електромобили – Kurir.mk

„Панасоник“ гради фабрика за батерии за електромобили во САД

Магдалена Андонова — Thu, 14 Jul 2022 08:12:47 +0000

Јапонската корпорација „Панасоник“ планира во американската сојузната држава Канзас, да изгради уште една фабрика за производство на батерии за електрични автомобили. Проектот вреди четири милијарди долари, објави „Волстрит журнал“. Според наводите, компанијата веќе станува една од најголемите во областа на производството на батерии. Отворањето на погонот се очекува да отвори до 4.000 работни места. „Панасоник“, којшто произведува батерии за електромобилите на „Тесла“, веќе има заеднички инвестиции со оваа компанија за батерии и во Невада. (МИА)

Во близина на Берлин отворена е првата европска фабрика за електромобили на „Тесла“

Тале Кристо — Tue, 22 Mar 2022 08:06:18 +0000

„Тесла“ денеска ја отвора својата нова фабрика за електрични автомобили во околината на Берлин. На свеченоста, Илон Маск се очекува да им ги предаде првите возила „Модел ипсилон“ на нарачателите. Се очекува на настанот да присуствуваат и германскиот канцелар Олаф Шолц и министерот за економија, Роберт Хабек. Таканаречената „Гигафактори“ (Gigafactory), сместена во руралната покраина Бранденбург, во којашто се наоѓа главниот град на Германија, е првиот погон за електромобили на „Тесла“ во Европа. Од компанијата се надеваа дека ќе почнат со производство минатото лето, но процесот на одобрување од државата се одолжи, делумно и зашто фирмата одлучи да додаде и фабрика за батерии на тоа место, и таа е сè уште во изградба.

Eлектромобилите „Тесла“ ќе може да се плаќаат и со биткоини

Тале Кристо — Wed, 24 Mar 2021 11:09:19 +0000

Извршниот директор на американскиот производител на електрични автомобили „Тесла“, Илон Маск, денеска објави дека електромобилите на компанијата ќе може да бидат плаќани и со криптовалутата биткоин. -Ќе можете да плаќате во ’Тесла‘ со биткоини. Можноста за плаќање во биткоини ќе биде достапна и вон САД кон крајот на оваа 2021 година, напиша претприемачот на својата Твитер-страница. Тој исто така, претходно поддржуваше и други слични дигитални валути, како што е „доџкоинот“ (dogecoin). „Тесла“ на 8 февруари објави дека вложила 1,5 милијарда долари во биткоин и оти во блиска иднина ќе им овозможи на корисниците да ги исплаќаат возилата и во оваа криптовалута. -Една од најголемите компании во светот инвестираше во биткоин, што значи дека сите инвеститори во ’Тесла‘ (или барем само еден фонд во (индексот) Ес-енд-пи-500) се вклучени во тоа, рече тогаш Маск.

Фолксваген го презема европскиот пазар за електромобили

Магдалена Андонова — Fri, 27 Nov 2020 13:08:19 +0000

Најпродаваното електрично возило во Европа во октомври 2020 година е „Фолксваген ИД.3“, со испорачани 10.475 примероци. Компанијата Фолксваген, инаку, со десетлетија го имаше најпродаваниот конвенционален автомобил во Европа – моделот „Голф“, а сега, се чини, го презема водството и во областа на електромобилите. Европскиот пазар на автомобили забележа пад на продажбата од 7 отсто минатиот месец, но во истовреме, продажбата на електромобили (хибриди и целосно електрични возила) скокна за 153 насто во споредба со истиот месец лани. На овој начин, електрифицираните возила веќе ги надминуваат дизел-возилата во продажбата. На место број 4 е „КИА e-Ниро“ (3.868 продадени автомобили), а петти е „Пежо e-208“ (3.757 автомобили). Меѓу првите 10 се „Смарт-фор-ту“, „БМВ ај-3“, „Опел-воксал корса“, „Мини купер СЕ“ и „Нисан лиф“. Интересно е што моделите на Тесла не се меѓу првите десет најпродавани електромобили.

Продажбата на електромобили во ЕУ лани двапати поголема

Ивона Петрова — Fri, 07 Feb 2020 10:11:17 +0000

Во Европската Унија лани биле продадени над 290.000 електрични автомобили, речиси двојно повеќе отколку во 2018 година, покажуваат податоците на Европската асоцијација на производители на автомобили (AЦEA). Тоа значи – поголема продажба за 93,8 отсто. Холандија со 67.695 продадени возила и Германија со 63.491, се водечки земји на европскиот пазар за електромобили. Исто така, продажбата на хибридни автомобили се зголемила за 50 отсто, на 465.026 возила, додека продажбата на хибридни автомобили со полнење, се зголемила за 13,9 отсто, на 174.103 возила. Во меѓувреме, продажбата на дизел-возила падна за 13,9 отсто, на 4,65 милиони продадени автомобили. Бензинските автомобили останаа најпопуларен вид возило во ЕУ, така што продажбата и се зголеми за 5,2 отсто, на 8,96 милиони возла. Нивниот пазарен удел се зголеми за повеќе од два процентни поени, на 58,9 проценти.

Амнести Интернешнал: Батериите за електромобили се штетни за околината

Дарко Андоновски — Thu, 21 Mar 2019 10:26:43 +0000

Меѓународната организација Амнести Интернешнал ја осуди индустријата за електрични возила која се претставува како пријател на околината, а, како што наведуваат оттаму, произведува батерии „со помош на фосилни горива и неетички собрани материјали“. Во извештајот се наведува дека производството на батерии е штетно за околината и за озонот поради емисијата на јаглерод, додека пак, снабдувањето со матеијрали за батериите е поврзано со кршење на човековите права, како што се оние околу детскиот труд. – Електричните возила се клуч за оддалечување на автомобилската индустрија од фосилните горива, но тие во овој миг не се етички како што би сакале да ги гледаме. Подрачјата за изработката на литиум-јонски батерии најмногу ги има во Кина, Јужна Кореја и Јапонија, а при самото создавање на енергијата се согорува многу јаглен и други фосилни горива, стои во документот. Светските производители на автомобили вложуваат милијарди долари во производство на електромобили. Фолксваген, на пример, само минатата година произведе 40.000 електрични возила. До 2025 година се планира тој број да изнесува три милиони. Од друга страна, пак, во февруари годинава, 14 невладини организации, меѓу кои и АИ и Глобал Витнес, се спротивставија на плановите на Лондонскиот пазар на метал (ЛМЕ) да го забрани кобалтот кој е резултат на кршење на човековите права. – Наместо забраната на кобалтни брендови, ЛМЕ треба да соработува со компаниите кои ги произведуваат, за да се обезбедува одговорно производство, истакнуваат од АИ.

Нови измени на Законот за возила, се воведуваат еколошки налепници и субвенции за електромобили

Ивона Петрова — Sat, 10 Nov 2018 08:42:00 +0000

Заменик-министерот за животна средина и просторно планирање Јани Макрадули денеска ќе ги презентира новите измени на Законот за возила со кои ќе се воведат еколошки налепници и субвенции за електрични и хибридни возила. Вчера, министрите за внатрешни работи и за економија Оливер Спасовски и Крешник Бектеши ги најавија измените во Законот за возила со кои на лиценцираните такси автомобили задолжително ќе се поставуваат жолти табли, а сите возила ќе бидат означени со еколошка налепница за степенот на емисијата на штетни гасови. МИА