екстремисти – Kurir.mk

Израелската армија елиминира четворица екстремисти од Либан

Катерина Бојаџиева — Tue, 17 Oct 2023 09:17:55 +0000

Израелската армија денеска уби четворица екстремисти, кои имаа елеци со експлозив и се обидува да преминат од Либан во Израел, изјави воениот портпарол Авихаи Адраи. На видеото од беспилотно летало објавено од армијата се гледаат екстремистите до граничниот ѕид пред да бидат погодени, што предизвика експлозија. Ниту една либанска организација не презеде одговорност. Минатата недела екстремистите од палестинскиот Исламски џихад во јужен Либан ја преминаа границата и се судрија со израелските војници, при што загинаа тројца, а беа повредени неколку други. Екстремистите беа елиминирани.

На австрискиот претседател Ван дер Белен екстремистите му се закануваат со бесилка

Тале Кристо — Wed, 27 Jul 2022 13:09:05 +0000

Повеќе недели десничарски екстремисти му се закануваат на австрискиот претседател Александер ван дер Белен, а сега тоа го направија и со бесилка. На протест по повод доаѓањето на Ван дер Белен на летен културен фестивал во Салцбург, еден од учесниците носеше бесилка со напис „Алатка за поправка на владата“. Полицијата ги обезбедуваше политичарите при нивното доаѓање, но не им одговори на учесниците на протестот. На социјалните мрежи реагираа многумина, критикувајќи што полицијата дозволила такви закани. Со недели десничарски групи се обидуваат да ги нарушат настапите на Ван дер Белен. Објавени се термини на социјалните мрежи, првенствено на Телеграм, како и повик на сите места, со различни средства, да му се попречуваат настапите. Така група демонстранти пред неколку дена излезе во Ефердинг поради што беше откажан планираниот говор на австрискиот претседател. Медиумите пишуваат дека на сите места каде Ван дер Белен доаѓа, соочен е со протести и свирежи.

Германската полиција запре повеќе од 50 вооружени екстремисти кај полската граница

Ивона Петрова — Mon, 25 Oct 2021 07:18:51 +0000

Германската полиција соопшти дека запрела повеќе од 50 десничарски екстремисти вооружени со солзавец, бајонети, мачети и палки кои сакале да патролираат долж полската граница за да спречат мигранти да влезат во земјата. Екстремистите го следеле повикот на Третиот пат, екстремно десничарска партија за која постои сомневање дека се поврзани со неонацистички групи, нивните членови да ги запрат илегалните преминувања во близина на градот Губен на германско-полската граница. – Полицијата им го заплени оружјето и ги принуди да ја напуштат областа Губен доцна навечер во саботата и раните часови во неделата, изјави портпаролот. Некои осомничени дојдоа на полската граница од други делови на Германија. Десетици луѓе се собраа во саботата во Губен за да се спротивстават на планираните десничарски патроли. Министерот за внатрешни работи Хорст Зехофер изјави дека Германија распореди дополнителни 800 полицајци на полската граница за да го контролира протокот на мигранти кои се обидуваат да влезат во ЕУ од Белорусија.

САД запленија милиони долари од налози што ги користеле екстремистите

Тале Кристо — Fri, 14 Aug 2020 06:59:42 +0000

Министерството за правда на САД соопшти дека се запленети милиони долари од криптовалутните налози во странство што екстремистичките организации, помеѓу кои и Ал Каеда и Исламска држава ги користеле за финансирање на насилни операции. Екстремистичките групи ги користеле налозите за донации, а некои од нив и мамеле дека продаваат заштитна опрема за Ковид-19. Тоа е најголема операција за заплена на средства во облик на дигитална валута поврзана со тероризмот. Криптовалутите, како биткоинот, често се користат за недозволени трансакции бидејќи се верува дека потешко им се влегува во трага.

Сириската војска изврши ракетен напад врз позициите на екстремистите во Идлиб

Тале Кристо — Tue, 23 Jun 2020 16:33:49 +0000

Сириските владини трупи извршија ракетен напад врз позициите на терористичката група Џабхат ал Нусра во провинцијата Идлиб, објави денеска порталот „Ал-Масдар“. Командата на сириската армија издаде наредба за отворање оган врз терористите, откако беспилотните летала на оваа екстремистичка група се обиделе да ја нападнат руската воздушна база Хмеимим, јави ТАСС. Беспилотните летала биле забележани над крајбрежниот град Џаблех и биле елиминирани со противвоздушна одбрана. Сириската армија потоа го уништила командното место и позициите на екстремистите во близина на градот Ал-Бар.

Во Германија уапсени 12 екстремисти

Дарко Андоновски — Fri, 14 Feb 2020 14:45:13 +0000

Во полициска акција против десничарскиот екстремизам, спроведена денеска во шест германски покраини, уапсени се 12 лица осомничени за припадност на терористичка група. – Полициска претрес е извршен на 13 локации, а претресот започнал од пет лица претходно познати на властите, соопштија од Обвинителството во Карлсруе. Терористичката организација планирала напади врз полицијата и припадниците на малцинствата. Според германското сојузно обвинителство наводно петтемина формирале организација во септември 2019 година со цел да се наруши поредокот во Германија, а за постигнување на својата цел планирале напади врз политичари, баратели на азил и муслиманите, за да предизвикаат воена состојба. Уште осум лица се под сомнение дека финансиски ја помагале групата, набавувале оружје и планирале да учествуваат во идните напади.

Најмалку 14 жртви во нов напад на екстремистите во Нигер

Ивона Петрова — Fri, 27 Dec 2019 07:19:41 +0000

Исламски екстремисти со мотоцикли убиле 14 припадници на безбедносните сили кои биле придружба на службеници од нигериската изборна комисија, соопштија денеска локалните власти. Нападот се случил во средата вечер, недалеку од Санам, кој е на околу 200 километри од главниот град Нијамеј, при што загинале седум воени полицајци и седум припадници на Националната гарда. Нигер е изложен на исламски екстремизам, затоа што граничи со Нигерија, каде терористичката група Боко Харам е активна веќе една деценија. Но земјата во моментов е исто така изложена на активностите на терористичката група „Совет на Сахара“ која е активна по должината на границата со Мали и во 2017 година изврши напад во кој загина американски службеник. На почетокот на месецов екстремистите во Нигер во еден напад убија 71 војник.

Екстремисти планирале политички убиства во цела Германија

Ивана Ефремовски — Sun, 07 Jul 2019 07:21:07 +0000

Екстремистичката група „Nordkreuz” – „Северен крст” планирала серија политички убиства во цела Германија, објави медиумската група Redaktionsnetzwerk Deutschland (РНД). Организацијата базирана во Мекленбург-Западна Померанија, составила список со 25 илјади потенцијални жртви – политичари кои ги сметале за свои противници. Федералното обвинителство смета дека екстремистите собирале податоци не само за политичари од таа провинција туку и за политичари од други места. Меѓу август 2017 и април 2018 година властите заплениле документи во кои се најдени имиња и адреси на речиси 25 илјади опоненти на организацијата во цела Германија. Според медиумската група, членовите на Северен крст собирале податоци за политичари со позитивен однос кон бегалците. При распити во полиција, еден од приведените признал за планови за убиства на политички противници. Основачот на организацијата Марко Г. кој е во привор од минатиот месец е поранешен припадник на специјалната полиција. Тој и уште три други лица украле муниција од депоа на полицијата. (МИА)

Повеќе од 300 екстремисти на ИД одбиваат да се предадат

Ивана Ефремовски — Mon, 18 Feb 2019 16:12:15 +0000

Повеќе од 300 екстремисти на групата Исламска држава, кои се наоѓаат во мала област во источна Сирија, одбиваат да се предадат на сириските бунтовнички сили поддржани од САД и се обидуваат да преговараат за повлекување. Според неименуван извор запознат со преговорите, екстремистите бараат воспоставување коридор до северозападната провинција Идлиб, што е под контрола на бунтовниците. Сирискиот центра за мониторинг на човековите права, со седиште во Лондон, соопшти дека барањето на ИД да се евакуираат нејзините припадници во соседен Ирак, исто така, е одбиено. Последните екстремисти се наоѓаат во источниот дел на Сирија и се кријат меѓу стотина цивили.

Убиени се 11 екстремисти при воздушен напад на војската на САД во Либија

Ивона Петрова — Sat, 01 Dec 2018 10:30:06 +0000

Американската војска соопшти дека убила 11 екстремисти во југозападна Либија. Посочи дека убиените екстремисти биле припадници на Ал Каеда. МИА