европски совет – Kurir.mk

Европскиот совет на 17 октомври ќе одржи вонреден состанок за војната меѓу Израел и Хамас

Тале Кристо — Sun, 15 Oct 2023 08:51:39 +0000

Претседателот на Европскиот совет, Шарл Мишел, најави дека во вторник на 17 октомври ќе се одржи вонреден видео - состанок на лидерите на Европската унија, на кој ќе се разговара за војната меѓу Израел и палестинската милитантна група Хамас. „Бруталните терористички напади на Хамас врз Израел минатата сабота доведоа до трагична загуба на над илјада невини израелски цивили. Заложниците мора веднаш да бидат ослободени и без никакви предуслови. Нема оправдување за теророт“, се вели во изјавата на Мишел. Тој додаде дека ЕУ е во целост солидарна со израелскиот народ и со жртвите на терористичките напади и нагласи дека Израел има право да се брани во согласност со меѓународното право.

Европскиот совет ја поддржува идејата на Рама за одржување меѓународна конференција за Косово и Србија

Тале Кристо — Thu, 29 Jun 2023 17:43:12 +0000

Претседателот на Европскиот совет, Шарл Мишел, ја поддржа идејата за одржување меѓународна конференција за Косово и Србија, со цел да се намалат тензиите меѓу двете земји, кои предизвикаа загриженост на Западот, јави Топ чанел. - Ја поддржуваме и идејата што поскоро да се организира конференција - заедно со некои земји-членки на ЕУ. Мислам дека е дојдено време да се има глобален пристап и да се преземат јасни чекори кон нормализација на односите Косово-Србија. Ова е многу важно, бидејќи рековме дека сакаме да се потрудиме да направиме нешто за Западен Балкан, заедно со Западен Балкан, изјавил Мишел. Идејата за одржување меѓународна конференција за Косово и Србија беше изнесена на 27 јуни од премиерот Еди Рама, кој разговараше за ова прашање истиот ден во Брисел со неколку високи европски претставници, меѓу кои и самиот Мишел. -Косово и Србија продолжуваат меѓусебно да се обвинуваат за тензичната ситуација на северот, додека меѓународната заедница главно ја посочи Приштина за одговорна за ситуацијата. ЕУ претходно излезе со план мерки за намалување на тензиите, кој меѓу другото вклучува и распишување нови избори на северот и повлекување на специјалната единица на косовската полиција од областа, наведува телевизијата. Додава дека со планот се бара Србија да обезбеди учество на Србите на евентуалните нови локални избори. Српската заедница ги бојкотираше изборите во април. Косовскиот премиер Албин Курти се изјасни за одржување нови избори под услов тие да бидат во правната рамка на државата.

ВМРО-ДПМНЕ: Ковачевски да не лаже, ЕС ги отпочна преговорите со Албанија, а со Македонија отпочна фаза на отворање на преговори

Ивона Петрова — Thu, 21 Jul 2022 06:28:55 +0000

Предавникот Ковачевски да не лаже, Европскиот Совет ги отпочна преговорите со Албанија, а со Македонија отпочна фаза на отворање на преговори, велат од ВМРО-ДПМНЕ. -На официјалната веб страна на Европскиот Совет во делот на соопштенија од Советот, во две засебни соопштенија за меѓувладините конференции, помеѓу Албанија и Македонија со ЕУ се гледа кој почнува преговори, а кој ќе чека уште. Албанија почнува преговори, а Македонија уште е во чекална, појаснуваат од партијата. Како што истакнуваат за Македонија да ги почне преговорите треба да се бугаризира, и тоа е директна вина на Ковачевски. -Предавникот Ковачевски трајно ги наруши македонските преговарачки позиции и нашите црвени линии. ВМРО-ДПМНЕ нема да дозволи промена на Уставот. Пратениците на партијата нема да гласаат за промена на Уставот. Македонија мора да преговара со ЕУ под услови кои важеле за сите, се вели во соопштението на ВМРО-ДПМНЕ.

Претседателот на Европскиот совет денеска во Скопје

Ивона Петрова — Tue, 05 Jul 2022 05:57:02 +0000

Претседателот на Европскиот совет, Шарл Мишел, денес пристигнува во посета на Скопје. Се очекува Мишел во рамките на посетата да ја покаже поддршката на ЕУ за францускиот предлог и да ја потврди заложбата за македонските евроинтеграции. Како што најавија од Владата, во рамки на посетата високиот претставник од Советот на Европа ќе има тет-а-тет средба со премиерот Димитар Ковачевски. Потоа е предвидено да присуствува на владината седница, по што во 13:15 часот премиерот Ковачевски и претседателот на Советот на Европа Мишел, ќе одржат заедничка прес-конференција.

ЕК поддржува кандидатски статус за ЕУ на Украина и на Молдавија

Ивона Петрова — Fri, 17 Jun 2022 10:32:29 +0000

Европската Комисија предлага на Украина да ѝ биде доделен статус на кандидат за членство во Европската Унија. Претседателката Урсула фон дер Лајен изјави дека Комисијата предлага „на Украина да ѝ се даде кандидатски статус. Ова, секако, на разбирање дека земјата ќе спроведе бројни дополнителни реформи“. – Од гледна точка на Комисијата, Украина јасно ги покажа аспирацијата и решеноста да ги исполни европските стандарди, додаде Фон дер Лајен. Според ДПА, ЕК предлага статус кандидат за во ЕУ и за Молдавија. Украина аплицираше за членство откако Русија ја започна инвазијата врз земјата кон крајот на февруари. Потоа следуваа и барања за членство од Молдавија и Грузија.

Претседателот на Европскиот совет Шарл Мишел утре во посета на Македонија

Ивона Петрова — Wed, 15 Jun 2022 07:40:00 +0000

Претседателот на Европскиот совет Шарл Мишел утре доаѓа посета на Република Северна Македонија. Мишел во „Вила Билјана“ во Охрид ќе се сретне со претседателот на државата Стево Пендаровски. Како што соопштија од кабинетот на претседателот, Пендаровски и Мишел ќе имаат тет-а-тет средба, по што ќе одржат заедничка прес-конференција. Претседателот на Европскиот совет, Шарл Мишел кој е во мини балканска турнеја, ќе биде гостин на вториот Преспа форум за дијалог што ќе се одржи во Охрид од утре до 18 јуни во организација на Владата на Северна Македонија. Форумот ќе го отвори претседателот Стево Пендаровски, а на првата сесија на високо ниво според најавите ќе говорат и претседателите на Слованија Борут Пахор, на Хрватска Зоран Милановиќ, на Косово Вјоса Османи – Кадриу и претседателот на Црна Гора Мило Ѓукановиќ. Пред да ја посети земјава претседателот на ЕС Мишел беше во посета на Босна и Херцеговина, Црна Гора и Косово.

Шарл Мишел во посета на Црна Гора

Ивона Петрова — Tue, 14 Jun 2022 05:47:14 +0000

Претседателот на Европскиот совет, Шарл Мишел денеска ќе престојува во официјална посета на Црна Гора, соопшти Службата за информирање на претседателот на Црна Гора. Како што се наведува, Мишел во вилата Горица со највисоки воени и државни почести ќе го пречека црногорскиот претседател Мило Ѓукановиќ. Разговорите ќе започнат со средба на двајцата претседатели во четири очи, која ќе продолжи во присуство на делегации. За време на престојот во Подгорица, Мишел ќе се сретне и со премиерот Дритан Абазовиќ и ќе има работен ручек со членовите на Владата.

Мишел во ненајавена посета на Киев

Ивона Петрова — Wed, 20 Apr 2022 07:50:31 +0000

Претседателот на Европскиот совет Шарл Мишел денеска пристигна во ненајавена посета на Киев. Претходно овој месец и претседателката на Европската комисија Урсула фон дер Лајен, исто така, го посети украинскиот главен град. – Денеска сум во Киев. Во срцето на слободна и демократска Европа, напиша Мишел на Твитер.

Мишел: ЕУ треба да им понуди азил на руските дезертери

Ивона Петрова — Wed, 06 Apr 2022 11:14:46 +0000

Претседателот на Европскиот совет, Шарл Мишел денеска изјави дека земјите-членки на Европска Унија треба да разгледаат начини да им понудат азил на руските војници кои ќе го напуштат бојното поле. Тој ги повика руските војници да не ги почитуваат наредбите. – Ако не сакате да учествувате во убивањето на вашите браќа и сестри Украинците, ако не сакате да бидете криминалци, фрлете го оружјето, престанете да се борите, напуштете го бојното поле, истакна Мишел. Западните извештаи сугерираат дека руските војници веќе се деморализирани и трпат големи загуби. На почетокот на инвазијата, Украина им понуди пари на руските војници, кои ќе дезертираат.

Европа подготвува нови санкции за Русија

Ивона Петрова — Sun, 03 Apr 2022 10:17:27 +0000

Претседателот на Европскиот совет, Шарл Мишел ги осуди „злосторствата“ извршени од руските сили во предградијата на Киев и вети дека ќе има нови санкции кон Русија. – Шокиран сум од прогонувачките слики од злосторствата извршени од руската армија во ослободениот регион Киев, напиша Мишел на Твитер. Тој додаде дека Европска Унија и помага на Украина и на невладините организации во собирањето на потребните докази за гонење пред меѓународните судови.