фармацевтска компанија – Kurir.mk

Фармацевтската компанија „Џонсон и Џонсон“ побараа дозвола за итна употреба на вакцината

Тале Кристо — Fri, 05 Feb 2021 06:43:02 +0000

Фармацевтската компанија „Џонсон и Џонсон“ побара од Американската агенција за храна и лекови (ФДА) да ја одобри за итна употреба нејзината вакцина од една доза. Барањето на компанијата следува по извештајот од 29 јануари, во кој се вели дека глобалното клиничко тестирање покажало оти ефективноста на оваа вакцина во спречување на заразата со коронавирусот е 66 проценти. Вакцината која се дава во една доза може да ја забрза испораката и да ја поедностави кампањата за имунизација во САД. За разлика од вакцините на Фајзер и Модерна, кои се даваат во две дози, вакцината на Џонсон и Џонсон не бара втора доза или транспорт на ниски температури. По барањето на компанијата за регистрација на вакцини, на регулаторите ќе им треба време да ги анализираат податоците и состанок на советодавниот комитет. САД имаат договор за купување на 100 милиони дози од оваа вакцина за милијарда долари, со можност за набавка на уште 200 милиони дози. Компанијата „Џонсон и Џонсон“ соопшти дека е подготвена да достави вакцини веднаш по одобрувањето и планира да испорача една милијарда дози во 2021 година, кои би се произвеле во САД, Европа, Јужна Африка и Индија. Вакцината користи аденовирус тип 26 за да инјектира коронавирусни протеини во клетките на телото и да предизвика имунолошки одговор.

„Модерна“ почна со тестирање на вакцината против Ковид-19 меѓу адолесценти

Магдалена Андонова — Thu, 10 Dec 2020 14:57:33 +0000

Фармацевтската компанија Модерна објави дека во вториот дел од последната фаза на тестирање, им ја дала првата доза на вакцината на кандидатите кои припаѓаат на возрасна група помеѓу 12 и 18 години. Тестирањето меѓу адолесцентите значително помага да се обезбеди сигурност и ефикасност на вакцината кај помладата популација. Тестирањето се спроведува во соработка со Биомедицинското напредно тело за истражување и развој (БАРДА), кое е дел од американското Министерство за здравство. – Со задоволство објавуваме дека започнавме со вториот дел од последната фаза на тестирање кај здрави адолесценти во САД. Нашата цел е да собереме доволно податоци до пролетта 2021 година за да ја одобриме употребата на нашата вакцина, подоцна во учебната година, рече Стефан Бансел, извршен директор на Модерена. – Се надеваме дека ќе можеме да доставиме безбедна вакцина и да им дадеме заштита на адолесцентите, така што тие ќе можат да се вратат на училиште во нормални услови, рече Бансел. Модерна планира да тестира 3.000 адолесценти во САД со две дози во период од 28 дена. (МИА)

ЕК во преговори со шеста фармацевтска компанија за вакцина против Ковид-19

Магдалена Андонова — Wed, 09 Sep 2020 13:12:54 +0000

Европската Комисија соопшти денеска дека портфолиото за вакцини е комплетирано по заклучувањето на преговори со фирмата БиоНТех-Фајзер, јави дописничката на МИА од Брисел. Договорот со оваа компанија доаѓа по пет други со следните фармацевтски компании: Санофи-ГСК, Џонсон и Џонсон, КјурВак, Модерна и АстраЗенека. За Европската Комисија склучувањето договори со повеќе компании овозможува разновидност и конкурентност во трката по вакцина против коронавирусот. -Можниот договор со БиоНТех-Фајзер би им овозможил на сите ЕУ земји членки да ја купат вакцината како и да се донира на земји со низок или среден приход или да се пренасочи кон европски земји, соопшти Европската Комисија. Начелно се предвидени 200 милиони дози за сите земји членки на ЕУ, со опција за дополнителни сто милиони дози откако ќе се утврди дека вакцината е ефикасна и безбедна. -Среќна сум што можам да соопштам дека ги завршивме преговорите со БиоНТех-Фајзер за начелен откуп на 200 милиони дози за идната вакцина против коронавирусот. Ова е шестата фармацевтска компанија со која завршивме преговори или потпишавме договор за потенцијална вакцина во рекордно време. Нашите шанси за развој и дистрибуција на безбедна и ефикасна вакцина никогаш не биле поголеми, како за Европејците дома, така и за остатокот од светот, изјави претседателката на Европската Комисија, Урсула фон дер Лајен. Европската стратегија за вакцини е усвоена во јуни годинава и има за цел да им обезбеди на европските граѓани достапна и безбедна вакцина во најкус можен рок штом таа биде готова, најверојатно во наредните 12 до 18 месеци. (МИА)

„Астра Зенека“ почна тестирања со терапија со антитела

Магдалена Андонова — Tue, 25 Aug 2020 09:01:14 +0000

Британската фармацевтска компанија „Астра Зенека“ соопшти дека почна тестирања со терапија со синтетички антитела за превенција и третман на Ковид-19, придружувајќи се во напорите во потрага по ефикасен лек за оваа болест. Компанијата „Астра Зенека“, што во моментов спроведува клиничко испитување на вакцина против новиот коронавирус, соопшти дека раната фаза на тестирање AZD7442, комбинација на две моноклонални тела, има за цел да ја утврди безбедноста на овој лек. Во оваа фаза се вклучени 48 здрави доброволци од Велика Британија, на возраст од 18 и 55 години. Доколку оваа фаза покаже позитивни резултати, „Астра Зенека ќе продолжи со натамошни студии за да се утврди ефикасноста на AZD7442 во спречување на инфекција од Ковид-19, како и во лекување на пациенти кои веќе се заболени од новиот коронавирус. AZD7442 е комбинација на две лабораториски произведени моноклонални антитела кои имитираат природни антитела произведени од човечкото тело и во моментов се користи за лекување на некои видови на карцином. „Астра Зенека“ во јуни доби 23,7 милиони долари од американските владини агенции за подобрување на терапијата со антитела за лекување од Ковид-19. Оваа терапија во моментов ја тестираат и американските компании „Регенерон“ и „Ели Лили“. (MИА)