ЕЛЕМ – Kurir.mk

Семејството Ахмети се офајдиле и од ЕЛЕМ: Дрин Ахмети добил 5.310.000 денари од македонските Електрани

Ристе Здравков — Tue, 04 Jul 2023 13:14:04 +0000

Дрин Ахмети се офајдил и од ЕЛЕМ. Преку два тендери од македонските Електрани добил 5.310.000 денари. За набавка на доломитски или калциски сепариран варовник, прво на 17-ти февруари 2022-ра фирмата Еверест ЏД, во сопственост на внукот на Али Ахмети добила речиси 30.000 евра, а пред помалку од еден месец, на 13 јуни годинава добила уште речиси 60.000. Иако Дрин добива бизниси од државните институции во државата каде веќе 20 години на власт е партијата на неговиот чичко, сепак вели вечниот лидер на ДУИ немал ништо со неговите бизниси. -Али Ахмети ми е чичко и Бог да го благослови. Тој ми е мотивација. Ахмети и помогна на оваа држава. Немаше да ја имаме Македонија денес ако го следевме Љубчо Георгиевски кој ќе ја поделеше државата, кажа Ахмети. Покрај од ЕЛЕМ, на сметката на Дрин Ахмети пари легнале и од Фондот за иновации, каде директор е Фестим Алили, кадар на ДУИ, партијата со која раководи неговиот чичко. За иновациите пари на фирмите на младиот бизнисмен легнале годинава меѓу февруари и мај, а вкупната сума е нешто помалку од 80.000 евра. На сметката на Еверст ЏД легнале 45.000 евра, додека ТХОР Индустрис добила нешто повеќе од 30.000 евра. Од Фондот за иновации потврудваат дека младиот Ахмети добил пари од нив, но се правдаат дека и за некои апликации го одбиле. Инаку, името на Дрин Ахмети стана актуелно во јавноста кога беше објавено дека тој преку неговата фирма Тхор Индустрис стана сопственик на 39 проценти од деловниот центар Соравија за 0 евра. извор: alfa

50-тина родители и 60 деца со посебни потреби останаа 20 часа без струја во хотелот на ЕЛЕМ на Шапка

Тале Кристо — Wed, 11 Jan 2023 20:19:58 +0000

50-тина родители и 60 деца со посебни потреби 20 часа се заглавени без струја во хотелот на ЕЛЕМ на Шапка. „Немаме никаква информација, никој ништо не ни кажува. Има дечиња кои навистина веќе не можат да издржат. Ладно е. Родителите не можат ниту да ги пресоблечат, ниту да ги нахранат децата во колички. Навистина сме во ситуација за која веднаш треба да се реагира“, вели Сузана Стојановска, родител, во телефонски разговор за Сител ТВ. Единствениот одговор којшто го добиле од менаџментот на хотелот бил, уште од утрово, дека за половина час би имало струја, но веќе 20 часа лицата се без електрична енергија.

Дел од прехранбената индустрија, водостопанствата и училишта можат да се пријават за снабдување со електрична енергија од ЕСМ Продажба

Ивана Ефремовски — Wed, 09 Nov 2022 11:03:06 +0000

АД ЕСМ ги подготви процедурите, договорите и придружните документите потребни за склучување договори за снабдување на дел од прехранбената индустрија, водостопанствата и јавните училишта. Истите се поставени на официјалната страна на АД ЕСМ од каде засегнатите субјекти ќе можат да ги симнат, пополнат и потпишат и да ги испратат на соодветните меил адреси кои се наведени во упатствата, како и во архивата на АД ЕСМ. [email protected] [email protected] [email protected] Нивното соопштение го пренесуваме во продолжение: За снабдување од 01.12.2022, поради мрежните правила на ЕВН Електродиструбија за промена на снабдувач комплетните документи потребно е да се поднесат до 10.11.2022г., додека за субјектите кои се на снабдувач во краен случај, рокот е 20.11.2022г. Снабдувањето на овие потрошувачи АД ЕСМ ќе го прави преку ЕСМ Продажба, по одлука и задолжение од Владата на Р. Северна Македонија, која го задолжи ЕСМ Продажба во текот на траењето на енергетската криза, до 30.4.2023г, да снабдува со електрична енергија неколку категории потрошувачи надвор од досегашната обврска по закон. Оваа одлука со која на АД ЕСМ-ЕСМ Продажба му се дава обврската за снабдување на дополнителен број потрошувачи, е донесена со цел да се спречи раст на цените на одредени прехранбени производи, да се одржи сигурност и континуитет во снабдувањето со вода и одведување и пречистување на води, како и да се обезбеди електрична енергија за училиштата за непречено одвивање на наставата. ЕСМ Продажба ќе ги снабдува со електрична енергија следните категории потрошувачи: I КАТЕГОРИЈА – Потрошувачи на електрична енергија, физички и правни лица регистрирани за вршење на приоритетна дејност-главна приходна шифра (само за потрошувачката на броилата за електрична енергија за извршување на приоритетната дејност) - по цена од 80 евра /MWh, и тоа: - 01.47 oдгледување на живина - 10.11 преработка и конзервирање на месо - 10.12 преработка и конзервирање на живинско месо - 10.13 производство на животинско и живинско месо - 10.41 производство на масла и масти - 10.51 преработка на млеко и производство на млечни производи - 10.61 производство на мелнички производи - 10.71 производство на леб; слатки (колачи и торти) во свежа состојба и бисквити (кекси), и - 10.89 производство на останати преxранбени производи, неспомнати на друго место (само за производство на квасец) во услови на постоење на кризна состојба во снабдувањето со електрична енергија II КАТЕГОРИЈА – Потрошувачи на електрична енергија, јавни претпријатија од областа на водостопанство, собирање и одведување на урбани отпадни води и прочистување на отпадни води кои работат со пумпни и/или пречистителни станици- по цена од 95 евра /MWh III КАТЕГОРИЈА – Потрошувачи на електрична енергија, основни и средни јавни училишта - по цена од 95 евра /MWh Овие категории потрошувачи кои ќе сакаат да се префрлат на снабдување со електрична енергија од ЕСМ Продажба ќе треба да ги регулираат своите односи со нивните сегашни или досегашни снабдувачи, и АД ЕСМ тука нема никаква надлежност, вклученост и одговорност, односно тоа е однос меѓу трети страни. Сите документи се веќе поставени на официјалната страница на АД ЕСМ, дадени се точни листи на потребни документи и точни упатства како да се постапи. Документите се поставени на следниот линк: https://www.esm.com.mk/?p=14637

Димитриеска Кочоска за ТВ24: Владата нема стратегија ниту за енергетскиот сектор, во ЕЛЕМ има криминал, а тие не контролираат

Ивана Ефремовски — Tue, 08 Nov 2022 21:03:03 +0000

Пет квартали по ред преработувачка индустрија е во минус во однос на производство, и никој во владата не забележа дека нешто се случува. Што се случува? Имаме високи цени на струјата, да тоа сите го знаеме и сега повторно велат од владата и не можам да не реагирам кога ќе кажат дека помагаат. Го уништија ЕЛЕМ, 3300 гигават часови електрична енергија е задоволително производство за 2021 година, вели потпретседателката на ВМРО-ДПМНЕ, Гордана Димитриеска Кочоска во гостување на емисијата Отворено на ТВ 24. Димитриеска Кочоска смета дека владата нема стратегија за енергетскиот сектор во државата, критикувајќи ги Димитар Ковачевски кој во изјава кажал дека во 2021 година имало најмало производство на електрична енергија бидејќи се случувале ремонти, потенцирајќи дека некој од многуте советници кој ги има Ковачевски требало да му кажат дека ремонтите се планираат месец по месец. -Значи не можам а да не реагирам, кога слушам приказна од владата дека помогнале. Па што помогнале? Каде се најмалку 1000 гигавати кои што имаат обврска, да ги снабдат да ги произведат, што се случува со енергетскиот сектор во Македонија. Ниту стратегија имаат, значи се правиме при очи слепи и не гледаме што се случува со ЕЛЕМ. Го слушам премиерот пред неколку дена, значи срамота е еден премиер кој што има еден куп советници да излезе и да каже имавме најмало производство на електрична енергија во 2021 година бидејќи беше предвидено за ремонти. Срамота, нема такви ремонти, бидејќи тие се планираат месец по месец, рече таа. Според неа, најголем виновник за проблемот со електричната енергија е во ЕЛЕМ и владата, бидејќи се случувале голем број на криминали а владата не контролирала и сега се обидува сето тоа да го прикрие со изговор дека субвенционира електрична енергија. -Проблемот со електричната енергија во Македонија е најголема вина на ЕЛЕМ, а тука и владата бидејќи не контролира што се случува со ЕЛЕМ. ЕЛЕМ тоне, се случуваат корупции, криминали, непроизводство, неработење, и сега за сето тоа да го прикријат, ни прикажуваат нас дека они нешто субвенционирале, потенцираше Димитриеска Кочоска.

Мицкоски: За да го земе Владата заемот за ЕЛЕМ треба да се затворат РЕК Битола и Осломеј и да се интегрира Македонија со грчкиот пазар, тоа е енергетска анексија

Магдалена Андонова — Thu, 27 Oct 2022 10:46:24 +0000

За тоа дека ќе нема да се затвораат Осломеј и РЕК Битола, премиерот очигледно не ја говори вистина, рече лидерот на ВМРО-ДПМНЕ, Христијан Мицкоски одговарајќи на новинарско прашање поставено пред неговото учеството на настанот насловен како Политички дијалог на ЕПП - партиите од регионот. - Ковачевски не ја говори вистината или го нема прочитано предлог законот. Ако го прочита предлог законот кој е доставен во парламентот, а се однесува на ликвидноста на ЕСМ поранешно ЕЛЕМ јасно ќе забележи дека станува збор за услов за да се добијат тие пари. А тоа значи затворање на Осломеј до 2023 година и затворање на РЕК Битола до 2027 година, вели Мицкоски. Според него тоа е егзактна работа и тоа не е предмет на дебата и филозофија. - Ако го прочитате законот јасно кажува дека за да биде ефектуиран тој заем од 100 милиони евра се бара затворање на овие два производни капацитети и интегрирање на македонскиот пазар прво со грчкиот во четвртиот квартал во 2022 година, а во 2023 година и со бугарскиот. Или јас тоа би го нарекол енергетска анексија на Македонија, заклучи Мицкоски.

Корисниците на парното од ЕЛЕМ Енергетика за недела-две се очекува да добијат субвенционирани сметки

Магдалена Андонова — Thu, 20 Oct 2022 13:14:22 +0000

Генералниот директор на АД ЕСМ, Васко Ковачевски денеска соопшти дека корсиниците на парното од ЕЛЕМ Енергетика во наредниот период ќе ги добијат сметките за плаќање. Како што информира Ковачевски, ЕСМ очекува да биде прифатено субвенционирањето на тие сметки, а постапката е во тек. -Корсиниците на парното од ЕЛЕМ Енергетика, во делот на Гази Баба, ќе ги добијат сметките. Се уште немаше одлука од Влада за субвенционирање. Ние имаме испратено информација до Владата, таа веќе е во процедура и очекуваме да се прифати субвенционирањето на тие сметки, односно на тие граѓани. Во наредниот период граѓаните ќе ги добијат сметките за плаќање на парното. Ако ги испорачавме вака, сега, сметките ќе беа повеќекратно повисоки и ќе се создадеше непријатна ситуација. Очекуваме оваа или наредната недела да имаме сметки со цени кои ги признава и прифаќа Регулаторната комисија за енергетика, рече Ковачевски.

Субвенциите, потврди, не се исплатени. -Сега ќе бидат пресметани со новите цени сметките на граѓаните. Во делот на исплатата имаме отворено наменска сметка за топлинска енергија. На таа сметка во јануари или февруари имаме добиено околу 360 милиони денари и со Владаа ќе направиме порамнување. Дополнително сега имаме добиено уште 1,1 милијарда денари за топлинската енергија во Скопје, за проработување на трите нови ДОО-ели на АД ЕСМ за набавка на гасот за октомври и за следните набавки кои следуваат наредната недела, напомена Ковачевски. (МИА)

Димитриеска Кочоска: ЕЛЕМ работи со загуби затоа што имаме рекордно најниско производство на електрична енергија, поради погрешните политики на власта имаме поскапа струја, посиромашни граѓани

Ивана Ефремовски — Sat, 17 Sep 2022 10:57:07 +0000

Имаме рекордно најниско производство на електрична енергија и поради тоа се случуваат загубите во ЕЛЕМ, додека во исто време има огромни фиксни трошоци, изјави потпретседатечката на ВМРО-ДПМНЕ, Гордана Димитриеска Кочоска за „Стадион“ на Канал 77 потенцирајќи дека заради погрешниот пристап на власта во енергетиката денеска имаме повисока цена на електришната енергија и посиромашни граѓани. -Либерализацијата која ја направија доведе до ова денес, повисока цена, посиромашно граѓанство и немаше потреба од либерализација и кога ја направија кажуваа приказни дека напуштаат термоцентрали, и дека ќе се фокусираат на гасни централи и обновливи извори на енергија, а втората фаза на ветерниот парк Богданци 5 години не им е завршена, рече Димитриеска Кочоска. Таа истакна дека додека власта се правда дека има загуби заради тоа што ја продавале струјата на ЕВН под производната цена, реалноста е дека производната цена зависи многу и од тоа колку сте произвеле, а се произведува историски најниско досега. -Затоа што во исто време ако не произведете и продадете повеќе имате огромни фиксни трошоци и загубите се огромни. На ЕЛЕМ загубите што му се случуваат токму од тој проблем се, затоа што производството падна на историски најниско ниво и во исто време има огромни фиксни трошоци. ЕЛЕМ има над 5 милиони евра месечен расход само за плата. Тој приход мора од некаде да се обезбеди. Требаше да се фокусираат да го подигнат производството, но тоа не се случува, потенцираше таа. Димитриеска Кочоска посочи дека колку се заинтересирани за работа покажаа уште во првата година кога дојдоа на власт кога ја намалија откривката на јаглен, го намалија концептот на термоцентрали и сега кога видоа криза се враќаат назад и баш заради тоа имаме проблем, ниеден рудник не може да почне за една година. -Има ли пресметка колкави се трошоците на ископ во однос на произведената електрична енергија во РЕК Битола? Дали тие растат или се намалуваат затоа што и покрај купената механизација, надворешени фирми работат таму. Велат дека прават капителен ремонт, но им се случува куршлус на блок 3 и никој не може да го констатира има има надвор од употреба на блок скоро цела година, нагласи Димитриеска Кочоска. Таа воедно го запраша директорот на ЕСМ, Васко Ковачевски да одговори на што се потрошени парите, односно каде се заминат 18 милиони евра за кои нема отчет. -На официјалната страница на ЕСМ постои податок за 171 милион евра кои ги имаат добиено како се потрошено, но кога ќе се соберат официјалните математики излегува дека отчет даваат за само 152 милиони, Васко Ковачевски треба да каже каде се потрошени уште 18 милиони за кои не даваат отчет, посочи таа.

Комисии на ВМРО-ДПМНЕ: Дали ноќните вишоци на ЕЛЕМ „ги празнат“ и хидроакумулациите?

Дарко Андоновски — Wed, 07 Sep 2022 11:18:32 +0000

ДАЛИ НОЌНИТЕ ВИШОЦИ НА ЕЛЕМ „ГИ ПРАЗНАТ“ И ХИДРОАКУМУЛАЦИИТЕ?, ова денеска преку статус на Фејсбук го прашуваат од Комисиите на ВМРО-ДПМНЕ. „Во изминатиот период информиравме за криминалната продажба на “вишоците” на електрична енергија во ноќните часови од страна на АД ЕЛЕМ/ЕСМ, односно за ниската цена по која тие се продаваат во однос на цената на струјата на HUPX берзата. На сето тоа, Васко Ковачевски се обиде со работничко одело и табла да ни каже како се создавале вишоци и зошто ги продавале. Но, за возврат ние да му објасниме на Васко Ковачевски како се создаваат вишоци на електрична енергија во ноќните часови. Поради нискиот конзум на електрична енергија во ноќните часови, понекогаш понизок и од техничкиот минимум за производство на РЕК Битола, се јавува вишок на произведена електрична енергија. Според сета енергетска логика вакви вишоци не се создаваат од големите хидроцентрали сопственост на АД ЕЛЕМ, туку само од термоцентарлите. Но, дали е тоа навистина така? Од табелата на сликата јасно се гледа дека во периодот на продажба на “вишоците” биле вклучувани и хидроелектраните што е недозволиво во состојба кога целото стопанство се бори со превисоки сметки за електрична енергија. САМО НА 6.8.2022 ОД 3 ДО 7 ЧАСОТ НАУТРО ТИЕ РАБОТЕЛЕ СО 636 MW, А НА 18.8.2022 СО 326 MW. Значи “вишокот” на електрична енергија на Васко Ковачевски не е произведен само од РЕК Битола, туку дел од овие “вишоци” се и од производството на хидроелектраните. Со оваа постапка намерно се празнат хидроакумулациите, со што свесно се влошува и онака лошата енергетската сотојба на македонското електростопанство. Дали Васко Ковачевски и СДСМ се неспособни да го менаџираат АД ЕЛЕМ/ЕСМ или намерно се создаваат “вишоци” на електрична енергија дури и од хидроелектраните само за криминал и лично богатење на сметка на народот?! Комисија за енергетика на ВМРО-ДПМНЕ, стои во нивниот пост на Фејсбук.

Лозановска до СДСМ: Од ЕЛЕМ направивте тежок загубар

Магдалена Андонова — Wed, 01 Jun 2022 12:39:00 +0000

Пратеничката од ВМРО-ДПМНЕ Олга Лозановска на денешната собраниска седница истакна дека за разлика од претходно кога ЕЛЕМ била гигант, сега со владата на СДСМ истата компанија е загубар, укажувајќи дека се бара заем од 25 милиони евра за задолжување за фотоволтаици. Предлог на закон за гаранција на Република Македонија на обврските по договор за заем за финансирање на проектот на ЕСМ за транзиција кон соларни фотоволтации кои ќе се склучи меѓу Европската банка за обнова и развој и Акционерското друштво за производство на електрична енергија „Електрани на Македонија во државна сопственост, значи АД ЕСМ ќе се задолжи со заем во износ до 25 милиони евра за финансирање на проектот на ЕСМ за транзиција кон соларни фотоволтации. Шампионите во енергетиката кои го урнисаа енергетскиот систем и борците за чист воздух се сетија дека ветуваа живот за сите и чист воздух. Она кое што е многу интересно е што износот на вкупната инвестиција за фотонапонските електроцентрали во Осломеј и Битола со инсталиран капацитет од 30 мегавати од 25 милиони евра, изградбата на еден мегават се потребни 833 илјади евра, а во суштина изнесува со се приклучок 600 до 650 илјади евра. Имаме разлика 5 и пол милиони евра, тоа е профит кој што ќе оди во џебовите на некого, меѓутоа и кредитот и овој профит кој што ќе оди во џебовите на некого ќе го плаќаат граѓаните, рече Лозановска. Лозановска во текот на своето обраќање потсети дека пред СДСМ да дојде на власт ветуваше електростатски филтри, ветуваа десулфуризација на РЕК Битола, а во 2018 и 2019 година нивото на загадување на животна средина со сулфур диоксид и прашина било од 3 до 6 пати. -Ветувавте електростатски филтри, ветувавте десулфуризација на РЕК Битола, а кога дојдовте на власт, а во 2018 и 2019 пишува посебно загрижувачки е податокот што го двете години нивото на загадување на животната средина со сулфур диоксид и прашина е 3 до 6 пати над дозволените вредности, додаде таа.

ВМРО-ДПМНЕ: Неспособноста на СДСМ во управувањето со ЕЛЕМ ја чини државата и до 250 милиони евра годишно, a тоа ќе го платат граѓаните со повисоки сметки за струја

Катерина Бојаџиева — Mon, 30 May 2022 06:45:21 +0000

Неспособноста на СДСМ во управувањето со ЕЛЕМ ја чини државата и до 250 милиони евра годишно, a тоа ќе го платат граѓаните со повисоки сметки за струја, велат од ВМРО-ДПМНЕ. -Во 2019 година ЕЛЕМ произведувале 4,25 терават часови, а во 2021 година произвеле само 3,17 терават часови. 1 терават часови се 1 милион мегават часови. Доколку се помножи 1 милион мегават часови по цена од 250 евра, бројка околу која се движи цената на струјата на берза, се доаѓа до сума од 250 милиони евра годишно, пари кои се потрошени за увоз и покривање на струјата која ЕЛЕМ можеле да ја произведат, но заради неспособноста на СДСМ не ја произвеле. Тие 250 милиони евра, кои се за покривање на слабото производство на ЕЛЕМ, можеле да не се одделат од државата, доколку правилни се менаџира РЕК Битола, хидроакумулациите, ТЕЦ Неготино. Но СДСМ наместо да работи, тие РЕК Битола во ек на грејна сезона ја оставија без јаглен, па тргнаа во бркање на скап увоз на јаглен. Долг период РЕК Битола работеше на минимум затоа што воопшто немаа енергенс. А хидроакумулациите ги испразнија во лето. Сите овие пропусти доведоа да се фрлаат тешки милиони за увоз, стои во соопштението од ВМРО-ДПМНЕ и се додава: „Тие 250 милиони евра кои се одлеаја од државата за купување на скапа струја со која се покрива само разликата која ЕЛЕМ ја произведувал, а сега не може да ја произведе, што е исклучува вина на СДСМ сега сакаат да ги фрлат на граѓаните. Наместо да удира по граѓаните, врвот на власта треба да одговори зошто има намалено производство и зошто со наши пари се купува скапа струја во ек на криза, за што се одлеваат девизи. Со СДСМ во енергетиката не очекуваат само поскапи сметки и енергетска неизвесност. Затоа потребни се предвремени парламентарни избори час поскоро“.