Џоко Видодо – Kurir.mk

Видодо: Г-20 мора да биде двигател на економското закрепнување

Тале Кристо — Tue, 15 Nov 2022 07:16:45 +0000

Самитот на лидерите на Групата 20 (Г-20) беше отворен денеска на островот Бали со барање на Индонезија, која е домаќин на самитот, за единство и конкретна акција, со што би се постигнало подобрување на глобалната економска состојба, и покрај длабоките поделби што постојат меѓу земјите околу војната во Украина. „Немаме други опции, потребна е соработка за да се спаси светот. Г-20 мора да биде катализатор за инклузивно економско закрепнување. Не треба да го делиме светот на блокови. Не смееме да дозволиме светот да западне во нова студена војна“, рече индонезискиот претседател Џоко Видодо во воведното обраќање, пред лидерите на најбогатите земји во светот да ги започнат разговорите зад затворени врати. Земјите од Г-20 сочинуваат 85 отсто од светското економско производство и 75 отсто од светската трговија. Во нив живеат две третини од светската популација. Членки на Г-20 се Аргентина, Австралија, Бразил, Канада, Кина, Франција, Германија, Индија, Индонезија, Италија, Јапонија, Мексико, Русија, Саудиска Арабија, Јужна Африка, Јужна Кореја, Турција, Велика Британија, Соединетите Американски Држави и претставници на Европската унија, односно администрацијата во Брисел. Шпанија е секогаш поканета како гостин. Пред самитот, американскиот претседател Џо Бајден и кинескиот претседател Си Џинпинг одржаа тричасовен состанок и порачаа дека никогаш не треба да се води нуклеарна војна. Тоа беше нивна прва средба откако Бајден стана претседател. Двајцата лидери ветија почеста комуникација и покрај многуте разлики.

Видодо: Доколку дозволи ситуацијата, Путин ќе присуствува на Самитот на Г20

Тале Кристо — Tue, 08 Nov 2022 10:51:48 +0000

Претседателот на Индонезија, Џоко Видодо денеска изјави дека неговиот руски колега Владимир Путин ќе присуствува на претстојниот Самит на Г20 на Бали доколку „дозволи ситуацијата“. – Но, ако не успее да дојде, можеби виртуелно ќе ни се придружи, истакна на Видодо, кој претседава со овогодишниот Самит на Г20 на Бали. Индонезија како домаќин на Г20 се спротивстави на притисокот од западните земји и Украина да ја повлече поканата до Путин, наведувајќи дека нема овластување да го направи тоа без консензус меѓу членките. Видодо во интервју за „Фајненшл тајмс“ истакна дека Русија е добредојдена на Самитот. – Г20 не е наменет да биде политички форум. Замислен е да се занимава со економија и развој, посочи Видодо. Индонезија го покани и украинскиот претседател Володимир Зеленски, кој наведе дека нема да учествува доколку присуствува Путин. На Самитот се очекува да присуствуваат и неколку други светски лидери, меѓу кои и американскиот претседател Џо Бајден и кинескиот претседател Си Џинпинг.

Катастрофа во Индонезија: Најмалку 1.200 загинати, земјата бара меѓународна помош

Ивона Петрова — Mon, 01 Oct 2018 06:00:09 +0000

Индонезискиот претседател Џоко Видодо упати барање за меѓународна помош по катастрофалниот земјотрес и цунами кои убија над 1.200 луѓе. Потресите и бранот најсилно го погодија островот Сулавези, каде новинарите јавуваат дека во градот Палу најмлаку 300 жртви биле закопани во масовна гробница со цел да се избегне ширење заразни болести. Томас Лембонг, координатор на Индонезискиот инвестициски совет, изјави дека земјата бара помош, но засега не е прецизирано каков вид на помош е најмногу потребнa. МИА