Елизабета Дуковска – Kurir.mk

Новоизбраната уставна судијка Елизабета Дуковска денеска почна со работа

Ивона Петрова — Tue, 11 Apr 2023 13:40:24 +0000

Денеска во Уставниот суд со работа почна новоизбраната судијка Елизабета Дуковска. Од Судот информираат дека таа утрово била примена од претседателката Добрила Кацарска, доби работен материјал за седницата која ќе се одржи на 12 април 2023 година. Дуковска се запозна и со вработените во службата на Уставниот суд и во следниот период ќе добие предмети за работа кои ќе ги води како судија-известител. Мандатот на судијката Елизабета Дуковска во Уставниот суд е девет години.

Елизабета Дуковска избрана за нов судија на Уставниот суд

Катерина Бојаџиева — Mon, 10 Apr 2023 12:33:39 +0000

Со 64 гласа „за“ и еден „воздржан“, судијката на Апелациониот суд - Скопје, Елизабета Дуковска во рамки на денешната 106. седница беше избрана за судија на Уставниот суд, предложена од Судскиот совет. Дуковска е родена на 30.07.1961 година. Дипломирала на Правниот факултет во Скопје при Универзитетот „Свети Кирил и Методиј“, а правосуден испит положила на 15.02.1990 година. Во 2004 година е избрана за судија на Основниот суд Скопје 1, а од јули 2007 работела како стечаен судија во Основниот суд Скопје 2. Во 2009 година е избрана за судија на Апелациониот суд во Скопје. Во своето долгогодишно искуство работела во Основен суд на здружен труд Скопје, како стручен соработник, во Окружен стопански суд Скопје, Основен суд Скопје 1 и во Апелационен суд Скопје, како стручен соработник. Во рамки на оваа седница, пратениците го изгласаа и Предлогот на закон за ратификација на измените и дополнувањата на Договорот за слободна трговија меѓу Република Македонија и Украина и го избраа Вукељ Валдета за нов член на Државниот совет за превенција на детско престапништво.

Собранието треба да расправа за избор на Елизабета Дуковска за уставен судија

Ивона Петрова — Mon, 20 Mar 2023 06:17:29 +0000

Во Собранието денеска ќе продолжи 106. седница на која на дневен ред е Предлог за избор на судија на Уставниот суд. За нов уставен судија е предложена Елизабета Дуковска. На дневен ред на седницата се и избор на член на Државниот совет за престапништво, ратификација на измените и дополнувањата на Договорот за слободна трговија со Украина, измени и дополнувања на Законот за Собранието, по скратена постапка, Предлог на закон за амнестија, по скратена постапка, дополнување на Законот за служба во Армијата, по скратена постапка, Предлог на закон за прогласување на Kањон Матка за споменик на природата и измени и дополнување на Законот за игрите на среќа и за забавните игри, двата во прво читање. На дневен ред се и Годишен извештај за работата на Комисијата за надзор над спроведување на мерките за следење на комуникациите во 2022 година; Барање за давање на автентично толкување на член 86 став (1) од Законот за управни спорови, поднесено од пратеникот Јован Митрески, Барање за давање на автентично толкување на член 1, 8 и член 9 од Законот за трансформација во редовен работен однос, поднесено од пратеникот Хусни Исмаили, како и Барање за давање на автентично толкување на член 24 став (2) точка б) од Законот за административни службеници, поднесено од пратеникот Снежана Калеска Ванчева.

Предлог законот за амнестија на осудените од 27 април пред пратениците

Ивона Петрова — Thu, 16 Mar 2023 07:18:31 +0000

Предлогот за избор на судијата Елизабета Дуковска од Апелацискиот суд Скопје за судија на Уставниот суд на Република Северна Македонија е на дневен ред на денешната 106. собраниска седница. Дуковска е предлог на Судскиот совет на Република Северна Македонија за нова уставна судијка. Таа е судијка од 2004 година, работела во двата основни суда во Скопје како стечаен судија, а од 2009 суди во скопска Апелација како граѓански судија во трговски оддел. На дневен ред на денешната седница се и Предлог законот за амнестија на лицата осудени за настаните од 27 април 2017 година, како и Предлог законот за амнестија, двата по скратена постапка. Пред пратениците се и Предлог законот за изменување и дополнување на Законот за здравственото осигурување, како и Предлог законот за дополнување на Законот за лековите и медицинските средства, и двата по скратена постапка. Меѓу другите точки се и Предлог законот за изменување и дополнување на Законот за игрите на среќа и за забавните игри, Предлог законот за ратификација на измените и дополнувањата на Договорот за слободна трговија меѓу Република Македонија и Украина, Предлог-одлуката за испраќање на припадник на Армијата на Република Северна Македонија за учество во меѓународната операција на Европската Унија „АЛТЕА“, во Босна и Херцеговина (јули 2023-јануари 2024), како и Предлог-одлуката за испраќање на припадник на Армијата на Република Северна Македонија за учество во меѓународната операција на Европската Унија „EUTM RCA“ во Централноафриканската Република, како и Предлог на закон за дополнување на Законот за служба во Армијата на Република Северна Македонија, по скратена постапка.

Судскиот совет ја предложи Елизабета Дуковска за член на Уставниот суд

Тале Кристо — Mon, 20 Feb 2023 13:01:28 +0000

Судскиот совет на Република Македонија на денешната 431 седница со 11 гласа „за“ и два „против“ го усвои предлогот до Собранието за судија на Уставниот суд од редот на судиите да биде предложена судијката од Апелационен суд Скопје Елизабета Дуковска. Дуковска се предлага на местото на судијката Вангелина Маркудова, чиј мандат истече. Судијката од Апелационен суд Скопје Елизабета Дуковска беше предложена од членот на Судскиот совет Зоран Герасимоски. Дуковска дипломирала на Правниот факултет во Скопје на 19 октомври 1987 година, правосуден испит положила во Скопје на 15 февруари 1990 година. Првпат била избрана за судија во Основен суд Скопје I - Скопје на 19 март 2004 година, каде постапувала по предмети во стечајното одделение. Од јули 2007 година работела како стечаен судија во Основен суд Скопје II – Скопје, а на 19 ноември 2009 година е избрана за судија во Апелациониот суд Скопје, каде постапува по предмети во трговскиот оддел и е претседател на совет. Освен Дуковска, за членови на Уставниот суд беа предложени и судијката Татјана Сусулеска од Апелационен суд Битола и судијката Антоанета Димовска. Претседателката на Судскиот совет, Весна Дамева, пред гласањето рече дека неспорно сите три предлози се со долгогодишно искуство, но за неа лично поприфатлив е предлогот на Герасимоски. - Судијката Елизабета Дуковска сметам дека е најсоодветниот кандидат, изјави Дамева. Изборот на функцијата судија на Уставен суд е со мандат од девет години.