федерер – Kurir.mk

Емотивна вечер во Лондон: Федерер во солзи ја заврши кариерата

Ивана Ефремовски — Sat, 24 Sep 2022 07:53:12 +0000

Еден од најдобрите тенисери на сите времиња Роџер Федерер во својот последен натпревар во кариерата не успеа да забележи победа во двојки со Рафаел Надал, иако беа на поен од триумф, но на крајот славеше американскиот пар Џек Сок и Френсис Тијафо со 4-6, 7-6, 11-9. Последниот натпревар во кариерата на легендарниот швајцарски тенисер одигран на егзибицискиот Лејвер куп во Лондон траеше два часа и 15 минути и донесе фантастичен тенис. Во драматичен расплет, исполнет со безброј прекрасни поени, Федерер и Надал во продолжениот тајбрејк поведоа со 9-8 и имаа меч топка на сервис на Швајцарецот, но Сок и Тијафо нанижаа три поени и му ускратија победничко збогување на Федерер со тенисот. „Ова беше прекрасен ден. Им реков на момците дека сум среќен, дека уживав. Беше ова одличен натпревар“, изјави Федерер пред публиката во преполната О2 Арена во Лондон, Федерер потоа со многу емоции и солзи се поздрави со членовите на Тимот на Европа, а емотивното збогување продолжи и кога се поздравуваше со противничкиот табор од Тимот на остатокот на светот. Федерер стави точка на кариерата во која освои 103 трофеи, вклучувајќи 20 грен – слем титули. (МИА)

Новак Ѓоковиќ го надмина Федерер и постави нов светски рекорд во тенисот

Тале Кристо — Mon, 08 Mar 2021 08:56:34 +0000

Српскиот тенисер Новак Ѓоковиќ денес ја започна 311. недела како прв „рекет“ на светот, се наведува на официјалната веб-страница на АТП. Така, 33-годишниот Србин постави нов рекорд во светот на тенисот. Претходното достигнување му припаѓаше на Швајцарецот Роџер Федерер (310 недели). Новак Ѓоковиќ е 18-кратен победник на Грен слем турнирите, вклучувајќи го и неодамнешниот трофеј од Австралија опен 2021

Федерер нема да игра на Австралија опен

Тале Кристо — Mon, 28 Dec 2020 08:25:21 +0000

Агентот на Роџер Федерер Тони Годсик, соопшти дека тенисерот ќе го пропушти Австралија опен во Мелбурн. Швајцарецот се очекува да се врати на терените по закрепнувањето од повредата, некаде на крајот на февруари. Претходно, 39-годишниот Федерер изјави дека приоритети во 2021 година за него се Олимписките игри, Вимблдон и УС Опен. Единствениот турнир што Федерер го играше во 2020 година беше Австралија опен, каде стигна до полуфиналето. После тоа тој беше подложен на две операции на десното колено.

Федерер, Роналдо и Меси се најдоа во Топ 5 најплатени славни личности за 2020 година

Тале Кристо — Thu, 17 Dec 2020 08:23:22 +0000

Престижниот американски магазин „Форбс“ објави ажурирано рангирање на најплатените познати личности во светот на крајот на 2020 година. Тројца спортисти се наоѓаат во топ 5 ранг-листа: тенисерот Роџер Федерер (3. место, 106,3 милиони долари годишно), како и фудбалерите Кристијано Роналдо (Јувентус, 4. место, 105 милиони долари) и Лионел Меси ( Барселона, 5. место, 104 милиони долари). Уште двајца спортисти се наоѓаат во Топ 10 на листата на Форбс: Напаѓачот на ПСЖ, Нејмар (7. место, 95,5 милиони долари) и кошаркарот на Лејкерс, Леброн Џејмс (9. место, 88,2 милиони долари). Првото место на крајот на годината го зазеде моделот Кајли Џенер (590 милиони долари), втор беше раперот Кание Вест (170 милиони долари).

Линдзи Вон: Без Федерер, спортот никогаш нема да биде ист, за мене тој е најдобриот играч на сите времиња

Тале Кристо — Sat, 12 Dec 2020 08:17:14 +0000

Олимписката шампионка во алпско скијање, Линдзи Вон искажа голема почит кон швајцарскиот тенисер Роџер Федерер. – Роџер сака да остане во спортот што е можно подолго. Јас исто така се однесував кон скијањето, но во одреден момент телото рече: „Не, ова е премногу“. Не знам во која фаза е сега тој, но сигурен сум дека тука не е крајот. Федерер е многу посветен на тенисот, поради што останува конкурентен толку долго. Поради него, почнав да гледам тенис, и без него спортот никогаш нема да биде ист, истакна Вон. Американката додаде дека многу го почитува и Рафаел Надал. – Неговите достигнувања на земја се неверојатни, но јас бев и сум фан на Федерер. За мене, Роџер е најдобриот играч на сите времиња. Зачудувачка благодат, совршена рамнотежа – ретко кој може да го повтори ова, потенцира Вон.

Федерер нема да замине во пензија дури и кога ќе наполни 40 години

Тале Кристо — Sat, 18 Jul 2020 12:13:19 +0000

Роџер Федерер нема да замине во пензија во 2021 година, тврди неговиот долгогодишен тренер и пријател, Северин Лути. Во интервјуто за швајцарскиот магазин „Смаш“, тој најави дека освојувачот на 20 Гренд-слем титули ќе продолжи да игра со несмалена желба, но тој прво мора да се опорави. Федерер во последните неколку месеци имаше две операции на коленото и нема да игра до крајот на сезоната. – Повредата пристигна во најдобар можен час и уште подобро кога имате предвид што се случува со рангирањето, иако тоа не влијае многу врз него во емотивна смисла. Тој не е некој што се чувствува фрустриран. Ден по операцијата, тој веќе планираше како ќе го помине времето со семејството. Тој ја има оваа уникатна карактеристика да одржува големи амбиции без да биде опседнат или фрустриран кога се случуваат несакани работи, вели Лути. Швајцарскиот стручњак, кој долги години е на чело на националниот Дејвис Куп тим, гледа одредена паралела со повредата на Федерер од 2016 година. – Има одредени паралели. И двапат поминал на операција и во двата случаи се влошуваше состојбата, па практично моравме да започнеме од почеток, а му требаше повеќе време за рехабилитација. Од првиот момент, тој погледна кон иднината со оптимизам и ентузијазам, пристапи кон сè на многу позитивен начин. Мислам дека ќе биде многу корисно за него тоа што го помина во 2016 година, смета Северин. На прашањето кога Роџер би можел да замине во пензија, бидејќи спомна одредена можност дека тоа ќе се случи во блиска иднина, Лути рече дека не мисли дека тоа нема да се случи наскоро. – Чувството ми е дека тој нема брзо да се повлече. Тој сè уште сака да игра тенис, никогаш не сум го чул како вели дека сака да запре и да си го смени животот или дека е уморен од патувањето. Не можете ништо да отфрлите 100%, но гледајќи како тој продолжува да ужива во тенисот и со пријателите насекаде, не мислам дека ќе замине во пензија во 2021 година, заклучи Лути.

Федерер ќе го пропушти остатокот од сезоната, Ѓоковиќ размислува да не оди на УС опен

Тале Кристо — Wed, 10 Jun 2020 07:44:39 +0000

Швајцарскиот тенисер Роџер Федерер најави дека нема да настапи во 2020 година. – Драги обожаватели, се надевам дека сте здрави и безбедни. Пред неколку недели, кога наидов на проблеми, за време на закрепнувањето, морав да претрпам дополнителна артроскопска процедура на десното колено, напиша Швајцарецот на Твитер. Тоа значи дека Федерер најверојатно нема да игра цела година, додека српскиот тенисер и прв светски рекет Новак Ѓоковиќ јасно стави до знаење дека може да го пропушти УС Опен. – Повеќето играчи со кои разговарав се доста негативни во врска со можноста да одат таму. За мене, најверојатно, во тековната ситуација, сезоната ќе продолжи во септември, соопшти Ѓоковиќ. Во моментот, стартот на УС Опен е закажан за 31 август. Тениската асоцијација на САД следната недела треба да донесе одлука за нејзиното одржување. Во исто време, тенисерите ќе треба да бидат ставени во карантин 14 дена по пристигнувањето во земјата. Исто така, како резултат на состојбата со коронавирус, пристапот до терените ќе биде ограничен. Претходно почетокот на Грен слемот „Ролан Гарос“ беше одложен за септември.

Федерер и Кербер на турнир на трева во Берлин

Тале Кристо — Mon, 01 Jun 2020 17:04:02 +0000

Роџер Федерер, 20-кратен Гренд-слем шампион, би можел да се врати во тенис во јули на егзибициски турнир на трева во Берлин. Во моментов се планира германската престолнина да биде домаќин на два тридневни настани со шест мажи и шест жени – првиот на трева на стадионот „Штефи Граф“ и вториот на тврди терени во авионски хангар. Двата турнири ќе понудат награден фонд од 200 000 долари. Меѓу мажите кои се пријавиле за учество се веќе Доминик Тим, Александар Зверев, Ник Кириос, Јаник Синер и на нив ќе им се придружат уште двајца играчи. – Секако дека ќе го прашаме и Роџер Федерер, рече организаторот Едвин Вајндорфер. Федерер не играл конкурентен тенис откако беше подложен на операција на коленото по Австралија опен во јануари. Тој требаше да се врати на сезоната на трева пред коронавирусот да го запре тенисот. Во Европа се планирани најмалку десетина турнири во затворено, додека спортот останува суспендиран до крајот на јули. Германката Анџелик Кербер исто доби покана за влез во женскиот турнир, во која веќе влегуваат Елина Свитолина, Кики Бертенс, Јулија Гергес и Андреа Петковиќ.

Федерер ја призна доминацијата на Ѓоковиќ во последните години

Тале Кристо — Tue, 26 May 2020 14:34:28 +0000

Дваесеткратниот победник на Грен слем турнирите, Роџер Федерер изјави дека Новак Ѓоковиќ е најдобриот тенисер во последните години. – Последните години се ера на Ѓоковиќ. Освен „Ролан Гарос“, затоа што таму владее Надал. Кога ќе погледнете наназад и гледате дека 4,5 – 5 години што не сум победил на Грен слем, луѓето скоро ми звучат како да играв ужасно. Имав тешка година во 2013 година со многу болки во грбот од Индијан Велс во текот на целото лето. Мислам дека успеав да продолжам затоа што верував дека сум многу добар и имав добар тим и никогаш не изгубив мотивација, изјави Федерер. Швајцарецот има освоено рекордни 20 Грен слем титули, додека Ѓоковиќ 17.

Федерер донира 1 милион долари за 64.000 деца

Тале Кристо — Wed, 06 May 2020 20:42:14 +0000

Фондацијата Роџер Федерер издвои еден милион долари за помош на Африка. Идејата е да се пренесат парите на семејствата погодени од кризата со коронавирусот на тој континент. Средствата ќе бидат дистрибуирани преку институции за да им помогнат на над 64,000 деца и нивните семејства. Заедно со неговата сопруга Мирка, Роџер веќе донираше милион швајцарски франци за помош во неговата земја за време на пандемијата.