ердоган – Kurir.mk

Ердоган вети нови домови за сите што ги изгубија во пожарите во Турција

Ивона Петрова — Fri, 20 Aug 2021 12:13:44 +0000

Турскиот претседател Реџеп Таип Ердоган изјави дека најдоцна во рок од една година ќе бидат изградени нови домови за граѓаните кои во текот на шумските пожари во Турција станаа без покрив над глава, јави Анадолија. – Ќе ги анализираме сите планови против шумските пожари, поплавите, свлечиштата и сушите, изјави Ердоган во обраќањето до нацијата по средбата на Кабинетот во Анкара. Тој напомена дека властите значајно ќе им помогнат на граѓаните кои се нашле во тешка ситуација за време на неодамнешните природни катастрофи. – На местото на секое изгорено дрво ќе засадиме ново, ќе ја обновиме секоја изгорена куќа и ќе ја подигнеме секоја зграда уништена од поплавите, додаде турскиот претседател. Како што рече, околу 150.000 хектари земја беа зафатени од пожари во 54 различни градови во Турција само во 2021 година. – Иако терористичките организации се сомничат за подметнување на некои пожари во нашата земја, јасно е дека се соочуваме со општа катастрофа, изјави тој. Ердоган рече дека шумските пожари од големи размери веќе се претвориле во значаен глобален проблем. Во своето обраќање, Ердоган, исто така, се осврна и на областите во Турција со ниска стапка на вакцинирани против коронавирусот. – Ги повикувам сите граѓани, почнувајќи од овие области, да се вакцинираат што е можно поскоро. Ние, исто така, редовно ќе бараме ПЦР-тестови од невакцинирани студенти и универзитетскиот персонал, рече тој. Турскиот претседател истакна дека наставниот кадар ќе треба да се тестира на почетокот на учебната година. – На почетокот на наставата, од 6 септември, од наставниот персонал кој уште не е вакциниран, ќе бараме ПЦР-тестирање најмалку двапати неделно, додаде тој. Исто така, на јавните настани, како концерти и кина, наскоро исто така ќе се бара негативен ПЦР-тест со цел сузбивање на ширењето на коронавирусот. – За патувањето со авиони и меѓуградски автобуси исто така ќе биде потребен ПЦР-тест, изјави Ердоган.

Ердоган: Време е повторно да се разговара за новиот Устав на Турција

Тале Кристо — Tue, 02 Feb 2021 07:29:34 +0000

Турскиот претседател Реџеп Таип Ердоган изјави дека е време повторно да се разговара за новиот Устав на Турција, јави агенцијата Анадолија. Ердоган на прес-конференција по вчерашниот состанок на Кабинетот во Анкара рече дека оној кој тврди оти на Турција не ѝ се потребни реформи, тој не упатен ниту во однос на Турција, ниту светот, ниту во општеството. – Можеби сега повторно дојде време за дебата за нов Устав на Турција, потенцира Ердоган. Тој исто така рече дека наскоро со јавноста ќе сподели сеопфатна студија за реформските пакети, вклучувајќи ги филозофијата, целите, задачите и активностите, инфомира Анадолија. Говорејќи за самиот процес на изготвување на новиот Устав, Ердоган порача дека тој треба да биде „спроведен на транспарентен начин, а крајниот текст да биде презентиран пред народот.“ Ердоган додаде дека ако постигнат договор со партнерот во рамките на Народната алијанса, која се состои од Партијата на правдата и развојот и Партијата на национално движење, во наредниот период можно е да се преземат мерки за изготвување на нов Устав. Турскиот претседател рече дека е одлучено во Турција од 15 февруари да се отворат училиштата во руралните места, а од 1 март постепено и училиштата во градовите. Нагласи дека паралелно ќе се следи епидемиолошката состојба и дека во училиштата во руралните средини, во регионите каде што ќе дојде до евентуално зголемување на бројот на случаи на коронавирусот, ќе може да се прекине наставата. Според Анадолија, тој потсети дека меѓународните анализи покажуваат дека меѓу земјите од групата Г-20, Турција и Кина може да ја затворат 2020 година со позитивен раст. – Почнавме да работиме на воспоставување постројка за лансирање микросателити, наскоро во вселената ќе испраќаме наши сателити и сателити на нашите пријатели. Решени сме од нашата земја да направиме бренд во вселенските и сателитските технологии кои имаат широка примена, од комуникациите до енергетиката, од заштитата на животната средина до одбранбената индустрија, рече, меѓу другото, Ердоган.

Ердоган се приклучи на турската платформа на Телеграм

Тале Кристо — Wed, 13 Jan 2021 07:25:29 +0000

Турскиот претседател Реџеп Тајип Ердоган вчера отвори свој канал на платформата Телеграф. “Турскиот претседател Реџеп Тајип Ердоган е на Телеграм! Ви благодарам што се претплативте на нашиот Телеграм канал. Денеска отвораме и нов канал на новата платформа БИП”, напиша синоќа Ердоган на каналот. Каналот на Ердоган е верификуван од Телеграм, а заклучно со синоќа тој веќе има повеќе од 128.000 следбеници, наведе Тасс. Неодамна, многу корисници на социјални мрежи и месинџери го напуштија Воцап поради ажурираните услови за користење, според кои своите податоци мораат да ги споделуваат со Фејсбук. Одлуката дека на Фејсбук ќе му бидат проследени телефонските броеви, трансакциите и IP-адресите на корисниците на Воцап беше критикувана во Турција, при што многумина се префрлија на Телеграм и БИП, месинџер на турската телекомуникациска мрежа Турксел.

Ердоган-Рама: Нема да дозволиме ФЕТО да ги труе односите меѓу Турција и Албанија

Тале Кристо — Thu, 07 Jan 2021 14:40:36 +0000

Албанија и Турција се согласија дека терористичката организација ФЕТО претставува закана за двете земји. Затоа нема да дозволиме ФЕТО да ги труе односите меѓу Турција и Албанија, ова е заедничкиот став на турскиот претседател Реџеп Тајип Ердоган и албанскиот премиер Еди Рама на заедничката прес-конференција во Анкара, пренесуваат албанските медиуми.

Како што јави дописничката на МИА од Тирана, се додава дека ФЕТО е терористичка организација која ја предводи Фетула Ѓулен, кој живее во Соединетите Американски Држави, а за чија екстрадиција Турција има доставено официјално барање.

ФЕТО се смета дека е одговорна за крвавиот обид за државен удар во Турција ноќта на 15 јули во 2016 година. Во текот на обидот за државен удар во Турција загинаа 251, а ранети беа околу 2.200 лица.

На прес-конференцијата, турскиот претседател Ердоган ги нагласи историските врски на двете земји.

– Планираме да ги зголемиме инвестициите во инфраструктурата и туризмот во Албанија. Сакаме нашата економска соработка да ја подигнеме на повисоко ниво. Договоривме изградба на болница во градот Фиер, како и бесплатно лекување во Турција на 100 албански државјани заразени со Ковид-19, основање турски универзитет во Албанија и реставрација на џамијата во Скадар, рече Ердоган.

Турција и Албанија потпишаа Договор за унапредување на билатералните односи на ниво на стратешко партнерство.

– Ги подигнавме нашите односи на ниво на стратешко партнерство. Овој чекор што го направивме денеска ќе овозможи понатамошен развој на нашата соработка на секое поле, посочи Ердоган, посакувајќи слободни и демократски избори на 25 април, кои ќе бидат во полза на албанскиот народ.

Премиерот Рама се заблагодари за помошта дадена по земјотресот од 26 ноември минатата година, нагласувајќи дека Ердоган „не делува како многу држави за време на пандемијата кои ја запреа помошта за Албанија“.

Рама, кој денеска ја завршува дводневната посета, Ердоган вчера го дочека со официјална церемонија, а денеска албанската делегација го посети и музејот на таткото на современа Турција, Мустафа Кемал Ататурк.

Ердоган го повика Бајден да посвети внимание на американско-турските односи

Тале Кристо — Wed, 23 Dec 2020 12:55:52 +0000

Турскиот претседател, Реџеп Таип Ердоган, го повика новоизбраниот американски претседател, Џо Бајден, да посвети должно внимание на турско-американските односи, јави агенцијата Анадолија. – Веруваме дека новиот претседател на Америка, господин Бајден, исто така, ќе посвети должно внимание на турско-американските односи. Немаме предрасуди, непријателство или анимозитет кон никого“, порача Ердоган во обраќањето пред парламентарната група на Партијата за правда и развој (AK Parti). – До денес, трчајќи се приближувавме до оние што правеа само еден чекор кон нас. Ние ја одржуваме истата искреност и оптимизам“, рече тој. Ердоган додаде дека Турција ќе продолжи да работи за мир, правда и просперитет во регионот. Турскиот претседател, исто така, рече дека Турција се надева дека ќе отвори ново поглавје во односите со ЕУ и САД во новата година. – Ние не гледаме на нашите разновидни политички, економски и воени врски како алтернатива на нашите добро воспоставени односи со САД. Исто така, се надеваме дека ЕУ ќе се ослободи од своето стратешко слепило што ја оддалечува Турција [од Унијата]“, нагласи Ердоган. На 14 декември, САД воведоа санкции за Турција поради нејзиното купување на рускиот систем за ракетна одбрана С-400. Американските официјални лица се противеа на договорот, тврдејќи дека системите С-400 би биле некомпатибилни со системите на НАТО и би ги изложиле воените авиони Ф-35 на можна руска саботажа. Турција нагласи дека системот С-400 нема да биде интегриран во НАТО-системите и не претставува закана за Алијансата или за нејзиното наоружување. Турските власти повеќепати предлагаа создавање работна група за испитување на проблемот со техничката компатибилност на системите.

Ердоган: Санкциите на САД се одраз на непочитување на сојузникот

Тале Кристо — Fri, 11 Dec 2020 11:16:55 +0000

Претседателот на турција,Реџеп Тајип Ердоган денска изјави дека санкциите на САД кон неговата земја се одраз на непочитување кон важниот сојузник во НАТО. – Турција ќе биде трпелива и ќе види какви ќе бидат односите со новата администрација од следниот месец, посочи Ердоган. Претходно, списанието „Форин полиси“ објави дека САД би можеле да воведат санкции кон Турција поради набавката на рускиот противракетен систем С-400. САД и Турција подолго време имаат несогласувања, за купувањетона руско оружје, за политиката за Сирија и за други прашања.

Турција најостро ја осуди карикатурата на Ердоган во Шарли Ебдо

Тале Кристо — Wed, 28 Oct 2020 09:21:36 +0000

Високи турски владини претставници ја осудија карикатурата на претседателот Реџеп Тајип Ердоган во францускиот сатиричен неделник Шарли Ебдо, истакнувајќи оти е „одвратен обид за ширење на културен расизам и омраза“. – Силно ги осудуваме карикатурите на нашиот претседател во француското списание кое нема почит кон ниту една религија. Ништо не им е свето, немаат никави вредности, напиша портпаролот на Ердоган, Ибрахим Калин на Твитер. Тој додаде дека со тоа Шарли Ебдо покажува дека е „вулгарен и неморален“. – Напад врз нечии приватни ставови не е хумор ниту слобода на изразување, додаде Калин. Додека претставникот на Ердоган за медиуми, Фахретин Алтун изјави дека антимуслиманската пропаганда на францускиот претседател Емануел Макрон „дава плодови“. – Го осудуваме најодвратниот чин предизвикан од најновата карикатура, што шири расизам и омраза, напиша Алтун ан Твитер. На насловната страница на Шарли Ебдо, Ердоган седи во бела кошула и долна облека, држи пијалак и го подигнува здолништето на жена во хиџаб, на која и се гледа задникот.

Ердоган до САД: Турција не е племенска држава

Тале Кристо — Mon, 26 Oct 2020 07:43:15 +0000

Претседателот на Турција, Реџеп Тајип Ердоган вчера изјави дека САД не треба да го одложуваат воведувањето на санкции кон Анкара поради неодамнешната проба на рускиот противвоздушен систем С-400. – Какви и да се санкциите немојте да ги пролонгирате туку применете ги. Вие (САД) ни кажувате да го вратиме С-400. Ние не сме племенса држава, ние сме Турција, истакна Ердоган. САД во петокот повторно предупредија дека односите со Турција ќе бидат загрозени поради турското тестирање на системот С-400. Стејт департментот соопшти дека тестирањето е „некомпатибилно со одговорноста на Турција како сојузничкана НАТО и стратешки партнет на САД“. Вашингтон се закани дека ќе воведе санкции кон Турција доколку биде активиран С-400. Анкара договорот за купување на С-400 од Русија го потпиша во 2017 година, а првата батерија е испорачана во јули минатата година.

Ердоган: Минската група заглавена во наоѓање решение за конфликтот во Нагорно-Карабах

Тале Кристо — Wed, 14 Oct 2020 13:12:16 +0000

Турскиот претседател Реџеп Таип Ердоган денеска изјави дека Минската група е заглавена во наоѓање решение за конфликтот во регионот Нагорно Карабах и повтори дека регионот треба да се врати на Азербејџан. Зборувајќи пред членовите на неговата владејачка Партија за правда и развој, тој исто така рече дека Турција не испратила борци од Сирија во регионот. – Турција целосно ги поддржува своите сојузници од Азербејџан, рече Ердоган.

Ердоган: Турција нема да се откаже од истражувањата во Средоземјето

Тале Кристо — Tue, 25 Aug 2020 06:05:17 +0000

Турскиот претседател Реџеп Тајип Ердоган изјави дека неодамнешното големо откритие на резерви со природен гас во Црно Море е предвесник на новите вести за уште поголемо турско откритие. -Имаме силни показатели дека откриените резерви се само најава за уште поголемо откритие. Наскоро се надеваме на слични вести и од Средоземното море, рече тој во обраќањето по седницата на владиниот кабинет, јави агенцијата Анадолија. Истакнувајќи дека Турција би можела да стане една од земјите со најголеми резерви на гас, тој рече дека Турција направила големи чекори и во развојот на соларни и други потенцијали за обновлива енергија. -Намалувањето на цената на природниот гас ќе има дополнително позитивно влијание врз буџетот на луѓето и развојот на сите сектори во наредниот период, рече Ердоган. Турција минатата недела соопшти дека ги пронашла најголемите резерви на природен гас во Црното Море во својата историја. Ердоган рече дека станува збор за резерви што ги пофали целиот свет, но дека некои недобронамерни кругови и натаму негативно ја оценуваат турската економија и јасно покажуваат од каде добиваат упатства. Коментирајќи ја пораката на навигацискиот телекс (Навтекс), што ја издаде Грција, Ердоган рече дека станува збор за нечесен чин, што е закана за безбедноста на сите бродови во регионот. Во пораката, Грција најави четиридневни воени вежби на воздушните и поморските сили во областа што се совпаѓа со областа на источниот Медитеран, во која Турција претходниот ден најави дека ги продолжува активностите на истражувачкиот брод „Орус Реис“ за дополнителни четири дена. На тој начин Грција се обидува да ги блокира турските права на хидрокарбонските истражувања во тој дел од регионот. -Грција е единствена одговорна за се негативно што може да се случи во регионот и ќе биде единствената што ќе претрпи штета, рече Ердоган. Со таквиот свој став, додаде Ердоган, што е спротивен на меѓународното право, добрата волја и добрососедски односи, Грција самата ќе влезе во хаос од кој нема излез.