Фатмир Лимај – Kurir.mk

Лимај најавува во преговарачкиот процес барање воена отштета од Србија

Предраг Кукиќ — Sun, 16 Dec 2018 08:52:59 +0000

Фатмир Лимај потпретседател на косовската влада и еден од двата шефови на новоизбраниот приштински тим за продолжување на дијалогот со Белград, изјави дека „барање за воена отштета“ ќе биде една од 15-те теми за завршување на тој процес. Тој повтори дека меѓу другите теми се, „меѓусебно признавање, исчезнати лица и сукцесија“, објави Коха диторе. Лимај е еден од поранешните команданти на ОВК. Изјавата ја даде откако Парламентот синоќа усвои резолуција за продолжување на дијалогот и потврди нов тим за финалната фаза од дијалогот што ќе го предводи лидерот на опозициската СДП, Шпенд Ахмети. Министерот за одбрана на Србија, Александар Вулин оцени синоќа дека изборот на Лимај е „потценување на здравиот разум и само иедеја за дијалог“. – Кога на чело на преговарачки тим ставате убиец тогаш јасно е дека сакате преговорите да бидат убиени. Да го ставите Лимај во преговарачки тим тоа е потценување со здравиот разум и само идеја за дијалог“, нагласи Вулин.

Лимај: Нема Албанец кој би сакал да разговара со Вучиќ и Дачиќ, но тие се избрани од нивниот народ

Матеја Петровски — Wed, 12 Sep 2018 11:43:26 +0000

Лидерот на владејачката партија Иницијатива за Косово (Нисма) и потпретседател на косовската Влада, Фатмир Лимај вели дека во 1999 година заврши времето кога Србија се трудеше да најде претставници на Албанците со кои ќе разговара и кои ќе бидат по мерка на Србите, јави дописникто на МИА од Приштина. Лимај е на чело на тимот што косовскиот премиер Рамуш Харадинај го состави за да ја претставува Владата на Косово на преговорите со Србија во Брисел, а во кој се уште и вицепремиерите Енвер Хоџај и Беџет Пацоли, министрите за јавна администрација и за дијаспора, Махир Јагчилар и Дардан Гаши и досегашниот главен претставник на Владата во преговорите, Авни Арифи. Претседателот на Србија Александар Вучиќ и министерот за надворешни работи Ивица Дачиќ изјавија дека не го прифаќаат Лимај за шеф на владиниот преговарачки тим, поради неговата улога во војната во 1998-99 година, на што косовскиот вицепремиер одговори дека „не верува оти постои Албанец кој би сакал да разговара со Вучиќ и Дачиќ, меѓутоа тие се избраниците на нивниот народ“. Потпретседателот на косовската Влада рече дека во моментов нема никаков предлог од Србија дека под одредени услови би ја признала независноста на Косово. - Нека каже Србија дека го сака половина Косово во замена за признавањето на Косово и ние ќе го дадеме нашиот одговор. Без официјален предлог не знаеме за што зборуваме. Ние ги имаме нашите барања, а тоа се признавање и зачленување во ОН, но од Србија немаме официјален предлог, изјави Лимај. Тој рече дека меѓу политичките субјекти на Албанците во Косово има разлики и недоверба, но порача дека во овој момент тие мора да се обединат. - Во Косово имаме недоверба. Имаме дискутабилни личности. Имаме недоверба поради разни причини и разни искуства. Јас имам проблеми со претседателот (Хашим Тачи), а и тоа е нормално. Но, тоа е внатрешна, национална тема. А, во Брисел треба да бидеме заедно и да понесеме одговорност, изјави Лимај. (Миа)

Лимај: Тачи не е добар избор за водење на разговорите меѓу Пришина и Белград

Ивана Ефремовски — Fri, 27 Apr 2018 06:18:12 +0000

Заменикот на косовскиот премиер и лидер на Иницијативата за Косово, Фатмир Лимај изјави дека косовскиот претседател Хашим Тачи не е добар човек за водење разговори меѓу Приштина и Белград. Тој наведе и дека Владата се уште не донела одлука кој ќе ги води овие разговори, пренесува „Газета експрес“. Лимај изјави дека неговата партија ќе има проблем ако овие разговори ги предводи Хашим Тачи. - Ние бараме овие разговори да ги води некој во кој доверба имаат сите партии во Владата и Собранието на Косово, рече тој и додаде дека сите партии треба да го кажат своето мислење кога станува збор за дијалогот Белград-Приштина. Лимај истакна дека „Харадинај зборувал во свое име“. - Владата, Парламентот и другите партии се уште го немаат кажано своето мислење за тоа кој ќе ги води овие разговори, истакна тој и додаде дека Иницијатива за Косово од оној што ќе ги води разговорите ќе бара да поднесува извештаи за се што се случува во Брисел. (МИА)

Поранешниот командант во ОВК ослободен од обвинението за воено злосторство

Ивона Петрова — Fri, 09 Mar 2018 11:16:05 +0000

Фатмир Лимај, актуелен пратеник во косовското Собрание и поранешен командант во Олободителната војска на Косово (ОВК), е ослободен од обвиненијата за воено злосторство. По повеќе од 18 месеци од покренуивањето обвинение, Основниот суд во Ѓаковица го ослободи Лимај од обвиненијата, бидејќи „не се докажани елементите на кривично дело“. Обвинителство пред година и половина го обвини Лимај за воени злосторства, поврзани со убиство на двајца цивили од албанска националност, извршено во октомври 1998 година, во близина на селото Беланица во општина Малишево. Според обвинението, Лимај како командант на 121-та бригада на ОВК, „не презел разумни и неопходни мерки во согласност со своите надлежности, за да го спречи убиството на Рамиз Хоџа и Селман Биниши“. Хоџа, од селото Беланица, и Биниши, од селото Бања, во кое што е роден и Лимај, биле киднапирани на 2 октомври 1998 година, во близина на џамијата во Беланица, а потоа егсекутирани околу четири километри подалеку, во близина на селото Кравасари. Во обвинението беше наведено дека Лимај ги видел телата на жртвите и бил свесен за злосторствата, но дека „намерно не презел мерки за пронаоѓање на сторителите и оти никогаш не го пријавил случајот до надлежните органи, за да може да се спроведе истрага и за да може случајот да биде процесиран“.