екрем имамоглу – Kurir.mk

Имамоглу: Пресудата е политичка и незаконска

Катерина Бојаџиева — Wed, 14 Dec 2022 18:27:47 +0000

Градоначалникот на Истанбул, Екрем Имамоглу, денеска изјави дека затворската казна што му ја изрече турскиот суд е политичка и незаконска. Турскиот суд денеска го осуди Имамоглу на повеќе од две години затвор и му забрани да извршува политички функции, поради наводни навреди упатени кон членови на Државната изборна комисија. Имамоглу се сметаше за силен противник на турскиот претседател Реџеп Таип Ердоган на претседателските избори следната година. Тој има право да ја обжали изречената пресуда. На Имамоглу, кој е член на главната опозициска Републиканска народна партија (РПП), му беше судено поради говор во 2019 година по поништувањето на резултатите од локалните избори во Истанбул, при што тој изјави поништувањето на законските избори е „глупост“. По обвинението, во кое се наведува дека Имамоглу со таквата изјава ги навредувал членовите на Државната изборна комисија, беше предвидена максимална затворска казна од четири години. Победата на Имамоглу во март 2019 година на изборите за градоначалник на Истанбул беше поништена откако Партијата на правдата и развојот на турскиот претседател Ердоган пријави нерегуларности. Имамоглу победи и на повторените избори во јуни.

Градоначалникот на Истанбул, Имамоглу осуден на затворска казна

Катерина Бојаџиева — Wed, 14 Dec 2022 17:05:04 +0000

Турскиот суд денеска го осуди градоначалникот на Истанбул, Екрем Имамоглу на повеќе од две години затвор и му забрани политичко дејствување поради навреда на јавни службеници. Одбраната на Имамоглу ќе поднесе жалба на пресудата, донесена на само шест месеци пред претседателските и парламентарните избори. Имамоглу беше потенцијално силен ривал на турскиот претседател Реџеп Тајип Ердоган во трката за шеф на државата. Опозицијата се уште не избрала претседателски кандидат. Имамоглу, член на опозициската Републиканска народна партија (ЦХП), беше осуден за говор по локалните избори во 2019 година во Истанбул, во кој рече дека оние што ги поништиле резултатите биле „будали“. Обвинението предвидуваше максимална затворска казна од четири години. Имамоглу тесно го победи кандидатот на владејачката Партија на правдата и развојот (АКП) на Ердоган на изборите за градоначалник на Истанбул во март 2019 година. Откако тие избори беа поништени, тој победи убедливо на повторените избори, со што заврши 25-годишното владеење на АКП и нејзините исламистички претходници во најголемиот турски град. Се оценува дека исходот од изборите во 2023 година зависи од способноста на ЦХП и другите опозициски партии да се обединат околу еден кандидат за да се спротивстават на Ердоган и АКП, која владее со Турција две децении. Затворската казна или политичката забрана мора да бидат потврдени од апелациските судови, што значи дека случајот може да заврши до изборите во јуни 2023 година.

Градоначалникот на Истанбул хоспитализан поради коронавирус

Ивона Петрова — Sat, 24 Oct 2020 14:48:22 +0000

Градоначалникот на Истанбул Екрем Имамоглу потврдил дека синоќа е хоспитализиран откако резултатите на тестот покажале дека е позитивен на коронавирус. Тој истакнал дека во болница е хоспитализиран со температура, но сега се чувствува добро. Имамоглу нагласил дека во болница бил примен синоќа со температура од 38 степени. Тврди дека сега се чувствува подобро, дека температурата не му е висока и дека состојбата не му е загрижувачка, пренесува Ројтерс.

Имамоглу нов градоначалник на Истанбул

Дарко Андоновски — Mon, 24 Jun 2019 05:39:22 +0000

Кандидатот на опозициската Републиканска народна партија, Екрем Имамоглу, кој ги доби изборите за градоначалник на Истанбул, вети „нов почеток” во градот и изрази подготвеност за соработка со турскиот претседател Реџеп Тајип Ердоган. Имамоглу освои 54 отсто од гласовите, оставајќи го зад себе кандидат на владејачката АКП и поранешен премиер Бинали Јилдирим. Имамоглу победи на изборите на 31 март и беше градоначалник 18 дена, но изборната комисија, по жалба на АКП, ги поништи тие резултати поради неправилности. Турскиот претседател Реџеп Тајип Ердоган му честиташе на лидерот на опозицијата, Екрем Имамоглу, за победата во повторното гласање за градоначалникот на Истанбул. „Му честитам на Екрем Имамоглу, кој победи според неофицијалните резултати”, напиша Ердоган на Твитер.