Емерсон Мнангагва – Kurir.mk

Емерсон Мнангагва реизбран за претседател на Зимбабве

Ивона Петрова — Sun, 27 Aug 2023 08:33:47 +0000

Националната изборна комисија на Зимбабве синоќа соопшти дека актуелниот претседател Емерсон Мнангагва победил на претседателските избори оваа недела со приближно 53 отсто од гласовите, но опозицијата и аналитичарите веднаш го доведоа во прашање резултатот. Мнангагва, кој ја презеде функцијата од долгогодишниот претседател Роберт Мугабе по воениот удар во 2017 година, се очекуваше да обезбеди втор мандат, бидејќи аналитичарите велат дека изборите биле наместени во корист на владејачката партија ЗАНУ-ПФ, која е на власт повеќе од четири децении. Изборната комисија соопшти дека главниот противник на Мнангагва, Нелсон Чамиса, кој ја предводи опозициската партија Граѓанска коалиција за промени, освоил 44 отсто од гласовите.

Емерсон Мнангагва и официјално е нов претседател на Зимбабве

Ивона Петрова — Fri, 03 Aug 2018 05:39:46 +0000

Емерсон Мнангагва победи на претседателските избори во Зимбабве, соопшти Изборната комисија на земјата, додека опозицијата ги оспорува резултатите тврдејќи дека изборите се наместени. Мнангагва освои 50,8 отсто од гласовите, додека за опозицискиот кандидат Нелсон Чамиса гласале 44,3 проценти од избирачите. Мнангагва вчера изјави дека разговарал со лидерот на опозицијата Чамиса во обид да се намалат тензиите до кои дојде по претседателските избори и судирот на војската и безбедносните сили со приврзаниците на опозицијата на улиците на Хараре. Тој преку Твитер побара независна истрага за уличните насилства во кои загинаа неколку лица. Претседателските избори се одржаа во неделата, а опозициските партии организираа протести незадоволни од резултатите. Во судирите беа убиени три лица, а полицијата синоќа соопшти дека бројот на загинати се зголемил на шест, повредени се 14 лица, а биле уапсени 16 луѓе. Учесниците на протестот беа растерани од страна на припадници на безбедносните сили со оклопни возила и воени хеликоптери. МИА

Мнангагва се сретна со лидерот на опозицијата на Зимбабве

Ивона Петрова — Thu, 02 Aug 2018 10:17:56 +0000

Претседателот на Зимбабве, Емерсон Мнангагва изјави денеска дека разговарал со лидерот на опозицијата Нелсон Чамиса во обид да се намалат тензиите до кои дојде по претседателските избори и судирот на војската и безбедносните сили со приврзаниците на опозицијата на улиците на Хараре. Тој преку Твитер побара независна истрага за уличните насилства во кои загинаа три лица. Претседателските избори се одржаа во неделата, на кои победи Мнангагва, а опозициските партии организираа протести незадоволни од резултатите. Во судирите се убиени три лица, а учесниците на протестот беа растерани од страна на припадници на безбедносните сили со оклопни возила и воени хеликоптери. МИА