ферус мустафов – Kurir.mk

По смртта на неговите татко и дедо: Ферчо Мустафов ќе објави заедничко оро кое го создале со Ферус и Илми

Ивана Ефремовски — Fri, 13 Oct 2023 11:24:13 +0000

Пред неколку месеци како гром од ведро небо дојде информацијата дека од овој свет си замина легендарниот виртуоз на саксафон, најдобриот на овие простори – Кралот Ферус Мустафов. Тоа како да не беше доволна трагедија во семејството Мустафов, па по неколку месеци од смртта на Ферус, почина и неговиот син Илми Мустафов. Најмногу овие трагедии го погодија внукот на Ферус, односно синот на Илми, Ферчо Мустафов, кој е нивниот наследник и според многумина, единствениот кој може да го замени кралот на саксафонот. Инаку Ферчо уште пред смртта на Ферус и Илми се пресели во Србија, каде живее и соработува со најголемите тамошни ѕвезди како Цеца и многу други. Младиот музичар пред неколку дена го заврши снимањето на видеоспотот за заедничкото оро кое го создале токму тој, татко му и дедо му Ферус. Како што вели тој, за жал во спотот се појавува само тој, иако планот било и видеото да го снимаат тројцата, но судбината одлучила да биде поинаку... „Пред два дена го завршивме снимањето на видеоспотот за орото кое го работевме заедно со дедо ми и татко ми. Поради ситуацијата што се случи, спотот го снимав сам. Тој ќе биде готов за дваесетина дена од сега, па публиката ќе има прилика да го види и слушне она што го создадовме со дедо ми Ферус и татко ми Илми“, вели младиот виртуоз Ферчо. Инаку како што напоменавме, Ферчо живее и работи во Белград, каде соработува со најголемите ѕвезди, а полека, но сигурно тој станува еден од најбараните дувачи на овие простори.

Почина музичарот Илми Мустафов, синот на легендарниот Ферус Мустафов

Ристе Здравков — Wed, 16 Aug 2023 11:55:14 +0000

По само три месеци од смртта на кралот на ромската музика, Ферус Мустафов, синоќа почина и неговиот син, Илми Мустафов. Познатиот саксафонист и кларинетист Илми Мустафов беше и член на групата „Огнени Момчиња“. Во неговата скоро три децениска кариера, има снимено многу ора и чочеци, дел со својата група, а дел со неговиот познат татко Ферус Мустафов. Неговиот син Ферчо соопшти дека Илми ќе биде погребан утре од 13 часот на гробиштата во Камник. Преку социјалните медиуми од него се простуваат многу музичари и негови блиски луѓе.

ЗА ЕДНА НОЌ ЗАРАБОТИЛ БАКШИШ КОЛКУ ЗА ДВА СТАНА ВО СКОПЈЕ – никогаш нема да претпоставите и со кој инструмент прво Ферус започнал да свири во младоста

Дарко Андоновски — Mon, 22 May 2023 16:09:45 +0000

Веста за заминувањето на кралот на саксофонот Ферус Мустафов длабоко ја потресе Македонија и македонската естрада. Нејзините автори, музичари и изведувачи, особено оние од народната музика, а такви речиси и да нема со кои Ферус не соработуваше, како и со дел од забавната, поп и арен би изведувачите кај нас. Музичар парекселанс, виртоуз на саксофонот, кларинетот, но и на уште дузина други музички инструмиенти, кои Ферус со врвна умешност ги свиреше, на број петнаесетина. Малкумина знаат дека на Ферус прв инструмент не му е саксофонот, туку виолината. Роден е во најмузичкиот град во Македонија, Штип, каде учел музичко училиште, чиј татко Илми Јашаров е првиот музичар во Македонија кој саксофонот го внесува во народната музика. Како што самиот ќе рече во една пригода, штипскиот чочек е дело на неговиот татко, а тој од него ќе го засака саксофонот и ќе продолжи по неговите стапки станувајќи виртуоз на овој дувачки инструмент. Музички мајстор каков што со децении ќе нема не само во Македонија, туку и во регионот. Придавката или поточно епитетот „кралот на саксот“ ја добил кога во Лондон го снимил првото ЦД со чочеци. Прекарот ќе му го дадат колегите Англичани со кои тогаш соработувал, кои први ќе го наречат Ферус – кралот. И нема да згрешат, устоличувајќи го за навека, до последниот ден на неговото музичко дејание. Музиката и музичкото умеење ќе го носат насекаде, од најблиското соседство па се во многу земји низ Европа и светот, каде ќе биде ценет, почитуван, познат и признат, а заработувачката од музиката на моменти ќе достигнува дури и вртоглави бројки. Така, во една прилика тој за медиумите ќе открие дека најголемиот бакшиш што некогаш го заработил во животот бил на еден настан во Франција, каде настапувала целата српска естрада, кога заработил 180.000 евра за само една вечер! Ферус Мустафов не е само врвен музичар туку тој им бил идол и учител на некои од денес многу познатите музичари. За негов наследник се смета неговиот внук Ферчо Мустафов, но ферус им бил учител и на имиња како што е Џамбо Агушев на пример, кој е токму на некој начин негово откритие, а денес важи за „крал на трубата“. Нему токму Ферус му го дал прекарот „Џамбо“, а чие вистинско име всушност е Исин. „Беше кај нас на гости, дека фамилијарно многу си живееме и јас почнав да свирам нешто, а Ферус вели: Аааај, овој како свири! И ме зема кај него и ми рече: Ај ќе ти направам јас еден албум… Тогаш имав само 11 години. Потоа Ферус ми вели: Ти си брз како Џамбо џет авион, ќе ти го ставиме прекарот Џамбо“ – откри Агушев во едно свое ТВ гостување, во кое Џамбо исто така нагласи дека Ферус многу му помогнал, го учел да свири, но знаел да биде и строг. „Во студиото имаше соба и ме остави да се одморам, а јас заспав. Откако ме разбуди ми рече ајде свири, но јас не можев и тогаш му удри една шлаканица и јас почнав веднаш да свирам. Од страв почнав се да паметам. „А, тебе ти треба ќотек, да памтиш ли?“ – ми рече Ферус, ама јас не му се налутив – откри Џамбо. Речиси никој или само малкумина паметат како изгледал Ферус во младоста, на почетокот од кариерата. Фотографиите од обвивките на плочите и касетите сведочат за тоа време. Со црна, настрана исчешлана коса, густи зулуфи и без брада. Многумина во вакво издание не би ги ни препознале, да не знаете дека се работи за кралот на саксофонот. Подоцна Ферус ќе пушти брада која со годините ќе стане неговиот заштитен знак. Што се однесува до неговиот имиџ до самиот крај на животот, тој речиси остана непроменет. Таков и замина во царството небеско, во вечноста која „кралот“ Ферус Мустафов оддамна ја заслужи.

ПРЕД ДВА МЕСЕЦИ ЗА ПОСЛЕДЕН ПАТ ДАДЕ ИНТЕРВЈУ – во него збореше за оваа личност која му недостасува, па започна да рони солзи без престан (ВИДЕО)

Дарко Андоновски — Mon, 22 May 2023 15:21:42 +0000

Познатиот виртуоз Ферус Мустафов денеска почина по кратко боледување. Веста за неговата смрт ги преплави социјалните мрежи, каде луѓето изразуваат жалење за прераното заминување. Инаку на Ферус последното јавно појавување му беше пред околу два месеци, кога гостуваше во подкастот на познатиот јутјубер Стефан Лазаров. Таму Ферус зборуваше за целата своја кариера, а најтажен момент беше кога се расплака на прашањето од Лазаров за ненадејната смрт на познатиот хармоникаш, инаку голем пријател на Ферус, Милан Завков. Погледнете го тој момент:

Панчо за Ферус: Беше толку голем, можевме сите да му ги чистиме кондурите како на сликава! (ФОТО)

Дарко Андоновски — Mon, 22 May 2023 13:28:20 +0000

Од големиот Ферус Мустафов на свој начин се прости и познатиот рапер Панчо од дуото ДНК. Панчо и Ферус беа големи пријатели, се почитуваа каде и да се сретнеа, а зборовите кои ги напиша раперот говорат за тоа колку тој го почитувал виртуозот на саксафон… „Денес не напушти Ферус, кралот на саксофонот. Беше толку ГОЛЕМ што буквално можевме сите да му ги чистиме кондурите баш вака како на сликава. Еден од најголемите “мајстори” на саксофонот ако не и најголем. Почитиван и сакан од сите колеги, човек со голема смисла за хумор и огромно срце кој живееше за музиката и беше музика. Преку своите звуци убеден сум дека не постои човек кој го нема станато од столче со рацете дигнати нагоре. Ќе ми недостигаат оние кратки патувања, шали и дружби. Вечна ти слава брате Ферусе. Почивај во мир и свири им горе, весели ги како ти само најубаво знаеш и умееш. 💔

View this post on Instagram

A post shared by Pancho | DNK (@djshortypofficial)

Ферус Мустафов се бори за живот

Ивана Ефремовски — Wed, 03 May 2023 05:36:05 +0000

Откако по медиумите се рашири вест дека наводно починал популарниот музичар Ферус Мустафов, се огласи неговото семјество. Внукот на Мустафов, Ферчо Мустафов, демантира дека познатиот музичар починал во болница, но потврди дека неговиот дедо е во болница и се бори за живот. „Мојот дедо Ферус Мустафов не е починат, но вистина е дека е во болница и се бори за својот живот“, напиша неговиот внук.

Смеење до солзи: Скриената камера за Ферус Мустафов повторно е хит на социјалните мрежи (ВИДЕО)

Саше Стојановски — Sun, 24 Dec 2017 22:41:59 +0000

Оваа скриена камера е постара од 10 години, но деновиве повторно е актуелна на социјалните мрежи. Главната улога во скриената камера ја има виртуозот на саксофон и кралот на ромската музика Ферус Мустафов. Ферус има закажано снимање на Сител со својот оркестар, меѓутоа мора итно да оди до другото студио поради шминкање и стајлинг. Во меѓувреме, колата во која се вози Ферус, удира пешак, а возачот бега од местото на инцидентот, по што Ферус си има работа со полицијата... Што понатаму се случува погледнете на видеото...