емилија ангелова – Kurir.mk

Ангелова: Град Скопје е во целосна нефункционалност и наместо реализација на проекти секојдневно гледаме скандали

Катерина Бојаџиева — Tue, 11 Jul 2023 11:31:38 +0000

Градот Скопје е во целосна нефункционалност и наместо реализација на оние проекти којшто беа ветено во програмата ние гледаме секојдневно скандали и нови ескалации во Градот и во сите јавни претпријатија, истакна советничката во Град Скопје, Емилија Ангелова на денешната трибина организирана од ВМРО-ДПМНЕ на тема „Предизвиците на главниот град и локалната самоуправа како сервис на граѓаните“. „Имавме многу голем штрајк во ЈСП, граѓаните не можеа да стигнат на своите работни места заради тоа што беше целосно блокиран јавниот превоз и овде освен празни флоскули и обвинувања како што умее да направи градоначалничката не видовме никаква реализација на ветените барања од превозниците. Градот беше целосно блокиран, граѓаните остнаа без јавниот превоз и можеме да кажеме дека навистина се одрази на нивното секојдневно живеење и егзистирање во градот. Имавме протест на спортските клубови во Ѓорче Петров со години користени спортски сали, нешто за кое во програмата рековме дека ќе се обврзе градоначалничката да се развива спортскиот дух на младите и на децата, но во момент беше сето тоа заборавено, стопирано, штрајкуваа спортските клубови затоа што им беа одземени салите за коишто прописно си плаќаа надомест и воопшто немаа никаква вина за одземањето на салите. Веројатно беше тоа само хир и каприц на градоначалничката како и секојдневно што тоа го гледаме“, потенцираше Ангелова. Таа додаде дека ситуацијата кулминираше и во Комунална хигиена каде доколку не беа градоначалниците на ВМРО-ДПМНЕ кои веднаш се организираа за собирање на сметот последиците можеа да бидат многу поголеми. „Кулминира протестот со „Комунална хигиена“ и да не беа градоначалниците на ВМРО-ДПМНЕ сметам дека навистина ќе се предизвикаше голем здравствен проблем. Веднаш се одзваа и во интерес на граѓаните и впрочем во интерес на оние коишто ги изгласаа, заради кои што постојат градоначалниците, излегоа на терен, го собраа сметот со помош на механизација и човечки ресурси од други општини. Се до оној момент додека градоначалниците на ВМРО-ДПМНЕ не излегоа со конкретни решенија за решавање на проблемот со сметот не беше повикан кризниот штаб и мислам дека ќе се продлабочуваше уште повеќе проблемот, меѓутоа откако сето тоа се случи благодарение на нашите градоначалници почна да се движи 1%, не повеќе од тоа. Иако гледаме по медиуми објавува некоја победа, не знаеме врз што е победата, заради тоа што граѓаните ја избраа нејзе и нас како легитимни советници за да работиме во нивен интерес и тука нема остварување на победи, туку има реализација на проекти во интерес на граѓаните“, рече Ангелова и додаде: „Сметам дека голема нефункционалност постои во однос и на оној момент што во една ипол година 32 директори да бидат променети тоа значи дека или недоволна изменаџираност со човечки ресурски, недоволно добро избирање на директори коишто не знаат да си ги извршат своите работни задачи“.

Ангелова: Бараме Арсовска да го разреши Глигоров, постои опасност тој да го повтори насилството

Ристе Здравков — Sun, 15 Jan 2023 11:11:08 +0000

Трет ден молк од Зоран Глигоров за фрапирачките сознанија за вршење на семејно насилство. Дополнително, бараме од институциите конечно да покажат дека може да се обезбеди функционирање на секој сегмент на правната држава, особено кога се во прашање наводите за сторени насилни дејанија од страна на именувани функционери, рече на денешната прес-конференција советникот во Советот на Град Скопје, Емилија Ангелова. Институциите се одговорни постојано да се борат против и да се обидуваат трајно да ги искоренат овие појави од општеството. Наместо тоа, Зоран Глигоров се уште е на позиција секретар на Град Скопје. Имено, насилство врз жените се разбира како кршење на човековите права и форма на дискриминација врз жените и ги означува сите акти на родово засновано насилство коишто доведуваат или веројатно ќе доведат до физичка, психичка или економска повреда. Зоран Глигоров е должен да одговори дали се вистинити наводите дека во два наврати, еднаш во 2007-мата и еднаш во 2017-та година бил пријавен за нанесување на телесни повреди при вршење на семејно насилство преку повеќе удари и изненаден напад? Исто така, Глигоров е должен да одговори дали се вистинити наводите дека како секретар на Град Скопје физички и вербално се пресметувал со лице вработено во Градот Скопје? Праша Ангелова. Поради стравување од можно повторување на ваквите насилни дејствија бараме Зоран Глигоров веднаш да поднесе оставка од позицијата секретар на Град Скопје. Во непресметливи состојби и карактерни особини кај лица кои се поврзани со секаков вид на насилство постои голема веројатност насилството дополнително да ескалира. Бараме институциите да даваат највисок приоритет на пријавите на семејно насилство и да ги преземаат сите мерки за заштита на жртвите. Очекуваме и од градоначалничката на Град Скопје да реагира, да ги провери состојбите кои се пласирани во јавноста и за истото да информира дали и како ќе постапи односно дали ќе го разреши или не Глигоров од именуваната позиција, додаде таа.

Ангелова: Дали Глигоров е рецидивист во насилство, претходно семејно, а сега на работно место? Институциите да утврдат, а Арсовска да го разреши

Ристе Здравков — Sat, 14 Jan 2023 11:00:39 +0000

Целосниот молк од страна на секретарот на Градот за скандалозните информации за вршење на семејно насилство предизвикува уште поголеми сомнежи дека она што го говориме е вистина, рече на денешната прес-конференција Емилија Ангелова, советник во Советот на Град Скопје. -Во политиката во XXI век нема место за лица кои учествуваат во или се дел од насилни дејствија. Очекуваме Глигоров да одговори дали како генерален секретар на Град Скопје, физички и вербално се пресметувал со лице вработено во институцијата. Дали и кои биле причините да се случи ваков инцидент? Воедно, доколку се случило вакво насилно однесување и конфликт со лице вработено во Градот Скопје, дали службите и надлежните институции се информирани за истото? Ги повикуваме и надлежните органи да се изјаснат дали во нивната евиденција има нотирано ваков случај. Зоран Глигоров е човек за кој се врзуваат насилни дејствија. Тој треба да и одговори на јавноста дали бил пријавуван за семејно насилство и тоа неколкукратно? Глигоров да одговори дали на 25.06.2007 година е пријавен за тешка телесна повреда врз женско лице со иницијали Л.Г нанесени преку повеќе удари и изненаден напад, и дали на 12.03.2017 година е пријавен за нанесување на телесна повреда при вршење на семејно насилство врз Љ.Г. преку повеќе удари и изенаден напад? Дали Глигоров е рецидивист во насилство и насилно однесување без разлика дали се работи за членови на семејството или за вработени на кои им е претпоставен. Доколку станува збор за карактерна особина на Глигоров, ги повикуваме институциите да поведат постапка за проверки. Дали генералниот секретар на Град Скопје има состојби кои не може да ги отклони, па тие резултираат со вакви постапки или се работи за нешто друго, треба да утврдат стручни институции. Во Град Скопје не се зборува за проекти кои ќе го подобрат животот на граѓаните, не се зборува за развој на инфраструктурата, не се зборува за справување со серозагадувањето, напротив секојдневно слушаме срамни, скандалозни и недолични постапки од функционери на високи позиции. Граѓаните сакаат да видат именувани лица кои се стремат да креираат програми за социјална заштита, програми за превенција од конфликт, центри за поддршка на лицата жртви од семејно насилство, истакна Ангелова. Очекуваме во најбрз можен рок Глигоров да одговори на вакви изнесените сомнежи, но доколку се утврди било каква негова поврзаност со вакви дејанија очекуваме да поднесе оставка, а доколку не го стори тоа веднаш да биден разрешен од функцијата секретар на Град Скопје, додаде таа.

Ангелова: Ако се покажат за вистина сознанијата дека Глигоров имал дејствија на семејно насилство бараме негово разрешување

Дарко Андоновски — Fri, 13 Jan 2023 12:03:19 +0000

Наместо да зборуваме за проекти и промени, за жал денес пред јавноста треба да презентираме скандалозни сознанија на кои Зоран Глигоров, Секретарот на Град Скопје треба да даде одговори. Пред само два дена од медиумите бевме запознаени дека Генералниот секретар на Град Скопје, Зоран Глигоров, претходно шеф на кабинетот на градоначалничката Данела Арсовска, се пресметувал со обезбедувањето во институцијата, а засега не се познати причините за инцидентот. Воедно, согласно нашите информации станувало збор за насилно однесување и конфликт со лице вработено во Градот Скопје. До денес, од страна на Глигоров нема ниту демант, ниту потврда на ваквите информации, ова денеска преку изјава за медиумите го истакна Емилија Ангелова од ВМРО-ДПМНЕ. -Но, она што е навистина вознемирувачки е што нашите информации говорат дека ова не е прво и единствено насилно однесување на секретарот на Градот Зоран Глигоров. Имено, очекуваме јавноста да добие одговор дали е точно дека според евиденцијата на МВР дека Зоран Глигоров бил пријавуван за семејно насилство? Воедно, дали на 25.06.2007 година е пријавен Глигоров за тешка телесна повреда врз женско лице со иницијали Л.Г нанесени преку повеќе удари и изненаден напад, Второ, дали на 12.03.2017 година е пријавен Глигоров за нанесување на телесна повреда при вршење на семејно насилство врз Љ.Г. преку повеќе удари и изненаден напад? Ова се навистина сериозни информации кои треба да бидат одговорени пред јавноста затоа што доколку ова е точно тогаш претставува сериозен проблем. Како современи политичари секојдневно сме исправени пред голем број на предизвици каде се бара јасно и разбирливо презентирање на своите политички убедувања и цели, но наша, примарна цел за спречување и борба против насилството во секоја форма и врз секого е да предизвикаме промени на индивидуално, институционално и структурно ниво, вели Ангелова. Таа додава дека очекуваме Глигоров да одговори на овие сознанија и институциите да постапат согласно информациите кои ги поседуваат. Воедно ако се покаже ова за вистина бараме негово разрешување. Ниту еден човек кој бил пријавуван за семејно насилство не смее да биде лицето на институција.

Ангелова до Арсовска: Според Вашата логика треба да се плаќа ПР од надвор, само не од Вашата институција

Тале Кристо — Tue, 27 Dec 2022 15:43:36 +0000

„Програмата „За Модерно Скопје“ повторно не се реализира. Односно повторно ние нешто бараме дополнително од она кое што го немало во програмата, а го има во програмата. Точно кажа градоначалникот на пет локации кои веќе се определени во Гази Баба, Чаир, Аеродром, Кисела Вода и Ѓорче Петров предвидуваме создавање паркови по примерот на Градски парк. Колку паркови минатата година се подигнати? Дали секоја година по еден парк ќе подигнуваме? И дали ќе стасаме во овие четири години да ги подигнеме сите овие паркови кои што се во програмата „За Модерно Скопје“. И повторно одиме на моментот дека се ќе се работи ин хаус освен ПР-от на градоначалник и консултанските услуги“, нагласи Емилија Ангелова, советничката во Советот на Град Скопје од ВМРО-ДПМНЕ на денешната седница по однос на амандманот со архивски број 27 – 14410/5 поднесен од група на советници на ВМРО-ДПМНЕ и Коалицијата „За обнова на Македонија“. Таа посочи според градоначалникот само консултантските услуги и ПР-от не можат да одат ин хаус, туку треба да се плаќаат консултанти надвор од институцијата. „Бидејќи ова беше дел од програмата како еден од клучните приоритети сметаме дека овие предвидени средства од 7 милиони кои што се одземаат од сметката, односно од програмата Г1 поддршка на локалниот економски развој ставка 426 и се предвидува проектирање на нови мега паркови во општина Аеродром, Кисела Вода и нов мега парк помеѓу „Христијан Тодоровски Карпош“ и улица „Хошимин“ во општина Бутел се оправдани и заслужуваат граѓаните да ги добијат овие мега паркови. Повторно нема да се направи никаков дисбаланс на планираните приходи и расходи, така да сметам дека овој амандман треба да биде усвоен практично да биде изгласан од сите советници“, рече Ангелова.

Ангелова: Предлагаме зголемување на средствата за изградба и реконструкција на улици во Град Скопје во вредност од 35 милиони денари, ова е во интерес на граѓаните

Катерина Бојаџиева — Tue, 27 Dec 2022 12:23:56 +0000

Во програмата за сообраќај нема ниту една од овие проекти, заради и тоа се предлага овој амандман. Практично со овој амандман се врши прераспределба на средствата заради нивна наменска алокација за квалитетно, навремено и успешно одвивање на проектите, а намалување на непродуктивните трошоци на Град Скопје. Имено предвидените 35 милиони денари се за зголемување на средства во изградба и реконструкција на локални патишта заради проектирање или успешна имплементација, вели Емилија Ангелова, советничката во Советот на Град Скопје од ВМРО-ДПМНЕ, образложувајќи го амандманот поднесен од советничката група на ВМРО-ДПМНЕ и коалицијата. Ангелова рече дека со амандманот се предвидува кратење од непродуктивните трошења на градот, укажувајќи дека во програмата за сообраќај нема предвидено реконструкција на улиците, порачувајќи дека Град Скопје мора да започне со реализација на проектите. Со овој амандман се предвидува да се скратат од програмата Е0- општинска администрација, ставка 425 договорни услуги и тоа 35 милиони денари. Како приоритети во оваа програма ќе ги набројам сите наведени улици, се работи за проекти за нови кружни текови и реконструкција на улици, на булевар Србија, 12 Македонска бригада, како и Фрањо Клуз, со реконструкција на Фрањо Клуз кон булевар со надвозник за поврзување на Аеродром и Кисела Вода, од булевар Трета Македонска бригада до улица Народни херои, нова улица Борис Кидрич од Трета Македонска бригада до улица Симеон Кавракиров, реконструкција на улица Вера Јоциќ, нереализиран општинска соработка со општина Кисела Вода, во изградба на канализациона мрежа во населба Градинар и реконструкција на улица во населба Усје. Реконструкција и санација на фекална канализација на улица Христо Татарчев, реконструкција на улица 30 Љуботенски пат, од скопска обиколница до пат на село Љуботен и многу други улици, нагласи Ангелова. Ангелова побара поддршка од сите советници во советот на Град Скопје додавајќи дека со ова не се прави дис баланс на буџетот на Град Скопје. Имено, повторувам уште еднаш, во програмата за сообраќај нема ниту една од овие улици, нема ниту еден проект. Оние проекти кои што не се започнати предлагаме да бидат започнати ако се прифати овој амандман, и оние проекти кои се веќе завршени да се отпочне со нивна реализација конечно. Со овој амандман воопшто не се прави дис баланс на вкупниот буџетот и затоа е поднесен и нашата советничка група смета дека е издржан амандманот и треба да добие поддршка од сите советници, вели Ангелова.

Ангелова: Со поддршка на советничката група на ВМРО-ДПМНЕ и коалицијата Градот ќе реконструира улици во Ченто и Гази Баба

Ристе Здравков — Wed, 31 Aug 2022 12:22:55 +0000

„Врз основа на надлежностите на Советот на Град Скопје, донесувањето на оваа одлука за воспоставување на меѓуопштинска соработка за остварување на заеднички интереси и заеднички работи од надлежност на општините е од многу големо значење. Имено, улицата „Кристофер Жефаровиќ“ се наоѓа во населба Ченто, општина Гази Баба, повеќе од три години истата оваа улица е целосно раскопана и граѓаните се дават во кал и прашина. И за реализација на овој проект, реконструкција на улицата „Кристофер Жефаровиќ“ во општина Гази Баба потребни се 7 милиони 800 илјади денари со вклучен ДДВ и се обезбедени од Буџетот на Град Скопје за 2022 година“, истакна советничката од редовите на ВМРО-ДПМНЕ, Емилија Ангелова по предлог одлука за воспоставување меѓуопштинска соработка помеѓу Град Скопје и Општина Гази Баба за реконструкција на „Кристофер Жефаровиќ“. Ангелова додаде дека Општината Гази Баба во остварување на соработката со Град Скопје ќе учествува со средства во висина 500.000 денари со вклучен ДДВ и се обезбедени со Буџетот на Општина Гази Баба за 2022 година, како и со изработка на техничка документација и решавање на можните имотно правни односи. „Работите, имено ќе ги изведува јавно претпријатие „Улици и патишта“ за што Градот Скопје ќе склучи договор за реализација на работите“, појасни советничката. „Сметам дека месното население во Гази Баба односно населба Ченто има право на основни услови за живеење во 21 век. И затоа ќе продолжиме посветено да работиме за изградба на соодветна инфраструктура за потребите на граѓаните“, нагласи Ангелова.

Ангелова: За што се потрошени парите за репрезентација за календарската 2021 година од страна на директорката на „Здравко Цветковски“ кога во 2021 година наставата се одвиваше онлајн?

Магдалена Андонова — Thu, 10 Mar 2022 20:08:33 +0000

На денешната седница на Советот на Град Скопје, советничката од ВМРО-ДПМНЕ, Емилија Ангелова упати три прашања до директорите на средните училишта на Град Скопје и тоа до „Здравко Цветковски“, АСУЦ „Боро Петрушевски“ и „Васил Антевски Дрен“ Во однос на првото прашање упатено до директорката на „Здравко Цветковски“ Ангелова посочи дека во финансискиот извештај има прикажано дека во календарската 2021 година сте потрошиле 250 илјади денари за репрезентација. Ангелова упати прашање до директорката на „Здравко Цветковски“ за што ги потрошила тие пари кога во цела 2021 година не се изведуваше настава во вашето училиште односно наставата се одвиваше онлајн? Таа посочи дека немате добиено и писмена согласност за изведување на наставата онлајн со што сте постапиле и спротивно на протоколот и планот за изведување на настава во учебната 2021/2022 година и сте реализирале онлајн настава без добиена согласност од министерството и Владата. Ангелова ја запраша директорката дали со ова е свесна дека го исполнува и условот за нејзино разрешување согласно член 93 од законот за средно образование? Во однос на второто прашање упатено до директорот на АСУЦ „Боро Петрушевски“ Ангелова истакна дека во 2021 година предметот за набавка реконструкција на кровна конструкција е спротивно на законот за јавни набавки, бидејќи го делите на две постапки. Реконструкција на кров на фискултурна сала со вредност од околу 29 илјади евра и реконструкција на кров на дел од училишна зграда со вредност од околу 30 илјади евра и по некоја случајност тоа го добива една иста фирма од Тетово. Истата фирма од Тетово има добиено и јавна набавка за молерисување. Ангелова го запраша директорот на АСУЦ „Боро Петрушевски“ за тоа како е правено реконструкција на кровот на фискултурната сала кога фискултурната сала ја отворивте вие како директор во 2020 година и дали за една година успеа да се уништи кровот, а со тоа да биде потребна реконструкција? Таа додаде и за колку м2 е направена реконструкција бидејќи од склучениот договор не може да се утврди точната количина бидејќи секаде имате ставено количина еден. Во однос на третото прашање упатено до директорката на „Васил Антевски Дрен“ Ангелова побара доставување на извештајот од финансиската инспекција од националната агенција за европски образовни програми и мобилност која ви била извршена во вашето училиште за сите проекти.

Ангелова: Државата треба да ги зголеми и заштити правата на лицата со аутизам, Унијата на жени се залага за нивна целосна инклузивност

Тале Кристо — Fri, 02 Apr 2021 09:52:48 +0000

Лицата со аутизам треба да ги делат истите права и привилегии кои ги уживаат сите луѓе онаму каде се определени за доброто на овие лица. Овие права треба да бидат зголемени, заштитени и определено законодавство треба да обезбедува правила за нивно остварување во секоја држава, истакна на денешната прес-конференција Емилија Ангелова, генерален секретар на Унијата на жени на ВМРО-ДПМНЕ. Во продолжение интегрален текст и видео од обраќањето на Ангелова: „Бог не може да биде насекаде, па затоа ги создал мајките.“ Мајка која расте, воспитува и се грижи за дете со посебни потреби е херој на модерното општество. Соочувајќи се со цивилизациските норми, критериуми, предрасуди, тие се најсилните, најистрајните, најсмелите меѓу нас. Мајки на деца со аутизам! Вие честопати се прашувате дали правите се што е потребно за доброто на своето дете? „Растењето не значи ништо за една мајка. Детето си е дете. Тоа станува поголемо, постаро, но да порасне? Што треба тоа да значи? Во моето срце тоа не значи ништо.“ Со цел пошироката јавност подобро да ги разбере тешкотиите на детето со аутизам, грижата за неговите потреби и одредени однесувања, важно е да знаеме дека ова не е само развојна фаза што ќе се надмине. Детето се однесува на овој начин бидејќи моторниот немир, импулсивноста и тешкотијата во одржувањето внимание се биолошки условени, не може да ги контролира ниту пак да ги надмине. Мајките на овие деца се непресушен извор на трпение, разбирање, поддршка и неограничена, безусловна и безрезервна љубов. Таквата љубов е нишката меѓу нив и нивното дете и меѓу нив и секојдневните должности на несекојдневна мајка. Нивната претпазливост, секој нивен страв, болка, несреќа и тага е исто толку голема колку и нивната љубов. Навикнати се да ги премолчувате тие нешта, оти нашето општество не е вистински подготвено да го слушне нивниот глас. Лицата со аутизам треба да ги делат истите права и привилегии кои ги уживаат сите луѓе онаму каде се определени за доброто на овие лица. Овие права треба да бидат зголемени, заштитени и определено законодавство треба да обезбедува правила за нивно остварување во секоја држава. ДЕКЛАРАЦИЈАТА ЗА ПРАВАТА НА ЛИЦАТА СО АУТИЗАМ - Повикува институциите да ги признаат и имплементираат правата на овие лица кои подразбираат: а.) право да живеат независно – тоа е базично право на сите луѓе во цивилизирано општество. б.) право да се застапувани и да се вклучуваат колку е тоа можно во одлуките кои влијаат на нивната иднина; в.) право на достапно и соодветно образование, сместување, помош и служби за поддршка; г.) право на ослободеност од страв, закани од погрешен третман, д) Право да учествуваат и да имаат корист од културата, забавата, рекреацијата и спортот. ѓ) Право на вработување и вработувањето да ги има во предвид можностите и изборот на поединецот. Последиците да се биде роден со аутизам не треба да вклучуваат отстранување, ослабување или понижување на правата кои ги уживаат сите членови на општеството. Овие права и привилегии треба да се прошират и зголемат за да се осигура дека лицето со аутистичен потенцијал не е задушено од незнаење, страв, бездушност или предрасуди. Унијата на Жени на ВМРО-ДПМНЕ ќе се заложува на интензивна соработка и помош во сите сфери со цел што побрза и ефективна инклузивност на лицата со аутизам во општеството.

Ангелова: Жените протестираат против сите касапења и импровизации, неказнивоста значи одобрување

Ивана Ефремовски — Thu, 18 Mar 2021 18:46:35 +0000

Кога неказнивоста станува пракса, скандалите стануваат секојдневие. Последните неколку скандалозни случаи во кои пациенти си одат дома без органи, ја прелеаја чашата. Нашите тела не се „кукли фантоми“ за вежбање, вели Емилија Ангелова, генерален секретар на УЖ на ВМРО-ДПМНЕ. „ Народот не се чувствува безбедно, се плаши да отиде во болница, дури и кога за тоа има итна и неодложна потреба. Односот на властите во болниците кон пациентите е застрашувачки и ги поминува сите етички стандарди. Видовме како пациенти лежат до мртви лица, како други примаат инфузија во двор на болница, како жена умира затоа што нема кој во болница да и даде кислород, како се вадат органи без потреба. Системот на Венко Филипче ги осакатува луѓето. Венко Филипче создаде атмосфера на недоверба во здравствениот систем и за тоа виновен е само тој. Против сите неправди и импровизации, се спротивставуваме на неправдите, затоа повикуваме на протест во сабота 20-ти март, во 11 часот, пред министерството за здравство, затоа што неказнивоста значи одобрување. Здравјето не е статистика, ова е протест за жените и женските права, да го кренеме гласот, доста беше“!