Ерик Кантона – Kurir.mk

Трансферот на Кантона највреден во историјата на Премиер лигата

Ивона Петрова — Fri, 14 Jul 2023 12:12:55 +0000

Новинарите на лондонски „Дејли Мејл“ составија листа на играчи чии трансфери оставиле голема трага во англискиот фудбал, а за нив или воопшто не било платено обесштетување или биле ангажирани за симболична сума. Број еден во изборот на „Дејли Мејл“ е Французинот Ерик Кантона, кој во 1992 година дојде во Манчестер јунајтед од Лидс за 1.5 милиони евра. Неговиот трансфер не беше ниту меѓу првите пет тоа лето. Втор на листата е сонародникот на Кантона, Патрик Виера, кој од Милан за 3.5 милиони евра го засили Арсенал во 1996 години. Меѓу Топ 3 највредни трансфери во историјата на Премиер лигата во изборот на лондонскиот весник е и доаѓањето на Џејми Варди од нисколигашот Флитвуд во Лестер во 2012 година. Варди со Лестер ја освои шампионската титула, стекнувајќи и статус на репрезентативец, а Лестер за неговите услуги плати 1.2 милиони евра.

Кантона: Нема да гледам ниту еден натпревар од Мундијалот во Катар

Магдалена Андонова — Wed, 14 Sep 2022 10:46:22 +0000

Во писмото објавено на социјалните мрежи, поранешниот напаѓач на Манчестер јунајтед и француската фудбалска репрезентација, Ерик Кантона, вели дека „неволно“ ќе се откаже од овој настан, што го смета за „аберација“, јави дописникот на МИА од Париз. Следејќи го патот што го трасираа други поранешни играчи како Филип Лам, јавни личности како актерот Винсент Линдон или дури и медиумите (Котидијан де ла Реунион), Ерик Кантона ја објави својата намера да го бојкотира Светското првенство во Катар 2022 година (20 ноември – 18 декември ). – Да бидеме искрени со себе! Ова Светско првенство нема смисла! Уште полошо, тоа е аберација! – вели поранешниот напаѓач (56), кој ги осудува „илјадниците смртни случаи“ и лудилото на климатизираните стадиони на овој „голем маскенбал“, чиешто единствено значење, според него, се „парите“. На за него својствен јазик, Кантона тврди дека нема „ништо да го интересира“ она што ќе направи репрезентацијата на Франција таму, притоа признавајќи дека оваа одлука го чини: „Од кога бев дете, тоа беше настан што го сакам“. Но, како што вели и самиот: „Понекогаш во животот мораме да носиме одлуки, дури и ако тоа не чини“. (МИА)

И некогашните ѕвезди на Јунајтед против Супер лигата – Бекам и Кантона бараат ставовите на навивачите да бидат земени во предвид

Магдалена Андонова — Tue, 20 Apr 2021 17:07:21 +0000

Поранешните фудбалски ѕвезди на премиерлигашот Манчестер јунајтед, Ерик Кантона и Дејвид Бекам, се произнесоа денеска во врска со најавената Супер лига зад која застана нивниот поранешен клуб, оценувајќи дека новото натпреварување ги игнорирало ставовите на навивачите и може да ги загрози изворните фудбалски вредности. Бекам, кој играше за три од 12-те клубови потписници на новоформираната Супер лига – Манчестер јунајтед, Реал Мадрид и Милан, напиша на Инстаграм дека „играта што ја сакаме е во опасност“. -Јас го сакам фудбалот, тоа е мојот живот, откога помнам. Како играч, а сега и како сопственик (на американскиот прволигаш Интер Мајами) знам дека нашиот спорт не вреди ништо без навивачите. Потребен ни е фудбал за сите. Фудбалот треба да биде фер и натпреварување засновано на постигнати резултати. Доколку не ги заштитиме овие вредности, играта што ја сакаме е во опасност, напиша Бекам на социјалните мрежи. Здружението на навивачи на Манчестер јунајтед (MUST), исто така, се изјасни против Супер лигата. Поранешниот капитен и клупска икона на Манчестер јунајтед, Ерик Кантона, рече дека ставовите на навивачите мораат да бидат земени в предвид. -Навивачите се најважни и мораат да се почитуваат. Дали овие големи клубови ги прашаа своите навивачи што мислат за оваа идеја?, Не, и тоа е штета, истакна Кантона во видеоснимка објавена на Инстаграм. (МИА)

Јунајтед размислува да го врати легендарниот Кантона во клубот

Ивона Петрова — Fri, 20 Mar 2020 10:31:55 +0000

Раководството на Манчестер Јунајтед сериозно размислува за можноста да врати во клубот една од најголемите легенди на „црвените ѓаволи“, Ерик Кантона. Според „Мирор“, идејата е да се покани Французинот како амбасадор и да им се придружи на други легендарни фигури, како Брајан Робсон и Денис Ирвин, кои веќе ги исполнуваат тие одговорности. Навивачите на Јунајтед буквално му се поклонуваат на Кантона, кој има освоено четири шампионски титули со тимот на „црвените ѓаволи“, двапати ФА Купот и три пати Суперкупот на Англија. Тој постигна 82 голови и беше идентификуван како најдобар трансфер на Манчестер Јунајтед во ерата на Фергусон.