Фатмир Битиќи – Kurir.mk

Битиќи: Би прифатил да бидам премиер 100 дена пред избори и консензуален кандидат за претседател

Ивона Петрова — Thu, 26 Oct 2023 18:51:32 +0000

Потпретседателот на СДСМ и вицепремиер за економски прашања Фатмир Битиќи изјави дека би прифатил да биде премиер 100 дена пред избори доколку тоа биде побарано од него. За можноста да се кандидира за претседател на државата, пак, вели дека „ако се зборува за консензуален кандидат независно на етничкото потекло и тој е најдобриот за тоа, радо би прифатил“. -Јас знам дека има договор помеѓу СДСМ и ДУИ за последните 100 дена да биде Албанец премиер. Јас не се преоптоварувам со тоа решение. Јас сум навикнат и научен во мојот живот да работам до последниот момент. Ако приликите дојдат да се бара од мене да служам на народот во функцијата премиер велам – да, истакна Битиќи во Само интервју на Канал 5 телевизија. На прашањето дали би прифатил да биде консензуален кандидат за претседател на државата, Битиќи со став дека ако се зборува за консензуален кандидат независно на етничкото потекло и тој е најдобриот за тоа, радо би прифатил, но, како што потенцираше, ако консензуалниот кандидат е само за да биде Албанец, нема да прифати.

Битиќи: Изборите ќе бидат редовни, сите партии што се отворени може да се обединат

Ивана Ефремовски — Tue, 17 Oct 2023 19:27:12 +0000

Изборите ќе бидат редовни, имаме ист став и во партијата и во коалицијата, рече вечерва потпретседателот на СДСМ и вицепремиер за економски прашања, Фатмир Битиќи. Според него, претседателските и парламентарните избори треба да бидат одвоени, а за доброто на земјата може да се разговара за термините. Како што истакна Битиќи во дневникот на ТВ Алсат М, сите партии што се отворени може да се обединат или во заеднички листи или во заеднички дух за подобра, европска иднина на државата. -Во минатото докажавме дека имаме широк коалициски капацитет и со различни партии. И последните парламентарни избори во 2020 година беа во таков дух. Сега го нарекуваме европски фронт. Сите партии што се отворени можат да се обединат или во заеднички листи или во заеднички дух за подобра, европска иднина на државата, истакна Битиќи. (МИА)

Битиќи: Ќе предложиме закон за корекција на платите на функционерите

Ивона Петрова — Tue, 17 Oct 2023 06:51:23 +0000

Вицепремиерот за економски прашања Фатмир Битиќи најави дека денеска на Влада ќе биде поднсено законско решение за Законот за плати на избрани и именувани лица, за поправедено решение, со кое ќе бидат ослободени дел од средствата за антикризни мерки за најранливите категории граѓани. -Минатата недела Владата донесе одлука и не задолжи работна група од четири министри за нови антикризни мерки. Утре ќе дадеме и законско решение за Законот за плати на избрани и именувани лица, за поправедено решение, со кое ќе ослободиме дел од средствата за антикризни мерки за најранливите катерогии, бидејќи тоа е клучно во временски периоди кога сите треба да покажеме солидарност, најави синоќа Битиќи во гостувањето во емисијата „24 Анализа“ на телевизија 24. Тој нагласи и дека со пренамената на буџетот ќе има нов пакет на антикризни мерки од околу 70 милиони евра кои ќе бидат наменети за најранливите категории на граѓани. -Остануваат денови до обзнанување на новиот пакет мерки, рече Битиќи, и нагласи дека оваа Влада предводена од СДСМ поинаку ги сфаќа ранливите категории и креира мерки таргетирани за нив. Законот за минимална плата е закон кој, рече, мора да почитува и во јавниот и во приватниот сектор, а следното усогласување мора да се случи во март, кога минималната плата ќе се усогласи со стапката на инфлација и растот на просечната плата, додека пензиите се усогласуваат два пати годишно. Вицепремиерот Битиќи меѓу другото, истакна дека значително растат и странските инвестиции во државата. Пикот на инвестиции по влезот во НАТО, според него, беше одложен поради ковид кризата, но дека сега доаѓа. При тоа посочи дека се водат финални преговори со јужнокорејските компании Хјундаи и ЛГ да донесат дел од производството во нашата држава, додека други компании како Герцхајмер, Техникал текстајл, Вик влегуваат во наредни циклуси на инвестиции. Истовремено, вели Битиќи, се поддржуваат домашните компании и тоа поддржани се 919 македонски компании, кои имаат реализирано 500 милиони инвестиции, кои се доволно конкурентни за отворениот пазар на ЕУ.

Вицепремиерот Битиќи нервозно ја напушти прес-конференцијата на Ковачевски: Не му се допадна прашањето за целосно владеење на ДУИ со државата (ВИДЕО)

Тале Кристо — Fri, 13 Oct 2023 14:59:52 +0000

Вицепремиерот за економски прашања Фатмир Битиќи ја напушти денешната заедничка прес-конференција со премиерот Димитар Ковачевски, откако еден од новинарите го праша премиерот што мисли за сценариото највисоките државни функции да ѝ припаднат на ДУИ доколку не бидат успешни претседателските избори. „Во случај на неуспешни претседателски избори, дали сте подготвени да прифатите дека државата останува во рацете на ДУИ со тоа што ќе биде назначен Албанец за премиер, а функцијата шеф на државата ќе му припадне на собранискиот спикер Талат Џафери?“, гласеше новинарското прашање упатено до Ковачевски. Очигледно од самата реакција, на Битиќи не му се допадна и веднаш реагираше со зборовите: – Јас мислам дека не треба да стојам тука на вакви прашања – рече Битиќи и ја напушти прес-конференцијата. Камерите го снимија вицепремиерот како нервозно се качува во автомобил и без поздрав го напушта местото. За Ковачевски новинарското прашање било „апсолутно некоректно“. – Денес во нашата држава имаме концепт за европска Македонија, којшто го предводи Владата и СДСМ. Што ги третира сите граѓани еднакво според нивната етничка, верска и која било друга припадност. Меѓутоа, имаме појава е еден популизам, којшто во својата основа има етно-национализам и ксенофобија, што за мене е форма на модерен фашизам, рече Ковачевски.

Зошто потпретседателот на Сдс демонстративно ја напушти прес конференцијата а Таче вели дека прашањето е некоректно?
Кој повеќе се навреди за можното сценарио "целосна власт на Дуи"?https://t.co/n8Y1N127R8 pic.twitter.com/gXXKfIpc4z
— Бемка (@B1PcG6cyiRrcoTr) October 13, 2023

Потпретседателот на СДСМ, Битиќи: Потребно е помирување со Груевски и да се обезбеди бројка на пратеници

Ивона Петрова — Tue, 10 Oct 2023 05:50:34 +0000

Потпретседателот на СДСМ Фатмир Битиќи говори за помирување и ублажување на казни и вели дека уставните измени нема да се гласаат додека не се обезбедат бројките. На ова Битиќи се осврна во вчерашното гостување во емисијата Клик плус што се емитува на телевизија 21. На прашањето може ли тоа да биде еден од начините власта да се пазари со гласови во замена за враќање на Никола Груевски, Битиќи вели дека е подготвен за доброто на државата да се согласи со условите што му се поставени. Битиќи вели дека е „првиот што седнува и зборува за помирување“. Истакна дека е за помирување со Груевски. -Ако резултатот од тоа помирување може да донесе појасна иднина за државата и идните генерации кои треба да живеат овде тогаш треба да се зборува за тоа, вели Битиќи кој на прашањето пак дали тука мисли и на враќањето на Груевски Битиќи додава: „Да, да. Помирувањето може донекаде да ја ублажи казната“.

Битиќи: Повиците за онлајн игри на среќа ќе се организираат транспарентно, преку оглас

Тале Кристо — Mon, 09 Oct 2023 13:24:55 +0000

Повиците за онлајн игри на среќа ќе се организираат транспарентно, преку оглас на кој ќе се изберат одредени компании, рече денеска вицепремиерот за економски прашања Фатмир Битиќи. Според Битиќи, може да аплицира секој што ги исполнува условите. -Не знам каде и зошто некој го прочитал ограничувањето дека не дава Владата. Повиците за онлајн игри на среќа ќе се организираат транспарентно, преку оглас на кој ќе се изберат одредени компании кои ќе ги приредуваат онлај игрите на среќа. Секако, секој што ги исполнува условите е повикан да аплицира. Ако сакаме да правиме нешто на неорганизиран начин, тогаш да продолжиме на неорганизиран начин, ако сакаме се уште да гледаме казина во дворовите на училиштата и до верските објекти, да продолжиме тоа да го правиме, но сметам дека штетата е многу поголема, истакна Битиќи, одговорајќи на новинарски прашања по конференцијата „Македонска економија-довербата расте“.

Битиќи во Вашингтон: Размената на стоки со САД бележи нагорна линија, потенцијалот на соработката ќе расте уште повеќе

Ристе Здравков — Tue, 26 Sep 2023 18:16:12 +0000

Зменик-претседателот на Владата на Република Северна Македонија задолжен за економски прашања, координација на економските ресори и инвестиции, Фатмир Битиќи, во Вашингтон оствари средба со Дејвид де Фалко, заменик помошник секретар за Европа и Евроазија при американското Министерство за трговија. На средбата, вицепремиерот Битиќи и де Фалко разговараа за унапредување на економската соработка помеѓу Северна Македонија и САД особено во областите на енергетика, ИКТ, земјоделство, транспорт и во одбранбената индустрија. Вицепремиерот Битиќи подвлече дека размената на стоки меѓу Северна Македонија и САД бележи нагорна линија и додаде дека во периодот јануари – јули 2023 година, бележи пораст од 3.8 % во однос на истиот период од претходната година. Ова додаде Битиќи, се многу оптимистички бројки кои говорат за потенцијалот на соработката која може да биде уште поголема. На средбата, вицепремиерот Битиќи го стави фокусот во креирање силен регионален синџир на вредност со што значително ќе се подобри конкурентноста на Северна Македонија, и тука ја спомна потребата од “near shoring“, со што земјата, регионот, но и Европа како целина нема да зависат од далечните азиски синџири за снабдување, како што беше примерот за време на КОВИД кризата. Заменик- помошникот на американскиот секретар за трговија за Европа и Евроазија, Дејвид де Фалко, од негова страна истакна дека Северна Македонија е стратешки политички и економски партнер на САД и додаде дека оваа соработка ќе се унапредува уште повеќе во наредниот период.

Битиќи во Њу Џерси: Државната поддршка за инвестиции е потпора и за пазарните успеси на македонските компании во САД

Ристе Здравков — Fri, 22 Sep 2023 10:45:03 +0000

Заменикот на претседателот на Владата на Република Северна Македонија, задолжен за економски прашања, координација на економските ресори и инвестиции, Фатмир Битиќи, заедно со претседателот Стево Пендаровски, во рамки на работната посета на САД, по повод учество на Генералното собрание на ОН, ја посетија компанијата „Фаст Пак Трејдинг“, во сопственост на Иванчо Ивановски, основана пред 30 години, а која врши дистрибуција на над 1.000 различни македонски производи во сите сојузни држави на САД. При обиколката на дистрибутивниот центар на компанијата во Њу Џерси, вицепремиерот Битиќи, ја истакна заложбата на Владата за негување и развивање на контактите со дијаспората, посебно во насока на унапредување на економските врски и создавање на стимулативни услови кои мотивирачки би делувале, Северна Македонија да ја препознаат како реална можност за развивање на нивниот бизнис. Вицепремиерот Битиќи изрази задоволство што компанијата „Фаст Пак Трејдинг“ е пример за тоа како еден бизнисмен од македонската дијаспора може да допринесе во развивањето и унапредувањето на економските врски помеѓу САД и Северна Македонија, особено од фактот што сите добавувачи на компанијата „Фаст Пак Трејдинг“ се од Северна Македонија. „Задоволство е да се види како успесите кои се остваруваат на американскиот пазар од над 300 милиони потрошувачи во целост се засноваат на потенцијалите на стопанството во Северна Македонија. Уште повеќе радува фактот дека пазарниот успех е споделен со компании од Северна Македонија, чии производи, благодарение на претприемачките способности на г-нот Ивановски, завршуваат на пазарот во САД. Ова зборува дека во нашето стопанство имаме компетитивни компании способни да испорачаат конкурентни производи и во најсилната економија во светот. Успесите на „Фаст Пак Трејдинк“ се потврда и за ефективните политики на Владата за поддршка на инвестициите, затоа што дел од добавувачите во Северна Македонија финансиски се поддржани преку Законот за финансиска поддршка на инвестициите“, рече вицепремиерот Битиќи по обиколката на еден од дистрибутивните центри на компанијата. Вицепремиерот Битиќи изразувајќи честитки за успесите на компанијата, на сопственикот Ивановски му порача своето претприемачко знаење да го пренесе во Северна Македонија и со тоа уште подлабоко да се вклучи во градењето на економскиот развој на земјата и зголемувањето на благосостојбата на граѓаните, за што од Владата може да очекуваат силна партнерска поддршка.

Антикризни мерки ќе има, ама во ноември, вели Битиќи

Ристе Здравков — Wed, 13 Sep 2023 05:46:58 +0000

Одредени антикризни мерки би требало да бидат активни за граѓаните на почетокот на ноември, најави денеска вицепремиерот за економски прашања, Фатмир Битиќи. Мерките ќе се подготват додека во Собранието не помине одлуката што претходно ја усвои Владата за прераспределба на средства од буџетот, со која се одвоени средства за таа намена. -Со пренамената во новиот буџет, вкалкулирани се антикризните мерки. Мерките ќе се спремат додека заврши собраниската процедура. Очекувам дека одредени мерки веќе на почеток на ноември би требало да бидат активни за нашите граѓани, рече Битиќи на денешната прес-конференција во Владата заедно со министерката за култура Бисера Костадиновска Стојчевска и додаде дека на 19 септември би требало да има нова собраниска седница. Нагласи дека засега податоците не укажуваат дека треба да се донесат одредени мерки коишто директно би требало да помогнат на стопанството, затоа што, како што рече, Владата се стреми да им помогне на ранливите и маргинизирани целни групи, без разлика дали се работи за лица со ниски приходи, студенти или млади. На крајот, додаде, секако средствата завршуваат кај стопанствениците. Истото денеска го потврди и министерката за труд и социјална политика, Јованка Тренчевска на дебата со релевантните чинители, граѓанскиот сектор и со стопанските комори, за потребите на граѓаните и на реалниот сектор. -Ќе имаме нов пакет на антикризни мерки. Разговараме и во рамки на Владата и во рамки на министрите од економскиот ресор за се што треба да направивме за граѓаните, особено во текот на зимскиот период што доаѓа и како да има повеќе приход, особено во семејствата на ранливи категории на граѓани, рече Тренчевска. Битиќи најави дека деновиве ќе бидат обзнаени целните групи кои што ќе бидат опфатени со пакетот антикризни мерки. -За некој ден мислам дека ќе бидат соодветно обзнаени. Не сакаме да ги кажеме мерките, затоа што имаме доволно искуство со антикризните мерки, почнувајќи од 2020 година со ковид, кога знаеме дека спроведувањето ни правеше тешкотии. Не сакаме да донесеме мерка со која што после во спроведувањето ќе имаме тешкотии. Гледаме како да ги елиминираме тие елементи, за да имаме добро и навремено спроведени мерки кон сите граѓани, рече Битиќи.

Битиќи: Членството во ЕУ ќе донесе трајни и големи економски придобивки за граѓаните и компаниите

Ристе Здравков — Mon, 21 Aug 2023 10:43:11 +0000

„Усвојувањето на уставните измени во Собранието на Република Северна Македонија, а со тоа и овозможување да продолжи евро-интегративниот пат на нашата држава, не е само политичко прашања, туку и прашање на економски структурни промени кои треба да донесат низа на трајни придобивки како за нашето стопанство, така и за граѓаните“, пишува на својата Фејсбук страна заменик-претседателот на Владата задолжен за економски прашања, координација на економските ресори и инвестиции, Фатмир Битиќи. Тој посочува дека остварувањето на стратешката определба на 80% од граѓаните на државата за зачленување во ЕУ најважно е дека ќе значи повисок животен стандард и поголема куповна моќ за нив. „Една од најголемите придобивки која стои пред нашата држава е создавање на реални услови за голем раст на платите, кој кај одредени држави во првите пет години по зачленувањето во ЕУ се движеше од над 50 отсто, па се до 100 отсто. Ова ќе биде директна придобивка за куповната моќ за граѓаните, за нивниот смеен буџет и животен стандард. ЕУ е најголемиот наш економски партнер, нашето стопанство органски е поврзано со европското, 77,5% од извозот завршува во некоја од 27-те држави членки, додека 51% од увозот доаѓа од таму. Ова значи дека домашните компании создаваат дополнителна економска вредност, креираат и одржуваат работни места за нашите сограѓани преку деловна соработка со европски компании, односно основата на нивниот раст и развој лежи на европски трговски основи“, пишува вицепремиерот за економски прашања Битиќи. Во својот пост на Фејсбук, тој истакнува дека со полноправното членство во ЕУ на нашата економија ќе се отворат вратите на единствениот европски пазар од 500 милиони потрошувачи, што дополнително ќе ги зајакне трговските перспективи и потенцијалите за остварување на одржливи стапки на раст на БДП. „Искуството на други држави покажува дека во првите пет години од зачленувањето во Унијата, стапките на раст на БДП се зголемуваат од 80 до 90 отсто. Поедноставената трговија ќе ги зголеми можностите за извоз, ќе создаде деловни услови за намалување на трошоците и зголемување на ефикасноста на домашните компании. Слободното движење на работната сила во рамки на европскиот економски простор ќе им овозможи на компаниите да пристапат до нови човечки ресурси, со развиени таленти и напредни знаења, што ќе биде силна поддршка да ја зголемат нивната приспособливост на променливите барања на пазарот“, пишува Битиќи. Вицепремиерот за економски прашања Битиќи потсетува дека ЕУ е наш најголем финансиски поддржувач, донатор и кредитор во сите области, таа ни помага во европеизирањето на македонскиот бизнис модел. „Само во досегашниот евроинтегративен процес на земјата преку ИПА програмата се вложени околу 1 милијарда евра за модернизација и развој на инфраструктурата, што има витално значење за водењето на бизнис во земјава. Но тоа не е се, преку ИПА 3 програмата проектирани се финансиски средства од 243 милиони евра. ИПАРД 2 програмата ни стави на располагање 60 милиони евра, на кои имавме рекордна искористеност од 98 отсто, поради што во ИПАРД 3 ни се ставаат на располагање неповратни 97 милиони евра за унапредување на нашето земјоделството. Партнерството со ЕУ за нашата држава значеше и грант од 80 милиони евра за справување со енергетската криза, 100 милиони евра макроекономска помош и 160 милиони евра за ублажување на економските последици од пандемијата“, пишува Битиќи. Тој истакнува дека малите и средните претпријатија се ’рбетот на економијата на нашата земјата и создаваат околу 80% од работните места, а ЕУ помага во градењето и одржувањето на нивната профитабилност. Само преку Програмата за поддршка на малите и средни претпријатија за пристап на пазарите на ЕУ низ унапредена конкуренција на компаниите им се достапни 36 милиони евра за зголемување на нивните конкурентни капацитети. „Со забрзувањето на евроинтегративните процеси и нивното финализирање со полноправно членство, директната поддршка за економија ќе продолжи и ќе биде многу повисока. На државата и стопанството ќе и им бидат достапни нови програми и фондови, кои може да бидат и за 11 пати повисоки отколку фондовите и програмите кои им се достапни на земји кандидати за полноправно членство. Овие историски шанси кои се пред нашата економија не смееме да ги пропуштиме. Не постои друга реална перспектива или алтернатива која на нашата економија ќе и постави долгорочни и цврсти темели за остварување на забрзан, одржлив и долгорочен раст, зголемена конкурентност на компаниите и повисок животен стандард на граѓаните“, се вели во објавата на Фејсбук на вицепремиерот за економски прашања Фатмир Битиќи.