ЕМА – Kurir.mk

ЕМА: Кампања за вакцинација против Ковид-19 еднаш годишно како против грип

Ивана Ефремовски — Wed, 15 Feb 2023 16:49:22 +0000

Европската агенција за лекови (ЕМА) денеска објави дека очекува кампањите за вакцинација против Ковид-19 да се спроведуваат еднаш годишно, слично како и вакцинацијата против грип. Иако вирусот што предизвикува Ковид-19 сè уште не се однесува како сезонски вирус за време на зимските бранови во умерените климатски подрачја, тоа би можело да биде правецот по кој би одело, изјави директорот за здравствени закани и стратегија за вакцинација на ЕМА, Марко Кавалери. Во Европа има забележливо намалување на бројот на нови случаи на Ковид-19, хоспитализација и смртност. Кавалери, повикувајќи се на податоците од Европскиот центар за превенција и контрола на болести, истакна дека во изминатите 12 месеци забележани се најниски нивоа на инфекцијата во ЕУ. (МИА)

ЕМА: Обилната менструација е можен несакан ефект на вакцината мРНК против Ковид-19

Ивана Ефремовски — Fri, 28 Oct 2022 19:27:56 +0000

Одборот на Европската агенција за лекови (ЕМА) денеска препорача обилно менструално крварење да се додаде на листата несакани ефекти од вакцината мРНК против Ковид-19 произведена од Модерна, како и од партнерите Фајзер и БиоНТек. Извештаи за обилни менструации – крварење кое се карактеризира со зголемен волумен и/или времетраење што го попречува квалитетот на животот – се забележани во клиничките испитувања, од случаите во реалниот свет и во медицинската литература, соопшти ЕМА. Случаите – кои беа главно не се сериозни и се привремени по природа – беа пријавени по првата, втората и засилената доза на вакцините, се додава во соопштенито. Регулаторот сега заклучи дека постои барем „разумна можност“ обилно менструално крварење да е причински поврзано со овие вакцини. Менструалните нарушувања може да се појават поради повеќе причини, вклучувајќи хронични болести, стрес и замор. Здравствените власти нагласија дека се евидентирани вакви случаи и по заболување од Ковид-19. (МИА)

ЕМА: Не знаеме какви соеви на Ковид-19 ќе се појават зимава

Дарко Андоновски — Fri, 02 Sep 2022 12:54:01 +0000

Марко Кавалери, задолжен за вакциналната стратегија во ЕМА, денеска порача дека е важно луѓето да продолжат да се вакцинираат против ковид во пресрет на зимата, јави дописничката на МИА од Брисел. Засега ситуацијата со Ковид-19 во Европа е стабилна, а сојот омикрон БА5 сѐ уште е најзастапен кај заразените, информираше Европската агенција за лекови, ЕМА. Иако трендот на инфекции се намалува во сите земји на ЕУ, болеста сѐ уште е присутна. -ЕМА врши мониторинг за подобро да го разбереме бранот, екстремно тешко е да се прават предвидувања, вирусот продолжува да мутира многу брзо, мора да ги следиме новите мутации, рече Марко Кавалери од ЕМА, истакнувајќи дека од многу блиску се следи новиот сој што се појави во Индија, БА75. ЕМА уште еднаш повика да се продолжи со вакцинација и ревакцинација на населението, приоритетно за најранливите категории на граѓани, како постарите луѓе, имунокомпромитираните, лицата со коморбидитети и бремените жени, како и дека сите треба да ги следат препораките на нивните национални власти во однос на вакцинацијата. Во овој контекст, ЕМА ги следи и трендовите на новите апдејтирани вакцини против Ковид-19, неодамна одобрени во ЕУ. Ефикасноста, велат од Агенцијата, е убедлива, но сѐ уште се потребни докази во реалниот свет за да се знае која вакцина е најефикасна за кого. Апдејтираните вакцини кои го инкорпорираат сојот омикрон даваат силен имунолошки одговор, а во некои случаи се поефикасни од првичните вакцини. За лицата кои сѐ уште не се воопшто вакцинирани, најверојатно во ЕУ ќе се добие една од првичните вакцините, а за бустер дозата можно е да се добие апдејтирана, сепак тоа останува одлука на националните здравствени власти, рече Кавалиери. -Не исклучуваме да се појават нови соеви блиски до БА5, или комплетно нов сој, не можеме да предвидиме, важно е да се имаат апдејтираните вакцини, за земјите членки да имаат повеќебројни опции кога ги кројат нивните вакцинални стратегии, рече Марко Кавалиери.

Одобрена вакцина против мајмунски сипаници

Тале Кристо — Fri, 22 Jul 2022 19:00:09 +0000

Европската агенција за лекови (ЕМА) објави дека одобрила вакцина против големи сипаници да се применува во превенција од мајмунски сипаници. ЕМА препорача антивирусната вакцина Имванекс да биде вклучена во заштитата на возрасните лица од мајмунски сипаници, соопшти европскиот регулатор за лекови. Се оценува дека вакцината против големи сипаници обезбедува цврста заштита од мајмунски сипаници, но не е познато колку долго трае заштитата по вакцинацијата. Вакцината Имванекс, произведена од данската компанија „Бавариан Нордик“, во ЕУ е одобрена од 2013 година за превенција од големи сипаници. Вакцината содржи жива модифицирана форма на вирусот наречен Анкара, што е поврзан со вирусот на големи сипаници. Ситуацијата со мајмунски сипаници се влоши во изминатите недели, а сега има повеќе од 15.300 заразени во 71 земја, покажуваат најновите податоци на санитарните власти во САД. Мајмунски сипаници првпат се дијагностицирани кај човек во 1970 година, но болеста е помалку опасна и заразна од големите сипаници кои се искоренети во 1980 година. Мајмунските сипаници се карактеризираат со рани на кожата, што можат да се појават на гениталиите или на устата. Болеста е придружена со треска, болки во грлото и болки во лимфните јазли и осип што наликува на сипаници. Болеста обично поминува сама по себе, но може да биде многу болна. Резервите на вакцината Имванекс во ЕУ во моментов се многу ограничени. Вакцината Имванекс е одобрена на американскиот пазар под името Џенеос, и се аплицира за превенција од мајмунски сипаници и од големи сипаници.

ЕМА разгледува вакцинација на деца под петгодишна возраст

Магдалена Андонова — Thu, 05 May 2022 14:22:13 +0000

Фармацевтската компанија Модерна побарала од Европската агенција за лекови, ЕМА, да ја разгледа можност за употреба на нејзината вакцина кај деца под петгодишна возраст против Ковид-19. Ова денеска го соопшти Марко Кавалери, задолжен за стратешка вакцинација во Агенцијата. -Започнавме со проценката на барањето на Модерна да се прошири употребата на Спајквакс кај деца меѓу шест месеци и пет години и ова е прво барања за оваа возрасна група, изјави тој. ЕМА одобри употреба на вакцините на Модерна кај деца од шест годишна возраст, сега за прв пат ќе се испитува употребата кај бебиња и мали деца. Децата обично го прележуваат вирусот полесно од возрасните, но можат повеќе да го пренесуваат. (МИА)

ЕМА: „Модеренa“ одобрена за деца од 6 до 11 години, бустер дозата на Фајзер за 12 и постари

Магдалена Андонова — Thu, 03 Mar 2022 15:45:15 +0000

Европската агенција за лекови (ЕМА) денеска соопшти дека одобрила примена на вакцината „Модерна“ против коронавирус за деца на возраст од 6 до 11 години и препорачала засилена доза на вакцината „Фајзер“ за деца на возраст од 12 и повеќе години. „Модерна“ е втора вакцина против коронавирусот по „Фајзер“, која е одобрена во ЕУ за деца и под 18 години. ЕМА наведува дека „Модерна“ на деца на возраст од шест до 11 години ќе им се дава половина од дозата во однос на возрасните, со оценка дека е докажано дека децата на таа возраст имаат имунолошки одговор кој може да се спореди со оној кај постарата популација. За време на редовната прес-конференција, ЕМА соопшти дека податоците од повеќе од 400.000 вакцинирани деца, вклучително и Израел и САД, покажале дека третата доза на Фајзер била „ефикасна и безбедна“ кај луѓе на возраст од 12 години и постари. Се нагласува дека случаите на воспаление на срцето и други несакани ефекти од вакцината кај оние меѓу 12 и 18 години биле „многу ретки“ и дека децата обично се изложени на многу помал ризик од тешка болест, но сепак се ранливи на високи нивоа на пренос..

ЕМА: Премногу бустер дози може да го ослабат имунолошкиот систем

Ристе Здравков — Fri, 14 Jan 2022 06:30:05 +0000

Европската агенција за лекови предупреди дека повторувањето на бустер дозите на вакцината против коронавирус може да има негативен ефект врз имунитетот и може да не биде одржливо. Повторувањето на бустер доза на секои четири месеци може да го ослаби имунолошкиот одговор и да ги измори луѓето, соопшти Европската агенција за лекови (ЕМА). Наместо тоа, државите треба да направат подолга пауза помеѓу бустер дозите и да ги врзат за постудената сезона, слично како кога станува збор за вакцинацијата против грип, велат од агенцијата. Неодамна, Израел беше првиот што воведе втора бустер доза за лица над 60 години. Во Обединетото Кралство беше објавено дека бустер дозата обезбедува добро ниво на заштита и дека во моментов нема потреба од нов бустер, но дека ќе ги разгледаат податоците, наведува Блумберг. „Бустер дозите може да се дадат еднаш, можеби двапати, но тие не треба да се повторуваат одново и одново. Треба да размислиме како да преминеме од сегашната пандемија во ендемична состојба“, рече Марко Кавалиери, раководител на одделот на ЕМА за биолошки опасности и вакцинална стратегија. ЕМА додаде дека тие би можеле да одобрат нови вакцини насочени кон специфични варијанти најрано во април, што беше најавено од некои фармацевтски компании, бидејќи тој процес трае три до четири месеци.

ЕМА: Лекот на Фајзер против коронавирусот ќе биде во употреба за неколку недели

Магдалена Андонова — Mon, 10 Jan 2022 15:28:06 +0000

Европската агенција за лекови (ЕМА) ја започна евалуацијата на оралниот антивирусен лек Паксловид од Фајзер Европа, а условното одобрување и ставање во промет на лекот би можело да се забрза за неколку недели, соопштија од централата на ЕМА, пишува Танјуг. Лекот се користи за лекување на благи до умерени симптоми на коронавирусот кај возрасни и адолесценти (на возраст од 12 години и постари со тежина од најмалку 40 кг) кои се изложени на висок ризик од прогресија до тежок ковид-19. Од ЕМА наведуваат дека веќе почнале да ги разгледуваат податоците од лабораториските и клиничките студии, како и резултатите од студијата за употреба на лекот Паксловид кај нехоспитализирани и невакцинирани пациенти со Ковид-19. Во согласност со забрзаните рокови за третмани, ЕМА исто така издаде мислење во кое опишува како лекот треба да се развива и проучува за употреба кај деца. Во декември 2021 година, Управата за храна и лекови на САД издаде одобрение за употреба на Паксловид за третман на високоризични случаи на коронавирусот на возраст од 12 години и постари и оние со тежина од најмалку 40 килограми.

ЕМА: Вакцината на „Џонсон и Џонсон“ може да се прими како засилувачка два месеца по првата

Катерина Бојаџиева — Wed, 15 Dec 2021 11:33:30 +0000

Европската агенција за лекови денеска соопшти дека вакцината против Ковид-19 на „Џонсон и Џонсон“ може да се користи како засилувачка доза два месеца по примената на првата доза. „Комитетот на ЕМА (CHMP) заклучи дека засилената доза на вакцината против Ковид-19 на ‘Џонсон и Џонсон’ може да се земе најмалку два месеца по првата доза кај луѓе на возраст од 18 години и повеќе“, се вели во соопштението. Во соопштението се додава дека вакцината на „Џонсон и Џонсон“ може да се даде и како засилувачка доза по две дози на вакцините „Фајзер“ или на „Модерна“.

ЕМА ја одобри вакцината Фајзер за деца од 5 до 11 години

Тале Кристо — Thu, 25 Nov 2021 14:39:34 +0000

Европската агенција за лекови (ЕМА) препорача да се одобри употребата на вакцината Фајзер и кај децата од 5 до 11 години. Оваа вакцина е веќе одобрена за употреба кај деца кои имаат полни 12 години. Кај децата кои се на возраст од 5 до 11 години, дозата ќе биде помала од онаа која се користи кај деца со полни 12 години,соопштуваат од ЕМА. Според ЕМА ефикасноста на оваа вакцина е 90% во заштита од вирусот. Најчести несакани појави после вакцината се болка на местото на вакцината, замор,главоболка,црвенило и оток. Овие појави се обично благи и умерени и престануваат во рок од неколку дена од вакцинацијата, соопштуваат од ЕМА.