Ево Моралес – Kurir.mk

Поранешниот боливиски претседател позитивен на коронавирус

Магдалена Андонова — Wed, 13 Jan 2021 12:54:30 +0000

Поранешниот боливиски претседател Ево Моралес е позитивен на коронавирусот, соопшти неговиот кабинет. Оттаму уште се наведува дека тој е стабилен и примал терапија за да се справи со симптомите, но не се наведува за какви симптоми станува збор. Моралес (61) во ноември се врати во земјата по едногодишниот егзил, откако еден од неговите дотогашни сојузници Луис Арке беше избран за претседател. По неговото враќање, Моралес, кој е лидер на владејачката партија Движење за социјализам, учествуваше на бројни митинзи со приврзаниците и членовите на неговата партија пред локалните избори закажани за март годинава. (МИА)

Поранешниот боливиски претседател Ево Моралес се врати во земјата

Ивона Петрова — Tue, 10 Nov 2020 08:29:55 +0000

Поранешниот претседател на Боливија, Ево Моралес, се врати во земјата од егзилот во Аргентина и веднаш тргна на тридневно патување од 1.000 километри до неговото упориште во централниот дел на земјата. -Дел од мојот живот остана во Аргентина, по 11 месеци прогонство, рече поранешниот претседател, кој пешки го мина делот од границата меѓу градот Ла Квика, на северот од Аргентина, до Вилазон, во јужниот дел на Боливија, јави Хина. Моралес во Аргентина беше придружуван од левоцентристичкиот претседател Алберто Фернандез, кој во неделата присуствуваше на церемонијата на давање заклетва на новиот претседател на социјалистичка Боливија, Луис Арце. Моралес му се заблагодари на аргентинскиот претседател за гостопримството, додавајќи дека „му го спаси животот“. По преминувањето на границата, Моралес беше пречекан од стотици приврзаници. Моралес се врати во Боливија откако неговата социјалистичка партија МАС се врати на власт, една година откако мораше да поднесе оставка и да ја напушти земјата поради насилните протести на опозицијата. Поранешниот боливиски претседател (2006-2019) прво неколку недели беше во бегство во Мексико, а потоа се засолни во Аргентина. Левичарскиот поранешен претседател, кој владееше со земјата 14 години, ја напушти Боливија во ноември 2019 година, откако се обиде да го освои четвртиот претседателски мандат на изборите, што беа обележани со обвинувања за измама. Неговото враќање ги зголеми тензиите во и онака напнатата политичка сцена во земјата, каде новиот Конгрес со социјалистичко мнозинство ја наметнува својата политичка агенда во услови на жестоки протести на опозицијата. Засега не се знае каква улога ќе има Моралес во политичкиот живот на Боливија.

Боливија го повлече налогот за апсење на Ево Моралес

Ивона Петрова — Tue, 27 Oct 2020 06:23:30 +0000

Правосудството на Боливија синоќа го повлече налогот за апсење на поранешниот претседател Ево Моралес, кој е во егзил во Аргентина. Таквата одлука е донесена една недела по победата на неговиот привразаник Луис Арсе на претседателските избори. – Неговите (на Моралес) права се прекшени, првенствено правото на одбрана бидејќи не беше уредно повикан на сослушување,изјави претседателот на судот во Ла Паз, Хорхе Квино. Главниот обвинител на Боливија на 6 јули побара покренување на кривична постапка против Моралес поради бунт и тероризам. Тогаш беше наложено притворање на Моралес. Поранешниот боливиски претседател на 10 ноември 2019 година под притисок на армијата и протестите на опозицијата беше принуден да даде оставка. Моралес беше претседател на Боливија од 2006 до 2019 година.

Кандидат на партијата на Моралес победи на претседателските избори во Боливија

Ивона Петрова — Tue, 20 Oct 2020 05:11:18 +0000

Кандидатот на левичарската партија на поранешниот претседател на Боливија, Ево Моралес победи во првиот круг на вчерашните претседателски избори. Победата на кандидатот на Движењето Моралес за социјализам, Луис Арсе (57), значи ненадеен пресврт на Боливија од конзервативната политика на претходната привремена влада поддржана од САД. Привремената влада ја презеде власта во ноември минатата година откако Моралес (60), долгогодишен левичарски претседател, поднесе оставка и ја напушти земјата под притисок на демонстрантите и војската. Главниот ривал на Арсе на изборите, центристот Карлос Меса, го призна поразот на изборите, како и привремената претседателка на Боливија, Жанин Ањес, противничка на Моралес. Иако официјалните резултати не се објавени, две независни агенции, спонзорирани од Римокатоличката црква и граѓанскиот сектор, објавија дека Арсе освоил нешто повеќе од 50 проценти од гласовите и има предност од околу 20 проценти во однос на Меса.

Боливиски обвинители бараат апсење на Моралес

Ивона Петрова — Tue, 07 Jul 2020 05:33:48 +0000

Боливиски обвинители го обвинија поранешниот претседател Ево Моралес за тероризам и бараат негово апсење, јавија локални медиуми. Наводите се засновани на аудио-снимка во која, наводно, Моралес ги убедува одгледувачи на кока да блокираат патишта кон градовите и да ги остават без храна. Моралес беше принуден да поднесе оставка во ноември минатата година, по масовните улични собири организирани поради измама избори во октомври. По 13 години на власт, левичарот Моралес е привремено заменет со конзервативката Жанин Анез. Моралес во моментов е во Аргентина, каде има статус на политички бегалец.

Моралес потврди дека ги повикал граѓаните да се самоорганизираат

Ивона Петрова — Mon, 13 Jan 2020 07:06:16 +0000

Поранешниот претседател на Боливија, Ево Моралес, го оправдува повикот за формирање вооружени групи во неговата земја, што го испратил до граѓаните, чии снимки беа објавени на државното радио. Моралес, кој е во егзил во Аргентина, потврди дека е неговиот глас, што се слуша на аудио-снимка, со повик на формирање вооружени милиции „како оние во Венецуела“, бидејќи луѓето имаат право да се бранат доколку бидат нападнати од новата влада. Тој прецизираше дека не значи да се вооружат овие групи со „оружје“, туку да се организираат одбранбени групи на граѓани кои отсекогаш постоеле во неговата земја. – Во Боливија, ако вооружените сили пукаат и убиваат луѓе, луѓето имаат право да се организираат за своја безбедност“, рече Моралес во изјава за западни медиуми. – Понекогаш, тие групи беа нарекувани милиции, подоцна синдикална безбедност или синдикална полиција, а на некои места беа наречени комунални чувари. Ова не е ништо ново, рече поранешниот боливиски претседател. Во објавената ради снимка, Моралес рече дека тој и неговите приврзаници „верувале премногу“ пред минатогодишните претседателски избори и требало да има „план Б“. „Ако се вратам (во Боливија) или некој друг се врати, мора да се организираме, како во Венецуела, со вооружени милиции на народот“, се слуша во клипот. Моралес ја напушти Боливија во ноември по политичките немири предизвикани од контроверзната изборна победа, доби азил во Мексико, но потоа се пресели во Аргентина. Најмалку 29 луѓе загинаа во судири на полицијата и демонстрантите во немири, а во средината на декември боливиските обвинители издадоа налог за апсење на Моралс поради обвинувања за бунт и тероризам.

Приврзаници на Моралес опколени во мексиканската Амбасада во Ла Паз

Ивона Петрова — Thu, 26 Dec 2019 06:56:39 +0000

Мексико соопшти дека боливиските безбедносни сили го зголемиле своето присуство околу резиденцијата на мексиканскиот амбасадор во Ла Паз каде група поранешни министри и други функционери верни на соборениот претседател Ево Моралес побараа азил. Војската во вторникот се собра околу резиденцијата, соопшти мексиканското Министерство за надворешни работи и ситуацијата ја оцени како „опсадна состојба“. Односите меѓу двете земји се затегнати откако Мексико му даде азил на Моралес, кога тој на 10 ноември поднесе оставка по немирите во земјата заради обвинувањата дека ги фалсификувал претседателските избори. Моралес во меѓувреме замина за Аргентина и завчаера најави дека ќе остане вклучен во политиката на соседна Боливија, наведуваат американските медиуми. Боливискиот заменик министер за јавна безбедност Вилсон Сантамарија изјави дека на политичарите кои се наоѓаат во мексиканската Амбасада нема да им биде дозволено да ја напуштат земјата. -Ги преземавме неопходните чекори за силите за безбедност веднаш да откријат било каква помош на бегалците за да ја напуштат земјата, рече тој.

МНР на Мексико: 150 агенти на Боливија ја опколија резиденцијата на амбасадорот

Ивона Петрова — Tue, 24 Dec 2019 06:17:52 +0000

Мексиканското Министерство за надворешни работи соопшти дека 150 боливиски разузнавачи ја опколиле резиденцијата на мексиканскиот амбасадор во Ла Паз и се обиделе да го претресат неговото возило. Во соопштението се вели дека кругот формиран од агентите на Боливија, облечен во воени униформи, започнал да се формира во текот на викендот, истакнувајќи дека присуството на чувари и обидот за пребарување дипломатско возило ја нарушило дипломатската заштита и гаранции. Мексико кратко му дал азил на поранешниот претседател на Боливија, Ево Моралес, кој поднесе оставка по протестите на 10 ноември, а околу 30 негови приврзаници најдоа прибежиште во амбасадата во Ла Паз.

Поранешниот претседател на Боливија бара азил во Аргентина

Тале Кристо — Thu, 12 Dec 2019 16:21:59 +0000

Поранешниот претседател на Боливија Ево Моралес, кој ја напушти земјата по спорните претседателски избори, допатува денеска од Куба во Буенос Аирес, каде што има намера да остане, изјави новиот шеф на аргентинската дипломатија Фелипе Сола. – Тој доаѓа за да остане во Аргентина во својство на барател на азил, а потоа ќе добие статус на бегалец, рече Сола. Новиот претседател на Аргентина Алберто Фернандез во ноември рече дека ќе му одобри азил на Моралес, бидејќи смета дека поранешниот претседател на Боливија е „жртва на обид за државен удар“. Моралес, кој беше принуден да си поднесе оставка по уличните протести на 10 ноември, замина за Мексико на 12 ноември. Поранешниот боливиски претседател отиде во Куба минатата недела, но се одлучи за Аргентина, каде неговите деца се преселија во ноември. Тој е првиот претседател на Боливија со индијанско потекло.

Претрес во домот на Ево Моралес

Ивона Петрова — Wed, 11 Dec 2019 11:00:16 +0000

Боливиското обвинителство потврди дека е извршен претрес во домот на соборениот претседател Ево Моралес како дел од истрагата за тероризам и противдржавна дејност против поранешниот лидер на земјата кој е во егзил. Моралес минатиот месец поднесе оставка по речиси 14 години на власт по наводите дека ги фалсификувал парламентарните избори. Оттогаш тој се наоѓа во Мексико, каде доби азил како „жртва на преврат“. Неговата наследничка Жанин Анес го обвини Моралес и други негови соработници за разгорување на жестоки судири по изборите во Боливија, кои траеја повеќе од еден месец и во нив загинаа десетици луѓе. Обвинителот Руди Теразас изјави дека претресот во домот на Моралес во Ахумани, богат кварт во административната престолнина Ла Пас, е „извршен по судски налог“. Компјутерите, пронајдени во имотот, ќе бидат прегледани поради докази за „тероризам и дејствија против државата“. Моралес на Твитер напиша дека истражните органи ја злоупотребиле својата должност. Сегашната власт тврди дека Моралес предизвикал голем недостиг на храна и гориво, давајќи им инструкции на своите следбеници да ги блокираат патиштата кои водат кон големите градови, по неговото заминување во Мексико.