Ебрахим Раиси – Kurir.mk

Иранскиот претседател разговараше со саудискиот принц, тие го споменуваат „исламскиот свет“

Ивана Ефремовски — Thu, 12 Oct 2023 07:00:38 +0000

Иранскиот претседател Ебрахим Раиси телефонски разговарал со саудискиот престолонаследник Мохамед бин Салман што е прв директен контакт на двајцата лидери од зближувањето на земјите на почетокот на годинава, јавија иранските државни медиуми. Двајцата лидери разговараа за ситуацијата на Блискиот Исток, јави државната новинска агенција ИРНА. Според Иран, во разговорите било нагласено „единството на исламскиот свет“. Хамас го нападна Израел во саботата, кој возврати во масовно бомбардирање на Појасот Газа. Иранските лидери ги поздравија нападите на Хамас врз Израел, но негираа директна вмешаност. Саудиска Арабија се смета за важен заштитник на Палестинците. Ријад во саботата повика на итен прекин на ескалацијата, и во исто време за нападите го обвини израелското „лишување на палестинскиот народ од неговите легитимни права“. Иран и Саудиска Арабија долго време беа регионални ривали, но во март двете сили објавија договор за обновување на дипломатските односи како дел од приближувањето со посредство на Кина. Ријад ги прекина дипломатските контакти во 2016 година, откако демонстранти ја нападнаа амбасадата на Саудиска Арабија во Техеран. Сунитското кралство и мнозинскиот шиитски Иран, исто така, беа на спротивни страни во воените конфликти во регионот. (МИА)

Путин и Раиси разговараа за спроведување проекти во областа на енергетиката и транспортот, соопшти Кремљ

Тале Кристо — Wed, 11 Jan 2023 19:53:28 +0000

Рускиот претседател Владимир Путин имаше телефонски разговор со неговиот ирански колега Ебрахим Раиси, јавија руските агенции, повикувајќи се на прес-службата на Кремљ. Според руското претседателство, двајцата лидери разговарале за актуелни прашања од руско-иранските односи. Акцент беше ставен на натамошната изградба на целиот комплекс на билатерална соработка. -Претседателите зборуваа поконкретно за доследно спроведување на заемно корисни проекти во областа на енергетиката, транспортот и логистиката. За време на дискусијата за меѓународните прашања, двете страни дадоа позитивна оценка за воспоставената тесна координација во рамките на процесот во Астана, кој игра клучна улога во решавањето на сириското прашање, соопшти Кремљ. Во соопштението се наведува дека Путин и Раиси изразиле подготвеност да ја продолжат да се залагаат за нормализирање на ситуацијата во Сирија и за враќање на нејзиниот територијален интегритет. Дополнително во разговорот претседателите го истакнале „одржувањето голем број контакти на високо ниво“. Во понеделникот, иранското Министерство за надворешни работи соопшти дека Раиси планира да ги посети Турција и Сирија, но не беа дадени детали за посетите.

Раиси апелира за дипломатско решение за Сирија

Тале Кристо — Tue, 19 Jul 2022 19:28:14 +0000

Претседателот на Иран, Ебрахим Раиси на средбата во Техеран со рускиот и турскиот претседател. Владимир Путин и Реџеп Тајип Ердоган повика на дипломатско решение за граѓанската војна во Сирија. – Најважно е да се гарантира територијалниот интегритет и да се дозволи сирискиот народ да одлучува за својата политичка судбина, истакна Раиси. Тој додаде дека друга заеднички цел е борбата против тероризмот. Иран, Русија и Турција и во 2017 година во Астана разговараа за иднината на Сирија. Русија и Иран го поддржуваат сирискиот претседател Башар ал Асад, додека Турција е сојузник со опозицијата. Анкара со недели најавува нова офанзива во северна Сирија.

Иранскиот претседател: Иран нема да се откаже од „нуклеарните права“

Тале Кристо — Sat, 09 Apr 2022 18:04:01 +0000

Иранскиот претседател Ебрахим Раиси денеска нагласи дека Техеран нема да се откаже од своето право да развива сопствена нуклеарна индустрија за мирољубиви цели и дека сите страни кои сакаат да го обноват нуклеарниот договор од 2015 година треба да го почитуваат тоа. Индиректните преговори меѓу Иран и САД во Виена заглавија по единаесет месеци, бидејќи двете страни тврдат дека Техеран и Вашингтон мора да донесат политички одлуки за да ги решат преостанатите прашања. „Повеќе од сто пати, нашата порака од Техеран до Виена е дека нема да отстапиме од нуклеарните права на иранскиот народ… ниту еден милиметар“, изјави Раиси на Денот на нуклеарната технологија во Иран. Раиси го повтори ставот на Иран да ја користи нуклеарната програма исклучиво за мирољубиви цели. САД размислуваат да ја отстранат иранската Револуционерна гарда од листата на странски терористички организации доколку Иран се обврзе да ги ограничи своите активности, изјавија ирански и западни извори. Ирански дипломат изјави дека Техеран го отфрлил предлогот на САД за отстранување на гардата од списокот, но ги оставил на него бригадите за специјални операции Ал Кудс.

Иранскиот претседател ја повика ЕУ да не подлегнува на притисокот на САД

Ивана Ефремовски — Tue, 26 Oct 2021 07:24:07 +0000

Иранскиот претседател Ебрахим Раиси ги повика земјите од Европската унија да дејствуваат независно и да не бидат предмет на притисок од САД.

Раиси во понеделникот во Техеран ги прими амбасадорите на Белгија, Финска и Швајцарија. Неговиот кабинет соопшти дека за време на разговорите тој посочил дека Иран ги почитува одредбите од меѓународниот договор за иранската нуклеарна програма, а тоа не го направиле и земјите од ЕУ, пренесува Анадолија.

-ЕУ не смее да подлегне на притисоците на САД. Се надевам дека европските земји, сепак, ќе изберат независност и ќе се држат подалеку од експанзионистичката политика на Вашингтон, порача Раиси.

Иранскиот претседател досега одбиваше да ги продолжи индиректните разговори со САД во Виена за двете страни да се вратат на почитување на договорот, според кој Иран ќе ја ограничи својата нуклеарна програма во замена за олеснување на економските санкции.

За да го запре збогатувањето ураниум, Иран бара укинување на санкциите наметнати од САД кон земјата, но Вашингтон досега одбиваше да го стори тоа. (МИА)

Ебрахим Раиси е новиот претседател на Иран

Тале Кристо — Sat, 19 Jun 2021 07:28:23 +0000

Првичните податоци од пребројувањето на гласачките ливчиња покажуваат дека Ебрахим Раиси е новиот претседател на Иран со освоени 62 отсто од гласовите на избирачите. Актуелниот умерен шеф на државата Хасан Рохани претходно изјави дека веќе има победник, без да го именува Раиси. – Им честитам на луѓето за нивниот избор. Моите официјални честитки ќе дојдат подоцна, но ние знаеме кој доби доволно гласови на овие избори и кој е избран, истакна Рохани. Останатите двајца ултра-конзервативни кандидата, Мохсен Резаи и Амирхосеин Газизаде-Хашеми, исто така, му честитаа на Раиси. – Му честитам на … Раиси, кој е избран од народот, рече Газизаде-Хашеми, цитиран од иранските медиуми. Во објава на Твитер, Резаи напиша дека се надева оти Раиси ќе изгради „силна и популарна влада, која ќе ги реши проблемите на земјата“. Единствениот реформатор во изборната трка за претседател, поранешниот гувернер на централната банка Абдолнасер Хемати, исто така, објави твит со честитки до Раиси. На претседателски избори во Иран гласале 28,6 милиони граѓани, истакна раководителот на штабот за спроведување на изборите, Џамал Орф. Според првичното пребројување, за Раиси гласале 17,8 милиони луѓе.