа за Си-Ен-Ен, Џејк Саливан, советник за национална безбедност во Белата куќа. -Ова е уште еден пример за бруталноста на Владимир Путин и неговите сили чии цели се училишта, џамии, болници и новинари, изјави Саливан. САД работат на тоа рускиот претседател да плати висока цена, додаде тој. Новинарот бил застрелан додека работел заедно со тим на снимање во Ирпин, предградие на Киев. -Ние им помагаме на Украинците со секаква воена помош што можеме да ja организираме за тие да ги истеснат руските сили, изјави тој. Во изјава за Си-Би-Ес, Саливан предупреди дека доколку Русија „почне да пука на територијата на НАТО“, блокот ќе одговори „со полна сила“. Саливан вели дека тоа ќе го активира членот 5 на НАТО, според кој нападот врз еден сојузник се смета за напад врз сите сојузници. -Доколку има воен напад на територијата на НАТО, тоа би предизвикало повикување на член 5, а ние би одговориле на тоа со целосните сили на НАТО“, изјави тој. Изјавата дојде откако руските сили вчера истрелаа 30 проектили врз база што американски и други сојузнички инструктри ја користеле како тренинг центар за украински војници. Базата се наоѓа на само 24 километри од границата со Полска, членка на НАТО.

Џејк Саливан: САД се подготвени и за дипломатија и за одбрана

Тале Кристо — Thu, 13 Jan 2022 21:34:29 +0000

САД се подготвени или за дипломатија со Русија или да ги „заштитат“ своите сојузници, во зависност од одлуките на Москва во врска со Украина, изјави пред новинарите американскиот советник за национална безбедност Џејк Саливан.

Тој истакна дека САД се подготвени и во двата случаја.

– Подготвени сме да постигнеме напредок на преговарачката маса… и подготвени сме да ги преземеме неопходните и соодветни чекори за да ги заштитиме нашите сојузници, да ги поддржиме нашите партнери и решително да одговориме на каква било директна агресија што може да се случи, нагласи Саливан.