Европска Сребрена Лига – Kurir.mk

Македонските „Спартанци“ во полуфиналето на Европската сребрена лига

Ивона Петрова — Sun, 12 Jun 2022 16:42:44 +0000

Македонската одбојкарска репрезентација доби можност да игра во полуфиналето на Европската сребрена лига. „Спартанците“ изборија учество помеѓу четирите најдобри во Сребрената лига, откако попладнево Романија ја победи Албанија со максимални 3:0 (25:18, 25:19 и 25:22). Македонците вчера беа поуспешни од Босна и Херцеговина исто така со максимални 3:0 и го исполнија првиот предуслов за пласман во полуфиналето. По шесте кола во Б-групата, Романија го освои првото место со 14 бода, Македонија е втора со 10, Албанија има исто така 10 на третото место, но со послаб сет-количник. Босна и Херцеговина е последна со два бода. Од А-групата, полуфиналисти се Финска и Унгарија.

Познати противниците на македонските одбојкари во Европската сребрена лига 2022

Ивана Ефремовски — Tue, 07 Dec 2021 13:37:26 +0000

Романија, Албанија и Босна и Херцеговина ќе бидат противници на македонските одбојкари во Европската сребрена лига 2022.

За разлика од претходната сезона, натпреварувачкиот систем ќе биде лигашки, што значи дека во нашата група „Б“ ќе има шест кола, односно секој ќе игра дома и на гости. Најдобрата репрезентација ќе обезбеди настап на завршниот турнир во Унгарија, а шанса ќе има и за второпласираната, но во зависност од расплетот во групата „А“. Во неа ќе има само три репрезентации, а покрај организаторот на завршницата – Унгарија, во оваа конкуренција се Финска и Азербејџан. Северна Македонија првиот натпревар го игра на 25 мај против Босна и Херцеговина, по што следи гостување кај Романија, па два меча против Албанија. Потоа ја пречекуваме Романија на домашен терен и гостуваме кај БиХ.

Завршниот турнир ќе се одржи во Унгарија на 18 и 19 јуни следната година. (МИА)

Македонските одбојкари вечерва против Данска ќе играат во финалето на Европската сребрена лига

Бошко Тасиќ — Sun, 06 Jun 2021 07:06:51 +0000

Македонската машка одбојкарска репрезентација денеска во финалето на завршниот турнир од Европската сребрена лига, што се игра во салата „Парк“ во Струмица, ќе игра против Данска. Во вториот полуфинален натпревар, што се одигра синоќа, Данците беа подобри од Унгарија совладувајќи ги со 3:1 во сетови. Вчера во првиот полуфинален натпревар нашите најдобри одбојкари ја победија репрезентацијата на Хрватска со 3:2 во сетови. Финалниот натпревар за златниот медал се игра вечер во Струмица со почеток во 20 часот, додека претходно (17 часот) во борбата за бронзениот медал ќе се сретнат репрезентациите на Унгарија и Хрватска