ебола – Kurir.mk

Поддршка од пет милиони евра за Уганда од ЕУ во борбата против ебола

Ивана Ефремовски — Mon, 28 Nov 2022 14:24:39 +0000

Европската комисија соопшти дека мобилизира пет милиони евра поддршка за Уганда која се соочува со нов бран на ебола. Со оваа помош ќе се поддржат клиничките тестирања на вакцини и третмани против суданскиот сој на ебола за кој не постои во моментов ниту лек ниту вакцина. Еврокомесарката за здравство, Стела Кириакидес, порача дека со оваа итна помош за Уганда ЕУ се обидува да придонесе во контрола на епидемијата, која е смртоносна и “многу загрижувачка“, рече таа. -Ќе обезбедиме пет милиони евра финансии за клинички тестирања за вакцини и третмани водени од Светската здравствена организација и владата на Уганда. Ова е конкретен пример кој покажува дека нашите дела одат подалеку од границите на ЕУ, рече еврокомесарката за здравство. Петте милиони евра за поделени на два: четири милиони евра за вакцините, еден милион за третманот. (МИА)

Уганда ќе ја скрати учебната година за две недели за да го ограничи ширењето на еболата

Дарко Андоновски — Tue, 08 Nov 2022 14:03:40 +0000

Уганда ќе ја скрати учебната година за две недели во обид да се ограничи секојдневниот контакт меѓу учениците и со тоа да го ограничи ширењето на еболата, соопшти министерката за образование на таа африканска држава. Властите се борат да го сузбијат ширењето на многу заразната и смртоносна хеморагична треска ебола. Епидемијата го зафати главниот град Кампала, со население од околу два милиони луѓе. Според податоците на Министерството за здравство, до вчера во Уганда се потврдени 135 случаи на зараза и 53 смртни случаи. Министерката за образование Џенет Катаха Мусевени рече дека владата одлучила да ги затвори градинките, основните и средните училишта на 25 ноември, бидејќи полните училници претставуваат ризик од ширење на вирусот. Студентите во Уганда моментално се во третиот и последен рок од календарската година, на крајот од кој одат на испити. Кај децата има осум смртни случаи од 23 потврдени. Суданскиот вид на ебола циркулира во Уганда, за кој нема вакцина.

Еболата се шири, оваа земја воведе карантин во две области: На сила е и полициски час

Магдалена Андонова — Thu, 20 Oct 2022 14:56:03 +0000

Епидемијата на ебола во Уганда брзо се разви во текот на еден месец откако болеста беше откриена во оваа источноафриканска земја, изјави денеска регионалниот директор на здравствената агенција на ОН за Африка, Матшидисо Моети. - Министерството за здравство на Уганда покажа извонредна отпорност и ефективност и постојано го прилагодува својот одговор на предизвикувачката ситуација. Подоброто разбирање на синџирите за пренос на болести им помага на оние на теренот да реагираат поефикасно, рече Моети. Уганда прогласи епидемија на ебола на 20 септември, неколку дена откако заразната болест почна да се шири во рурална земјоделска заедница. Оттогаш, 64 луѓе се заразиле со ебола, а 24 починале како последица на болеста, иако официјалните податоци не ги вклучуваат луѓето кои најверојатно починале од ебола пред да се прогласи епидемијата. Стравувањата дека еболата би можела да се прошири далеку од епицентарот на епидемијата ги наведоа властите да воведат карантин, како и полициски час, во два од петте окрузи кои пријавиле случаи на ебола. Еболата се шири преку контакт со телесни течности или контаминирани материјали на заразено лице. Симптомите вклучуваат треска, повраќање, дијареа, болки во мускулите, а понекогаш и внатрешно и надворешно крварење.

СЗО: Во Уганда 29 лица починаа од ебола, меѓу нив и здравствени работници

Катерина Бојаџиева — Wed, 05 Oct 2022 20:45:18 +0000

Дваесет и девет лица, меѓу нив четворица здравствени работници, починаа од ебола во Уганда, откако пред две недели властите прогласија епидемија во централниот дел на земјата, соопшти денеска Светската здравствена организација. – Вакцините што успешно се користат за да се спречат неодамнешните епидемии на ебола во ДР Конго, не се ефикасни против типот на вирусот ебола што ја предизвика оваа пандемија, изјави генералниот директор на СЗО, Тедрос Аданом Гебрејесус. Тој зборуваше на темата на прес-конференција. – Сепак, неколку вакцини против овој вирус се во различни фази на развој, од нив две може да започнат клинички испитувања во Уганда во наредните недели, во очекување на регулаторни и етички одобренија од Владата на Уганда, појасни тој. Идентификувани се вкупно 63 потврдени и веројатни случаи. Меѓу нив се 29 смртни случаи. Според Тедрос, „десет здравствени работници биле заразени, а четворица починале”. Министерката за здравство на Уганда, Џејн Рут Асенг Осеро на Твитер информираше за денешната смрт на 58-годишен анестезиолог. – Кога има доцнење во откривањето на епидемија на ебола, нормално е најпрво случаите постојано да се зголемуваат, а потоа постепено да се намалуваат, додека не се применат интервенции за спасување животи и мерки за контрола на епидемијата, посочи Тедрос. Вирусното заболување ебола често е смртоносно, но сега се достапни вакцини и третмани за оваа хеморагична треска што се пренесува на луѓето од заразени животни. СЗО ослободи два милиона долари од својот резервен фонд за итни случаи и работи со партнерите за да им помогне на властите да ја засилат реакцијата со испраќање специјалисти и медицински материјали. Првите случаи во Уганда беа регистрирани во областа Мубенде во централниот дел на земјата, а потоа се распостранија во соседните области Касанда, Киегегва и Кагади. Минатата недела претседателот Јовери Мусевини отфрли каков било карантин. Тој смета дека земјата има капацитет да ја контролира епидемијата.

Мистериозна болест слична на ебола убива луѓе во Танзанија: Научниците спроведуваат итна истрага

Магдалена Андонова — Thu, 14 Jul 2022 10:28:57 +0000

Три лица починаа во Танзанија од мистериозна болест која наликува на ебола. Властите во оваа земја овој случај го нарекоа „многу чуден“. Здравствените власти се испратени да ја испитаат болеста од која досега се заразени 13 лица. Симптомите вклучуваат треска, главоболки, несвестица и крварење, особено од носот. Немаше претходни случаи на ебола или Марбург, две смртоносни хеморагични болести, пријавени во Танзанија. Од друга страна, соседните земји Конго и Уганда ги регистрираа овие болести. Исто така, ниту еден од 13-те пациенти, кои живеат во јужниот регион Линди, не бил позитивен на ниту една од овие две болести. – Негативни се и тестовите за КОВИД, соопштија надлежните. Главниот медицински офицер на Танзанија, Ифело Сихалвен, рече дека еден од пациентите целосно се опоравил, додека другите се изолирани. - Владата формираше тим од професионалци кои се уште ја истражуваат оваа непозната болест - рече Сихалвен. Претседателката на Танзанија, Самиа Сулуху Хасан, рече дека „чудна“ болест може да биде предизвикана од „зголемената интеракција“ меѓу луѓето и дивите животни. И Марбург и еболата, за кои е познато дека се шират меѓу луѓето, може да се пренесат со лилјаци. Гана, која се наоѓа на западниот брег на Африка, минатата недела пријави два сомнителни случаи на вирусот Марбург, кој убива до 90 отсто од заразените пациенти. Пациентите меѓусебно не биле познати, што укажува на тоа дека болеста се шири.

СЗО: Две лица починаа од ебола во Конго

Магдалена Андонова — Tue, 26 Apr 2022 08:18:56 +0000

Уште еден пациент со дијагностицирана ебола почина во Демократска Република Конго, неколку дена откако смртоносната болест повторно се појави таму, соопшти денеска Светската здравствена организација (СЗО). Генетското тестирање покажа дека инфекцијата е потврдена минатата недела, нов случај на пренос од заразено животно и дека не е поврзана со последната епидемија, чиј крај беше објавен во декември, објави во понеделникот СЗО на Твитер. Второто лице кое починало било поврзано со првиот починат пациент, изјави портпаролот на СЗО за Ројтерс. Првиот пациент, наводно, почнал да покажува симптоми на 5 април, но не побарал лекарска помош повеќе од една недела. Тој беше примен во центарот за лекување на ебола во Мбандака, главниот град на провинцијата Екватор во Конго, на 21 април, а почина подоцна истиот ден, пренесува британската агенција. Конго претходно имаше 13 епидемии на ебола, вклучувајќи ја и онаа од 2018 до 2020 година, на истокот на земјата, во која починаа речиси 2.300 луѓе, што е втор најголем број регистрирани случаи во историјата на оваа болест, според Британците. агенција.

СЗО ја прогласи за завршена втората пандемија на ебола годинава во Демократска Република Конго

Магдалена Андонова — Thu, 16 Dec 2021 15:10:44 +0000

Втората епидемија на болеста ебола оваа година во Демократска Република Конго и официјално е прогласена за завршена, соопшти Светската здравствена организација (СЗО), пренесе ДПА. Источната провинција Северен Киву, каде што на 8 октомври беше пријавен првиот случај, беше зафатена од епидемијата, а во овој период вкупно 11 лица се разболеа од ебола, додека уште три се воделе како сомнителни случаи. Шест од пациентите, меѓутоа, починале од ебола, пренесе ДПА. Претходната епидемија во Северен Киву беше официјално прогласена за завршена во мај. Сите случаи се регистрирани во близина на градот Бени, каде што епидемија на ебола веќе имаше од 2018 до 2020 година, кога беа откриени речиси 3.500 случаи, а починаа 2.299 лица. Бени е комерцијален центар во регионот со блиски врски со соседните Руанда и Уганда. Инфекцијата со ебола вобичаено е проследена со висока температура и внатрешно крварење и е опасна по животот.

СЗО објави: Потврден прв случај на исклучително смртоносен вирус

Ивона Петрова — Tue, 10 Aug 2021 08:54:41 +0000

Светската здравствена организација соопшти дека здравствените власти во Гвинеја го потврдиле првиот случај случај на исклучително смртоносниот вирус Марбург, сличен на ебола. Како што е наведено од СЗО, станува збор за прв случај на марбуршка вирусна хеморагиска треска во западна Африка, а пациентот е лекуван во локална болница каде состојбата му се влошила по што починал. Во моментов се рабопти на пронаоѓање на неговите конаткти во делот од државата кон границата со Либерија и Брегот на Слоновата Коска за да се запре ширењето на вирусот, пренесува Гардијан. -Вирусот Марбург има голем потенцијал за ширење, што значи дека мораме да го запреме што поскоро, соопшти регионалниот директор на СЗО за Африка, Матсидисо Моети. Првиот случај во Гвинеја е потврден минатата недела, само два месеци откако земјата прогласи крај на епидемијата од ебола, која оваа година усмрти 12 лица. Ова е прва пат смртносна болест да е идентификувана во западна Африка, а од 1967 година имало 12 големи епидемии на овој вирус, најголем дел во јужна и источна Африка. Стапката на смртност од Марбург вирусот варирале од 24 до 88 проценти во минататите епидемии, во зависност од соевите на вирусот и управувањето со кризата, наведува СЗО. Вирусот се пренесува преку крв и секрет. По инкубацијата, која може да трае до шест дена, болеста почнува со висока температуриа, болки во мускулите, општа малаксаност и доведува до големо оштетување на органите па смртниот исход е чест кај пациентите.

СЗО и испорача на Гвинеја вакцини против ебола

Ивона Петрова — Tue, 23 Feb 2021 07:33:22 +0000

Повеќе од 11.300 дози на вакцината „Мерк“, против хеморагична треска од ебола, Светската здравствена организација (СЗО) синоќа авионски и ги испорача на Гвинеја, земја во која болеста повторно се појави, јави Дојче веле. СЗО требаше вакцините да ги достави пред два дена, но авионот од Женева не успеа да слета во Гвинеја поради облаци од прашина и мораше да биде пренасочен кон главниот град на Сенегал, Дакар. Од тие причини авион на „United Mining Supply, компанија за транспорт и логистика во рударството во Гвинеја, отпатува за Сенегал за да ги преземе вакцините. Кутиите со логото на СЗО синоќа беа истоварени во Гвинеја во 20 часот по локално време. Некои од кутиите со вакцини ќе бидат пренесени во Гуеке и Незерорем на југо-истокот на земјата, регион што се граничи со Сиера Леоне, Либерија и Брегот на Слоновата Коска, каде што неодамна еболата предизвика пет смртни случаи. Вакцинацијата во овој регион е закажана за денеска. Се очекува уште 8.700 дози вакцини утре да пристигнат од САД. Ова е прва епидемија на ебола во Западна Африка по епидемијата 2013-2016 година, во која тогаш умреа повеќе од 11.300 лица, претежно во Гвинеја, Либерија и Сиера Леоне. Еболата неодамна повторно се појави во Демократска Република Конго, каде умреа четири лица. -Населението во Конго ги отфрла мерките на контрола, зголемувајќи го стравот од натамошно ширење на епидемијата, изјави официјален извор неделава. Вирусот на ебола се пренесува на луѓето преку заразени животни. Инфекцијата меѓу луѓето се пренесува преку размена на телесни течности и нејзините главни симптоми се: треска, повраќање, крварење и дијареја.

СЗО со предупредување до шест африкански држави по појавата на ебола

Дарко Андоновски — Tue, 16 Feb 2021 15:30:32 +0000

Светска здравствена организација денеска упати предупредување до шест африкански држави да бидат внимателни поради појавата на ебола во Гвинеја и во Демократска Републиак Конго. – Веќе предупредивме шест околни држави, вклучително и Сиера Леоне и Либерија и тие брзо се подготвуваат и ги испитуваат потенцијалните инфекции, истакна портпаролката на СЗО, Маргарет Харис. Но, таа не ги именува другите држави. Харис посочи дека властите идентификувале речиси 300 контакти со заразени со ебола во ДР Конго и околу 110 во Гвинеја. ДР Конго пријави избивање на болеста на 7 февруари, додека Гвинеја на 14 февруари пријави појава на болеста во југоисточниот дел на земјата. – Не знаеме дали ова е последица на вирусот на ебола што опстојал кај луѓето или повторно имало трансмисија од животни, посочи Харис при тоа додавајќи дека се спроведува генетското секвенцирање за да се утврди потеклото на вирусот. Во текот на последната епидемија на ебола во Западна Африка (2014 – 2016) во Гвинеја, во Либерија и во Сиера Леоне беа регистрирани 28.000 пациенти од кои 11.310 починаа. Минатата година во источниот дел на ДР Конго од ебола починаа 2.299 луѓе.