еп 2024 – Kurir.mk

Тонали суспендиран на 10 месеци, ќе го пропушти ЕП 2024

Ивона Петрова — Thu, 26 Oct 2023 13:44:49 +0000

Фудбалерот од средниот ред на Њукасл и Италија, Сандро Тонали е суспендиран на 10 месеци поради обложување во фудбал, пренесува агенцијата „Франс прес“. Претходно беше објавено дека фудбалерот признал дека се обложувал на натпреварите на Милан кога настапувал за италијанскиот клуб. Поради суспензијата, 23-годишниот играч за врска ќе го пропушти Европското фудбалско првенство кое следното лето ќе се одржи во Германија. На 12 октомври се дозна дека Тонали и неговиот италијански репрезентативен партнер Николо Заниоло може да бидат обвинети за нелегално обложување на фудбал. Тонали во летниот преоден рок дојде во Њукасл од Милан. Вчера се појави информација дека англискиот клуб му се заканува на поранешниот клуб на Тонали со правна постапка.

Удар и за Данска пред ЕП, тешка повреда на Питлик

Бошко Тасиќ — Thu, 26 Oct 2023 03:58:53 +0000

Симон Питлик беше прва ѕвезда на данската репрезентација на Светското првенство кое се одигра во Полска и Шведска, по што си обезбеди учество во Бундеслигата и трансфер во Флензбург, но очигледно ќе му треба повеќе време за адаптација на физички снажниот ракомет што се игра во Германија. Младиот ракометар пристигна во Фленсбург од ГОГ Гудме, со кој освојуваше неколку трофеи и се очекуваше да биде меѓу носителите на тимот, но ги повреди лигаментите на скочниот зглоб и не се знае колку долго ќе отсуствува од терените. „Исклучена е можноста за операција, повредата не е премногу сериозна, но не можеме уште да кажеме колкава пауза го очекува Питлик. Претпоставуваме дека првиот дел од сезоната за него е завршен, но нема да шпекулираме додека не знаеме повеќе информации. Повредата сигурно ќе бара неколкунеделно лечење, а кои чекори ќе ги преземеме потоа, останува да видиме. Жалиме за оваа ситуаација, но мора да ја прифатиме и да одиме напред“, изјави генералниот директор на тимот, Холгер Гландорф.

Германија без Пекелер ќе биде на ЕП 2024

Бошко Тасиќ — Wed, 25 Oct 2023 04:30:41 +0000

Еден од најискусните ракометари во дресот на Кил, кружниот напаѓач Хендрик Пекелер нема да настапи на Европското првенство 2024. Искусниот ракометар, кој има 32 години и кој важи за еден од најдобрите играчи во одбрана, изјави дека со тешко срце го одбива настапот на континенталниот собир. Германија на Европското првенство 2024, на кое е и организатор, се наоѓа во група со Македонија, Франција и Швајцарија, а најдобрите две репрезентации ќе обезбедат пласман во следната фаза. Пекелер најголемиот успех со Германија го имаше на Европското првенство во Полска (2016) кога со своите репрезентативни колеги се радуваше на освоеното злато.

Англија обезбеди место на ЕП, Србија на бод пред пласман на шампионатот

Бошко Тасиќ — Wed, 18 Oct 2023 04:02:33 +0000

Фудбалската репрезентација на Србија веќе 23 години чека да се израдува на пласман на Европско првенство, а сега е на чекор од реализација на оваа желба. Во дербито против соседот Црна Гора, фдубалерите на Србија во Белград победија со 3:1. Александар Митровиќ даде два гола, а еднаш погоди Душан Тадиќ за голема радост на домаќините. Единствениот гол за Црна Гора го даде Стеван Јоветиќ. Србија сега има 13 бодови од седум меча и е на посакуваното второ место, додека Црна Гора останува трета, но сега со само осум бода од шест средби. Во последното коло Србија дома игра против Бугарија и доволно е да не загуби за да биде дел од Европското првенство во Германија. Место на континенталниот собир обезбеди Англија, откако со 3:1 славеше над Италија. Аѕурите први дадоа гол на „Вембли“ и тоа преку Скамака во 15 минута, за да 32 минута Хари Кејн од пенал израмни на 1:1. Во вториот следуваа голови на Маркус Рашфорд и Кејн за три бода на Гордиот Албион кој е сигурен лидер со 16 бодови, пред Украина со 13 и Италија со 10 бодови. Украина вечерва со 3:1 победи на гости кај Малта, па во последното коло Украина и Италија во меѓусебен дуел ќе решаваат за вториот патник на ЕП од оваа група. Во останатите денешни меча: Финска – Казахстан 1:2, Литванија – Унгарија 2:2, Сан Марино – Данска 1:2, Северна Ирска – Словенија.

Шпанија ја победи Норвешка и заедно со Шкотска се пласираа на ЕП 2024

Ивона Петрова — Mon, 16 Oct 2023 06:08:18 +0000

Шпанија синоќа ја победи Норвешка со 1:0 на гостински терен во квалификацискиот натпревар за Европското фудбалско првенство 2024. Стрелец на единствениот гол на натпреварот одигран во Осло беше Гави во 49. минута. Претходно, во 20. минута главниот судија на натпреварот Тобијас Штилер со помош на ВАР го поништи голот на гостинскиот фудбалер Алваро Мората поради офсајд. Норвешка поради поразот од Шпанија ги загуби шансите за пласман во финалната фаза на ЕП 2024. На Норвежаните, кои имаат 10 бода во групата А, им останува само уште еден натпревар во квалификациите - против Шкотска (19 ноември). Норвешка нема да може да се искачи над третото место - водечката Шпанија има 15 бодови, а Шкотска на второто место исто така има 15 бодови. Шпанија заедно со Шкотска веќе обезбедија пласман на ЕП 2024.

Шпанија, Шкотска и Турција се пласираа на Европското првенство наредната година

Бошко Тасиќ — Mon, 16 Oct 2023 04:23:45 +0000

Шпанија со 1-0 славеше на гостувањето кај Норвешка, а тоа значи дека тие и Шкотска се пласираат од оваа група, на Европско првенство оди и Турција, најголеми губитници се Хрватите кои веќе не одлучуваат сами. Со гол на Гави во 49. минута, Шпанија со 1-0 славеше на гостувањето кај Норвешка.Норвежаните со овој пораз ги загубија сите шанси за едно од првите две места, тие имаат уште еден меч до крајот, а пет бода помалку од Шпанија и Шкотска. Хрватска со 2-1 загуби на гостувањето кај Велс, два порази по ред за коцкастите во овие квалификации и сега ќе бараат помош од Турција која со денешната победа над Летонија од 4-0 избори пласман на Европското првенство. Ако не успее Хрватска да се пласира преку квалификациите, ќе може тоа да го направи преку Лигата на нации. Во останатите денешни натпревари Полска киксна против Молдавија, одигра само 1-1, Романија со 4-0 ја совлада Андора, Швајцарија и Белорусија одиграа 3-3, Чешка со 1-0 ги совлада Фарските острови, а Грузија со 4-0 беше подобра од Кипар.

Начевски и Николов ќе ја делат правдата на ЕП во Германија

Бошко Тасиќ — Tue, 26 Sep 2023 04:22:38 +0000

Европската куќа на ракометот ги објави судиите кои што ќе бидат дел од претстојниот шампионат во јануари следната година. Очекувано, на списокот на арбитри се најдоа и нашите најдобри судии Славе Николов и Ѓорѓи Начевски кои подолго време се при самиот врв кога во прашање е квалитетното судење. Европскиот шампионат ќе се одржи од 10 до 28 јануари во Германија, а Македонија ќе биде во групата А заедно со домаќинот, Франција и Швајцарија.

Македонија и Франција пред 50.000 гледачи на ЕП во ракомет

Бошко Тасиќ — Sat, 16 Sep 2023 05:04:45 +0000

На нешто помалку од четири месеци до почетокот на Европското ракометно првенство, организаторите објавија дека овој турнир ќе биде убедливо најпосетениот во историјата. Германија можеби најдобрата земја за домаќинство на еден континентален собир, најмногу поради одличната инфраструктура, големите сали и стадиони, а од организацијата најавија дека веќе е срушен првиот рекорд, иако првенството не ни започнало. Токму македонската репрезентација ќе ја има честа да настапи на премиерниот натпревар, кога на „Меркур-Шпил Арена“ во Дизелдорф, ќе се соочиме со силната Франција. Генералниот секретар на ЕХФ, Мартин Хауслајнтер, изрази големо задоволство од интересот и официјално соопшти дека повеќе нема билети за првиот натпреварувачки ден од првенството. Франција ќе биде голем фаворит против Македонија, но нашата репрезентација ќе има историска можност да заигра на отворен стадион, пред 50.000 ракометни фанови. Организаторите велат дека сѐ уште има многу билети за останатите мечеви, но првиот ден е комплетно распродаден и се најавува спектакл на отворањето на туринирот. Македонија и Франција ќе се сретнат на 10 јануари во 18:00 часот, а домашната Германија ќе игра против Швајцарија, со почеток во 20:45 часот. Нашите ракометари се во тешка група со Германија, Франција и Швајцарија, но надежите за позитивни резултати секогаш постојат. Се очекува и големо присуство на „фалангата“, која сигурно ќе им даде огромна поддршка на нашите репрезентативци. Европското првенство во ракомет започнува на 10 јануари, а натпреварот за златниот медал е закажан за осумнаесет дена подоцна.

ТЕШКА ЖДРЕБКА за ракометарите – Франција и Германија во иста група со Македонија (ФОТО)

Бошко Тасиќ — Wed, 10 May 2023 16:40:36 +0000

Македонската машка ракометна репрезентација откако неодамна успешно ги заврши квалификациите во група со Португалија, Турција и Луксембург, денес ги доби и противниците на Европското првенство во 2024 година. На денешната ждрепка на која бевме сместени во третиот шешир немавме многу среќа и ја добивме групата „А“ во која од првиот шешир со нас ќе биде Франција, од вториот домаќинот Германија, а од четвртиот Швајцарија. Натпреварите македонската репрезентација ќе ги игра во Берлин. Eвропското првенство во Германија се игра од 10-ти јануари до 28-ми јануари.

Македонската машка ракометна репрезентација пред ЕП ја чека ждрепката од третиот шешир

Бошко Тасиќ — Mon, 01 May 2023 04:42:19 +0000

На десетти мај македонската машка ракометна репрезентација ќе ги дознае противниците во групнaта фаза на Европското првенство, кое следната година ќе се одржи во Германија. Во очекување на верификација од страна на Европската ракометна федерација (ЕХФ), извесно е како ќе изгледааат четирите квалитативни шешири. Нашата репрезентација ќе ги чека своите ривали од третиот шешир, а не може да се сретне со останатите репрезентации во овој шешир. Шешири пред ждрепката за Европското првенство 2024 година: Шешир 1: Франција, Шведска, Данска, Шпанија, Исланд и Норвешка Шешир 2: Словенија,Унгарија,Холандија,Германија,Португалија и Австрија. Шешир 3: Македонија, Чешка, Полска, Хрватска, Србија, Босна и Херцеговина Шешир 4:Црна Гора,Фарски Острови,Грузија,Швајцарија,Романија и Грција. Најдобрите две селекции од секоја група ќе го продолжат натпреварувањето, кое ќе се одржи во неколку германски градови од 10 до 28 јануари 2024 година.