Џереми Корбин – Kurir.mk

Корбин: Ќе го продолжам процесот за Брегзит ако победам на изборите

Ивона Петрова — Sat, 22 Dec 2018 14:25:57 +0000

Лидерот на британската опозициска Лабуристичка партија Џереми Корбин денеска изјави дека ќе го продолжи процесот за Брегзит и ќе бара повторно да се преговара за условите за излез од ЕУ, доколку победи на вонредните избори наредната година. – Ќе мора да се вратите и преговарате и да видите каква би била агендата, рече 69-годишниот Корбин за „Гардијан“ на прашањето што би направил ако победи на предвремените парламентарни избори. На прашањето каков став би зазеле лабуристите ако се одржи нов референдум, тој одговори дека партијата ќе одлучи каква ќе биде политиката, но во овој момент предложи да продолжи процесот за Брегзит и Британија да се обиде да издејствува царинска унија со ЕУ. МИА

Корбин бара гласање за недоверба на премиерката Меј

Ивона Петрова — Tue, 18 Dec 2018 07:41:05 +0000

Лидерот на британската опозициска Лабуристичка партија, Џереми Корбин побара да се гласа за недоверба на премиерката Тереза Меј. Корбин поднесе такво барање откако Меј најави дека Парламентот нема да гласа за договорот со ЕУ до средината на јануари, што е подоцна од еден месец од првично планираниот термин. Гласањето требаше да се одржи минатата недела, но премиерката Меј ја одложи седницата во последен момент, откако стана јасно дека пратениците ќе го одбијат договорот. МИА

Џереми Корбин претпочита предвремени избори наместо втор референдум за Брегзит

Ивана Ефремовски — Sun, 23 Sep 2018 12:21:57 +0000

Лидерот на британската опозициска Лабуристичка партија, Џереми Корбин, изјави денеска дека преферира предвремени избори наместо втор референдум за Брегзит. На годишниот Конгрес на Лабуристичката партија, кој денеска почна во Ливерпул, ќе се разговара дали партијата ќе ја поддржи идејата за втор референдум за Брегзит - Ние претпочитаме општи избори, по кои ќе можеме ние да ги договораме идните односи со Европа. Но, ајде прво да видиме што ќе се случи на Конгресот, рече Корбин во изјава за Би-Би-Си. Корбин рече дека ако лабуристите преговараат со Брисел, би се обиделе да постигнат трговски договор со царинска унија со ЕУ, за да нема потреба од тврда граница на островот Ирска. Прашањето за идната граница меѓу Република Ирска и Северна Ирска е едно од најспорните во разговорите за Брегзит.

Европскиот опозиционери со критики за нападот врз Сирија

Даниел Василев — Sat, 14 Apr 2018 14:25:49 +0000

Повеќе опозициски партии и политичари, како што е британскиот левичарски лидер Џереми Корбин, изразија критика кон своите влади по ракетните напади врз Сирија. - Како што веќе реков, сметам дека Парламентот требаше да биде консултиран за ова прашање. Премиерот на Обединетото кралство е одговорен пред Парламентот, а не пред желбите на американскиот претседател, пишува во писмото што Корбин денеска го упатил до премиерката Тереза Меј. Во писмото тој изразува задоволство што британските пилоти се вратиле безбедно од мисијата и надеж дека немало цивилни жртви во Сирија. Корбин го критикува нападот поради што бил извршен пред да може да се спроведе истрага за хемискиот напад и бара гаранции дека нема да има дополнителни напади додека организацијата ОПЦВ не спроведе истрага во градот Дума, каде што беше извршен хемискиот напад. Во Франција, опозицискиот Национален фронт на Марин ле Пен и левичарскиот опозициски водач Жан Лук Меленшон го критикуваа претседателот Емануел Макрон за учеството во нападот без согласност од Обединетите нации. Меленшон побара од претседателот Макрон јавно да ги објави доказите дека сириската армија е одговорна за нападот во Дума, доколку има такви докази. Според Ле Пен, „нападите врз Сирија не ставија на патека со непредвидливи, потенцијално трагични последици“. Во Италија, Матео Салвини, лидерот на десничарската Лига и можен иден премиер на државата, ги спореди нападите врз Сирија со војната против Ирак во 2003 година, како и со либиската интервенција во 2011 година, по која Италија се соочи со бранови бегалци и мигранти. - Се уште го бараме „хемиското оружје на Садам“, се уште плаќаме за лудата војна во Либија, а сега некој што го има прстот на копче и вели дека има „интелигентни ракети“ им помага на скоро победените исламистички терористи. Ова е лудо. Стоп., напиша Салвини на својот Твитер профил. И Александар Гауланд, лидерот на опозициската Алтернатива за Германија (АфД) оцени дека нема докази дека сириската Влада е одговорна за нападот во Дума и ја обвини канцеларката Ангела Меркел дека, како и обично, заземала половичен став, јави новинската агенција ДПА. Во меѓувреме во САД, претседателот Доналд Трамп се соочи со критики како од неговата Републиканска партија, така и од опозициските демократи, при што некои го обвинуваат дека извршил напад без согласност од Конгресот, а други дека нападот не бил доволно жесток. Чак Шумер, водечкиот демократ во Сенатот, оцени дека нападот врз Сирија е соодветен одговор од страна на САД, но го предупреди Трамп да не дозволи САД да се најдат подлабоко вплеткани во крвавата граѓанска војна во оваа држава. Саманта Пауер, поранешната амбасадорка на САД во Обединетите нации во мандатот на Барак Обама, оцени дека Трамп не е во добра позиција да го води меѓународниот одговор кон Сирија бидејќи се смета дека претседателот чувствува нетрпеливост кон муслиманите и нема јасен план. - Но, ве молам кажете ми што би требало САД да сторат за да спречат натамошни масакри со хемиско оружје?, пишува Пауер. Поранешен воен дописник од Балканот, Пауер е авторка на книга во која изнесува теза дека САД имаат одговорност да реагираат секогаш кога некаде се вршат воени злосторства, и беше жестоко критикувана зошто прифати да остане амбасадорка на САД во ОН и покрај тоа што претседателот Обама не реагираше на војната во Сирија. МИА