едвард сноуден – Kurir.mk

Сноуден: „Немав избор, останав во Русија“

Ристе Здравков — Wed, 07 Jun 2023 07:46:24 +0000

Поранешниот агент на ЦИА, Едвард Сноуден изјави дека не планирал да остане .Првично, не планирав да останам во Русија, но другите земји не можеа да ја осигураат мојата безбедност, изјави „Во принцип, не планирав да останам во Русија, тоа беше само една станица на патот кон Латинска Америка, со оглед на тоа што Јужна Америка покажа отвореност кон свиркачите во минатото“, објасни тој. Тој објасни дека за време на неговиот 40-дневен престој во транзитната зона на аеродромот „Шереметјево“ пристапил до многу земји за да добие политички азил, но некои земји се плашеле од реакцијата на САД, а други не биле сигурни дали можат да ја обезбедат неговата безбедност. „Немав избор и побарав азил во Русија и го добив“, рече Сноуден. Во јуни 2013 година, Сноуден иницираше голем меѓународен скандал, тој им предаде на „Вашингтон пост“ и „Гардијан“ тајни документи за програмите за следење на специјалните служби на САД и Велика Британија на Интернет. Потоа одлетал за Хонг Конг, а оттаму во Москва, каде извесно време беше во транзитната зона на аеродромот Шереметјево.

Сноуден доби руско државјанство

Катерина Бојаџиева — Fri, 02 Dec 2022 11:46:06 +0000

Поранешниот аналитичар на американската Агенција за национална безбедност (НСА) Едвард Сноуден доби руски пасош и положи заклетва за државјанство, изјави денеска неговиот адвокат Анатолиј Кучерена. – Да, тој доби пасош. Тој положи заклетва, потврди Кучерена на прашањето на руски медиуми дали Сноуден добил руски пасош. Тој додаде дека сопругата на Сноуден, Линдзи Милс, моментално ги доставува потребните документи за да добие руско државјанство. Сноуден дојде во Русија на 23 јуни 2013 година, откако на почетокот на тој месец обелодени таен судски налог со кој на американските специјални служби им се дава пристап до сите повици што ги упатува американскиот мобилен оператор Верајзон. Тој објави и податоци за супертајната програма на неговиот поранешен работодавач, НСА „Призма“, која овозможи следење на електронските комуникации на многу интернет страници.

Путин му даде руско државјанство на Сноуден

Ивана Ефремовски — Mon, 26 Sep 2022 16:58:24 +0000

Рускиот претседател Владимир Путин му даде руско државјанство на Едвард Сноуден, јавија дел од светските медиуми. Свиркачот е познат по објавувањето строго доверливи податоци од американската Национална безбедносна агенција во 2013 година, кога беше вработен таму. Властите со години сакаа Сноуден да се врати во САД со цел да се соочи со судење за обвиненијата за шпионажа. (МИА)

Сноуден доби син

Магдалена Андонова — Sat, 26 Dec 2020 16:46:47 +0000

Американскиот „свиркач“ Едвард Сноуден и неговата сопруга добија син, а веста ја споделија на социјалните мрежи. – Среќни празници од нашето новопроширено семејство, напиша сопругата на Сноуден, Линдзи Милс, на Инстаграм. Сноуден минатиот месец објави дека тој и сопругата ќе побараат руско државјанство. Тој има дозвола за постојан престој во Русија. Сноуден (37) побегна од САД бидејќи како вработен во американската Национална безбедносна агенција (НСА) во 2013 година објави стого доверливи податоци за методите што ги применува американката разузнавачка служба, вклучително и незаконско прислушување на странски лидери. Тој во 2013 година беше обвинет за шпионажа. (МИА)

Сноуден побара руско државјанство

Ивона Петрова — Mon, 02 Nov 2020 09:28:56 +0000

Поранешниот соработик на американската Национална безбедносна агенција (НСА), Едвард Сноуден денеска поднесе барање за руско државјанство. Сноуден во 2013 година доби постојан престој во Русија. Тој а Твитер напиша дека сака да го задржи и американското државјанство. Барањето за руско државјанство Сноуден го поднесе откако неговата сопруга Линдзи Милс објави дека е бремена. Сноуден во 2013 година најде засолнипште во Русија откако побегна од САД, каде се соочува со обвинувања за шпионажа бидејќи откри глобална програма за прислушување и следење ширум светот. Американскиот претседател Доналд Трамп во август најави дека е можно помилување на Сноуден, кој се соочува со 30-годишна затворска казна поради шпионажа. Сноуден, на кого му е одземен американскиот пасош на барање на Вашингтон, пристигна во Москва во мај 2013 година од Хонг Конг и планираше да се засолни во Јужна Америка. Но беше блокиран во Русија каде доби азил.

Сноуден ќе стане татко

Ивона Петрова — Fri, 30 Oct 2020 08:09:48 +0000

Поранешниот член на американската Централна разузнавачка агенција (ЦИА) којшто доби дозвола за престој во Русија, Едвард Сноуден наскоро ќе стане татко, изјави денеска неговиот адвокат Анатолиј Кучерена. Правниот застапник нагласи дека детето ќе има руско државјанство. – Едвард и неговата сопруга Линдзи Милс наскоро ќе станат родители. Односно, до крајот на годината. Државјанството се доделува врз основа на местото на раѓање, истакна тој. Сноуден не изрази желба да добие руско државјанство, барем сѐ уште не. – Ние не сме разговарале за ова прашање. Кога тој ќе одлучи, самиот ќе ја информира јавноста, нагласи адвокатот. Во октомври 2014 година, американската акробатка и блогер Линдзи Милс ги напушти САД и дојде во Москва за да му се придружи на Сноуден. Во САД, тој се смета за бегалец. Двајцата се венчаа во 2017 година. Во 2013 година, Сноуден објави дека американските разузнавачки служби незаконски ги следат електронските податоци на илјадници корисници на Интернет, што вклучува и нелегално прислушување на странски државјани и државници. Потоа, за да ги избегне правните последици од објавувањето доверливи податоци на САД, Сноуден побара азил во други земји, меѓу кои и Русија. Во август 2014 година доби дозвола за привремен престој во таа земја, додека во САД сѐ уште е обвинет за шпионажа и му се заканува казна затвор од десет години.

Сноуден негира дека на американската Влада ќе и даде пет милиони долари

Ивона Петрова — Wed, 23 Sep 2020 05:57:26 +0000

Едвард Сноуден, поранешен член на Агенцијата за национална безбедност на САД (НСА), негираше дека се согласил на американската влада да и даде пет милиони долари што ги заработил од продажбата на неговата автобиографија и говори ширум светот. Тој на својот профил на Твитер напиша дека Си-Ен-Ен погрешно ја интерпретирал информацијата и оти подобар наслов на текстот би бил „САД би можеле да заработат до пет милиони долари со помилување на Сноуден“. – Под А, тоа не е договор, јас не се согласив со тоа. Под Б, пресудата во овој случај на цензура не може да се спроведе додека сум во егзил, но ионака никогаш не сум имал толку пари, напиша Сноуден. Си-Ен-Ен вчера јави дека, според договорот меѓу Сноуден и администрацијата на Трамп, парите ќе бидат депонирани во посебен фонд. Минатата година Сноуден ја објави книгата „Трајно досие“ (Permanent Record) и со тоа го прекрши договорот што го склучи со ЦИА и НСА. Во книгата од која заработи неколку милиони долари, тој открива како американската Влада создала систем за масовно следење. Сноуден, кој моментално живее во Русија, заработи 4,2 милиони долари од продажбата на книгата и авторските права. Неговите говори, кои досега се повеќе од педесет, чинат во просек околу 18.000 американски долари

Сноуден го прекршил договорот за доверливост со НСА, американската Влада ќе му земе пет милиони долари

Ивона Петрова — Tue, 22 Sep 2020 09:54:38 +0000

Едвард Сноуден, поранешен член на американската Агенција за национална безбедност, (НСА) се согласи да ги предаде приходите од продажбата на неговата книга на американската влада. Сноуден, кого го бараат во САД за откривање на најдоверливите податоци на американските тајни служби, се согласи на владата да и предаде дури пет милиони долари. Тој во 2013 година го шокираше светот кога на човештвото му откри дека американската Влада тајно собира податоци од секој телефонски повик, порака и е-пошта. Сноуден во последните неколку години се наоѓа во Русија. Минатата година Сноуден ја објави книгата „Трајно забележено“ и со тоа го прекрши договорот што го склучи со ЦИА и Американската агенција за национална безбедност. Во книгата од која заработи неколку милиони долари, тој открива како американската Влада создала систем на масовно следење. Ова не е првпат американската Влада парично да казнува поранешни вработени за неовластено протекување информации. И Џон Болтон, поранешниот советник за национална безбедност, кој објави книга за претседателот Доналд Трамп, се соочува со сличен обид на Министерството за правда да ги поврати приходите од објавувањето и продажбата на книгата.

Помпео го спореди Болтон со Сноуден

Ивона Петрова — Tue, 23 Jun 2020 05:53:16 +0000

Американскиот државен секретар Мајк Помпео синоќа го спореди Џон Болтон со поранешниот разузнавач Едвард Сноуден, кој е обвинет за шпионажа. – Искрено, многу рескира да биде кривично гонет поради објавување на тие информации, изјави Помпео за „Фокс њуз“ пред објавување на книгата „The Room Where It Happened“, која е хроника на Болтон за неговите 17 месеци поминати во Белата куќа, како советник на американскиот претседател Доналд Трамп. Помпео додаде дека објавувањето на такви информации претставува „закана и удар врз САД“. Болтон во книгата го опишува Трамп како некомпетентен, невнимателен и опседнат со неговиот реизбор.

Сноуден предупредува: Преку мобилните ве следат на секој чекор, но сепак постои решение тоа да се спречи

Предраг Кукиќ — Fri, 25 Oct 2019 16:27:13 +0000

Поранешниот американски разузнавач и „свиркач“ Едвард Сноуден на подкастот "Joe Rogan Experience" се осврна на бројни теми во врска со сајбер безбедноста и разузнавањето. Едвард Сноуден е поранешен разузнавач на ЦИА и соработник на НСА, а стана американски „државен непријател број 1“ откако објави документи во кои се открива како американските разузнавачки служби ги шпионираат американските граѓани. Американскиот суд го бара затоа што треба да одговара за прекршување на Законот за шпионажа и загрозување на националната безбедност, па Сноуден од 2013-та година живее „заробен“ во Русија каде што доби азил од руските власти. Сноуден на подкастот "Joe Rogan Experience" проговори за тоа на кој начин разузнавачите ги шпионираат луѓето и дали ЦИА поседува информации за вонземјани, а исто така откри и како се шпионираат луѓето преку нивните мобилни телефони. „Имате мобилен некаде во собата. Мобилниот е исклучен, барем екранот му е исклучен. А, кога некој ќе ви испрати порака, екранот оживува. Како е тоа можно?“, се запраша Едвард Сноуден. „Мобилните денес се сеприсутни и се главниот начин за прислушкување затоа што луѓето ги користат почесто и од компјутерите. Кога и да ви е мобилниот вклучен, постои запис за вашата присутност на тоа место“, вели Сноуден и додава дека ако телефонот ви е вклучен, тогаш нема што да направите. „Секој паметен телефон, секој мобилен е секогаш поврзан со најблискиот репетитор. Дури и кога екранот му е исклучен и мислите дека не работи ништо, не можете тоа да го видите затоа што емисиите на радиофреквенциите се невидливи. Но, телефонот „врска“ во воздухот говорејќи - тука сум, тука сум“, открива Сноуден кој утврдил дека записот на вашата присутност на некое место ќе постои ако со себе го носите телефонот. Според него, на тој начин функционира масовниот надзор на населението, безразлика дали сте осомничен или „најобичниот човек на светот“. Сноуден тврди дека на тој начин се создава основна колекција што е владин еуфемизам за масовниот надзор - владата ги собира тие податоци надевајќи се дека еден ден би биле корисни. Сноуден вели дека луѓето едноставно немаат поим што нивните телефони би можеле да работат во позадина, а според него, посебно проблематично е тоа што кај новите телефони не може да се извади батеријата. Сепак, Сноуден советува дека за почеток доколку не сакате да ве следи некој, најдобро би било да го исклучите телефонот.