еурофарм пелистер 2 – Kurir.mk

Вардар со лесна победа против вториот тим на Е.Пелистер

Бошко Тасиќ — Sun, 05 Mar 2023 07:23:38 +0000

За разлика од минатата сезона кога вториот тим на Пелистер го изненади Вардар во Битола, овојпат црвено-црните славеа сигурна победа со 25-18. Вардар ја имаше научено лекцијата, па тргна сериозно уште од самиот старт на натпреварот. По првите 30 минута Вардарци имаа предност од пет голови разлика, водеа со 12-7. Во продолжението од натпреварот само го одржуваа водството не дозволувајќи Битолчани да се приближат. На крајот конечниот резултат гласеше 25-18 за Вардар.

Дејан Манасков со 13 голови беше убедливо најдобриот на теренот, Јагуриновски постигна четири погодоци, Талески три. Во домашниот тим, Павле Петровиќ даде осум голови, втор стрелец беше Мартин Ивановски со четири. Во следното коло во Скопје се игра големото дерби меѓу Вардар и првиот тим на Пелистер, првиот од двата натпревари кои ќе решаваат за титулата во македонскиот ракометен шампионат.

Бутел подобар од Еурофарм Пелистер 2 во дербито на колото

Тале Кристо — Thu, 28 Apr 2022 18:14:06 +0000

Ракометарите на Бутел вечерва забележаа убедлив триумф над Еурофарм Пелистер 2 во дербито на 6. коло од Суперлигата. Предводени од репрезентативецот Марко Митев кој средбата ја заврши со седум погодоци, Бутел заслужено ги освои бодовите и се зацврсти на третото место на табелата со 12 бода. Битолчани кои во еден момент во првото полувреме имаа предност од четири гола, на крајот загубија убедливо и останаа на четвртото место со седум освоени бода. На првите две позиции се Еурофарм Пелистер и Вардар кои в недела во Битола го играат можеби мечот кој ќе го даде шампионот за оваа сезона.

Вардар му се реваншира на Еурофарм Пелистер 2

Бошко Тасиќ — Sat, 12 Feb 2022 20:22:56 +0000

Актуелниот ракометен шампион на Македонија Вардар, сосема очекувано со убедливи 32:20 го декласираше составот на Еурофарм Пелистер 2 и на тој начин „црвено-црните“ му се одмаздија на ривалот за поразот во првиот круг од натпреварувањето, кој е единствен на „вардарци“ во досегашниот дел од сезоната. Дибиров беше најефикасен во победничкиот тим со седум гола, по четири постигнаа Моралес и Оливие Нијокас, додека по четири погодоци за Еурофарм Пелистере 2 реализираа Петровиќ и Арсеновски.

Двата битолски ракометни тима на зимски одмор, старт на 12.јануари

Бошко Тасиќ — Sat, 25 Dec 2021 08:23:33 +0000

Двата ракометни битолски тима завршија со активности за 2021 година, а поголем дел од играчите имаат и репрезентативни обврски. Подготовките за новата сезона екипата под водство на Жељко Бабиќ и неговиот стручен штаб ќе ги започне на 12 јануари 2022 година. Еурофарм Пелистер 2 своите зимски подготовки за вториот дел од сезоната ќе ги започне на 10 јануари 2022 година. Дополнително ќе бидат одредени контролните натпревари во претсезоната.

СЕНЗАЦИЈА во Битола – Вардар поразен од вториот тим на Еурофарм Пелистер

Бошко Тасиќ — Sat, 30 Oct 2021 18:26:37 +0000

Македонскиот ракометен шампион Вардар во натпреварот влезе како апсолутен фаворит, но се врати со наведната глава. Еурофарм Пелистер 2 водеше во текот на целиот меч и на крајот заслужено дојде до сензационалниот триумф. Вардар на овој меч настапи без Дибиров, Кевин Њокас, Кудуз... но имаше доволно силен состав за овој натпревар. Црвено-црните го постигнаа првиот гол на мечот, но потоа следуваше серија на битолскиот тим за 3-1, водеа и со 6-2. На одморот се замина со водство на Еурофарм Пелистер 2 од 14-11. Се чинеше дека Вардар во вториот дел ќе се врати, но не беше така, битолчани продолжија во истото темпо. При крајот на мечот шампионот дојде до израмнување 24-24, но Еурофарм Пелистер 2 не дозволи пресврт.Битолчани поведоа со 27-25, не остана многу време за Вардар кој со гол во последните секунди успеа само да намали на 27-26, што беше конечниот резултат на овој меч. Еурофарм Пелистер 2 заслужно ја славеше најголемата победа во клупската историја. Павле Атанасијевиќ со шест гола беше најефикасен кај Еурофарм Пелистер 2, Кузмановски и Петровиќ постигнаа по 4, во составот на Вардар Георгиевски и Тото постигнаа по 6 гола, Моралес 4.

Две победи на Еурофарм Пелистер на подготовките во Маврово

Бошко Тасиќ — Tue, 10 Aug 2021 19:54:49 +0000

За време на подготовките во Маврово екипата на Еурофарм Пелистер 2 од Битола покрај тоа што ги одработи базичните подготовки кои ги предводеа тренерите Александар Јовиќ и Александар Зарков, одиграа и контролни натпревари против Еурофарм Пелистер, и со екипите на Прилеп и Металург. На ракометарите на Еурофарм Пелистер 2 според тоа како ги одиграа два последни натпревари против, тренирањето во полн ритам им донесе и добра форма пред почетокот на новата сезона во Супер лигата, а тоа го докажаа и со двете победи. Првата средба на подготовките во Маврово ја играа против екипата на Прилеп која ја добија со 31:24, а потоа го победија Металург со 29:21. Минатата сезона, Екипата на Еурофарм Пелистер 2 стигна до плеј-офот, а со такви амбиции се и оваа гофина со оглед на новите имиња кои се оваа сезона во тимот.

Еурофарм Пелистер веќе го скрои планот за подготовките

Бошко Тасиќ — Wed, 09 Jun 2021 16:23:20 +0000

Македонскиот ракометен тим Еурофарм Пелистер го објави планот за подготовките за натпреварувачката 2021/2022. Стартот е закажан за 19 јули во Битола за да неколку денови подоцна се замине на подготвителен период во Маврово (23-30). Од 1 до 25 август пак ќе има пријателски и турнирски натпревари (Струга и СЕХА лига). Сличен распоред има и вториот тим на Еурофарм Пелистер кој исто ќе ги запали „моторите“ на 19 јули, па ќе се замине во Маврово за да потоа одигра пријателски и турнирски натпревари.

Пролет го совлада Еурофарм Пелистер 2

Бошко Тасиќ — Sat, 08 May 2021 18:04:10 +0000

Екипата на Пролет на домашен терен запиша посакувани бодови, но потешко од очекуваното, откако во подобар финиш славеше над Еурофарм Пелитстер 2 (27-25) во рамки на плеј-офот од Суперлигата. Пролет подобро го отвори натпреварот и во воведните минути лесно ја пробиваше одбраната на младите пелистерци. Токму тоа им донесе предност од три гола по 20 минути игра (9-6), која потоа стана и плус пет (14-8), а до паузата, Пролет беше доминантен и водеше со високи седум гола (16-9). Во второто полувреме гледавме еден нов Еурофарм Пелистер 2, како паузата да им годеше на младите избраници на Јовиќ. Кам-бекот се најави прво со преполовување на негативата (19-16) на 20 минути пред крајот, а во егал се влезе во влезот на последните десет минути кога беше 23-22. По неколку промашени напади на двете страни, Пелистер успеа да дојде до 23-23, па се играше гол за гол до самиот финиш. На 100 секунди пред крајот, домаќинот Пролет имаше 26-25, Јовиќ се обиде со „седум на шест“, а откако Еурофарм Пелистер 2 направи пробивање, голманот на Пролет погоди на празен гол за 27-25 и ги реши сите дилеми околу победникот.

Пролет го совлада Еурофарм Пелистер 2

Бошко Тасиќ — Sat, 20 Mar 2021 16:52:30 +0000

Ракометарите на Пролет ја забележаа и втората победа од стартот од плејофот, триумфирајќи на гостувањето против Еурофарм Пелистер 2 во Битола со резултат 21-23. Во главна улога беше голманот Петар Ангелов, кој со две клучни одбрани во последните две минути ја осигура победата на скопскиот клуб. Давор Палевски со осум гола беше прв стрелец на Пролет, четири постигна Пејовиќ, додека во редовите на Пелистер 2 најефикасни беа Павле Атанасијевиќ со шест и Талевски со пет погодоци.