Џо Харт – Kurir.mk

Официјално: Харт пристигна бесплатно кај Мурињо

Тале Кристо — Tue, 18 Aug 2020 13:43:29 +0000

Поранешниот голман на Англија, Џо Харт, потпиша двегодишен договор со Тотенхем, објави лондонскиот клуб. Харт беше слободен агент откако го напушти Барнли, за кого минатата сезона одигра само три натпревари. Во последните две сезони, искусниот голман има регистрирано вкупно 24 натпревари во сите натпреварувања за сега поранешниот клуб. Харт беше подложен на лекарски прегледи во понеделник и ќе се бори за позицијата резервен голман на Тотенхем со Пол Газанига, бидејќи Уго Лорис е првиот голман во тимот на Жозе Мурињо. Англискиот голман запиша 75 натпревари за репрезентацијата. Тој двапати ги освои Премиер лигата и Лига купот со Манчестер Сити, и го има трофејот во ФА Купот. Харт е второто засилување на Тотенхем во летниот преоден рок, по пристигнувањето на играчот од средниот ред Пјер-Емил Хојберг од Саутемптон.

Џо Харт во Тотенхем

Тале Кристо — Mon, 17 Aug 2020 09:43:11 +0000

Англискиот голман Џо Харт е нов играч на Тотенхем. Оваа информација ја пренесе новинарот Фабрицио Романо. Тотенхем наскоро ќе ја официјализира соработката. Поранешниот прв голман на репрезентацијата на Англија и Манчестер Сити има 33 години и се очекува да биде резерва за Лорис. Тој е без клуб од 1 јули, кога му истече договорот со Барнли, на кој беше член во претходните две сезони. Од заминувањето од Сити, тој исто така бранеше за Вест Хем и Торино. Тој има и 75 настапи за Англија.

Џо Харт официјално во Барнли

Ивона Петрова — Tue, 07 Aug 2018 15:52:50 +0000

Барнли го финализираше трансферот на Џо Харт од Манчестер Сити и со голманот потпиша двегодишен договор. Според британските медиуми, висината на трансферот изнесува околу 3,5 милиони фунти. Минатата сезона Харт ја помина како позајмица во Вест Хем, а годината пред тоа беше испратен како позајмица во Торино. Голманот не се вклопи во тимот на тренерoт Пеп Гвардиола и поради тоа по 12 години одлучи да го напушти Манчестер Сити.

Џо Харт: Ќе го носам англискиот дрес како навивач

Даниел Василев — Fri, 18 May 2018 14:29:50 +0000

Голманот Џо Харт призна дека му било тешко да го прифати фактот дека на Светското првенство во Русија нема да настапува за англиската репрезентација. Селекторот Герет Саутгејт го соопшти списокот со 23 играчи, но во него го нема Харт. Искусниот голман досега има настапено на 75 натпревари за репрезентацијата на Англија, вклучително девет од десет натпревари за квалификациите за овој Мундијал. - Се чувствувам очајно. Изминативе две години се обидувам да го извлечам најдоброто од тешката ситуација во која се најдов, иако ваквите вести не е лесно да се прифатат. Горд сум на секоја минута што ја одиграв во репрезентацијата. Знам со што да му помогнам на тимот, но што е тука е. Им посакувам среќа! Иако нема да настапам во Русија, сепак ќе го носам дресот на Англија како навивач, истакна поранешниот репрезентативен голман. Харт оваа сезона го загуби своето место и на голот на Вест хем, откако претходно дојде како позајмица од Манчестер сити. МИА

Најискусниот играч на Англија нема да патува на Мундијалот во Русија

Даниел Василев — Tue, 15 May 2018 11:11:15 +0000

Селекторот на Англија, Герет Саутгејт ќе приреди едно од најголемите изненадувања пред Светското првенство во Русија ова лето, соопшти денеска „Сан“. Тој нема да го вклучи ветеранот Џо Харт, за кој се веруваше дека е на листата, иако не и меѓу стартерите, соопшти изданието. Харт ќе беше најискусниот играч со 75 натпревари и три големи шампионати зад себе. Веста е шокантна и за печатот на Островот и за голманот, кој, според неговите зборови, „не може да поверува дека ќе остане надвор од 23-те играчи кои ќе патуваат за Русија“.

Во негово отсуство, се очекува Џордан Пикфорд од Евертон да застане на голот, а втор голман да биде Џек Батланд од Стоук. Трет избор веројатно ќе биде Ник Поуп од Барнли. Веста била објавена од Саутгејт во личен разговор со Харт по телефон. Во негово отсуство, најискусен кај англиските репрезентативци се очекува да биде Гери Кејхил, кој има 58 натпревари во националниот дрес. МИА