Ерлинг Холанд – Kurir.mk

Халанд има три гола на првите три натпревари сезонава во Премиер лигата

Дарко Андоновски — Sun, 27 Aug 2023 15:31:25 +0000

Фудбалерот на Манчестер сити, Ерлинг Халанд постигна три гола во неговите први три натпревари во Премиер лигата сезоната 2023/24. Во натпреварот од 3. коло против Шефилд Јунајтед одигран попладнево, Халанд го отвори резултатот во 63. минута. Во првото полувреме од средбата Норвежанецот не реализираше пенал погодувајќи ја стативата. Сити го одби натпреварот со 2:1. Во натпреварот од 1. коло против Барнли (3:0) Халанд постигна два погодока. Така Халанд, кој беше најдобар стрелец минатата сезона со 36 гола, сега го дели водството со Таиво Авонији (Нотингем Форест), Соли Марч (Брајтон) и Брајан Мбемо (Брентфорд).

Манчестер Сити со нов договор за Халанд

Бошко Тасиќ — Mon, 27 Mar 2023 05:18:12 +0000

Управата на Манчестер Сити сериозно размислува на темата како да го задржи неверојатниот Ерлинг Халанд во своите редови. „Граѓаните“ се подготвени да му понудат нов договор со кој Халанд ќе стане убедливо најплатениот играч во Премиер лигата со неделна плата од половина милион фунти. Во моментов најмногу заработува исто така играч на Сити, а тоа е Кевин де Брујне кој заработува 400.000 фунти неделно. На овој начин Манчестер Сити сака да го „забетонира“ престојот на Халанд во нивниот клуб и да го задржи до 2028 година, изјавуваат неколку англиски медиуми.

Гвардиола се надева дека Халанд ќе остане во форма по Светското првенство

Дарко Андоновски — Tue, 25 Oct 2022 09:16:47 +0000

Тренерот на Манчестер сити, Хосеп Гвардиола се надева дека напаѓачот Ерлинг Халанд, чија репрезентација не обезбеди учество на Светското првенство во 2022 година во Катар, ќе ја задржи формата во која се наоѓа сега. – Тој дефинитивно ќе биде во Марбела (Шпанија) или во Норвешка. Од тоа како ќе се однесува за време на репрезентативната пауза ќе зависи колку добро ќе се претстави во вториот дел од сезоната. Прилично сум сигурен дека тој би сакал да биде на Светското првенство. Можеби ќе биде на следниот Мундијал или на Евро. Халан има куќа во Марбела каде што ќе оди и ќе игра голф. Се надевам дека нема да пие и јаде многу и ќе се врати во добра форма, изјави Гвардиола за „talkSPORT“. Дваесет и двегодишниот Норвежанец има 17 постигнати голови на 11 натпревари од Премиер лигата.

Ливерпул може да го добие Холанд во летниот трансфер период

Тале Кристо — Tue, 21 Dec 2021 17:39:36 +0000

Премиерлигашот Ливерпул покажува интерес за напаѓачот на Борусија Дортмунд, Ерлинг Холанд, објави „Sky Sport Deutschland“. Според германскиот медиум, „Црвените од Енфилд“ се обидуваат да го добијат центарфорот во текот на летниот преоден рок. Дваесет и едногодишниот Норвежанец е еден од водечките кандидати за офанзивниот ред во тимот на Јирген Клоп. Се истакнува дека евентуалниот трансфер на напаѓачот може да стане аргумент за Ливерпул во преговорите за нов договор со напаѓачот Мохамед Салах. Едно од барањата на 29-годишниот Египќанец е сериозно засилување на составот. Салах побара и зголемување на платата. Оваа сезона, Холанд одигра 16 натпревари за Борусија Дортмунд, постигна 19 гола и оствари четири асистенции.

Холанд може да го пропушти мечот со Херта поради повреда

Ивона Петрова — Wed, 03 Jun 2020 06:48:48 +0000

Напаѓачот на Борусија Дортмунд, Ерлинг Холанд може да го пропушти натпреварот од 30. коло од Бундеслигата против Херта поради повреда на коленото, јавуваат германските медиуми. Претходно, Норвежанецот не можеше да игра на дуелот со Падерборн (6:1). Фудбалерот го пропушти последниот тимски тренинг. Тој веројатно има истегнување на внатрешниот латерален лигамент на коленото. Натпреварот Борусија – Херта е закажан за 6 јуни. Деветнаесет годишниот напаѓач оваа сезона има 14 настапи за Борусија и постигнато 13 гола и остварено три асистенции.

Рајола: Не мислам дека Холанд на лето ќе ја напушти Борусија Дортмунд

Тале Кристо — Thu, 21 May 2020 08:29:25 +0000

Мино Рајола, агентот на напаѓачот на Борусија Дортмунд, Ерлинг Холанд, го сподели своето мислење за напредокот на фудбалерот и неговата кариера во иднина. -Холанд е богатство. Убаво е да се види како напредува на секој натпревар. Никој не очекуваше тој толку брзо да се прилагоди во Бундеслигата и неговите настапи во Лигата на шампионите како дел од тим како Борусија. Не е лесно да се преселите од Австрија во Германија и веднаш да се демонстрира такво ниво. Сепак, Ерлинг сè уште има простор да расте. Тој ќе игра во Борусија онолку колку што е потребно. Едноставно ги руши сите идеи за тоа колку брзо може да напредува фудбалер. И покрај сите понуди, не мислам дека тој ќе го напушти Дортмунд ова лето, изјави Рајола. Холанд се пресели во Борусија од Салцбург во зима 2020 година за 20 милиони евра. Деветнаесетгодишниот Норвежанец има 13 голови и 3 асистенции на 12 натпревари за тим од Дортмунд. Претходно во медиумите се појави информација дека за напаѓачот се заинтересирани Реал и ПСЖ.

Холанд стигна до 12 голови на осум натпревари за Борусија и 40 гола на 30 одиграни натпревари од сезоната

Дарко Андоновски — Sat, 22 Feb 2020 17:34:06 +0000

Борусија Дортмунд го совлада Вердер Бремен со 2:0, во натпревар од 23 коло во Бундеслигата на кој Ерлинг Холанд уште еднаш се запиша во листата на стрелците. Ова е деветти гол на Норвежанецот на шест натпревари во Бундеслигата. Вкупно за 12. Во дресот на Борусија на осум натпревари. Во сезоната 2019/2020, 19-годишниот Холанд, кој играше за Ред Бул Салцбург до јануари, веќе постигна 40 гола на 30 натпревари во сите натпреварувања.

Рајола: Холанд беше во право кога го избра Дортмунд пред Јунајтед

Ивона Петрова — Fri, 07 Feb 2020 10:16:48 +0000

Агентот на новата sвезда на Борусија Дортмунд, Ерлинг Холанд – Мино Рајола, објасни дека го подготвувал договорот за Норвежанецот околу една година, потврдувајќи дека Холанд донел добро осмислена одлука да се пресели на „Сигнал Идуна парк“. Стрелецот му се придружи на тимот од Дортмунд за 18 милиони евра, отфрлајќи ја понудата на Манчестер Јунајтед. Самиот Рајола ги нападна „црвените ѓаволи“ дека клубот уништувал премногу талентирани играчи. Агентот сега откри некои детали за самата зделка за неговиот клиент. – Јас бев зафатен со Холанд последната година. Разговарав со голем број клубови, ги слушав нивните планови и преговарав за суми. Ова му овозможи на Ерлинг да направи оправдан избор, резимираше Рајола. Холанд ја започна својата сензационална кариера со тимот на Дортмунд, постигнувајќи 8 гола на неговите први 4 натпревари со „жолто-црниот“ дрес.

Холанд за трансферот во Борусија: Чувствував дека клубот и јас се приближувавме

Ивона Петрова — Wed, 08 Jan 2020 11:19:59 +0000

Напаѓачот на Борусија, Ерлинг Холанд изјави зошто решил да се пресели во клубот од Дортмунд. -Управата ми рече: „Ни требаш. Импресионирани сме од твојата игра. Ние те сакаме кај нас“. Имавме добар разговор што ме направи навистина заинтересиран за клубот. По него, чувствував дека Дортмунд и јас се приближуваме, изјави, Холанд. Норвежанецот се пресели во Борусија оваа зима. Германскиот клуб му платил 20 милиони евра на Ред Бул, 10 милиони долари на таткото на играчот и уште 15 милиони долари на агентот Холанд Мино Рајола.

Милан подготвен да му даде на Холанд годишна плата од 5,5 милиони евра

Ивона Петрова — Thu, 19 Dec 2019 09:13:34 +0000

Напаѓачот на Салцбург, Ерлинг Холанд е пред големи искушенија во зимскиот преоден рок да го напушти австрискиот тим. Според „Спортиталија“, Милан е последниот клуб кој искажува сериозен интерес за Норвежанецот. Се шпекулира дека „миланезите“ се подготвени да му понудат договор на Холанд со годишна плата во висина од 5,5 милиони евра. За 19-годишниот фудбалер се заинтересирани уште и: Барселона, Јувентус и Борусија Дортмунд.