Mиењето раце е подобра превентивна мерка за инфекција отколку носење ракавици за еднократна употреба

Ивона Петрова — Wed, 15 Apr 2020 08:52:23 +0000

Ракавиците може да дадат погрешно чувство на сигурност, затоа, миењето раце е подобра превентивна мерка за инфекција отколку носењето на ракавици за еднократна употреба, се наведува во заедничкиот водич за Ковид-19 и безбедноста на храната кој го подготвија Светската здравствена организација (СЗО) и Организација за земјоделство и храна (ФАО), а е наменет за компаниите кои работат со храна, производство и промет на храна. Во водичот се посочува дека работниците во тие компании може да користат ракавици за еднократна употреба, но мора често да ги менуваат. – Тие не се замена за мењето раце кое треба да го прават при секоја промена на ракавиците. Миењето раце е неопходно и кога отвораат или затвораат врати, кога ги празнат корпите за отпадоци, се посочува во водичот. Се истакнува дека ракавиците за еднократна употреба не треба да се користат како замена за миење раце. – Вирусот Ковид-19 може да ги загади ракавиците за еднократна употреба на ист начин како што опстанува и на рацете на работниците. Отстранувањето на ракавиците за еднократна употреба може да доведе до загадување на рацете со вирусот. Носењето ракавици за еднократна употреба може да даде погрешно чувство на сигурност и може да резултира со недоволно често миење на рацете на персоналот, пишува во водичот.

Европарламентот ги забрани пластичните предмети за еднократна употреба

Дарко Андоновски — Wed, 27 Mar 2019 19:26:28 +0000

Европскиот парламент денеска го одобри новото законодавство на ЕУ со кое се забрануваат пластични производи за еднократна употреба, како прибор за јадење, чинии, цевки и стапчиња за чистење уши, јави дописникот на МИА од Стразбур. Европскиот парламент со 560 гласови „за“, 35 „против“ и 28 „воздржани“ го одобри договорот склучен со министрите на ЕУ, според кој, од 2021 година во Унијата ќе биде забрането користење и продажба на пластични производи за еднократна употреба. Земјите членки ќе треба да ја достигнат целта за рециклирање на 90 отсто од пластичните шишиња до 2029 година, кои ќе треба да се состојат од најмалку 25 проценти рециклирана содржина до 2025 година, а 30 отсто до 2030 година. Договорот, исто така, предвидува посилна примена на принципот „загадувачот плаќа”, особено за тутунот, преку воведување на проширена одговорност на производителот. Овој нов режим ќе се применува исто така и на средствата за риболов, за да се обезбеди дека производителите, а не рибарите, ги сносат трошоците за собирање на мрежи изгубени во морето. Законодавството конечно предвидува задолжително посочување на негативното влијание врз животната средина од фрлањето на улица на цигарите што содржат пластични филтри, пластични чаши, влажни марамчиња и тоалет хартија. Според Европската комисија, повеќе од 80 отсто од отпадот во морињата е пластика. Производите чија употреба се забранува со ова ново законодавство, претставуваат 70 отсто од целиот отпад во морињата. Поради нивното бавно распаѓање, пластика се акумулира во морињата, океаните и на плажите, а нејзини остатоци се среќаваат во многу морски видови и потоа во човековиот прехранбен синџир. – Ова законодавство ќе ја намали цената на штетата по животната средина од 22 милијарди евра, односно на трошоците од пластичното загадување во Европа во 2030 година, изјави белгиската европратеничка Фредерике Рис од Алијансата на либерали и демократи за Европа (АЛДЕ). Според неа, Европа сега има законски модел што треба да го брани и да го промовира на меѓународно ниво, бидејќи прашањето на загадувањето на морињата со пластика е глобално, односно е од суштинско значење за планетата.

еднократна употреба – Kurir.mk

Mиењето раце е подобра превентивна мерка за инфекција отколку носење ракавици за еднократна употреба

Европарламентот ги забрани пластичните предмети за еднократна употреба