ејо – Kurir.mk

Тошковски: СДСМ и Десковска имаа една година за да го достават законот за ЈО во работна верзија до Венецијанската комисија, тоа не го сторија

Ивана Ефремовски — Tue, 04 Feb 2020 21:29:18 +0000

Панче Тошковски од ВМРО-ДПМНЕ на 24 Телевизија во емисијата „Отворено“ вечерва истакна дека власта пробува со некакви аргументи да убедува, но факт е дека имаа време цела година по барањето на ВМРО-ДПМНЕ да го достават во работна верзија до Венецијанската комисија, но тоа не го сторија. Тој вели дека станува збор за системски закон и доста значаен за Република Македонија, СДСМ пред една година требаше да постапи по барањето на ВМРО-ДПМНЕ како и ставот на најголем дел на експертите требаше во работна верзија да го достават до Венецијаска комисија којашто ќе дадеше можеби позитивно мислење за законот и денеска немаше да бидеме на ова дереџе каде што сме. -Нашиот став е јасен. ВМРО-ДПМНЕ е за донесување на ваков закон кој ќе овозможи независно Јавно обвинителство коешто ќе се бори со организираниот криминалот и корупцијата, баравме да се одржи јавна дебата, но повеќе од година дена на крај министерката дозволи да се одржи таа дебата, на којашто најголем дел од експертите се согласија со забелешките на ВМРО-ДПМНЕ, вели Тошковски. Тошковски истакна дека на неколку наврати ВМРО-ДПМНЕ има поднесено амандмани кои се истоветни во најголем дел од забелешките на експертите, како во делот на транспарентноста на ЈО, како и во делот на неуставните и недопуштените преодни и завршни одредби, каде се врши преседан единствено во Република Македонија во конкретното наведување со име и презиме на обвинители коишто треба да постапуваат по конретни предмети.

Тошковски за Законот за јавно обвинителство: СДСМ не може да разбере дека неправото не може да не донесе до правда

Предраг Кукиќ — Tue, 04 Feb 2020 09:39:32 +0000

Во утринско гостување во „Утрински брифинг“, Панче Тошковски од ВМРО-ДПМНЕ говореше за Законот за јавно обвинителство и рече она што ВМРО-ДПМНЕ го предлага за овој закон го потврдија и експертите. Имено тој посочи дека всушност станува збор за сите постапки кои што се влезени во судска постапка и сите постапки кои што не се влезени во судска постапка, Судот, Јавното Обвинителство и институциите да ценат која цена како ќе продолжи согласно важечки процесен закон. -Овој закон е материјален закон, закон кој што не дефинира процесни дејствија кои што би требало да продолжат или би требало да запрат, тоа е недозволиво, недопуштено, правно неиздржано. Се знае кој закон што дефинира, законот за кривична постапка си има многу добри процесни одредби кој што си дефинираат правила на игра и единствено по нив Судот и Јавното Обвинителство може да се водат во овие процеси за на крајот ние да дојдеме до правда. Каде е проблемот на другата страна? Не можат да разберат и не можат да прифатат едно основно правило, а тоа е неправото не може никогаш да не донесе до правда, со неправото единствено може како со глава во ѕид да удри и на крајот на денот последицата е јасна, истакна Тошковски. Имено тој во своето гостување го посочи и следново: -Ние година дена преговараме, јас аргумент во однос на преодни и завршни одредби не чув од страна на Десковска. Еве друга конкретна работа што е дефинирана во преодните и завршните одредби кои што се предложени од страна на министерката Десковска, со име и презиме уште не испишано кој требало да продолжи да го води постапките. Како може во еден закон со име и презиме да се дефинира кој конкретен предмет кој обвинител ќе го работи. Тошковски во своето гостување додаде дека овој предлог закон за јавно обвинителство е критикуван од професорот Тупанчевски, од професорот Калајџиев, од професорката Силјановска, професорот Климовски, професорката Каракамишева и сите останати експерти кои што дојдоа на јавната расправа.

Каракамишева: Предлог законот за ЈО воопшто не е влезен во собраниска процедура за по него да се отвора јавна дискусија, ова е кршење на Деловникот

Ивона Петрова — Tue, 04 Feb 2020 07:05:37 +0000

Професорката Тања Каракамишева во емисијата „Што не е јасно“ на Алфа телевизија рече дека сите експерти од Правниот факултет ги кажале скоро истите забелешки за предлог законот за Јавно обвинителство и дека ниеден од нив не се согласил со предлог законот. -Она што беше за мене најфрапантно е дека разговаравме на јавна дискусија за Закон кој не е поднесен во законодавна процедура, односно не е доставен до претседател на Собрание. Законот ни беше даден по меил каде што ни кажаа по овој закон ќе се расправа на јавната дискусија. Кога ги прашав лицата од секретаријатот на комисијата дали овој закон е поднесен до претседателот на Собранието, ми рекоа не знам, за потоа да дознаам дека тој закон воопшто не е влезен во собраниска процедура, истакна Каракамишева. Таа рече дека предлог законот за Јавно обвинителство е текст, односно збир на желби на некого за да се дискутираме по него. -Деловникот по не знам кој пат е прекршен, она што е интересно е дека во Деловникот јасно стои дека јавна дискусија може да има доколку законот е примен од претседателот на Собрание, потоа доколку е поминат на законодавно-правна комисија, која е и матично работно тело за овој закон, таа требаше да го гледа овој предлог закон и откако таа ќе даде позитивно светло, ќе оди на општа расправа, па таму ќе се одлучува дали ќе има јавна дискусија или не, посочи професорката. Каракамишева изјави дека како експерти биле повикани на јавна расправа без да се изодат чекорите кои ги налага Деловникот. Според неа, министерката Дескоска им рекла дека ќе се разгледуваат сите забелешки, за потоа да не дозволи работна група од професори кои што имале најмногу забелешки за законот, односно одбила формирање на работна група од професори кои што ќе работат на разгледување на предлог законот во која дел ќе бидат Тања Каракамишева и професорката Гордана Силјаноска Давкова. Дури и професорот Шкариќ изјавил дека законот од технички аспект не е добар.

Калајџиев за Законот за ЈО: ВМРО собра повеќе мислења и учество од правната фела, СДСМ беше надмен со лажна самодоверба

Предраг Кукиќ — Mon, 03 Feb 2020 11:44:24 +0000

Универзитетскиот професор по Кривично право, Гордан Калајџиев, смета дека ВМРО-ДПМНЕ, за време на целокупниов период на преговори и изготвување на Законот за Јавно обвинителство, собра повеќе мислења и учество од страна на правната фела отколку што тоа го направи СДСМ. Коментирајќи во емисијата „Трилинг“, тој додава дека работната група на СДСМ е составена од некои чудни правни избори. Калајџиев смета дека партијта на власт, поаѓајќи од тоа дека ја има власта и моќта да предлага, беше малку надмен со една лажна самодоверба, која што продонесе за овој дебакл со законот за ЈО. - Работните групи беа, делум, составени од партиски активисти. Кај СДСМ беа тоа некој чудни правни избори, кај ВМРО беа воглавно адвокати. Па, дури можам да кажам дека ВМРО, при целата приказна, од аспект на политичката страна, мислам дека собра повеќе мислења и учество од правната фела откулку што тоа го направи СДСМ. СДСМ, веројатно, поаѓајќи од тоа дека ја има власта и моќта да предлага, беше малку надмен во целата работа со една лажна самодоверба, која што мислам дека продонесе за овој дебакл, рече Калајџиев. Професорот Калајџиев упати критика и за функционирањето на Јавното обвинителство, при што истакна дека во оследните неколку години, во редовното Обвинителство, имаме до сега невидена појава, судските рочишта да се одложуваат заради недоаѓање на обвинителите, што порано, вели тој, воопшто не беше практика, воглавно тоа беше заради отсуство на странките, односно обвинетите и адвокатите.

Правен факултет 5 – СДСМ 1: Силјановска Давкова, Калајџиев, Тупанчевски, Каракамишева и Климовски VS Дескоска

Ивана Ефремовски — Wed, 29 Jan 2020 16:33:00 +0000

Додека министерката за правда, Рената Дескоска, брани партиски ставови во Собранието, нејзините колеги професори со факти и ги побиваат тезите. Во Собранието за време на Комисиската расправа по однос на законот за јавно обвинителство, од собраниската говорница се обратија Гордана Силјановска Давкова, Гордан Калајџиев, Никола Тупанчевски, Тања Каракамишева и Александар Климовски, сите универзитетски професори со стручни ставови. Наспроти нив, стоеше Дескоска со ставовите на СДСМ, кои од фелата беа побиени со стручни анализи и факти. Тупанчевски во однос на предлог законот за Јавно обвинителство посочи дека законот има крупни номотехнички грешки и создава правна несигурност -Членот 32 од предлог законот е каде што се уредуваат надлежности на ОЈО за организиран криминал и корупција, во еден ист член се користат 4 различни техники за типот на кривичните дела. Значи став 1 се однесува за злосторничко здружение, понатаму времетраењето, значи првиот стандард зборувам за цела наука, доктрина не би требало во еден член 4 пати различно да се настапува во елементи бидејќи се проудицира правна несигурност, вели професорот Тупанчески. Универзитетската професорка по уставно право Гордана Силјановска Давкова на јавна расправа за Законот за Јавно обвинителство посочи дека член 109, став 1 и став 2 е потребно да се корегираат бидејќи директно се мешаат во Советот на јавни обвинители. -Член 109 апсолутно и став 1 и став 2 не им е место во Законот за јавно обвинителство, зошто значи директно мешање на законот во работата на советот на јавни обвинители. Имено во рок од 30 дена од влегувањето на сила на овој закон се вели дека Основно јавно обвинителство ќе донесе одлука за зголемување на бројот на јавни обвинители за гонење на висок криминал, не може закон тоа да надреди, тоа е нивна работа врз основа увидот на јавните обвинители и мислам дека ова не е страшно да се корегира. И втората се вели дека во рок од 15 дена од донесувањето на одлуката од ставот 1, Советот на јавни обвинители ќе распише оглас, ниту ова не може во овој закон да го пишува, бидејќи не е работа на овој закон, изјави Силјановска Давкова. Свои забелешки на предлогот на законот за јавното обвинителство на јавната дискусија организирана во Собранието на Македонија изложи и проф. д-р Тања Каракамишева-Јовановска, професор по Уставно право на Правниот факултет „Јустинијан Први“. -Предлог законот е лоша имитација на оној од 2007 година, да беше реформски ќе имавме сосема нов закон, а не лоша компилација од претходниот за кој имаше забелешки од Венецијанската комисија и истите да бидат вметнати во овој закон. Полтронско вметнување на одредби од забелешките од 2007 год. Ќе ви дадам еден пример ако, некоја девојка во 2007 побарала мислење од моден креатор за облека, дали после 13 години кога таа е веќе оформена жена би ја носела таа креација. Сметам дека предлагачот го користи овој закон да ги вдоми кадрите на СЈО, рече Каракамишева. Таа додава дека законот е против уставен и дека во ваква верзија не треба воопшто да се носи, туку да се изработи нов закон. -Кога сме кај почитување на правото, ме интересира дали за овој предлог на закон е испочитуван Деловникот на Собранието, односно дали овој предлог на закон е официјално доставен до Собранието? Познато е дека за да има јавна дискусија предлогот на законот требал да помине прво читање во законодавно-правната комисија како матично работно тело. Седница на Собранието за прво читање на предлог на закон се одржува во рок од десет работни дена од денот на донесувањето на решението за свикување на седницата, но не подолго од 20 работни дена од денот на доставувањето на предлогот на законот до пратениците. Според член 144 од Деловникот, по општата расправа Собранието одлучува дали предлогот на законот може да се даде на второ читање. Ако Собранието одлучи дека предлогот на законот е прифатлив и може да се даде на натамошно читање се продолжува со законодавната постапка. Според член 145 за предлогот на закон кој е од поширок интерес, Собранието по општата расправа, може да одлучи по тој закон да се спроведе јавна дискусија и да определи матично работно тело што ќе ја организира јавната дискусија. Прашањето ми е зошто не е почитувана деловничката процедура, праша Каракамишева.

За професорот Александар Климовски работниот текст на законот е спротивен на Уставот, како и претходно законот за СЈО. За него носењето на овој закон нема врска со евроинтеграцискиот процес и не е услов за добивање датум. Тоа прашање, според него, ќе биде отворено кога ќе започнат разговорите за поглавјето за правосудство.

Во делот на стручните забелешки за содржината на законот, Климовски упати критики за повеќе членови кои се однесуваат на нееднаквиот третман на јавните обвинители, именувањето и изборот на јавните обвинители и други членови. Во делот на изборот на обвинители кажа дека на тоа треба да имаат право и професори по право, особено на правосудни предмети и адвокати со долгогодишно искуство.

Универзитетскиот професор по право Гордан Калајџиев на јавна дискусија за Предлог законот за ЈО остро искритикува дека се смешни и дилетански одредбите во законот како и дека продолжувањето на постапките не е нова сезона од серијата „Френдс“. -Не ми е јасно што беше толку важно во овие неколку случаи за „Поштенска банка“, „Империја“ и останати за кои по мене се незаконски поведени, за да се одолговлечат и да се обезличат за да не згаснат тие спорни истраги, што беше толку важно за да се одолговлечат сите останати постапки за овие случаи ? – праша Кајалџиев. -За оваа непотребна жртва која резултираше со фијаско во евроинтеграциите, резултираше во фијаско во донесување на законот . И во овој предлог закон има неколку многу нејасни одредби постапките ако тоа е идејата да продолжат истрагите, член 108 вели дека постапките треба да продолжат, WOW што е ова нова сезона на „Friends“, зошто обвинителот не го покаже писмото од Катица Јанева, и јас ќе го повикам уште еднаш обвинителот да го покаже писмото, зошто Катица не е суспендирана и тогаш и сега пишува кога ќе одела во притвор ќе се суспендирала, како можела Катица да му ги даде предметиите на Марко, а можела да ми даде на Јовески?, праша Калајџиев. Тој вели дека кога ќе згасне овој закон за СЈО има суштински гаранции, не може да ги дадете само на друго обвинителство, се сложивме дека не може овој предлог закон да го згасне законот за СЈО, таму има последици и за обвинителите, не смее да се заборави дека има и стручни служби кои треба да бидат распределени во овој предлог закон не се гледа нивната судбина. Тој остро искритикува дека постапките кои се спорни не може политички субјект да ги воскресне, дека се смешни и дилетански одредбите во законот за Европската конвенција чии одредби требало да ги имплементира сега новото обвинителство.

Силјановска Давкова: Законот преку член 109 директно се меша во надлежноста на Советот на јавни обвинители

Предраг Кукиќ — Tue, 28 Jan 2020 14:55:53 +0000

Универзитетската професорка по уставно право Гордана Силјановска Давкова на денешната јавна расправа за Законот за Јавно обвинителство посочи дека член 109, став 1 и став 2 е потребно да се корегираат бидејќи директно се мешаат во Советот на јавни обвинители. Член 109 апсолутно и став 1 и став 2 не им е место во Законот за јавно обвинителство, зошто значи директно мешање на законот во работата на советот на јавни обвинители. Имено во рок од 30 дена од влегувањето на сила на овој закон се вели дека Основно јавно обвинителство ќе донесе одлука за зголемување на бројот на јавни обвинители за гонење на висок криминал, не може закон тоа да надреди, тоа е нивна работа врз основа увидот на јавните обвинители и мислам дека ова не е страшно да се корегира. И втората се вели дека во рок од 15 дена од донесувањето на одлуката од ставот 1, Советот на јавни обвинители ќе распише оглас, ниту ова не може во овој закон да го пишува, бидејќи не е работа на овој закон, изјави Силјановска Давкова.