Ејуп Алими – Kurir.mk

Гури и Алими од ДУИ осудени на 3,6 години затвор за „Титаник 3“

Ристе Здравков — Fri, 14 Jul 2023 08:46:00 +0000

По три години и шест месеци затворска казна добија Ејуп Алими и Исмет Гури, од ДУИ обвинети во случајот „Титаник 3“. На нив во Кривичен суд им се судеше по вторпат, откако еднаш, Апелација ја укина пресудата. Судијката Марија Клетничка ги прогласи за виновни Алими и Гури бидејќи уништувале изборни материјали на локалните избори во 2013 година во Чаир. Тие ги преправале точните резултати на гласовите, па така за ДУИ конечните резултати растеле, на ДПА и на ВМРО-ДПМНЕ се намалувале. Овие резултати биле пратени во Државната изборна комисија со цел да станат конечни, но не им успеало. И денешната пресуда на Основниот кривичен суд не е правосилна односно странките имаат право на жалба до Апелација која овој пат ќе треба да одлучи мериторно. Ова е прва пресуда за некои поранешни или актуелни функционери од редовите на ДУИ во предметите на поранешното СЈО. Гури во моментов е заменик-управник во УЈП, а Алими државен советник во Министерството за политички системи и односи меѓу заедниците со кое раководи првиот вицепремиер Артан Груби.

Координаторот на ДУИ Алими до Заев: Срам ми е што сум дел од ова Собрание, апсете ме!

Предраг Кукиќ — Fri, 26 Jul 2019 09:03:23 +0000

Координаторот на пратеничката група на ДУИ, Ејуп Алими на вчерашната седница за пратенички прашања во Собранието, бурно реагираше на апсењето на поранешниот припадник на ОВК, Томор Морина. Тој беше уапсен врз основа на потерница на Интерпол издадена од соседна Србија. „Мене ми е срам што сум дел од ова Собрание. Апсете ме слободно, еве го повикувам министерот Спасовски да го стори тоа. Да се избришат постапките на Милошевиќ, а вие премиере Заев треба да се засрамите“, истакна Алими.

ДУИ до СДСМ: Вие одите со црни возила и им се заканувате на судиите, овие ли се реформите во судството кои им ги ветивте на граѓаните?

Ивана Ефремовски — Tue, 26 Feb 2019 13:45:26 +0000

Координаторот на пратеничката група на ДУИ, Ејуп Алими, синоќа во емисијата “Click Plus” на ТВ 21 ги обвини СДСМ дека со цел да го покријат нивниот неуспех за функционирање на правниот систем, што впрочем СДСМ ветуваше во предизборната кампања, измислуваат различни сценарија. -Господине Зеќири ве гледа цела јавност, со ова сценарио не можете да го покриете бегството на Груевски. Не можете да го покриете неуспехот за функционирање на правниот систем. Граѓаните прашуваат кај се парите, вие ветивте во кампањата дека сите финансиски средства ќе ги вратите во буџетот, ви се молам немојте, со вакви сценарија не можете да ги покриете неуспесите, кажа Алими. Зеќири на ова одговори дека Ејуп нема право да зборува за правниот систем бидејќи тој самиот треба да се појавува на суд секоја недела, на што Ејуп Алими му одговори дека тој се појавува и ќе се појавува и ќе продолжи да се појавува редовно се додека не се расчисти случајот и го обвини Зеќири дека од нивната партија им се закануваат на судиите. -Да, јас се појавувам на суд и ќе се појавувам редовно се дури не се расчити овој случај, но вие одите со црни возила и им се заканувате на судиите за жал, му порача Алими на Зеќири. Меѓу другото Ејуп Алими го запраша потпретседателот на СДСМ какви се тие реформи во судството кои ги ветиле, а ги гледаме истите судии од претходната власт. -Кои се тие реформи во судството кога ги гледаме истите судии за кои вие обвинувавте дека ги назначуваа Груевски и Мијалков, или пак да не случајно групи на интереси и различни лобија од казината ве финансираат па затоа и го попречувате законот за казината, го запраша Алими потпретседалот на СДСМ.

Владата без коментар за пресот на пратеникот Ејуп Алими на кој говореше само на албански јазик

Предраг Кукиќ — Wed, 23 Jan 2019 09:53:56 +0000

Владата не го коментира вчерашниот потег на пратеникот Ејуп Алими од ДУИ кој на прес-конференција во македонското Собрание говореше само на албански јазик. Владиниот портпарол Миле Бошњаковски денеска на редовната прес-конференција во Владата рече дека како Влада не би можеле да ги коментираат настапите на одредени политички субјекти и да им укажуват како тие да ги пласираат нивните информации до јавноста. – Информациите кои се пласираат на прес-конференции се информации кои се од важност за граѓаните. Владата не би можела да укажува на дадени политички субјекти или на било кои организации на граѓани на кој начин тие чувствуваат потреба да ги пренесат нивните информации за кои сметаат дека јавноста треба да знае. Она што можеме да кажеме е дека како Владата секогаш сме обезбедувале преведувач и функционираме по принципот што го промовираме на едно општество за кое имплементацијата на Законот за јазиците само ќе биде комплементарна додадена вредност во интерес на сите граѓани во Македонија, рече Бошњаковски, одговарајќи на новинарско прашање. Алими вчера во македонското Собрание одби да одговара на македонски јазик на прашањата на новинарите.

Координаторот на пратеничката група на ДУИ на суд за уништување на изборен материјал

Ивана Ефремовски — Fri, 27 Apr 2018 07:15:58 +0000

Денеска во Кривичниот суд ќе се одржи рочиште за случајот на Специјалното јавно обвинителство „Титаник 3“, во кој обвинети се координаторот на пратеничката група на ДУИ, Ејуп Алими и Исмет Гури, член на Општинската изборна комисија за општина Чаир. Според обвинението, тие направиле списи што служат за изборите и гласањето – записници за гласање, сумирање и утврдување на резултати од гласањето, а потоа додавале и одземале гласови за избор на гладоначалник во општина Чаир во првиот изборен круг. Откако судот го прифати обвинението, Алими рече дека ќе соработува со Специјалното јавно обвинителство за се што тие ќе побараат од него.