Џенсон Батон – Kurir.mk

Џенсон Батон ќе дебитира во НАСКАР

Бошко Тасиќ — Mon, 13 Mar 2023 05:39:21 +0000

Поранешниот светски првак во Формула 1, Џенсон Батон (43), ќе настапи на три трки во серијата НАСКАР Куп оваа година, објавија организаторите на натпреварувањето. Англичанецот, кој ја освои Формула 1 во 2009 година, ќе вози „Рик Вер Рејсинг Форд Мустанг“ на трките во Остин, на 26 март, во Чикаго (2 јули) и Индијанаполис (13 август). По повлекувањето од Ф1 во 2017 година, Батон возеше спортски автомобили во класата ГТ500 во јапонската Супер ГТ серија, каде ја освои титулата во 2018, а се натпреваруваше и на престижната трка „24 часа Ле Ман“.

Поранешниот Ф1 шампион 17 часа заглавен во пустина

Предраг Кукиќ — Tue, 26 Nov 2019 17:00:54 +0000

Џенсон Батон открива дека поминал 17 часа заглавен во пустина откако неговиот автомобил откажал при Баха 1000 трката во Мекиско. Поранешниот Ф1 шампион првпат учествуваше во оф-роуд авантурата од 1000 километри на полуостровот Баха Калифорнија, но работите не одеа според планот. – Се вративме од Баха 1000 со приказна за раскажување, но не таа која беше посакувана. Започна одлично, поминавме пет камиони кои уште возеа и потоа уште седум-осум скршени или заглавени, најдовме добар ритам, но по 235 милји мојот со-возач Тери Маден забележа дека имаме скршен диференцијал. Заглавивме на најлошото можно место и ја поминавме цела ноќ таму со вкупно 17 часа – открива Батон.

Батон: Постои веројатност Алонсо да се врати во Формула 1

Матеја Петровски — Tue, 21 Aug 2018 07:28:29 +0000

Шампионот во Формула 1 од 2009 година, Британецот Џенсон Батон, смата дека Фернандо Алонсо ќе се врати во ова натпреварување доколку Мекларен повторно има конкурентен болид. Алонсо пред неколку дена објави дека од следната сезона нема да се натпреварува во Формула 1, но не ја исклучи можноста повторно да се врати, ако се создадат соодветни услови. Според Батон, кој му беше тимски колега на Алонсо во Мекларен во 2015 и 2016 година, има голема веројатност двократниот светски шампион да се врати назад.

- Да се напушти Формула 1 тоа е секогаш лична одлука. Алонсо го направи истото што го направив и јас. Тој заминува, но ја остави вратата отворена за можноста за враќање и мислам дека тоа е правилна одлука. Уверен сум доколку Мекларен повторно стане конкурентен и победува, тој дефинитивно ќе се врати назад. Секој возач сака да се натпреварува со конкурентно возило, истакна Батон.

Во меѓувреме Алонсо наведе дека до крајот на сезоната ќе соопшти каде ќе ја продолжи кариерата, а како опции се споменуваат Индикар и Светскиот шампионат во трки на издржливост. (Миа)

Батон: На Алонсо му е време да се повлече од Формула 1

Даниел Василев — Mon, 16 Jul 2018 12:27:06 +0000

Поранешниот пилот на Мекларен, Џенсон Батон добро знае што значи да се натпреваруваш во средината на колоната без надеж за победа - она што му се случува сега на неговиот поранешен тимски колега, Фернандо Алонсо. Шпанецот се труди да покаже силен дух и покрај уште една разочарувачка сезона, поради перформансите на тимот. Тврдењата на Алонсо дека Мекларен напредува, како да имаат за цел да го убедат него самиот да не се откаже. Двократниот светски шампион продолжува да притиска и покрај силно обесхрабрувачката ситуација во тимот. - Тој очигледно се уште се забавува, но во својство на двократен светски шампион, да завршува деветти и да биде среќен - со тоа не може да се навикне. Не знам што ќе прави следната година, но сметам дека имаат потреба од драстична промена, а тој има потреба да е бескрајно уверен во успехот, бидејќи во спротивно ќе си замине, изјави Батон пред Скај Спортс. Батон ја прекина својата кариера во 2016 година, сфаќајќи дека кризата нема да заврши наскоро. Поради оваа причина, тој е свесен за болното чувство на разочарување кога пилотот се спушта надолу по линијата. Светскиот шампион од 2009 година смета дека е време неговиот поранешен колега да се пресели во други серии. - Чувствувам колку е разочаран, го слушам како зборува и на радио. Тој има амбиција да го освои „Инди 500“ и „тројниот слем“, па според мене следната година е добра можност за него да го постигне тоа. Од пилотска гледна точка и како човек кој веќе го преживеал тоа, мислам дека Алонсо треба да се зафати со нешто друго, рече Британецот. МИА