ЕУРО2024 – Kurir.mk

Квалификации ЕУРО2024: Утре почнува продажба на влезници за гостувањето на Италија

Тале Кристо — Tue, 29 Aug 2023 15:34:03 +0000

Продажбата на влезници за претстојниот натпревар на македонската фудбалска репрезентација против актуелниот европски првак Италија во Скопје во рамки на квалификациите за ЕУРО 2024 ќе почне утре, објави Фудбалската федерација на Македонија (ФФМ). Билетите ќе се продаваат по цена од 300 и 500 денари. ФФМ објави дека „продажбата на билети за натпреварот Македонија – Италија ќе се организира исклучиво преку продажната мрежа на MKTickets со физичко присуство на купувачите“. Европскиот првак Италија ќе гостува во Скопје на 9 септември, а натпреварот со почеток од 20:45 часот на Националната арена „Тодор Проески“ е во рамки на квалификациската група Ц во која македонската репрезентација е на претпоследното, четврто, место со три бодови од исто толку натпревари.

Продажбата на билети за ЕУРО2024 ќе стартува во октомври

Дарко Андоновски — Mon, 10 Apr 2023 06:04:09 +0000

Организаторите на Европското фудбалско првенство 2024 објавија дека официјалната продажба на влезниците ќе почне на 3 октомври кога земјата домаќин го одбележува Денот на германско единствено и обединување на земјата во 1990 година.

ЕУРО2024 ќе се одржи од 14 јуни до 14 јули во десет германски градови – Берлин, Хамбург, Лајпциг, Дортмунд, Дизелдорф, Франкфурт, Гелзенкирхен, Келн, Минхен и Штутгарт.

Како земја домаќин Германија ќе биде во групата А и ќе игра во воведниот натпревар на 14 јуни во Минхен.

Финалето ќе се игра точно еден месец подоцна во Берлин.

Жрепката за составот на групи е закажана за 2 декември оваа година.

Во четврток стартуваат квалификациите за ЕУРО2024

Ивана Ефремовски — Wed, 22 Mar 2023 17:51:55 +0000

Со натпреварот меѓу Казахстан и Словенија утре почнуваат квалификациите за пласман на 17. Европско фудбалско првенство кое од 14 јуни до 14 јули идната година ќе се одржи во Германија. Утрешната програма вклучува уште седум натпревари, вклучувајќи ги дуелот на македонската репрезентација против Малта во Скопје од 20: 45 часот, како и дербито во истата група Ц меѓу Италија и Англија. Во квалификациите за ЕУРО2024 учествуваат 53 репрезентации поделени во десет групи. На завршниот турнир ќе настапат 24 репрезентации. Германија, како домаќин, веќе обезбеди настап на ЕУРО2024. (МИА)

Македонските фудбалери од четвртиот „шешир“ ја чекаат жрепката за ЕУРО2024

Ивана Ефремовски — Wed, 28 Sep 2022 14:06:25 +0000

Македонската фудбалска репрезентација е сместена во четвртиот „шешир“ за жрепката за квалификациите за пласман на ЕУРО 2024, која е закажана за 9 октомври во Франкфурт. Вкупно 53 европски репрезентации ќе бидат подеделени во десет групи, седум со по пет, а три групи со по шест репрезентации. Квалификациите ќе стартуваат во март идната година и место на завршниот турнир во Германија ќе обезбедат победниците и второпласираните репрезентации во десетте квалификациски групи. Преостанатите три места за ЕУРО 2024 ќе бидат пополнети преку плејоф. Шешир 1 Холандија, Хрватска, Шпанија, Италија, Данска, Португалија, Белгија, Унгарија, Швајцарија, Полска Шешир 2 Франција, Австрија, Чешка, Англија, Велс, Израел, БиХ, Србија, Шкотска, Финска Шешир 3 Украина, Исланд, Норвешка, Словенија, Ирска, Албанија, Црна Гора, Романија, Шведска, Ерменија Шешир 4 Грузија, Грција, Турција, Казахстан, Луксембург, Азербејџан, Косово, Бугарија, Фарски Острови, Македонија Шешир 5 Словачка, Северна Ирска, Кипар, Белорусија, Литванија, Гибралтар, Естонија, Летонија, Молдавија, Малта Шешир 6 Андора, Сан Марино, Лихтенштајн. (МИА)

ЕУРО2024: Отворањето во Минхен, финалето во Берлин

Ивана Ефремовски — Tue, 10 May 2022 18:40:46 +0000

Премиерниот натпревар на Европското фудбалско првенство, чиј домаќин во 2024 година ќе биде Германија ќе се игра во Минхен, додека финалето ќе биде во Берлин, објави денеска УЕФА. ЕУРО 2024 ќе биде отворено на 14 јуни на Алијанц Арена во Минхен, а финалниот натпревар е на програмата на 14 јули на Олимпискиот стадион во Берлин. Првенството ќе се одржи во десет градови – Берлин, Хамбург, Лајпциг, Гелзенкирхен, Дортмунд, Дизелдорф, Келн, Франкфурт, Штутгарт и Минхен. – Уверен сум дека ЕУРО2024 ќе биде атрактивен турнир. Многу од најдобрите тимови во светот ќе се натпреваруваат во земја која се наоѓа во срцето на Европа. Очекуваме прекрасен фудбал и возбудлив турнир во секој поглед, порача директорот на ЕУРО2024, Филип Лам. Жрепката за квалификациските групи е закажана за 9 октомври оваа година во Франкфурт. (МИА)